Mga Pagbayaꞌen 6 - Tagbanwa

¹ Temed nangindiꞌ siꞌ it AMPUꞌANG DIYUS i bangsa ngayti nga Israel. Aypaꞌ ka ipiyasakep ya siꞌ sira it mga Madianita seledan it pitung taꞌun.

² Talagang egay magkabwat it mga Israelita kat mga Madianita ngayti nga magꞌapis it kanira. Ta it atkayti, mamagpatataguꞌ na sira. May duꞌun it mga kubkub nga duꞌut kabubukidan. Iyan beken, duꞌun it in ari makuriꞌ sira maparagan.

³ Kada yan nakalwak na i mga Israelita ngayti it mga lulwaken nira, sulungun sira siꞌ it mga Madianita baw mga Amalecita baw beken paꞌ nga mga taw nga taga duꞌun it lebatan nga ayun.

⁴ Magmalen-malen nayan sira duꞌun ka sariyen nira nat panranggaꞌ i kumpur mga luwak. Paglekep-lekepen nira i kumpur kaꞌuꞌumaan it mga Israelita ngayti, pasked sirang duꞌun it Gaza. Talagang egay ipagpaꞌped nira nga kumpur magkaparagan nirang kaꞌgenan it mga Israelita ngayti, luwak, pati mga ayep.

⁵ Talagang pugdak-pugdak i abut it mga Madianita ngayti. Uyut niray mga magkapuru-purun nga bala-balay nira. Tundan nira gasiꞌ i kumpur mga ayep nira. Talagang ega mabilang i kadakel it taw baw mga pagsakayan nirang ramu-ramu nga kamelyo. Dakulaꞌ talagay panranggaꞌ nirat banwa ngayti.

⁶ Talagang egay magkabwat it mga Israelita ngayti. Mamagkagipit na nga banar. Aypaꞌ nagpasanguꞌ-sanguꞌ na sira duꞌun it AMPUꞌANG DIYUS.

⁷ Pagkagneg it AMPUꞌANG DIYUS it pangabang ngaytit mga Israelita sabap it pakuriꞌ ngaytit kanira it mga Madianita,

⁸ may piyaprupitaꞌ ya siꞌ nga simnugid it ampang ya nga magꞌaat, “Ituy ampang it AMPUꞌANG DIYUS it imyu, bangsa nga Israel. Ipiyaliꞌwan ku kamu duꞌun it pagkaꞌuripen mi nga duꞌun it Egipto.

⁹ Eeꞌ baꞌ, ipiyagribri ku kamu kat pakuriꞌ it mga taga Egipto baw kat muꞌsang mga kalaban mi nga beken. Inimugaw ku sira bawnga ipiyagbegay ku nat imyu i babanwaan nira.

¹⁰ Inaat ku ngayan it imyu, ‘Aku i AMPUꞌANG DIYUS mi. Ayaw kamut kasalya sumamba it pagbete-beteꞌen nga mga diyus it mga Amorreo nga datiyan kat banwa ngaytu nga pataꞌidan ku it imyu.’ Temed daꞌkamu nagpagneg it aken.”

¹¹ Ta kat iting timpu, duꞌun nat Ofra nga sakep ni Joas nga kat kaꞌanak-anakan ni Abiezer, limnampud i Anghil it AMPUꞌANG DIYUS. Miyadung kanya duꞌun it siꞌrung it esang kayu nga encina. Nadnganan, maggiꞌek it tirigu i anak ni Joas ngayti nga si Gedeon duꞌun it kikilangan it ubas. Ega na duꞌun it abansada, in daꞌga duꞌun nat tataguꞌan ngayti i pagpanggiꞌkan ya ka magpaꞌelak nat mga Madianita ngayti.

¹² Pagpakikita it Anghil ngaytit AMPUꞌANG DIYUS duꞌun it ki Gedeon ngayti, miyampang kanya nga magꞌaat, “Pagtatarimaen ka it AMPUꞌANG DIYUS, ikaw nga ega babasta-bastaen nga mandadaꞌeg.”

¹³ Katubag si Gedeon, maat ya, “Ta, in pagtatarimaen kami nagang matuud it AMPUꞌANG DIYUS, unuka atkaytu na i kabetangan namen ngaytu? Unuka egay pagbuwaten ya nga kalililuꞌang bagay kayti, nga subung it iyan ipiyaliꞌwan yay mga kagiyaringanan namen duꞌun it Egipto, nga mga itu ngaytu natuturan nagaytut amen it mga kamagugurangan namen? Talagang inindiꞌan kami naytu it AMPUꞌANG DIYUS. In daꞌga inindiꞌan ya na kami, unuka masagkaꞌan ya na kami nga pagpakuriꞌan it mga Madianita ngaytu?”

