Mga Ipiyalteg 2 - Tagbanwa

Kusugiden ni Jesus duꞌun it mga magpamayaꞌ it kanya nga duꞌut Efeso

¹ Bawnga inaat yat aken, nga magꞌaat, “Ituy ibtang mu asat surat nga ipataban mu duꞌun it manigpamaalaꞌ it mga magpamayaꞌ it aken duꞌut Efeso. Aaten mu nga, ‘Ituy ipagkusugid it iyan kanya nga may sekel ngaytu kat iwanan nga alima ya nga pitung kabituꞌunan, kanya ngaytung magpanaw kat piyagtenga-tengaꞌan it pitung titidawan nga magtitindeg i dadaꞌtunan nira nga purus bulawan i binwat.

² Urut ku talaga i buwat mi nga mga magpamayaꞌ asan. Magpaꞌres kamu it paꞌres banar baw teꞌteꞌ talagay pamayaꞌ mi it kamatuudan. Talagang magkaltegan ku nga ega pagpasaleꞌsegen mi i magbuwat it maraꞌe-raꞌet asan it imyu. Siyukda-sukdanan mi i iyan mga magpaꞌapu-apustul asan, baw natantuwan mi nga magpaꞌapu-apustul sira nga matuud.

³ Magkaꞌrutan ku gasiꞌ nga teꞌteꞌ kamu kat pamayaꞌ baw pagsagkaꞌen mi it magayen i nakem in pagpakuriꞌan kamu sabap it pamayaꞌ mi ngaytut aken. Daꞌkamu magkaskedan.

⁴ Temed may bagay naga nga magkaꞌiway ku it imyu. Magdekeyeꞌ nay pagmaꞌal mit aken kayti, ega na subung it tagnaꞌ ngayti.

⁵ Sana demdemen mi naga i kadakulat pagmaꞌal mit aken iyan baꞌgu kamu paꞌ nga nagpasakep it aken. Bawnga pikiren mi kayti in sang unu nay kakurangan ya, isaꞌun masinguliꞌan mi i itu ngaytu. Kaꞌilangan, iyan siꞌ i buwaten mi, subuk buwat mi ngaytit tagnaꞌ. Ka basta daꞌkamu magsinguliꞌ it kamatuudan, talagang asanen ku kamu ka awaꞌen kuy titidawan mi, pati magtitindeg nga dadaꞌtunan ya asat puwistuꞌ ya. Bibasen ta nayan kamu.

⁶ Temed may bagay naga nga pagsagyaan kut imyu, adat mi nga subuk aken nga pagꞌisgan i mga maraꞌway nga pagbuwaten it mga Nicolaita.

⁷ Aypaꞌ it pagꞌargan it talinga, ipagpagneg, kaꞌilangan pagnegan mit magayen i pagꞌaaten ngaytu, nga ipagpatantu it Espiritu Santo kat mga magpamayaꞌ baw magsarig it aken. Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, begayan ku kanyat pudir nga makakaꞌen it buwaꞌ it kayu nga magbegay it kaꞌgenan, nga duꞌun it kalu-kalulwakan it Ampuꞌang Diyus.’ ”

Kusugiden ni Jesus duꞌun it mga magpamayaꞌ it kanya nga duꞌut Esmirna

⁸ “Itu gasiꞌ i ibtang mu kat surat nga ipataban duꞌun it manigpamaalaꞌ it mga magpamayaꞌ it aken nga duꞌut Esmirna. Aaten mu nga, ‘Ituy ipagkusugid it iyan kanya nga uꞌna it muꞌsa baw kat sinauryan naga, kanya nga lamang natay temed nagꞌegen nagat paꞌuliꞌ.

⁹ Talagang magkaltegan kuy mga paglabayen mi ka pagpakuriꞌan kamu. Urut ku nagay kakuriꞌ mi. Temed yay matuud, pasar it kamanggadan nga garing it aken, manggaden kamu talaga. Baw magkaltegan ku gasiꞌ i mga taw nga magbete-beteꞌ nga mga taawan ku sira, temed panibabaꞌ ga lamang tut aken. Ka yay matuud, sang siraan yan nga magsirbi it ki Satanas.

