Mga Pagbayaꞌen 14 - Tagbanwa

Pagpangasawa ni Samson

¹ Kaꞌsa naꞌaduꞌun si Samson it Timna. May naltegan ya duꞌun nga esang umbay nga babay it Filisteo.

² Pagkaꞌuliꞌ ya, isiyugid ya duꞌut mga giyaringan ya, “May naltegan ku baꞌ duꞌut Timna nga umbay paꞌ nga babay. Kuꞌasawaen ku bayting banar. Iꞌalyug mi na aku duꞌun.”

³ “Unuka duꞌun pay ireg mu nga pangasawaan it mga kadugu-duguꞌan it mga taw ngayting Filisteo nga ega seled kat urdin nga pagturiꞌ? Unu, ega nay mapiliꞌ mu nga asawaen situt aten nga kadugu-duguꞌan u mga kabanwa ta ngaytu?” maat i tubag it mga giyaringan ya ngayti. Katubag si Samson, maat ya, “Basta iti ireg ku nga asawaen.”

⁴ Egaytu naꞌrutan it mga giyaringan ya ngayti nga, kubwaten ya ngayti, ipiyanakem it kanya it AMPUꞌANG DIYUS, isaꞌun mabgayan yat timpu nga mapakibunuꞌan i mga Filisteo. Sabap ta, yanayti kat iting timpu pagsasakpen it mga Filisteo i mga Israelita.

⁵ Miyayaꞌ naga si Samson it mga amaꞌ ya nga naꞌaduꞌun nat Timna ka mangalyug na. Duꞌun it dalan ngayti, may magkapsagan nga kalulwakan it ubas parabir makaꞌbut it lansangan. Pagpaski ya duꞌun kayti, sakaling ininggeran kanya it esang leon.

⁶ Temed piyakseg kanya it Espiritu Santo it AMPUꞌANG DIYUS. Aypaꞌ ka maski egay pagseskelen yang basiꞌ, biyegsang ya i leon ngayti. Ipiyatibayaꞌ ya lamang it uꞌuybun it kambing. Takaꞌ ega itiyuturan ya duꞌun it mga amaꞌ ya ngayti.

⁷ Tiyuyuꞌ nga matuud ni Samson i babay ngayti ka piyakisugidan ya. Talagang siyagyaan yay iting babay.

⁸ Nagtaꞌlib i may pirang aldaw, piyaꞌuliꞌan ya siꞌ ka asawaen ya na i babay ngayti. Pagkapatuꞌ ya duꞌun it inimatayan ya ngaytit leon, nagpaski siꞌ ka napikir ya nga letganan ya daꞌan. Abutan ya, dingketan nat nigwan i seled it leon ngayti nga inimatay ya.

⁹ Minsiꞌ kanyat sang dalag nga biyaꞌil ka pagkaꞌnen ya nat magpanaw. Tiyabanan ya pat deges ngayti i mga amaꞌ ya, baw namagkaꞌen sira gasiꞌ. Temed ega naꞌrutan nira in ari garing. Ega naga isiyugid ni Samson nga duꞌun i liyaꞌutan ya it bilug it leon ngayti nga inimatay ya.

¹⁰ Pagꞌabut na Samson, miyalyug nay amaꞌ ya ngayti. Nakapitu i inayaw ni Samson it buwat it pagkasagyaan duꞌut balay it asawaen ya, ka iti, adat nira basta mangasawa nay mga lalaki.

¹¹ Pagkaꞌrut it mga Filisteo ngayti, piyaparagiꞌan nirat tulung puluꞌ nga kataawan nga mga mangaꞌwaꞌeng mga lalaki.

¹² Napikir ni Samson nga igman ya sira. Maat ya, “Esa-esa ga, magꞌigem aku. Kayti in mapintuꞌ mi it seledan it pitung aldaw ngaytu nga pagkasagyaan tami, begayan ku kamu it tulung puluꞌ nga kabadyuꞌan nga pirmira nga abel baw tulung puluꞌ naga nga ega babasta-bastaeng pakayan.

¹³ Temed in ega mapintuꞌ mi, aku i begayan mi it tulung puluꞌ ngaytung kabadyuꞌan baw tulung puluꞌ ngaytung pakayan.” Maamaatan sira, “Sigi, pakay kami nayang muꞌsa. Magꞌigem ka na.”

¹⁴ Egay beken, nagꞌigem na si Samson. Maat i inigem ya, “Garing duꞌun it kumakaꞌen, limniꞌwan i pangaꞌen. Baw garing duꞌun it mapuwirsa, mataꞌmis i limniꞌwan.” Seked tulung aldaw ega paꞌ napintuꞌ niray igem ngayti.

¹⁵ Iyan ikaꞌpat nang aldaw, isiyugid nira duꞌun it pagꞌasawaen ngayti ni Samson, “Sigi,” maat nira, “buwatan mu yan it rimidyuꞌ nga maꞌrutan namen i pagpintuꞌun it igem ngayan ni Samson. Basta ega mu yan buwatan, uyubun namen yan ikaw ka suriban namen i balay ngaytu. Ka iyan palan i inimbitaran mit amen, isaꞌun lamang mapakuriꞌan kami.”

¹⁶ Egay beken, naꞌaduꞌun it ki Samson i babay ngayti. Magluwa-luwaꞌ i miyampang, nga magꞌaat, “Ega talaga pagmaꞌalen mu aku. Magꞌigem ka duꞌut mga kabilug ku takaꞌ ega isiyugid mut aken i pagpintuꞌun.” Katubag si Samson, maat ya, “Maski mga giyaringan ku, ega siyugidan ku, ikaw paꞌ!”

¹⁷ Sigi nang pasuga-sugaw baw paꞌaluk-aluk it babay ngayti duꞌut ki Samson it seledan it pitung aldaw ngayti nga pagkasagyaan nira. Aypaꞌ ka iyan ikapitu nang aldaw, nakasugid na ni Samson i pagpintuꞌun it inigem ya ngayti, sabap it sigi-sigi na ngayti nga ingeꞌret it babay ngayti. Ta it isiyugid na ni Samson i pagpintuꞌun, dayun it isiyugid it babay ngayti duꞌut mga kabilug ya ngayti.

¹⁸ Egay beken, parabir simindep i aldaw it ikapitu na ngayti nga aldaw, naꞌaduꞌun nay mga taga Timna ngayti it ki Samson. Maat nira, “Unu, may kasubraꞌ paꞌ bat taꞌmis it deges it nigwan? Baw unu, may kasubraꞌ paꞌ it keseg baw kaꞌiseg it leon?” Maat ni Samson, “In daꞌga ininu-inu mi i pagꞌasawaen ku ngayan, ega bayan mapintuꞌ mi i igem ku ngayan.”

¹⁹ Bawnga piyakseg nang banar si Samson ngayti it Espiritu Santo it AMPUꞌANG DIYUS. Naꞌaduꞌun kanya it Ascalon baw nangimatay kanya it tulung puluꞌ nga kataawan nga Filisteo. Bawnga pinsiꞌ yay mga pakayan nira ka yanayti i ibinggay ya duꞌut mga nakapintuꞌ it igem ya ngayti. Pagkatiwas kayti, miyuliꞌ si Samson duꞌun it balay it mga giyaringan ya it ereꞌeret nga iseg ya.

²⁰ Temed babay ngayti nga inasawa ya, ipiyatindak nat punyangan ya duꞌun it naꞌiba-iba ni Samson it pagkaraꞌnen nira ngayti nga piyagsaduwan.