Mga Ipiyalteg 3 - Tagbanwa

Kusugiden ni Jesus duꞌun it mga magpamayaꞌ it kanya nga duꞌut Sardis

¹ Bawnga maat yat aken, “Ituy ibtang mu kat surat nga ipataban mu duꞌun it manigpamaalaꞌ it mga magpamayaꞌ it aken duꞌut Sardis. Aaten mu nga, ‘Ituy ipagkusugid it iyan kanya nga magpupudir it Espiritu Santo baw magseskel it pitu ngaytung bituꞌun. Talagang magkaltegan kuy mga pagbuwaten mi. Pagkilalaen kamu nga maat egen, arit yay matuud, patay, ka talagang egay kamatuudan it pamayaꞌ mit aken.

² Sulag! Paksegen mi i pamayaꞌ mi isaꞌun ega maꞌawaꞌ it langkuy, ka talagang malubay na. Namuyaan ku nga talagang kurang i pagsirbi mi kat panleteg it Ampuꞌang Diyus ku.

³ Demdemen mi i nagnegan mi nga panulduꞌ nga ipiyagpangadal asat imyu. Iyan ngayan i kaꞌilangan mi nga sunudun. Singuliꞌan mi baw indiꞌan i karaꞌe-raꞌetan mi. Ka in ega masulag kamu, paꞌasan aku nga subung it mananakaw nga ega magkaꞌru-kaꞌrutan in kaꞌnu. Talagang ega magkaꞌrutan mi in kaꞌnuy pangabut ku.

⁴ Temed may pira naga asan it Sardis nga maꞌintur, nga ega naga nakakursud duꞌun it mga mararaꞌway nga pagbuwaten. Talagang magkapakay sira nga kaꞌibaan ku duꞌun it kaꞌadiꞌan ku nga magpapakay it maputiꞌ.

⁵ Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, siguradung papakayan ku kanya it pakayan nga maputiꞌ baw ega buraen kuy ngaran ya kat pagsuratat mga pagbegayan it kaꞌgenan nga egay kaskedan. Baw ipamatuud ku kat adapan it Amaꞌ ku baw mga anghil ya nga pagkilalaen ku talaga kanya nga aken nayan.

⁶ Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken.’ ”

Kusugiden ni Jesus duꞌun it mga magpamayaꞌ it kanya nga duꞌut Filadelfia

⁷ “Ituy ibtang mu kat surat nga ipataban mu duꞌun it manigpamaalaꞌ it mga magpamayaꞌ it aken duꞌut Filadelfia. Aaten mu nga, ‘Ituy ipagkusugid it iyan kanya nga talagang kamatuudan baw alaid kat maski unu nga kasalaꞌan, kanya nga magseskel it gunsiꞌ it adiꞌ nga si David ka pagbebgayan it pudir duꞌun it kaꞌadiꞌan it Ampuꞌang Diyus. Aypaꞌ basta inabri ku, egay tanda-tandaꞌ nga makasiradu. Ta basta nasiradu ku mana gasiꞌ, talagang ega gasiꞌ i makaꞌabri.

⁸ Talagang maꞌyag it aken i kabetangan baw adat mi. Ka maski ega dakulaꞌ i kaya mi ka daꞌkamu dakel, temed pagteꞌteꞌan mi naga aku baw pagsunudun mi i panulduꞌ ku. Aypaꞌ ka may inabriyan ku nga salakwatan nga masledan mi nga egay maski siyu nga makasiradu kaytu.

⁹ Pagnegan mit magayen i iꞌaat kut imyu. Paꞌadapen kut imyu i mga taw ngayan asan nga maꞌambut ka magbete-beteꞌ nga mga taawan ku sira temed yay matuud, sang siraan yan nga magsirbi it ki Satanas. Pasaluduꞌun ku nga manluud sira kat adapan mi. Sikayan maꞌrutan nira nga talagang pagmaꞌalen baw pagrarasan ku kamu.

¹⁰ Sabap it siyunud mi i urdin ku nga temeꞌteꞌ maski pagpakuriꞌan, talagang tatarimaen ku kamu isaꞌun ega maꞌilang, pagꞌabut it timpu nga makuriꞌan i muꞌsang taw situt sinirungat langit ka sukdanan ku na sira.