¹⁰ Ega na iꞌlaman mi i mga pakuriꞌ nga magꞌadeꞌdeng na nga labayen mi. Eeꞌ baꞌ, kat buwat-buwat ni Satanas may mapirisu yan it imyu ka pagsukda-sukdanan i pamayaꞌ mi. Kaꞌilangan sagkaꞌen mi i pakuriꞌ ngaytu seledan it sang pulung aldaw. Teꞌteꞌan mi lamang aku maski maat ikagtas nat ginawa mi, ka siguradu yan nga ibgay kut imyu i tumbas nga kaꞌgenan nga egay kaskedan.

¹¹ Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken. Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, talagang ega na labayen yay ikadwang kamataynen, nga egay kaskedan nga kakuriꞌan.’”

Kusugiden ni Jesus duꞌun it mga magpamayaꞌ it kanya nga duꞌut Pergamo

¹² “Ituy ibtang mu duꞌun it surat nga ipataban duꞌun it manigpamaalaꞌ it mga magpamayaꞌ it aken nga duꞌut Pergamo. Aaten mu nga, ‘Ituy ipagkusugid it iyan kanya nga magseskel it atnang panare-tarem it basiꞌ nga limbak tarem.

¹³ Talagang magkaꞌrutan kuy kabetangan mi, nga pagtataꞌidan mi ngayan, pagsasakpan ni Satanas. Takaꞌ lamang atkayan, talagang teꞌteꞌ i pamayaꞌ mit aken. Daꞌkamu magpangindiꞌ it pagsarig mit aken, maski tagnaꞌ ngayan nga pagꞌimatay it ki Antipas nga matuud nga manigsirbi ku nga nanindeg it aken maski ikiyagtas na it ginawa ya, asan it rugar mi ngayang pagsasakpan ni Satanas.

¹⁴ Temed may pirang mga bagay nga magkaꞌiway ku asat imyu. May pira it imyu asan nga magsunud paꞌ it pangadal ni Balaam nga timnulduꞌ it ki Balak it tagnaꞌ paꞌ nga ipakursud i mga Israelita isaꞌun magkasalaꞌan sira. Ta sabap it itiꞌen ngayti, kimnaꞌen nay mga Israelita it karniꞌ nga ipagsalisi duꞌun it mga pagbete-beteꞌen nga diyus. Unupat minwat na sira it mga mararaꞌway nga buwat duꞌun it ega asawa nira.

¹⁵ May pira gasiꞌ asat imyu nga magsunud it mga ipagpangadal it mga Nicolaita.

¹⁶ Aypaꞌ ka, kaꞌilangan nga magsinguliꞌ sira baw indiꞌan i mga kasalaꞌan nira ngaytu. Ka in daꞌga, asanen ku yan kat madaliꞌ nga timpu ka puuꞌun kuy mga taw ngayan it basiꞌ ngaytu nga magliꞌwan kat baꞌbaꞌ ku.

¹⁷ Ta it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken. Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, siguradung may ibgay kut kanya nga magꞌaꞌareg sinit langit nga ega paꞌ magkaltegan it taw, iyan manna nga ipagkaꞌgen it egay kaskedan. Begayan ku gasiꞌ kanya it maputiꞌ nga batu nga pagsusuratan it esang ngaran nga baꞌgu nga egay maski siyung makaꞌrut, in daꞌga iyan lamang nga nabgayan kayan.’ ”

Kusugiden ni Jesus duꞌun it mga magpamayaꞌ it kanya nga duꞌut Tiatira

¹⁸ “Ituy ibtang mu asat surat nga ipataban duꞌun it manigpamaalaꞌ it mga magpamayaꞌ it aken duꞌut Tiatira. Aaten mu nga, ‘Ituy ipagkusugid it iyan kanya nga Anak it Ampuꞌang Diyus, nga subuk sugut apuy i mata ya baw mga aꞌay ya, magsinggat nga subung it piyakintab nga tumbaga.

