Mga Pagbayaꞌen 16 - Tagbanwa

Si Samson baw si Delila

¹ Kaꞌsa naꞌaduꞌun si Samson it Gaza. May nakilala ya duꞌun nga esang babay nga ipagpanulus yay bilug ya. Duꞌun na kayti i inigaꞌan ya.

² Naringid-ringidan it mga Filisteo nga duꞌun kanya, aypaꞌ binwat nira, liniputan niray iting balay, baw may tumandaꞌ it maglinag duꞌun it puwirtaꞌan it siyudad ngayti. Pinikir nira nga aldaw manay iꞌimatay nirat ki Samson.

³ Temed iyan lubuk nat delem, nagbangun na si Samson bawnga naꞌaduꞌun it puwirtaꞌan ngayti. Pagꞌabut ya, pagrangkas yat talaꞌep ngayti. Uyut-uyut nagay arigi baw papasꞌan it piyasaꞌan ya. Yapaꞌ ituduꞌ ya ka duꞌun it sagpaw it bulud nga ayun duꞌun it Hebron.

⁴ Ta, may duꞌun it daranasan it Sorec nga esang babay nga pagpangaranan it ki Delila. Nalilengan it nakem ni Samson i iting babay.

⁵ Ta it atkayti, inaduꞌun i babay ngayti it limang kataawan nga siray mga piyakamataꞌas nga pagbayaꞌen it mga Filisteo. Maat nira, “Buwatan mut rimidyuꞌ nga maꞌrutan i ipagkeseg ya ngayan isaꞌun madakep baw mapamilayan namen kanya. Basta mabwat muytu, begayan ka it kada esat amen it pirak nga tagasang puluꞌ may tulu nga kilu.”

⁶ Aypaꞌ pagꞌaduꞌun siꞌ ni Samson it kanya, iningkut ya na. Maat ya, “Ari bayan i garing it ipagkeseg mu ngayan? In beteꞌ saka-sakaliꞌ nga may dumakep it imu, unuy kaꞌilangan nga buwaten isaꞌun daꞌka na makalaban?”

⁷ Katubag si Samson, maat ya, “Basta bayukun aku lamang it pitung naay i baꞌgung ipagbanting it panaꞌ, daꞌku na makapilwas.”

⁸ Isiyugid ni Delila duꞌun it mga pagbayaꞌen ngayti it mga Filisteo. Aypaꞌ binggayan nira kanya it pitung naay i baꞌgung ipagbanting ngayti nga ibayuk yat ki Samson.

⁹ Iyan beken nga mga Filisteo duꞌut sang kaseledan mamagꞌeꞌlat na. Pagkabayuk ni Delila ngayti it ki Samson, gimnaꞌuy na kanya nga magꞌaat, “Samson, may magꞌaꞌabut nga mga Filisteo!” Biyugtuꞌ-bugtuꞌ ni Samson i magbabayuk ngaytit kanya nga ipagbanting it subung lamang it marapta-rapta na nga lubid. Ta, ega naga naꞌrutan nira in unuy ipagkeseg ni Samson ngayti.

¹⁰ Ta it atkayti, maat ni Delila ngayti, “Palan desang pagꞌintirmisen mu aku. Magayen ku ega desang ambutan mu aku. Isugid muy matuud in unu talagay ibayuk it imu nga daꞌka na makapilwas.”

¹¹ Aypaꞌ maat siꞌ ni Samson ngayti, “Basta bayukun aku it lubid nga ega paꞌ nagamit, daꞌku nayan makapilwas.”

¹² Egay beken, minsiꞌ si Delila ngayti it baꞌgung lubid bawnga biyayuk ya si Samson, it duꞌun nagat sang kaseledan ngayti i mga Filisteo. Pagkabayuk ya, gimnaꞌuy siꞌ kanya nga magꞌaat, “Samson, may magꞌaꞌabut nga mga Filisteo!” Biyugtuꞌ-bugtuꞌ siꞌ ni Samson i magbabayuk ngaytit kanya it subung lamang it miyugtuꞌ it bena-benang.

