Mga Pagbayaꞌen 2 - Tagbanwa

In unuka daꞌsira na tabangen it Ampuꞌang Diyus

¹ Esang aldaw, iyan Anghil it AMPUꞌANG DIYUS, garing duꞌun it Gilgal naꞌaduꞌun kanyat Boquim, ka may aaten ya duꞌun it mga Israelita. Maat ya, “Ipiyaliꞌwan ku kamu duꞌun it Egipto, baw tiyaban ku kamu situt banwa ngaytu nga isiyanggup ku duꞌun it mga kagiyaringanan mi. Baw maat ku nga talagang ega ranggaꞌen ku i ipiyakiꞌupakat ku ngaytit imyu seked it kaꞌnu-kaꞌnu.

² Baw ipiyagsasar ku ngaytit imyu nga kuydaw kamu it pakiꞌupakat it mga taga Canaan ngaytu. Daꞌga baꞌ ipiyagꞌurdin ku nga panranggaꞌen mi i mga papangantengan nga pagꞌantengan nirat mga ipagsamba duꞌut mga pagbete-beteꞌen nga diyus nira? Temed ta, ega siyunud mi i inaat ku ngayti. Unuka atkayan nga daꞌku piyamayaꞌ mi?

³ Aypaꞌ kayti, subung nagat inaat ku, ega na tabangen ku kamu it mimugaw it mga taga Canaan ngaytu. Garing kayti, kabilangan nira, mga dugi nga magtetdek it palinimbang nga kilid mi. Baw sigapul naga it imyu i mga pagbete-beteꞌen nga diyus nira.”

⁴ Pagkagneg it mga Israelita it inaat ngaytit Anghil it AMPUꞌANG DIYUS, talagang namagkasgaw sirang muꞌsa.

⁵ Aypaꞌ ka piyangaranan niray iting rugar it Boquim. Bawnga nagꞌanteng sira it mga salisi nga ipagꞌangut it kapasinsiyaan duꞌun it AMPUꞌANG DIYUS.

Inindiꞌan it mga Israelita i Ampuꞌang Diyus, aypaꞌ ipiyadaꞌeg ya sira it mga kalaban nira

⁷ Ta, mintras egen si Josue baw mga pagbayaꞌen nga nakamuya nga banar it mga mabantug nga binwat it AMPUꞌANG DIYUS kat ikagayen it bangsa nira nga Israel, pasigi nga nagsirbi i mga Israelita it AMPUꞌANG DIYUS.

¹⁰ Temed pagpatay ni Josue baw mga kaꞌebay-ebayan ya, yamanay naꞌped, mga baꞌgu manang taw nga ega nay pagkilala nirat AMPUꞌANG DIYUS baw egay uru-urut nira it mga kagayenan nga binwat ya duꞌun it bangsa nira ngayti nga Israel.

¹¹ Unupat mga Israelita ngayti, minwat nat karaꞌe-raꞌetan kat panleteg it AMPUꞌANG DIYUS, ka simnirbi na sirat ki Baal.

¹² Inindiꞌan na niray AMPUꞌANG DIYUS it kagiyaringanan nira nga kanya i nagpaliꞌwan it kanira duꞌun it Egipto. Simnirbi baw simnamba na sirat mga pagbete-beteꞌen nga diyus it mga taw kat linibut nirang mga rugar. Talagang inangut nira i iseg it AMPUꞌANG DIYUS.

¹³ Ka yanayti, inindiꞌan na nira i AMPUꞌANG DIYUS ka yanay sinirbiyan nira, si Baal baw si Astarot.

¹⁴ Aypaꞌ kat kadakulat iseg it AMPUꞌANG DIYUS it bangsa ngayti nga Israel, piyataꞌnan ya lamang sira nga pagdaꞌgen it mga kalaban nira nga magꞌaꞌabut-aꞌabut baw pagrangpasan sirat mga kusas nira. Talagang egay magkabwat it mga Israelita.

¹⁵ Kamatuudan, kada yan pakibunuꞌ sira, ipagpadaꞌeg sira it AMPUꞌANG DIYUS, subung nat isiyumpa yat kanira. Ta unu paꞌ it gipit na sirang pirmi.

¹⁶ Temed ega naga binibas it AMPUꞌANG DIYUS i bangsa ngayti nga Israel. Kamatuudan, may riyumraan ya nga mga pagbayaꞌen, nga sira ngayti i magpanindeg it mga Israelita ngayti.

¹⁷ Temed ta, ega naga pagpagnegan nira i mga pagbayaꞌen nira ngayti, ka inindiꞌan nira naga i AMPUꞌANG DIYUS baw ega na kat ulu nira i mga urdin ya nga pagsunudun it mga kagiyaringanan nira. Ka yanay riyaga nirang pagsambaen baw pagsirbiyan, pagbete-beteꞌen na nga mga diyus.

¹⁸ Kada pagbayaꞌen nga pagrumraan it AMPUꞌANG DIYUS, pagtabangen ya isaꞌun daꞌna malipi-lipi i mga Israelita it mga kalaban nira mintras egen i pagbayaꞌen ngayti. Ka pagsanguꞌan ya nagay mga Israelita ngayti sabap it panganin-anin nira kat kakuriꞌan nga paglabayen nira.

¹⁹ Temed basta yan natay i pagbayaꞌen nira ngayti, buwaten it mga Israelita, paꞌuliꞌan nira siꞌ i pagsambaen nira ngayti nga pagbete-beteꞌen nga mga diyus. Subraꞌ paꞌ it karaꞌe-raꞌetan it mga kagiyaringanan nira i kanira nga mga pagbuwaten. Talagang namagpategas sira nga ega indiꞌan nira i karaꞌe-raꞌetan nira ngayti.

²⁰ Ta it atkayti, subrang miniseg i AMPUꞌANG DIYUS it kanira. Maat ya, “Talagang riyanggaꞌ nat mga Israelita i pakiꞌupakat kut mga kagiyaringanan nira, baw pirming pagpasngelan nira aku.

²¹ Aypaꞌ ega na palꞌiden ku i mga naꞌped ngaytung mga Cananeo kat banwa ngaytung ipiyapusakaꞌ ni Josue it kanira.

²² Ka sira ngaytu, gamiten ku nga sukda-sukdan it in unu, sumunud nagay mga Israelita ngaytu it mga urdin ku nga subung it mga kagiyaringanan nira.”

²³ Ka mga taw ngayting dati nga taga duꞌun, may naꞌped naga kat pabetang-betang it AMPUꞌANG DIYUS. Ega naga biniglaꞌ-biglaꞌ yat mimugaw nga ipadaꞌeg ya nga muꞌsa it ki Josue.