Mga Ipiyalteg 7 - Tagbanwa

Inimandaꞌanan i mga Israelita nga manigsirbi it Ampuꞌang Diyus

¹ Ta pagkatupus it mga iti ngayti, may naltegan ku nga epat nga mga anghil nga mamagtitindeg kat epat nga kantu it banwa ngaytu. Pagsasabaren niray epat nga matat deres isaꞌun daꞌga daꞌan meyep situt sinirungat langit, ega dersan i dagat, pati talun.

² Baw siꞌ nga may naltegan ku nga miyabut nga esang anghil nga garing kat lebatan. Taba-taban ya i pangingimandaꞌan it Ampuꞌang Diyus, kanya nga egen it egay kaskedan. Giyaꞌuyan yay epat ngayti nga mga anghil nga binggayan it Ampuꞌang Diyus it pudir nga manranggaꞌ situt banwa baw kat dagat.

³ Maat ya, “Ega mi daꞌan ranggaꞌen i lugtaꞌ, dagat baw talun. Elaten mi nga maꞌimandaꞌanan i peges it mga manigsirbi it Ampuꞌang Diyus tami.”

⁴ Bawnga nagnegan ku i kapuꞌsaan it naꞌimandaꞌanan, sang gatus baw epat nga puluꞌ may epat nga ribu. Mga tungtung-inapuꞌ siraytu it sang puluꞌ may duwa ngaytung mga anak it kiyaꞌapuꞌ-apuꞌan nira nga si Israel.

^5-8 Sabap kat kuyunang mga tungtung-inapuꞌ ni Juda, sang puluꞌ may duwang ribu. Subung nagay ki Ruben, ki Gad, ki Aser, ki Neftali, ki Manases, ki Simeon, ki Levi, ki Isacar, ki Zabulon, baw kana Jose duwa ni Benjamin.

Daꞌna mabilang nga kadakel it taw i duꞌun it adapan it Ampuꞌang Diyus gimnaring na kat muꞌsang bangsa

⁹ Iyan natupus nay sabap it iting bagay, iyan siꞌ i naltegan ku, dakel nang dakel nga pagtaw. Daꞌna mabilang it maski siyu. Iting mga taw, nanggaring-garing kat kada ampang baw bangsa. Mamagtitindeg sira kat adapan it magꞌaꞌdung ngayti kat araꞌdungan it adiꞌ baw kat adapan it paꞌaaten ngayting Uꞌuybun It Tupa. Mamagpapakay sirang muꞌsa it maputiꞌ baw may sekel nira nga palakpak it subuk badangan.

¹⁰ Baw nagnegan ku nga derengan sira nga nanggaꞌmaran it dadakulaꞌ nga magꞌaat, “Mabantug i Ampuꞌang Diyus ngaytu kat pagkaꞌadiꞌ ya. Mabantug i Uꞌuybun It Tupa. Ka sira ngaytuy garing it karibriyan.”

¹¹ Naltegan ku nay muꞌsang mga anghil nga magtitindeg, maglilibut it araꞌdungan ngaytit adiꞌ, mga magugurang ngayti baw epat ngayting may ginawa nga giyuna. Kiminleb sira kat sarungaan it araꞌdungan ngayti ka siyamba niray Ampuꞌang Diyus nga magꞌaꞌdung duꞌun.

¹² Magꞌaat i inampang nira, “Kamatuudan tu! Mabantug ka nga Ampuꞌang Diyus namen. Dapat kang bantugun, pasalamatan baw galangen it egay katupusan, sabap ikaw i may kasepsep nga ega basta-basta, ikaw i may guna baw kakayaan nga ega masbungan. Kamatuudan tu!”

¹³ Bawnga iningkut akut sang kataawan ngayti nga magugurang. Maat ya, “Siyu yan nga mga taw i mamagpapakay-pakay ngayan it mapuputiꞌ? Ari yan i piyamaggaringan nira?”

¹⁴ Katubag aku, maat ku, “Tabing galang it imu, taꞌway. Ega magkaꞌrutan ku in ari piyamaggaringan kayan. Siguru ikaw yan i magꞌuꞌrut.” Maat ya siꞌ it aken, “Sira ngayan, iyan i nakalabay it dakulaꞌ talagang kakuriꞌan, temed maski atkayan, daꞌsira nangindiꞌ, naneꞌteꞌ i pamayaꞌ nira. Talagang linimpiyuꞌ nira baw piyaputiꞌ it duguꞌ it paꞌaaten ngaytung Uꞌuybun It Tupa i mga pakayan nira ngayan.

¹⁵ Aypaꞌ, sabap it iti ngayti, duꞌun sira it adapan it araꞌdungan ngaytut Ampuꞌang Diyus kat pagkaꞌadiꞌ ya. Magsirbi sirat kanya it delem-aldaw situt langit ngaytung bilang Templo ya. Baw kanya ngayan nga magꞌaꞌdung situt araꞌdungan ngaytut adiꞌ i tumaraꞌna it kanira.

¹⁶ Daꞌna yan sira makabatit getem baw kuꞌinum. Daꞌna kaꞌilangan nga pablad paꞌ sira it init it aldaw u makuriꞌan sira it maski unu paꞌ nga maꞌinit.

¹⁷ Sabap kanya ngaytung paꞌaaten nga Uꞌuybun It Tupa nga situt tepad it araꞌdungan ngaytut adiꞌ, kanya ngaytuy marigra nat kanira. Talagang tabanen ya na sira duꞌun it pagtumbudan it danum nga magbegay it kaꞌgenan. Baw daꞌnay tumuruꞌ nga luwaꞌ kat mga mata nira ka subuk panisen nat Ampuꞌang Diyus, ka awaꞌen ya nay kasmek nira.”