¹⁴ Inaat kanya it AMPUꞌANG DIYUS, “Manliꞌwan ka na kayti ka gamiten muy pagkalalaki mu kat ikaribri it mga Israelita. Ka akuytuy magtaꞌeg it imu.”

¹⁵ Maat siꞌ ni Gedeon ngayti, “Agalen, magꞌuꞌunu iribri ku i mga Israelita, it amen nang kaꞌanak-anakan i piyakadekeyeꞌ kat kuyunang mga tungtung-inapuꞌ ni Manases, baw aku na ngaytu i piyakatimawaꞌ kat seled it pamalay-balay namen?”

¹⁶ Mampang siꞌ i AMPUꞌANG DIYUS, nga magꞌaat, “Makaparibri mu bayan i Israel ka tabangen ku ikaw. Talagang daꞌgen mu yan i mga Madianita ngayan. Subung na lamang it pandaꞌeg mut sang kataawan.”

¹⁷ Katubag siꞌ si Gedeon ngayti, maat ya siꞌ, “In talagang pagsagyaan mu aku, paltegan mu aku it esang tandaꞌanan nga ikaw i magtaꞌeg it aken.

¹⁸ In mapakay ayaw ka daꞌat liꞌid ka tarakanan ku ikaw it pangaꞌen nga panggalang kut imu.” “Eeꞌ, melat akut paꞌaaten mu ngayan,” maat it AMPUꞌANG DIYUS.

¹⁹ Napanaw na si Gedeon, nagꞌimatay kanya it uꞌuybun it kambing bawnga inilutuꞌ ya. Sang iꞌilutuꞌan gasiꞌ i arina nga inilutuꞌ ya nga egay ipagpaꞌalsa. Pagkalutuꞌ, ibintang ya na duꞌut baꞌay, baw sabaw, ibintang ya duꞌun it sang kakurunan. Ipiyaꞌadap ya na duꞌun it Anghil ngaytit AMPUꞌANG DIYUS nga duꞌun it siꞌrung it encina.

²⁰ Inaat kanya it Anghil ngaytit AMPUꞌANG DIYUS, “Isagpaw mu asat dakulaꞌ ngayang batu i karniꞌ baw tinapay ngayan bawnga lamaꞌan mu it sabaw ngayan.” Piyamayaꞌ ni Gedeon i inaat ngayti.

²¹ Bawnga binwat it Anghil ngaytit AMPUꞌANG DIYUS, piyadiꞌkitan ya i pangaꞌen ngayti it subuk sungkud nga pagseskelen ya. Ta, miyapuy nga lagi baw naꞌanteng nay pangaꞌen ngayti. Nagsipat manay Anghil ngaytit AMPUꞌANG DIYUS.

²² Sikayti natantuwan ni Gedeon nga Anghil nga matuud it AMPUꞌANG DIYUS i kasugi-sugid ya ngayti. Ta sabap kayti, piyangingiraꞌbutan kanyat iꞌlam. Magyegyeg na kanya nga miyampang nga maat ya, “Ay kayni AMPUꞌANG DIYUS ku, unu nayni i baraꞌan ku kayni it nabilug ku na ngaynit kalteg i Anghil it AMPUꞌANG DIYUS!”

²³ Temed inaat kanya it AMPUꞌANG DIYUS, “Ayaw kat iꞌlam. Daꞌka yan maꞌunu.”

²⁴ Aypaꞌ binwat ni Gedeon, nagbuwat kanya duꞌun kayti it papangantengan it ipagsamba duꞌun it AMPUꞌANG DIYUS. Piyangaranan yay papangantengan ngayti it AMPUꞌANG DIYUS i Kaꞌimbengan. Duꞌun paꞌ it seked kayti i binwat ya ngayti, nga duꞌun it Ofra nga sakep it kaꞌanak-anakan ni Abiezer.

²⁵ Pagdelem inaat siꞌ it AMPUꞌANG DIYUS si Gedeon, nga magꞌaat, “Pisiꞌen mu i tudu it amaꞌ mu, iyan nga magpipitu na ngayang taꞌun. Baw ranggaꞌen mu i papangantengan ya it ipagsamba it ki Baal, baw pukanen mu i piyakaꞌarigi nga ladawan ni Astarot asat umid ya.

²⁶ Bawnga muwat ka it papangantengan it ipagsamba it aken nga AMPUꞌANG DIYUS mu asat sagpaw it batu ngayan. Gayen-gayenen mu nga buwat. In maꞌman mu na, peꞌtek-peꞌteken mu na i piyakaꞌarigi ngayan nga ladawan ni Astarot ka yanay gamiten mu nga iduꞌput mu it antengen mu ngayan nga tudu nga isamba mu it aken.”

