Mga Pagbayaꞌen 11 - Tagbanwa

¹ Ta kat iting timpu may esang taw nga pagpangaranan it ki Jefte nga taga Galaad. Ega babasta-bastaen kanya nga mamumunuꞌ. Ngaran it amaꞌ ya, sulun it rugar nira ngayti. Inaꞌ ya babay nga ipagpanulus yay bilug ya.

² May beken nagang mga anak ni Galaad ngayti duꞌun it talagang asawa ya. Pagsigdadakulaꞌ nira, inimugaw na nira si Jefte. Maat nira, “Egay maski unu nga imung masubli nga keseg it amaꞌ tami, sabap it ikaw ngaytu, anak ka duꞌun it belag nga babay.”

³ Egay beken, liminꞌid na si Jefte. Duꞌun nay tiyaꞌidan ya it rugar it Tob. Iyan duꞌun na kanya, nangumbinyu na kanya it mga kaꞌibaan ya, mga taw gasiꞌ nga mga bibinsiren. Namagsagpu-sagpunun na sira.

⁴ Nagpanaw it naꞌlay nga timpu, piyakibunuꞌan siꞌ it mga Ammonita i mga Israelita.

⁵ Egay beken, mga ginuꞌu duꞌut Galaad, inaduꞌun nira si Jefte ngayti nga duꞌun it Tob.

⁶ Pagꞌabut nira duꞌut ki Jefte, maat nirat kanya, “Asi-asi pat imu, sana baytu, ireg namen nga ikaw i pagbayaꞌen namen it pakibunuꞌ it mga Ammonita ngaytu.”

⁷ Katubag si Jefte ngayti, maat ya, “Daꞌga baꞌ, pagraꞌwayen mi aku, aypaꞌ piyalꞌid mi aku duꞌut Galaad? Ta unuka kayti nga may kakuriꞌan mi na, situ kamut aken it siꞌngi-siꞌngil?”

⁸ “Abaa, ikaw bay diyangep namen ka ireg namen ikaw i manguꞌna it pakibunuꞌ it mga Ammonita ngaytu. Bawnga ikaw i ipatindeg namen nga pagbayaꞌen duꞌun it Galaad.”

⁹ Maat siꞌ ni Jefte ngayti, “Ta in atkayan nga maat mi, panguꞌnaan ku kamu it pakibunuꞌ it kanira, ta kayti in beteꞌ iꞌildaw it AMPUꞌANG DIYUS nga mandaꞌeg aku, unuytu, matuud nga aku nay kilalaen mi nga pagbayaꞌen mi?”

¹⁰ “Aaꞌ, eeꞌ, talaga,” maat i tubag nira, “ikaw nay buwaten namen nga pagbayaꞌen. Talagang pagdedngegen kami tu it AMPUꞌANG DIYUS.”

¹¹ Egay beken, miyayaꞌ na si Jefte ngayti duꞌut Galaad. Pagꞌabut, naꞌaduꞌun daꞌan sirat Mizpa nga pagsambaan nira. Kat adapan it AMPUꞌANG DIYUS ipiyatindeg na nira nga pagbayaꞌen na nira si Jefte ngayti.

³² Piyakibunuꞌan na na Jefte ngayti i mga Ammonita, baw piyapandaꞌeg sira it AMPUꞌANG DIYUS.

³³ Talagang diyaꞌeg nira i mga kalaban nira ngayti nga mga Ammonita baw siyakep paꞌ ni Jefte i duwang puluꞌ nga kalansanganan nga garing duꞌun it Aroer miyabut duꞌun it Minit, baw maski duꞌun na it Abel-queramim. Ta, garing it naꞌatkayti ngayti, ega na kiminseg i mga Ammonita ngayti, ka talagang piyaꞌampuꞌ na.