Mga Pagbayaꞌen 1 - Tagbanwa

Dakel nga mga taga Canaan i ega naꞌimugaw it mga Israelita

¹⁹ Talagang pagtabangen it AMPUꞌANG DIYUS i kuyunang mga tungtung-inapuꞌ ni Juda in magpakibunuꞌ sira. Diyaꞌeg baw inimugaw niray mga taw nga magtataꞌid duꞌun it kabubukidan nga rugar kat kanira nga kabagiꞌan it banwa ngayti. Temed ega nakaꞌimugaw sira it mga taw duꞌun it daranasan ka, iting mga taw, may mga sarakayan nirat magpakibunuꞌ nga basiꞌ i binwat.

²⁰ Iyan siyudad it Hebron, ibiyagiꞌ nirat ki Caleb, uyun duꞌun it inaat naga ni Moises it tagnaꞌ. Aypaꞌ naꞌaduꞌun na Caleb ngayti ka duꞌun na i kanirang taꞌidan. Diyaꞌeg baw inimugaw nira i datiyan nga taga duꞌun nga tulung kataawan nga anak ni Anac.

²¹ Temed iyan kuyunang mga tungtung-inapuꞌ ni Benjamin, ega nakaꞌimugaw sira it mga Jebuseo nga magtataꞌid duꞌun it siyudad it Jerusalem. Aypaꞌ sang siraan nagay magtataꞌid duꞌun seked it kayti ngaytung timpu.

²⁷ Mga tungtung-inapuꞌ ni Manases, ega gasiꞌ naꞌimugaw nira i mga taw duꞌun it mga siyudad it Bet-sean, Taanac, Dor, Ibleam, Meguido, baw kat mga lansangan nga kat linibut it mga siyudad ngayti. Ka talagang ega maat magpaꞌimugaw i iting mga taw duꞌun it mga rugar nira ngayti.

²⁸ Iyan kiminseg nay mga Israelita, binwat na niray datiyan ngayting mga taga Canaan nga mga uripen na nira. Ega talaga napuꞌsa nirat kaꞌimugaw i iting mga taw.

²⁹ Atkayti nagay kat kuyunang mga tungtung-inapuꞌ ni Efraim. Ega naꞌimugaw niray mga Cananeo nga duꞌun it siyudad it Gezer. Aypaꞌ sang siraan naga i duꞌun.

³⁰ Mga tungtung-inapuꞌ ni Zabulon, ega naꞌimugaw nira i mga Cananeo nga taga siyudad it Kitron baw Nahalol. Aypaꞌ biyaraꞌan, nagsagpu-sagpunun na sira it iting mga taw. Temed inuripen niray mga Cananeo ngayti duꞌun.

³¹ Iyan kuyunang mga tungtung-inapuꞌ ni Aser, atkayti naga, ka ega naꞌimugaw nira i mga taw duꞌun it mga siyudad it Acco, Sidon, Ahlab, Aczib, Helba, Afec, baw Rehob.

³² Aypaꞌ ka sang siraan nagat iting mga Cananeo i timnaꞌid duꞌun it kanira ngayting kabagiꞌan nga taꞌidan duꞌun it Canaan ngayti.

³³ Mga tungtung-inapuꞌ ni Neftali, ega gasiꞌ naꞌimugaw nira i mga taga Bet-semes baw Bet-anat. Aypaꞌ ka nagsagpu-sagpunun na sira it iting mga taw. Temed inuripen it mga tungtung-inapuꞌ ngayti ni Neftali i mga Cananeo ngayti.

³⁴ Duꞌun it kat kuyunan nga mga tungtung-inapuꞌ ni Dan nga kabagiꞌan, ega naꞌunu-unu nira i mga Amorreo nga taga duꞌun nga lagi. Maꞌunu daꞌgen nira isan yan idiyedeg ga sira duꞌun it kabubukidan. Talagang maski manlampud duꞌun it daranasan, daꞌsira pagpalugtan it mga Amorreo ngayti. Aypaꞌ nagbaraꞌ na sira nga bukidnen.