Mga Ipiyalteg 6 - Tagbanwa

Iniriꞌ nat paꞌaaten ngayting Uꞌuybun It Tupa i mga papaꞌnget

¹ Ta naltegan ku nga iniriꞌ nat paꞌaaten ngayting Uꞌuybun It Tupa i esang papaꞌnget it kasuratan ngayti nga pagluulunun. Dengan it nagnegan ku nga miyampang i esa ngayting may ginawa nga giyuna. Miyampang kanya nga atnat pamsar it duldug i kadadakulaꞌ. Maat ya, “Daliꞌ na!”

² Pagleteg ku, naltegan kuy esang kabayuꞌ nga maputiꞌ. Magseskel it panaꞌ i magsasakay baw binggayan kanyat kuruna nga tandaꞌ it mandadaꞌeg. Bawnga napanaw na kanya isaꞌun ipasigi yay pandaꞌeg ya situt sinirungat langit.

³ Pagkaꞌanu kayti, ikadwa siꞌ nga papaꞌnget i iniriꞌ it paꞌaaten ngayting Uꞌuybun It Tupa. Bawnga nagnegan ku nga inaat it ikadwa gasiꞌ ngayting may ginawa nga giyuna, maat ya, “Daliꞌ na!”

⁴ Sakaliꞌ siꞌ nga may nanliꞌwan nga esang kabayuꞌ nga madarag nga banar. Binggayan i magsasakay it iting kabayuꞌ it kakayaan nga ikapapuꞌun it magbunuꞌ-bunuꞌun i muꞌsang taw kat sinirungat langit ka magꞌima-imatayen na. Madaꞌun nga karis i ibinggay it kanya.

⁵ Isiyunud siꞌ nga iniriꞌ it paꞌaaten ngayting Uꞌuybun It Tupa i ikatlung papaꞌnget it kasuratan ngayti. Ikatlu siꞌ ngayti nga may ginawa nga giyuna i nagnegan ku nga miyampang, nga magꞌaat, “Daliꞌ na!” Pagleteg ku, kabayuꞌ siꞌ nga maꞌitem i naltegan ku. Magseskel it timbangan i magsasakay duꞌun.

⁶ May nagnegan ku nga ampang nga sinraꞌan duꞌun it pagꞌaꞌanuꞌan it epat ngayting may ginawa nga giyuna, nga magꞌaat, “Sang lataꞌ lamang nga arina it tirigu i maꞌalang it tangdan it sang aldaw nga urnal. Subung naga tulung lataꞌ lamang i maꞌalang nga arina it sebaba it iyan nagang kantidad. Temed ega pakurangan muy lana it olibo baw irimnun nga letes it buwaꞌ it ubas!”

⁷ Ikaꞌpat siꞌ nga papaꞌnget i iniriꞌ it paꞌaaten ngayting Uꞌuybun It Tupa. Iyan siꞌ i nagnegan ku nga miyampang, ikaꞌpat ngayti nga may ginawa nga giyuna. “Daliꞌ na!” maat ya.

⁸ May kabayuꞌ siꞌ nga naltegan ku nga malasiꞌ i pamilug ya. Ngaran it magsasakay it itiꞌen, si Kamataynen. Magꞌikug-ikug nagat kanya, si Basad. Ibinggay it kanira i pudir nga mangimatay it ikaꞌpat nga bagiꞌ it katataawan situt sinirungat langit, nga pangimatay ngayti, magbunuꞌ-bunuꞌun, puyanget, panalakep baw sariyen it imatay it maꞌiꞌiseg nga ramu-ramu.

⁹ Bawnga ikalima siꞌ ngayti nga papaꞌnget i iniriꞌ it paꞌaaten ngayting Uꞌuybun It Tupa. Sakaliꞌ nga naltegan ku duꞌun it sirib it papangantengan i mga kiyarurwa it iyan mga inimatay sabap it pamatuud nira it ampang it Ampuꞌang Diyus baw panindeg nirat kamatuudan ya ngaytu.

¹⁰ Nagnegan ku nga imbus niray gaꞌmaran nirat gimnaꞌuy nga magꞌaat, “Agalen namen, alaid ka talaga kat muꞌsang kasalaꞌan baw purus kamatuudan i imu. Kapira pay kaꞌlay it elatan namen? Kaꞌnu mu paꞌ betanganan it ukuman baw rigaen i mga taw duꞌut sinirungat langit nga minimatay it amen?”

¹¹ Bawnga naltegan ku nga binggayan it mapuputiꞌ nga pakayan i kada esat kanira. Baw nagnegan ku nga inaat it kanira, “Magpaꞌna-paꞌna kamu na daꞌan it ega maꞌlay nga timpu, mintras ega paꞌ nakumplitu i bilang it mga sulsug mi kat pamayaꞌ, nga kaꞌibaan mi nga magsirbi it Ampuꞌang Diyus, sira nga pangimatayen gasiꞌ nga subung it imyu.”

¹² Bawnga naltegan ku, iniriꞌ siꞌ it paꞌaaten ngayting Uꞌuybun It Tupa i ikaꞌnem nga papaꞌnget. Unupat yimnegyeg i banwa it daꞌnay pasubrang keseg. Bawnga nagpintut nay aldaw. Ta, yan bulan, atnat duguꞌ it pandara-darag.

¹³ Baw iyan mga bituꞌun, nasari nat kaꞌulug, subung na lamang it magpandag nga buwaꞌ it kayu nga bukul paꞌ in pagpesagen it masbeg nga deres.

¹⁴ Ta, yan langit, nagsipat na lamang ka nalulun nga subuk papil. Iyan mga bukid, naꞌawaꞌ na kat mga pagꞌaꞌanuꞌan nira. Atnaga i mga pulaw.

¹⁵ Namagpatataguꞌ duꞌun it mga kubkub baw duꞌut mga indelangat mga batu nga duꞌut mga bukid i mga adiꞌ situt banwa, mga matataꞌas nga dugut taw, mga pagbayaꞌen it mga sundaluꞌ, mga manggaden, mga taw nga ega babasta-bastaen, talagang muꞌsat taw, egay naꞌped. Pati mga raꞌyat, uripen baw ega uripen, nagpatataguꞌ nga muꞌsa.

¹⁶ Pagsekaten nat mga katataawan ngayti i mga bukid baw mga batu nga magꞌaat, “Sigi, taburan mi na kami, isaꞌun malingeb kami, nga daꞌna maltegan it magꞌaꞌdung ngayan asat araꞌdungan it adiꞌ, baw isaꞌun gasiꞌ ega na masalapuꞌ namen i iseg it paꞌaaten ngayang Uꞌuybun It Tupa.

¹⁷ Sabap natantuwan namen nga naꞌbut nay ega basta-basta ngaytung aldaw nga ipalbaw na niray iseg nira. Ta, siyuy makasagkaꞌ kayan?”