Mga Ipiyalteg 22 - Tagbanwa

¹ Ipiyalteg gasit aken it anghil i magburus nga danum nga magbegay it kaꞌgenan. Talagang maliꞌgaw nga maliꞌgaw subung nat pirmirang salamin. Magtumbud ti duꞌun it araꞌdungan it Ampuꞌang Diyus baw paꞌaaten ngaytung Uꞌuybun it Tupa kat pagkaꞌadiꞌ nira.

² Baw duꞌun nay burus ya it tengaꞌ it dakulang karsadaꞌ it siyudad ngayti. Padipag-dipag may magtutubuꞌ nga kayu nga magbegay gasiꞌ it kaꞌgenan. Bulan-bulan magbuwaꞌ i iting mga kayu, aypaꞌ ka sang puluꞌ baw duwang bisis it sang taꞌun may baꞌgung buwaꞌ nira. Baw mga daꞌun nira, ipagkagayen it katataawan isaꞌun egay magsarut.

³ Talagang egay maparagan duꞌun nga maski unu nga siyumpaan it Ampuꞌang Diyus. Sabap yay rugar it araꞌdungan it Ampuꞌang Diyus baw paꞌaaten ngaytung Uꞌuybun it Tupa kat pagkaꞌadiꞌ nira. Baw buwat it muꞌsang mga taawan it Ampuꞌang Diyus ngayti, magsamba sira it kanya.

⁴ Maltegan nira i rupa ya baw makasurat na kat mga peges nira i ngaran ya.

⁵ Talagang ega nay delem duꞌun, aypaꞌ ega na kaꞌilangan nira pay mga titidawan. Ega na gasiꞌ kaꞌilangan niray eyag it aldaw ka Ampuꞌang Diyus nay meyag it kanira. Baw magꞌadiꞌ na sira it egay kaskedang pagꞌadiꞌ.

⁶ Maat siꞌ it aken it anghil ngayti, “Talagang matuud i itung mga ampang nga nagnegan mu, egay pagbaꞌguwan. Ka iyan Ampuꞌang Diyus nga magpapasarum it Espiritu Santo kat mga prupitaꞌ ya, kanya naga i timnaꞌeg it anghil ya nga ipaꞌrut kat mga manigsirbi ya i mga bagay nga pabetang-betang ya nga magꞌabut kat madaliꞌ nga timpu.”

Talagang paꞌuliꞌ situ si Jesus

⁷ “Kaꞌilangan pagneg kamu,” maat i inaat ni Jesus. “Talagang siguradu nga mabut aku kat ega naga maꞌlay nga timpu.” Aypaꞌ magkasagya i magsunud nga banar it muꞌsa ngaytung ipiyatantu na nga magbebtang situt itung kasuratan.

⁸ Aku nga si Juan i nakagneg baw nakalteg it muꞌsa ngaytu. Bawnga pagkalteg ku, nanluud aku duꞌun it sarungaan it anghil ngayting nagpalteg it aken it itung mga bagay ka sambaen ku kanya.

⁹ Temed maat i inaat yat aken, “Ayaw! Ega mu buwaten i atkayan. Iyan lamang, Ampuꞌang Diyus, i sambaen mu. Ka aku, manigsirbi ya gasiꞌ nga subung it imu, baw subung it mga sulsug mu kat pamayaꞌ nga mga prupitaꞌ baw muꞌsa nga mamagsunud nga banar it mga inaat nga mamagsusurat situt itung kasuratan.”

¹⁰ Baw maat pay beken nga inaat yat aken, “Ega itaguꞌ mu in daꞌga ipaꞌrut muy mga bagay ngaytung ipiyalteg it imu nga isiyurat mu situt kasuratan ngaytu. Sabap ega naytu maꞌlay matuman nay mga itu ngaytu.