²⁷ Pagkagneg ni Gedeon, piyabayaꞌ ya i sang puluꞌ nga kataawan nga mga manigsirbi ya. Binwat nira i kumpur ipiyagꞌaat ngaytit kanya. Delemen i pagbuwat nira kayti ka magꞌiꞌlam si Gedeon it mga giyaringan ya baw mga kaꞌibaan nira duꞌut lansangan nira ngayti.

²⁸ Ta, sulagan it kadakel ngaytit aldaw na, ranggaꞌ na i papangantengan it ipagsamba it ki Baal. Piyukan paꞌ i piyakaꞌarigi nga ladawan ni Astarot nga duꞌun it umid ya. Yanayti magsusundur na it pagꞌantengen ngayting tudu nga duꞌut baꞌgu ngayting papangantengan nga yamanayti duꞌun.

²⁹ Yay nabwat niray ingku-ingkutun. “Siyu bayan,” maat nira, “i nagꞌula-ula kayan?” Piyaruri nirat magayen, maꞌanuꞌan nira si Gedeon nga anak ni Joas i minwat kayti.

³⁰ Egay beken, inaduꞌun nira si Joas. Pagꞌabut nira maat nira, “Ipaliꞌwan mu sinit amen i anak mu nga si Gedeon ka imatayen namen, ka riyanggaꞌ ya i papagsambaan it ki Baal baw piyukan ya pay piyakaꞌarigi nga ladawan ni Astarot nga kaꞌumid ya.”

³¹ Temed katubag si Joas ngayti, “Unuytu, ipamles mi na si Baal? Unuka kamu nay magpanindeg it ki Baal? Yay matuud, siyu-siyuy mamles sabap it ki Baal, kaꞌilangan nga imatayen, ega paꞌbutat aldaw. Ka in talagang diyus kanya, kaya ya nagang panindegan i sadili ya, tutal kanya nga papangantengan i riyanggaꞌ ngayan.”

³² Aypaꞌ garing sikayti, si Jerobaal nay panaꞌwag nirat ki Gedeon ngayti sabap it inaat ngayti ni Joas nga, “Pataꞌnan mi nga belsen kanya ni Baal, tutal papangantengan nat ipagsamba it ki Baal i riyanggaꞌ ya ngayan.”

³³ Ta, miyabut siꞌ nga iyan mga Madianita ngayti, mga Amalecita baw beken paꞌ ngayting mga taw nga mamagbabanwa duꞌut lebatan nga ayun, nagluyu-luyugan na nga nandipag it danum it Jordan bawnga nagkampu sira duꞌun it daranasan it Jezreel.

³⁴ Ta it atkayti siꞌ, piyasaruman na si Gedeon it Espiritu Santo it AMPUꞌANG DIYUS. Egay beken, inyepan ni Gedeon i taburi nga paꞌalistu ya it muꞌsang mga lalaki kat kaꞌanak-anakan ni Abiezer.

³⁵ May piyapanaw ya gasiꞌ nga lekpen nira i mga kuyunang mga tungtung-inapuꞌ ni Manases, ni Aser, ni Zabulon baw ki Neftali. Ega dimnaꞌga i inabut ngaytit patugun ni Gedeon. Talagang urunyun sira nga naꞌaduꞌun it ki Gedeon ngayti.

³⁶ Miyampang si Gedeon nga pakisugid ya it Ampuꞌang Diyus. Maat ya, “In aku ngayning matuud, nga subuk ipiyagꞌaat mu, i gamiten mu nga manribri it bangsa namen ngayning Israel, may pagꞌangutun kut imu.

³⁷ Kayti mamlad aku it inimukluꞌ ngayning bulbul it tupa sinit papanggiꞌkan ngaynit tirigu. In mateꞌe-teꞌeng gang itu lamang i maꞌemeg it namug, iyan palibut ya matapugpug it katꞌug, talagang duꞌun ku maꞌrutan nga aku talaga i gamiten mu nga rimibri it bangsa namen ngayni.”

³⁸ Ta, binwat nga matuud ni Gedeon i atkayti. Pagꞌeyag, biyaꞌnaw yay ipiyagꞌamlad ya ngayti nga bulbul duꞌun it papanggiꞌkan. Pagpesel ya, napnuꞌ i esay karung.

³⁹ Maat siꞌ ni Gedeon duꞌun it Ampuꞌang Diyus, “Beteꞌ daꞌku naga isgan mu it kiyaꞌpusan ngaytung angutun ku. Iyan siꞌ i ireg ku, tuꞌug nga tuꞌug i bulbul ngayni, takaꞌ lugtaꞌ sinit linibut ya, emeg it namug.”

⁴⁰ Pagdelem, inatkayti nga matuud it Ampuꞌang Diyus. Tuꞌug i bulbul ngayti takaꞌ emeg it namug i duꞌut linibut ya nga lugtaꞌ.