¹¹ Talagang mabut aku kat madaliꞌ nga timpu. Inturun mi nga, iyan pamayaꞌ mi it kamatuudan baw pagsunud mi it kaꞌirgan it Ampuꞌang Diyus, ega mateꞌag-teꞌag, isaꞌun ega masalaud i tumbas kut imyu, in daꞌga matanggap mi talaga.

¹² Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, siguradu nga buwaten ku kanya nga bilang esang unayen nga arigi kat Templo it Ampuꞌang Diyus ku. Talagang ega maꞌawaꞌ-awaꞌ kanya duꞌun seked it kaꞌnu-kaꞌnu. Iꞌunay kut sumurat kat bilug ya i ngaran it Ampuꞌang Diyus ku baw ngaran gasiꞌ it siyudad nga baꞌgung Jerusalem, gumaring ngaytu duꞌun it langit, nga ipalampud it Ampuꞌang Diyus. Iꞌunay ku gasit sumurat kat bilug ya i baꞌgung ngaran ku ka taawan ku na kanya.

¹³ Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken.’ ”

Kusugiden ni Jesus duꞌun it mga magpamayaꞌ it kanya nga duꞌut Laodicea

¹⁴ “Ituy ibtang mu duꞌun it surat nga ipataban mu duꞌut manigpamaalaꞌ it mga magpamayaꞌ it aken duꞌun it Laodicea. Aaten mu nga, ‘Ituy ipagkusugid it iyan kanya nga magngangaran it Kamatuudan, kanya nga talagang egay pagbaꞌgu ka purus kamatuudan i ipagsugid ya, kanya naga nga manigpamegbeg it muꞌsang giyuna it Ampuꞌang Diyus.

¹⁵ Ega talagay ipaꞌlam it aken kat muꞌsang mga buwat mi. Daꞌkamu naga magpakikuntraꞌ it aken temed ega gasiꞌ tulanged i pamayaꞌ mi, in daꞌga ereꞌeret na nga mataꞌbang. Sana tulanged i pamayaꞌ mit aken, ka talagang ega magkapakay ku i pamayaꞌ nga egay kamatuudan, nga kat munung na lamang. Sabagay talagang dakulaꞌ i iseg ku kat mga taw nga egay pamayaꞌ, temed subraꞌ pay iseg ku kat magbete-beteꞌ ngaytu.

¹⁶ Ta, it pagraꞌwayen ku kamu, isuka ku na lamang subung it danum kat baꞌbaꞌ nga kababaruꞌbuꞌ it laway.

¹⁷ Maat mi, manggaden kamu, baw bastanti nay muꞌsa. Egay maski unu nga kakurangan. Takaꞌ ega magkaꞌrutan mi nga yay matuud, kaꞌildaw-ildaw kamu, miskin kamu nga egay kaya mi. Beleg kamu baw lebas kamu nga taw.

¹⁸ Aypaꞌ kayti ituy ipagsasar kut imyu. Kaꞌilangan nga malang kamu sinit aken it bulawan nga pirmira ka tiyunaw duꞌut apuy, isaꞌun magmanggaden kamu nga matuud. Malang kamu gasiꞌ sinit aken it maputiꞌ nga pakayan, isaꞌun daꞌkamu na maglelbas, ega na kaꞌeyaꞌ-eyaꞌ. Baw malang kamu gasiꞌ it ubaꞌubat it mata isaꞌun makalteg kamu.

¹⁹ Kumpur pagmaꞌalen ku, pagpadisiran ku sirat magayen. Pagsabatan kuy mga kamaliꞌ nga pagbuwaten nira baw pagtaldengen ku sira. Aypaꞌ kaꞌilangan tingled i nakem mi. Singuliꞌan mi baw indiꞌan mi nay kasalaꞌan mi it kayti nga lagi.

²⁰ Ka wayni aku na. Subung it magtitindeg aku asat salakwatan, magpaꞌungaꞌ-ungaꞌ nga pasleden. Ka in siyu-siyuy sumambung, nga mabri it talaꞌep ya ka pasleden ya aku, daꞌnay kasasawan it pagꞌiba-iba namen.

²¹ In siyu-siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, begayan ku kanyat pudir nga katimbang ku na kat pagkaꞌadiꞌ ku. Subung nagat aken, ka inindaꞌeg ku nay muꞌsa ngaytu, aypaꞌ kayti duwa kami na magꞌAmaꞌ i magꞌadiꞌ kat pagkaꞌadiꞌ ya.

²² Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu, nga ipagpatantu it Espiritu Santo kat mga magpamayaꞌ baw magsarig it aken.’ ”