¹³ Aypaꞌ maat siꞌ ni Delila ngayti, “Talagang pagꞌambutan mu lamang palan aku ka seked kayti ega paꞌ ipagsugid muy matuud nga in magꞌuꞌunuy pamayuk it imu nga daꞌka na talaga makapilwas.” Maat siꞌ ni Samson ngayti, “Basta irara muy mga buꞌuk ku ngaytu asat pagraraan mu ngayan bawnga gipiten mut maꞌinggit, siguradung daꞌku nayan makapilwas.”

¹⁴ Egay beken piyaꞌigaꞌ siꞌ ni Delila si Samson ngayti bawnga binwat yay paꞌaaten ngayti. Baw gimnaꞌuy siꞌ kanya nga magꞌaat, “Samson, may magꞌaꞌabut nga mga Filisteo!” Dali-daliꞌ kanyang nasulag baw inilwas ya nga riyantuꞌ i buꞌuk ya duꞌun it riyaraan ngayti.

¹⁵ Egay beken maat siꞌ ni Delila ngayti, “Yaga bay aken it maat mu pagmaꞌalen mu akung banar. Iyan palan egay kamatuudan ka ungaytu, katlu mu na aku ambutan. Unuka ega ipagkasugid mut aken in unu talagay pagpanggaringan it ipagkeseg mu ngayan?”

¹⁶ Aldaw-aldaw iti nang iti pagꞌingeꞌreten ya seked naskedan na si Samson ngayti.

¹⁷ Aypaꞌ ka isiyugid ya nay kamatuudan. Maat ya, “Yay matuud, garing it sapagwaꞌwaꞌ ku inambuꞌ aku nang lagi it Ampuꞌang Diyus. Aypaꞌ maski kaꞌsa, ega nadiꞌkitan it pamumuꞌlug i buꞌuk ku ngaytu. Ka basta napeꞌtekan i buꞌuk ku ngaytu, lumubay aku nayan nga subung nagat beken ngaytung mga taw.”

¹⁸ Natantuwan ni Delila nga magsugid nat kamatuudan si Samson ngayti, aypaꞌ may piyapaꞌaduꞌun ya it mga pagbayaꞌen ngaytit mga Filisteo. Piyasugidan ya nga isiyugid na ni Samson i kamatuudan, aypaꞌ mapakay na sira nga paꞌuliꞌ siꞌ duꞌut Sorec ngayti. Nagpaꞌuliꞌ sing matuud duꞌun i mga pagbayaꞌen ngayti nga taban na i pirak ngayti nga ibgay it ki Delila.

¹⁹ Binwat siꞌ ni Delila ngayti, piyaꞌigaꞌ ya si Samson nga magꞌuꞌulun duꞌun it paꞌa ya. Iyan maꞌlek na, miyanu kanyat sang kataawan ka piyabuꞌlugan ya na si Samson ngayti isaꞌun magꞌapus nay keseg ya. Ta nagꞌapus nang matuud i keseg ya ngayti ka tiyananan na kanyat AMPUꞌANG DIYUS.

²⁰ Pagkabuꞌlug, gimnaꞌuy siꞌ si Delila, nga magꞌaat, “Samson, masulag ka na! May magꞌaꞌabut nga mga Filisteo!” Ta, nasulag na si Samson baw tanu-tanud yaytu, subung naga it mga tagnaꞌ ngayti, nga maski unu-unuꞌun kanya, ega magkaꞌaydan. Egaytuy uru-urut ya nga tiyananan na kanya it AMPUꞌANG DIYUS.

²¹ Egay beken, diyakep na kanya it mga Filisteo ngayti bawnga linwat i mga mata ya. Bawnga tiyaban na nira duꞌun it Gaza, singgetan nira it kadina nga tumbaga baw pagpabwaten kanya nga manigꞌebeg it dakulang batu nga gilingan nga duꞌun it pirisuwan ngayti.