¹⁹ Talagang magkaꞌrutan kuy mga pagbuwaten mi, baw magkaꞌrutan ku gasiꞌ i pagmaꞌal baw pagsarig mit aken. Magkaltegan ku nagay pagsirbi baw paneꞌteꞌ mi. Urut ku gasiꞌ nga muꞌsa ngaytu, dakulaꞌ pay pagbuwaten mi kayti it buwat mit tagnaꞌ, iyan baꞌgu kamu paꞌ nga namayaꞌ it aken.

²⁰ Temed ituy pagꞌisgan ku, in unuka pagpalugtan mi si Jezebel, iyan babay ngayan nga maat pagtaꞌgen it Ampuꞌang Diyus, arit ega. Talagang kat pangadal ya pagteꞌag-teꞌagen yay mga magsirbi it aken asan. Ipagpakursud ya kat buwat nga maraꞌway duꞌun it ega asawa nira, baw pagꞌidek-ideken ya paꞌ sira nga kumaꞌen it mga pangaꞌen nga ipagsalisi duꞌun it mga pagbete-beteꞌen nga diyus.

²¹ Binggayan ku na kanyat rugar nga magsinguliꞌ baw indiꞌan i mga maraꞌway ngaytu nga pangaꞌgenan ya, temed talagang pagtemden ya na nga ega indiꞌan ya.

²² Aypaꞌ rigaen ku na kanya. Manarakiten yan kanya. Pati mga taw ngayan nga kaꞌibaan ya kat maraꞌway ngayting mga pagbuwaten. Makuriꞌ talagay ipalabay kut kanira basta ega singuliꞌan baw indiꞌan niray mga karaꞌe-raꞌetan ngayan nga pamagbuwaten nira.

²³ Pangimatayen ku gasiꞌ i mga anak ya nga lupaw. Sikayan maꞌrutan it muꞌsang magpamayaꞌ nga aku i manigrikisaꞌ it kaꞌirgan baw in unuy kat nakem it taw. Talagang tumbasan kuy kada esat imyu uyun kat mga pagbuwaten mi.

²⁴ Temed itu nagay iꞌaat kut iyan beken asat imyu nga taga Tiatira nga ega naga simnunud it maraꞌe-raꞌet ngaytu nga ipagpangadal ni Jezebel baw ega naga nanlebes it mga kepetan ya nga garing duꞌut ki Satanas, ega pabeꞌgaten kuy pagsunud mit mga urdin.

²⁵ In daꞌga itu na lamang i ipagꞌurdin kut imyu. Teꞌteꞌan mi i pamayaꞌ baw pagsarig mit aken seked it mabut aku.

²⁶ Ka in siyuy magkaꞌindaꞌeg it in unuy ipagkasalaꞌan baw ipagkaranggaꞌ it pamayaꞌ, baw magsunud nga pirmi it kaꞌirgan ku seked it umur, ibgay kut kanya i pamegbeg nga subung it tiyanggap ku nga ibinggay it aken it Amaꞌ ku, iyan pamegbeg it muꞌsang bangsa.

²⁷ “Mamegbeg kanya it ega basta-bastang pamegbeg nga subuk may titiꞌkul ya nga basiꞌ. Subuk perdaken ya sira nga subung it pagbuwaten it manigbuwat it dakut.”

²⁸ Ibgay ku gasiꞌ it kanya i buntatalaꞌ.

²⁹ Aypaꞌ it pagꞌargan it talinga ipagpagneg, kaꞌilangan pagnegan mit magayen i pagꞌaaten ngaytu nga ipagpatantu it Espiritu Santo kat mga magpamayaꞌ baw magsarig it aken.’ ”