Mga Ipiyalteg 20 - Tagbanwa

Talagang egay mabwat ni Satanas, daꞌgen kanya

¹ Bawnga may naltegan ku siꞌ nga anghil nga mapapasalu nga garing duꞌun it langit. Magseskel kanya it dakulang rantay baw gunsiꞌ it siwang ngayting piyakamalgeb.

² Riyusuban yay dragon ngayti ka biyayuk ya, nga seledat sang ribu nga taꞌun ega uꞌba-uꞌbadan. Ta dragon ngayti, kanya i maraꞌe-raꞌet ngayting nagpabaluy-baluy nga dukul it tagnaꞌ paꞌ ka akalan ya si Eva. Ngaran ya, Manigbuꞌbug baw si Satanas.

³ Egay beken, ibiyuntal na kanya it anghil ngayti duꞌun it siwang, bawnga siniraduwan. Pagkasiradu, piyaꞌngetan it anghil isaꞌun ega kaliꞌwan si Satanas, nga kapandayaꞌ siꞌ it mga bangsa seked it ega paꞌ naꞌayaw i sang ribu ngayting taꞌun. Temed in maꞌayaw na, paliꞌwanen kanyat ega maꞌlay nga timpu.

⁴ Sunud sing naltegan ku, may mga araꞌdungan it magꞌadiꞌ. Binggayan it pudir nga mangukuman i mga mamagꞌaꞌdung duꞌun. Duꞌun gasiꞌ i mga kiyarurwa it mga inimatay sabap it pamatuud nira it ki Jesus baw pangadal nira it ampang it Ampuꞌang Diyus. Talagang daꞌsira simnamba it kumakaꞌen ngayting ramu-ramu. Subraꞌ nay ladawan ya, talagang daꞌsira simnamba. Daꞌsira gasiꞌ nagpaꞌimandaꞌan it markaꞌ it ramu-ramu ngayti duꞌut peges nira u alima nira. Inggen i iting mga taw ka maꞌiba sira ni Cristo nga magꞌadiꞌ it seledan ngaytit sang ribung taꞌun.

⁵ Ituy paꞌaaten nga uꞌnang pagꞌegen it mga miyatay. Egnen mana siꞌ i miyatay nga beken in matupus nay sang ribu ngaytung taꞌun.

⁶ Magkasagya nga banar i mga piniliꞌ ngaytu nga makaꞌuyut it uꞌna ngaytung pagꞌegen it mga miyatay. Ka talagang daꞌsira makalabay it maski sang dekeyeꞌ nga kakuriꞌan nga paꞌaateng ikadwang kamataynen. In daꞌga, magbaraꞌ sira nga mga sasirduti it Ampuꞌang Diyus baw ni Cristo, baw kaꞌibaan ya sira nga magꞌadiꞌ it seledan ngaytit sang ribu nga taꞌun.

⁷ Ta pagkatupus it sang ribu ngayting taꞌun, ipaliꞌwan siꞌ si Satanas duꞌut pagpipirisuwan ya ngayti.

⁸ Unupat sublan ya siꞌ i buwat ya nga pandayaꞌ it katataawan. Lekpen yay muꞌsang mga bangsa situt sinirungat langit. Mangunkun kanyat ki Gog baw ki Magog, nga ireg sugiden, mga bangsa ngayti. Talagang kadakel it kunkunun ngaytu ni Satanas, subung nat igis duꞌun it baybayan. Tingpeden yay muꞌsa ngaytu ka pakibunuꞌ sira.

⁹ Ta, mga kiyunkun ngaytu, nagsinabut na. Pagkatingped nira, liniputan niray pagmaꞌalen it Ampuꞌang Diyus nga siyudad nga pagtataꞌidan it mga taawan ya. Temed egay nabwat it mga limniput ngaytu ka may timindag nga apuy nga garing duꞌut langit, nga iti i miyanteng it kanira.

¹⁰ Ta unupat iti, si Satanas ngayti nga dimnayaꞌ it kanira, itiyalpak na kanya duꞌun it maglalapnaw nga apuy nga magdiklap-diklap nay sugut asupri, nga tiyalpakan gasiꞌ it kumakaꞌen ngayting ramu-ramu baw mapiyandayaꞌ ngayting prupitaꞌ. Sang siraan i pakuriꞌan duꞌun it delem-aldaw it egay katupusan.

Magꞌukuman nay Ampuꞌang Diyus

¹¹ Pagkatupus siꞌ kayti, iyan siꞌ i naltegan ku, dakulaꞌ baw maputiꞌ nga araꞌdungan it adiꞌ baw kanya nga magꞌaꞌdung duꞌun. Baw sabap it magꞌaꞌdung na kanya ngayti duꞌun, nagsipat nay langit baw banwa, ega nay maltegan pat sumaꞌup.

¹² Bawnga sumunud siꞌ nga naltegan ku, muꞌsang mga miyatay na nga taw, mamagtitindeg sira duꞌun it sarungaan it araꞌdungan ngaytit adiꞌ. Mataꞌas baw mga timawaꞌ, duꞌun nga muꞌsa. Pagleteg ku, biyukaꞌ i mga kasuratan nga pagluulunun. Bawnga biyukaꞌ nay iyan sangbat nga pagsuratan it mga ngaran it kumpur mabgayan it kaꞌgenan nga egay kaskedan. Bawnga biyetanganan it ukuman i mga taw uyun kat kanya-kanyang binwat, iyan egen paꞌ, nga magsusurat duꞌun it mga kasuratan ngayti.

¹³ Eeꞌ baꞌ, muꞌsa nga duꞌun it pagꞌaꞌanuꞌan it miyatay, pati mga miyatay duꞌut dagat, tiningped sirang muꞌsa ka betanganan it ukuman uyun kat kanya-kanya gasing nabwat.

¹⁴ Pagkatupus kayti, itiyalpak na duꞌun it maglalapnaw ngayting apuy i kamataynen ngaytu baw rugar it mga miyatay. Ega nay kita-kitaen nga mga itu ngaytu, ka tiningled na duꞌun it maglalapnaw ngayting apuy nga iyan i ikadwang kamataynen.

¹⁵ Baw iyan ega magsusurat i ngaran duꞌun it pagsuratan it mga mabgayan it kaꞌgenang egay kaskedan, itiyalpak na gasiꞌ duꞌun.