²² Temed duꞌut pirisuwan ngayti, magꞌabwat-magꞌabwat siꞌ i buꞌuk ya ngayti.

In magꞌuꞌunu natay si Samson [Mga 1074 B.C.]

²³ Ta kaꞌsang aldaw, namagtingped i mga pagbayaꞌen it mga Filisteo ka muwat it dakulang pasalamat duꞌun it pagbete-beteꞌen nga diyus nira nga si Dagon baw magkasagyaan sira. Mamagkantaꞌ sira nga magꞌaat, “Piyapandaꞌeg tami it diyus ta kat kalaban tami nga si Samson.”

²⁴ Dakel gasing mga taw i nagpakiragiꞌ duꞌun. Iyan naltegan nira si Samson, namagkantaꞌ gasiꞌ sira nga magꞌaat, “Ipiyagꞌildaw it aten nga diyus nga mandaꞌeg tami kat taw ngaytu nga magpandaꞌeg it aten baw nakabwat it dakulaꞌ nga karanggaꞌan kat banwa tami ngaytu, baw nakaꞌimatay it dakel nang kabilug tami.”

²⁵ Kat kadakulaꞌ it kasagyaan nira, napikir nira nga kalabtaꞌen si Samson ngayti. Ipiyaliꞌwan nira kanya duꞌun it pirisuwan ka piyakalabtaꞌ nga bilang pasagya it kanira. Bawnga piyatindeg kanya duꞌun it piyagtengaꞌan it duwang dadakulaꞌ nga arigi.

²⁶ Iyan atnakayti, inaat ni Samson i taraꞌgen nga magdundun it kanya, “Ipaskel mut aken i mga arigi nga piyakapakseg it balay ngaytu ka kuparandig aku.”

²⁷ Kadakulat balay ngayti, sageksek it taw, babay, lalaki. Duꞌun nagat seled i mga pagbayaꞌen it mga Filisteo ngayti. Iyan beken, duꞌun it mapatag nga atep, babay, lalaki na, tulung ribuy kadakel nira. Masasagya sirang mamagleteg it ki Samson ngayting pagpakalabtaꞌen nira.

²⁸ Ta it atkayti na, binwat ni Samson, nanalangin kanya nga magꞌaat, “AMPUꞌANG DIYUS, sanguꞌan mu naga aku ngayni. Pagꞌangutun ku asan it imu nga kat ini lamang nga timpu kemseg siꞌ i bilug ku ngayni, isaꞌun kat timpu ngayning iniꞌen, makables aku nagat mga Filisteo ngayni kat binwat nira ngaynit aken nga linwatan akut mata.”

²⁹ Pagkapanalangin ya, itiyukuꞌ yay mga alima ya duꞌut arigi ngayting duwa nga iti nay piyakapakseg it muꞌsang kabalayan.

³⁰ Bawnga miyampang kanya nga magꞌaat, “Mga Filisteo, sang tamiyan nagay matay kayti!” Subuk tiningped ya i keseg it bilug ya bawnga isiyuꞌmud yay mga arigi ngayti. Egay beken, simnuꞌrub i balay ngayti nga nasuꞌruban nay mga pagbayaꞌen it mga Filisteo baw kadakel ngayti nga kumpur duꞌun. Aypaꞌ kadakel it naꞌimatay yat iting uras nga tangday ya, subraꞌ pang dakel it kaꞌlay ngayti nga napatay ya.

³¹ Pinsiꞌ naga si Samson ngayti it mga sulsug ya baw beken nga kaduguꞌan ya, ka duꞌun nagay limbengan it lebeng it amaꞌ ya ngayti nga si Manoa, duꞌun it piyagtengaꞌan it Zora baw Estaol. Duwang puluꞌ nga taꞌun i kaꞌlay it kakampiꞌ ni Samson it mga Israelita.