Mga Pagbayaꞌen 13 - Tagbanwa

¹ Iyan namagpangindiꞌ siꞌ it AMPUꞌANG DIYUS i mga Israelita ngayti, ipiyasakep ya siꞌ sira it mga Filisteo seledan it epat nga pulung taꞌun.

² Kat iting timpu, duꞌun it lansangan it Zora may esang lalaki nga pagpangaranan it ki Manoa, kat kuyunang mga tungtung-inapuꞌ ni Dan. Ega magpanganak i asawa ya.

³ Kaꞌsa nagpakikita it babay ngayti i Anghil it AMPUꞌANG DIYUS baw maat i inaat it kanya, “Seked kayti ega pay anak mu, temed ega maꞌlay dumarugmatiꞌ ka. Sumakit yan, lalaki.

⁴ Aypaꞌ garing kayti, maski sukdan, ayaw kat sukdan it maski unu nga kalasit irimnun nga kalalangu, baw ayaw kat kaꞌen it mga pagbawalen ngayang pangaꞌen.

⁵ In ipanganak mu na kanya, ega mu buꞌlu-buꞌlugan sabap garing paꞌ it pagsakit ya, ipiyasiguru na kanya nga kat Ampuꞌang Diyus. Kanya i puꞌun-puꞌun it manribri it mga Israelita kat pagsakep it mga Filisteo ngaytu.”

²⁴ Ta, miyabut i aldaw nga nanganak nay asawa ngayti ni Manoa, lalaki i simnakit. Piyangaranan ya it ki Samson. Dimnakulaꞌ i waꞌwaꞌ ngayti nga pasiging pagtatarimaen it AMPUꞌANG DIYUS.

²⁵ Sumang kaꞌanu nga mamasyar si Samson duꞌut kampu it mga sundaluꞌ nga kat kuyunan nagang mga tungtung-inapuꞌ ni Dan, nga duꞌun it piyagtengaꞌan it Zora baw Estaol, subuk pagpaꞌisgen kanya it Espiritu Santo it AMPUꞌANG DIYUS.