Mga Pagbayaꞌen 4 - Tagbanwa

¹ Pagpatay ni Aod nga esa nga riyumraan it AMPUꞌANG DIYUS nga pagbayaꞌen, nagpaꞌuliꞌ siꞌ kat pangaꞌgenang karaꞌe-raꞌetan kat panleteg it AMPUꞌANG DIYUS i mga Israelita ngayti.

² Aypaꞌ ka piyataꞌnan lamang sira it AMPUꞌANG DIYUS nga daꞌgen it adiꞌ nga si Jabin nga adiꞌ it Hazor, esang siyudad it mga Cananeo. Si Sisara nga taga Haroset i piyakapagbayaꞌen it mga sundaluꞌ ya.

³ Si Jabin ngayti, siyam nga gatus i gamit ya nga sarakayan it magpakibunuꞌ nga basiꞌ i binwat. Seledat duwang puluꞌ nga taꞌun talagang paggipiten yay mga Israelita ngayti. Aypaꞌ ka nangabang siꞌ sira duꞌun it AMPUꞌANG DIYUS.

⁴ Kat iting timpu, iyan siꞌ i pagbayaꞌen it bangsa ngayti nga Israel, esang babay nga prupitaꞌ nga pagpangaranan it ki Debora, nga asawa ni Lapidot.

⁵ Naꞌugaliꞌ ya na nga pirmi nga duꞌun magꞌaꞌdung it siꞌrung it kayu nga pagpangaranan it Kayu ni Debora nga duꞌun it mamungsuꞌun ngayti nga duꞌut Efraim, nga duꞌun it piyagtengaꞌan it Rama baw Betel. Sikayti kanya pagꞌaduꞌunun it mga taw nga may ipagpaꞌayus nga piyagbarisukaran.

⁶ May esang aldaw nga ipiyatawag ya si Barac nga anak ni Abinoam nga taga Cades-Neftali. Pagꞌabut ya, maat ni Debora ngayti, “Pagsekaten ka it AMPUꞌANG DIYUS nga miliꞌ ka it sang pulung ribu nga mga sundaluꞌ kat mga kuyunang mga tungtung-inapuꞌ ni Neftali baw ni Zabulon, bawnga pabayaꞌen mu sira duꞌun it Bukid it Tabor.

⁷ Pakibunuꞌan mi duꞌun it kadanuman it Cison i piyakapagbayaꞌen it sundaluꞌ ni Jabin nga si Sisara baw mga taawan ya. Subuk dalundunun yan siray paꞌasan baw siguradu yan nga ipadaꞌeg sirat AMPUꞌANG DIYUS it imyu.”

⁸ Katubag si Barac ngayti, maat ya, “Mapanaw aku ga bayan in magbabayaꞌ ka naga. Temed in ega, ta, daꞌku bayan paꞌaduꞌun.”

⁹ “Ta in atkayan,” maat ni Debora ngayti, “mayaꞌ aku naga. Temed ega nayan i tanggapen mu kat mga taw nga dayaw it imu sabap ega nayan ikaw i gamiten it AMPUꞌANG DIYUS nga kaꞌimatay it ki Sisara. Esa nayang babay i kaꞌimatay it kanya.” Miyayaꞌ nagang matuud si Debora it ki Barac ngayti.

¹⁰ Nagpapanaw si Barac it pamaꞌrut-paꞌrut kat mga kuyunang mga tungtung-inapuꞌ ni Neftali baw ni Zabulon. Nagsigꞌabut duꞌun it kanya nga duꞌun it Cades i sang puluꞌ ngayting ribu. Namagpanaw na sira pati si Debora ngayti.

¹² May nakasugid duꞌun it ki Sisara nga, si Barac, duꞌun it Bukid it Tabor.

¹³ Pagkaꞌrut ni Sisara kayti, tiningped ya i siyam nga gatus nga sarakayan it magpakibunuꞌ baw muꞌsang mga sundaluꞌ ya. Gimnaring sira duꞌun it Haroset, naꞌaduꞌun na sira it kadanuman ngaytit Cison.

¹⁴ Bawnga maat ni Debora it ki Barac, “Sigi! Darugpaꞌen mu na sira ka itung aldaw ipiyasiguru it AMPUꞌANG DIYUS nga daꞌgen mu si Sisara. Talagang AMPUꞌANG DIYUS i manguꞌna it imu.” Aypaꞌ egay beken, nanadsad na si Barac baw sang puluꞌ ngayting ribu nga mga sundaluꞌ ya duꞌun it Bukid it Tabor ngayti.

¹⁵ Iyan diyarugpaꞌ na na Barac, piyadaraꞌdaꞌan it AMPUꞌANG DIYUS na Sisara ngayti. Simnari nat palagyu i mga sundaluꞌ ya. Pagkamuya ni Sisara, nanaptap na kanya duꞌun it pagsasakayan ya ka miyalagyu na gasiꞌ kanya.

¹⁶ Tiyaraꞌusig na Barac i mga ipiyapalagyu nga sarakayan it magpakibunuꞌ seked duꞌun it Haroset. Napatay nira i muꞌsang mga sundaluꞌ ni Sisara ngayti. Ega nay naꞌped nga maski sang kataawan.