Mga Ipiyalteg 21 - Tagbanwa

In maꞌunu i baꞌgung Jerusalem

¹ Bawnga pagleteg ku, baꞌgu na nga langit baw baꞌgu na gasiꞌ nga banwa. Ega nay lagi-lagi ngaytung langit baw banwa. Ega na gasiꞌ i dagat.

² Bawnga iyan siꞌ i naltegan ku, ega na basta-bastang siyudad it Ampuꞌang Diyus, magpapasalu nga garing duꞌun it kanya nga duꞌut langit. Siyudad ngayting pagpangaranat Baꞌgung Jerusalem, nakasubung-subung nat kagayen it babay nga magpapakay-pakay ka sumusmu nat lalaki nga magpangasawa it kanya.

³ Baw siꞌ nga may nagnegan ku nga panggaꞌmarang dadakulaꞌ nga duꞌun it araꞌdungan ngaytit adiꞌ i sinraꞌan, nga magꞌaat, “Kayti iyan pamalay-balay it Ampuꞌang Diyus, asan nat mga taw. Pakisagpun na kanyat kanira ka mga taawan ya na sira. Baw talagang kanya ngaytu i Ampuꞌang Diyus nira, nga maꞌiba-iba nira nang pirmi.

⁴ Baw panisen nat Ampuꞌang Diyus ngaytu i mga luwaꞌ nira, nga ega na makasmek. Ega nay kamataynen, magkasgawan u maski unu nga sakit, ka nagtaꞌlib naytung muꞌsa i itung mga bagay.”

⁵ Pagkatupus it iting ampang, miyampang i magꞌaꞌdung ngaytu duꞌun it araꞌdungan ya kat pagkaꞌadiꞌ. Maat ya, “Pagbaꞌguun ku na i muꞌsang bagay.” Bawnga maat ya it aken, “Isurat muytu i mga itu ngaytu, ka matuud tuy itung mga inaat, egay pagbaꞌguwan ya.”

⁶ Baw maat pay beken nga inaat yat aken, “Kayti natuman naytung muꞌsa. Ka akuy uꞌna it muꞌsa baw aku naga i kat sinauryan. Aku i gimnuna it muꞌsa baw kat pudir ku i kaꞌbusan ya. In siyu nga pagbaꞌnekan, siguradu nga begayan ku kanyat danum nga egay bayad nga garing duꞌun it tumbud nga magbegay it kaꞌgenan.

⁷ Siguradung tumbasan ku i iyan nga nakaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, ka aku nay Ampuꞌang Diyus ya baw kanya nayan i anak ku.

⁸ Temed ta, talagang makuriꞌ nga banar i mabetangan it iyan magꞌiꞌlam mamayaꞌ, mga nangindiꞌ it pamayaꞌ, mga nagpasaga-saga it mga maraꞌway nga pagbuwaten, mga mangingimatay it masigkataw, mga mapiyamakun duꞌun it ega asawa nira, mga may kepetan nga pananamayaꞌ, mga magsirbi it diwata u maski unu nga ganti nirat Ampuꞌang Diyus, baw muꞌsa nga maꞌaꞌambut. Sira ngaytung muꞌsa, egay pagduwa-duwa nga italpak duꞌun it maglalapnaw nga magsugu nga asupri, nga iti nay paꞌaaten nga ikadwang kamataynen.”

⁹ Ta, bawnga minlep duꞌun it aken i esa kat pitu ngayting mga anghil nga teptep ngaytit pagseskelen nga karung nga betang ya, kiyaꞌpusan nga pitung panalakep. Maat yat aken, “Paꞌasini ka, ka ipalteg kut imu i asawaen it paꞌaaten ngaytung Uꞌuybun It Tupa.”

¹⁰ Egay beken, kat pamegbeg it magsasarum nga Espiritu Santo sinit aken, idiyuꞌlung aku it anghil duꞌun it siyagpawan it esang piyakamatindeg nga bukid. Ipiyalteg yat aken i Jerusalem, iyan ega basta-bastang siyudad it Ampuꞌang Diyus, nga magpapasalu nga garing duꞌun it langit, nga gimnaring duꞌun it Ampuꞌang Diyus.

¹¹ Talagang maꞌyag nga maꞌyag i siyudad ngayti, sabap it kabantugan it Ampuꞌang Diyus i magꞌeyag. Talagang magsinggat nga subung it marga nga pagminaꞌeng batu nga haspe, baw subuk pirmirang salamin.

