Mga Ipiyalteg 8 - Tagbanwa

Yapay iniriꞌ nay ikapitu ngayti nga papaꞌnget

¹ Iyan ikapitu na ngayti nga papaꞌnget i iniriꞌ it paꞌaaten ngaytung Uꞌuybun It Tupa. Seledan it tengat uras egay riꞌe-riꞌeng duꞌun it langit.

² Pagkatupus it itiꞌen, naltegan ku nga piyamgayan it taburi i iyan pitung kaꞌanghilan nga mamagtitindeg duꞌun it adapan it Ampuꞌang Diyus.

³ Bawnga may miyabut gasiꞌ nga esang anghil nga may taban ya nga bulawan nga bebtangan it kamangyan. Timnindeg kanya duꞌun it sarungaan nga ayun it papangantengan it kamangyan nga duꞌun it sarungaan it araꞌdungan ngaytit adiꞌ. Naltegan ku, binggayan kanyat dakulang kamangyan ka antengen ya duꞌun it papangantengan ngayti nga bulawan, dengan it iꞌapyat yay mga panalangin it mga taawan it Ampuꞌang Diyus.

⁴ Ta minsag na duꞌut adapan it Ampuꞌang Diyus i tabuk it kamangyan ngayting pagseskelen it anghil, baw nakaꞌbut na i mga panalangin it mga taawan it Ampuꞌang Diyus duꞌun it kanya.

⁵ Pagkatupus kayti, minsiꞌ it mga baga i anghil ngayti duꞌun it papangantengan, nga ibintang ya duꞌun it bebtangan ngaytit kamangyan seked it punuꞌ na. Bawnga itindag ya situt banwa. Sakaling nanduldug it dadakulaꞌ na nga pamsar, simnari nat kilat baw yimnegyeg nay lugtaꞌ.

Pitu ngayti nga taburi

⁶ Bawnga nagpagayen-gayen i pitu ngayting kaꞌanghilan isaꞌun alistu na sira nga meyep it pitu ngayting kataburiyan nga ibinggay it kanira.

⁷ Pagꞌeyep it uꞌnang anghil it kanya ngayting taburi, miyuran, takaꞌ magtedag, yilu nga subuk deset batu baw apuy nga may uyut nga duguꞌ. Naꞌanteng i ikatlung bagiꞌ it banwa baw ikatlung bagiꞌ it talun baw muꞌsang dikut.

⁸ Pagꞌeyep siꞌ it ikadwa ngayting anghil it kanya ngayting taburi, may itindag duꞌun it dagat nga kaꞌaat ka dakulaꞌ nga bukid nga may uyut nga sugut apuy. Nagbarang duguꞌ i ikatlu nga bagiꞌ it dagat.

⁹ Natay i muꞌsang betang it ikatlu ngayting bagiꞌ it dagat. Namagkaranggaꞌ gasiꞌ i ikatlung bagiꞌ it mga sarakayan nga pandagat.

¹⁰ Pagꞌeyep it ikatlu ngayting anghil it kanya ngayting taburi, may naꞌulug nga dakulang bituꞌun nga gimnaring duꞌut langit. Atnang panugu-sugu, nga atnat apuy nga pagdersan. Tindagan ya, ikatlung bagiꞌ it mga danum baw mga tumbud.

¹¹ Ngaran it bituꞌun ngayti, Mapaꞌit, baw miyaꞌit nga matuud i ikatlung bagiꞌ it danum ngayti. Dakel nga taw nga natay, pagkaꞌinum nira kayti.

¹² Pagꞌeyep siꞌ it ikaꞌpat ngayting anghil it kanya gasiꞌ ngayti nga taburi, naꞌiguꞌ i ikatlung bagiꞌ it aldaw, bulan baw mga bituꞌun. Aypaꞌ ka nagsipat i ikatlung bagiꞌ it mga eyag nira. Diminlem i ikatlung bagiꞌ it aldawun baw ega gasiꞌ i minyag kat ikatlung bagiꞌ it delemen.

¹³ Pagkatupus kayti, may naltegan ku nga esang agila nga maglalayug kat lawang. Nagnegan ku nga pagdadakulaꞌen ya nang gaꞌuy nga magꞌaat, “Makuriꞌ talagang banar i mabetangan it muꞌsa nga magtataꞌid kat sinirungat langit, pagꞌeyep it tulu paꞌ ngayang naꞌped nga mga anghil it kanira ngayan nga mga taburi.”