¹¹ Aypaꞌ it atkayan na, iyan mamagbuwat it maraꞌe-raꞌet pasigi lamang nga paraꞌe-raꞌet, ka yay pagkubwaten nira. Atnaga i maraꞌway i adat, sigi lamang nga paraꞌwayen nira. Temed iyan mga taawan it Ampuꞌang Diyus nga mamagbuwat it magayen, kaꞌilangan ipasigi nira lamang i magagayen ngaytung pamagbuwaten nira baw inturun nga alaid sira kat muꞌsang kasalaꞌan.”

¹² “Ka pagneg kamu,” maat ni Jesus. “Talagang ega na maꞌlay paꞌasan akut imyu. Taban ku yan i mga tumbas nga ipamgay ku it kada esa, uyun kat kanya-kanyang binwat.

¹³ Sabap aku ngaytu i uꞌna it muꞌsa baw aku naga i kat sinauryan. Aku i gimnuna it muꞌsa baw kat pudir ku i kaꞌbusan nira.

¹⁴ Magkasagya talaga sira nga pirmi nga maglimpiyuꞌ it mga pakayan nira, nga ireg sugiden, pagsinguliꞌan i kada kasalaꞌan isaꞌun maꞌawaꞌ. Ka mabgayan sirat pudir nga semled situt siyudad ngaytu baw kumaꞌen it buwaꞌ it kayu ngaytu nga magbegay it kaꞌgenan.

¹⁵ Temed talagang ega makasled situt siyudad ngaytu i mga mararaꞌe-raꞌet i adat, mga may kepetan, mga mapiyamakun duꞌun it ega asawa nira, mga mangingimatay it masigkataw, mga magsirbi it diwata u maski unu nga ganti nirat Ampuꞌang Diyus, baw maꞌaꞌambut kat ampang baw buwat nira.

¹⁶ Talagang aku nga si Jesus i timnaꞌeg it anghil ku ngaytu, isaꞌun kapatantu it imyu nga mga gurupu it mga taawan ku nga magpamayaꞌ it aken i itung mga bagay. Talagang liniꞌwanan ku, adiꞌ nga si David, ka matuud nga tungtung-inapuꞌ ya naga aku. Esa gasiꞌ nga panaꞌwag it aken, Magsinggat nga Buntatalaꞌ.”

¹⁷ Pagꞌaaten it Espiritu Santo baw mga taawan it Ampuꞌang Diyus, sira nga subuk asawaen it paꞌaateng Uꞌuybun It Tupa, “Daliꞌ na!” Baw muꞌsa nga makagneg it itung mga bagay, kaꞌilangan maat gasiꞌ sira nga, “Daliꞌ na!” Melep sini i siyu-siyu nga pagbaꞌnekan. Misiꞌ lamang i iyan magꞌireg it danum ngaytu nga magbegay it kaꞌgenan. Egaytu kaꞌman bayadan.

Pangiyaꞌpusan ya na

¹⁸ Ta ipagsasar kuytu kat maski siyu nga magkagneg it mga ipiyaꞌrut nga sugi-sugid nga magbebtang situt itung kasuratan. Ka in siyu nga dumungag it pagsugiden sikaytut itung kasuratan, idungag it Ampuꞌang Diyus kat panriga it kanya i mga salakep ngaytu nga magsusurat situ.

¹⁹ Baw ta, in siyu gasiꞌ i giminis it mga ipiyaꞌrut nga sugi-sugid nga magbebtang situ, iriꞌan kanya gasit Ampuꞌang Diyus it pudir nga semled situt siyudad ngaytu baw kumaꞌen it buwat kayu nga magbegay it kaꞌgenan, nga nasangpit situt itung kasuratan.

²⁰ Talagang pagꞌaaten ni Jesus ngayting nagpamatuud it muꞌsa ngaytu, “Siguradu nga mabut aku it ega na maꞌlay.” Aypaꞌ yay tubag ku, “Sana mabut ka nang matuud, Ampuꞌan ku nga si Jesus!”

²¹ Ipagpanalangin ku nga sana pirmi nga situt aten nga mga taawan ya i ildaw it Ampuꞌan tami ngaytu nga si Jesus.