Mga Ipiyalteg 5 - Tagbanwa

Kiyawaꞌ it Uꞌuybun It Tupa i kasuratan nga pagluulunun

¹ Naltegan ku gasiꞌ i esang kasuratan nga pagluulunun, pagseskelen it iwanang alima it magꞌaꞌdung ngayti duꞌun it araꞌdungan it adiꞌ. Pabali-bali ya may surat baw pitu i papaꞌnget ya.

² Baw naltegan ku gasiꞌ i esang ega basta-bastang anghil nga magpanggaꞌmaran it dadakulaꞌ, nga magꞌaat, “Siyu talagay mapakay nga miriꞌ it papaꞌnget ngaytu baw mukaꞌ it kasuratan ngaytung pagluulunun?”

³ Temed egay magkaparagan duꞌut langit, situt sinirungat langit u kat pagꞌabutan it mga miyatay, nga mapakay nga mukaꞌ baw lemteg it mga magbebtang duꞌun nga magsusurat.

⁴ Pagkamuya ku kayan, siminggaw aku it ega pateng. Nasgawan ku, ega ngayti i magkaparagan nga mapakay mukaꞌ.

⁵ Miyampang i sang kataawan nga magugurang, maat yat aken, “Ayaw ka nat sugaw. Letganan muy mandadaꞌeg ngaytu nga garing kat mga tungtung-inapuꞌ ni Juda, matanug ngaytung tungtung-inapuꞌ ni David. Kanya i nakaꞌindaꞌeg it mararaꞌe-raꞌet, aypaꞌ kanya i mapakay nga miriꞌ it pitu ngaytung papaꞌnget baw mukaꞌ it kasuratan ngaytu nga pagluulunun.”

⁶ Ta sakaliꞌ nga may naltegan ku nga esang Uꞌuybun It Tupa, nga magtitindeg duꞌun it piyagtengaꞌan it mga magugurang ngayti baw araꞌdungan ngaytit adiꞌ nga paglilibutun it epat ngayting may ginawa nga giyuna. May mga barnaꞌ na nga magpamatuud nga naꞌimatay nay iti nga Uꞌuybun It Tupa. Pituy tanduk ya baw pituy mata nga iti, ladawan it Espiritu Santo nga tiyaꞌeg it Ampuꞌang Diyus nga lemkep situt sinirungat langit.

⁷ Minlep kanya ngayting paꞌaaten nga Uꞌuybun It Tupa duꞌun it magꞌaꞌdung ngayti duꞌun it araꞌdungan it adiꞌ, ka kiyawaꞌ ya nay pagluulunun ngayti nga kasuratan nga pagseskelen it iwanang alima it magꞌaꞌdung ngayti.

⁸ Pagkawaꞌ yat iti ngayti, namagpanluud baw itinꞌem i rupa it epat ngayting may ginawa nga giyuna baw duwang puluꞌ may epat ngayting mga magugurang, nga kada esat kanira may sekel nga turugtugun nga alpa, baw magseskel gasiꞌ it karung nga bulawan nga magpupnuꞌ it kamangyan. Iti ngayti nga paꞌaaten, mga panalangin it mga taawan it Ampuꞌang Diyus.

⁹ Kimnantaꞌ sirat baꞌgung kalasit kantaꞌ, nga magꞌaat, “Ikaw talagay mapakay nga kumawaꞌ it pagluulunun ngayan nga kasuratan baw mawaꞌ it mga papaꞌnget ya. Sabap naꞌimatay ka, baw sabap it kamataynen mu ngayan nga ipiyaturuꞌ i duguꞌ mu, may subuk inalang mu na nga mga taw kat muꞌsang mga bangsa, maski siyuy piyanggaring-garingan nira baw maski unu nga ampang i ampang nira. Kayti mga taawan na sirat Ampuꞌang Diyus.

¹⁰ Binwat mu sira nga bilang sasirduti isaꞌun kapagsirbi na sirang muꞌsa it Ampuꞌang Diyus tami. Binwat mu gasiꞌ sira nga mga adiꞌ isaꞌun kapamegbeg na sira duꞌut sinirungat langit.”

¹¹ Ta pagkalteg ku siꞌ, sakaliꞌ nga nagnegan ku nga nanggaꞌmaran nay liyaksaꞌ-laksaꞌ na nga mga anghil nga ega na mabilang i kadakel nira. Palinibut sirat araꞌdungan ngaytit adiꞌ, mga may ginawa ngayti nga mga giyuna, baw mga magugurang ngayti nga duwang puluꞌ may epat. Mamagrasun na gasiꞌ.

¹² Pagꞌubsu-ubsun niray gaꞌmaran nira it mamagbantug nga magꞌaat, “Uꞌuybun ngaytut Tupa nga ipiyagtas yay ginawa ya, kanya talaga i mapakay nga tumanggap it pagbantug, nga bantugun i guna, kamanggadan, ega basta-bastang kasepsep baw kakayaan ya. Kaꞌilangan talaga nga kanya i paggalangen baw pagbantugun.”

¹³ Bawnga nagnegan ku nga namagbantug nay muꞌsang giyuna nga kat langit, kat sinirungat langit, pati duꞌut dagat, baw kat pagꞌabutan it mga miyatay. Talagang muꞌsang mga giyuna nga maski ari, daꞌgay-daꞌga mamagbantug, nga magꞌaat, “Bantugun baw galangen it egay katupusan i magꞌaꞌdung asat araꞌdungan it adiꞌ baw Uꞌuybun ngaytut Tupa, sabap it kadakulat kabantugan nira baw guna nga egay kasbung.”

¹⁴ Ta iti, epat ngayti nga may ginawa nga mga giyuna, siging saꞌu-saꞌup nirat “Matuud! Atkayan talaga!” Bawnga iti, duwang puluꞌ may epat ngayti nga mga magugurang, namagpanluud sira ka simnamba.