¹² Maꞌpal baw abwatay i kutaꞌ ya baw may sang puluꞌ baw duwa nga puwirtaꞌan ya. Kada esang puwirtaꞌan may guwardiya nga anghil, baw gasiꞌ nga magsusurat duꞌun it kada puwirtaꞌan i esa it mga ngaran it sang puluꞌ may duwang anak ni Jacob nga yay mga kiyaꞌapuꞌ-apuꞌan it mga Israelita.

¹³ Tagtutulu i puwirtaꞌan it kada kantu ya. Tulu i ayun kat lebatan baw tulu i kat sedpan nga ayun. Tulu i ayun kat sur baw tulu gasiꞌ i ayun kat nurti.

¹⁴ Baw may sang puluꞌ baw duwa gasing batu i batu nga papaꞌgen it kutaꞌ it siyudad ngayti. Magsusurat gasiꞌ duꞌun i mga ngaran it sang puluꞌ may duwang apustul it paꞌaaten ngaytung Uꞌuybun It Tupa.

¹⁵ Iyan anghil ngayti nga magpakisugi-sugid it aken, may sekel ya nga tatakes nga bulawan, ka taksen ya i siyudad ngayti, mga puwirtaꞌan ya baw kutaꞌ ya ngayti.

¹⁶ Kuwadradu i siyudad ngayti. In sang unuy kaꞌalaid ya, yanagay kalayaw ya. Ta tiyakes it anghil i siyudad ngayti. Mga duwang ribu baw epat nga gatus nga kilumitru i kaꞌalaid it kada sang kantu. Atnagay kadibwat ya.

¹⁷ Tiyakes gasiꞌ it anghil ngayti i kutaꞌ, mga enem nga puluꞌ may limang mitru, uyun kat panakes it taw ka atkayan nga tatakes i paggamiten it anghil ngayti.

¹⁸ Marga ngayting pagminaꞌen nga batu nga haspe i ikiyutaꞌ, baw pirmirang bulawan i siyudad ngayti, magkalaw-kalaw nga subung it salamin.

¹⁹ Pagpapagayenen it kalasi-kalasing pirmirang batu i papaꞌgen it kutaꞌ ngayti. Haspe i esa, ikadwa sapiro, kalsedonia i ikatlu, ikaꞌpat esmeralda,

²⁰ onise i ikalima, ikaꞌnem kornalina, krisolito i ikapitu, berilo i ikawalu, ikasiyam topasyo, krisopraso i ikasang puluꞌ. Ikasang puluꞌ baw esa hasinto, baw amatista i ikasang puluꞌ may duwa.

²¹ Subung it mutyaꞌ it basek i sang puluꞌ may duwang puwirtaꞌan, kada esa sang batung mutyaꞌ i binwat. Pirmirang bulawan i mga karsadaꞌ it siyudad baw magkalaw-kalaw nga subung it salamin.

²² Namuyaan ku nga egay Templo duꞌun it siyudad ngayti, sabap Ampuꞌang Diyus nga landaw nga gunaan baw paꞌaaten ngaytung Uꞌuybun It Tupa, duꞌun na nga pirmi, aypaꞌ ka duꞌun nat adapan nira i pagsambaan. Ega na kaꞌilangan nga muwat paꞌ it papagsambaan.

²³ Talagang ega na kaꞌilangan i aldaw u bulan nga megay it eyag duꞌun it siyudad ngayti, sabap kabantugan it Ampuꞌang Diyus i magꞌeyag duꞌun, baw paꞌaaten ngaytung Uꞌuybun It Tupa, yanay piyakatidaw.

²⁴ Eyagan i muꞌsang katataawan situt banwa it eyag ngaytu nga garing duꞌun it siyudad. Muꞌsang mga adiꞌ situt sinirungat langit, tabanen niray ipagkabantug it kanira duꞌun it siyudad ngaytu, ka ikabantug na it Ampuꞌang Diyus.

²⁵ Pirmi lamang nga abri i mga puwirtaꞌan it siyudad ngaytu sabap ega na maat demlem pay duꞌun.

²⁶ Talagang isled duꞌut siyudad ngayti i kamanggadan baw kabantugan it muꞌsang mga bangsa.

²⁷ Temed talagang ega makasled duꞌun i maski unu nga maraꞌway kat panleteg it Ampuꞌang Diyus, maski siyu nga magbuwat it kaꞌeyaꞌ-eyaꞌ u maski siyu nga maꞌambut, in daꞌga iyan lamang magsusurat i ngaran duꞌun it pagsuratat kumpur mabgayan it kaꞌgenan nga egay kaskedan, nga kasuratan ngaytu pagꞌaꞌarigraen it paꞌaaten ngaytung Uꞌuybun It Tupa.