Mga Ipiyalteg 19 - Tagbanwa

Kasagyaan duꞌun it langit

¹ Pagkatupus siꞌ kayti, nagnegan kuy subung it inesa-esa nga gaꞌmaran it talagang dakel na nga dakel nga mga taw duꞌun it langit. Magꞌaat i ipaggaꞌu-gaꞌuy nira, “Bantugun i Ampuꞌang Diyus tami! Bantugun kanya nga Manriribri tami nga ega masbungan i kabantugan baw guna ya.

² Ka talagang mataldeng baw kamatuudan i pangukuman ya. Inukumanan ya nay matanug ngayti nga babay nga magpanulus it bilug ya, kanya nga nagparaꞌe-raꞌet nang banar it katataawan kat sinirungat langit kat maraꞌway ngayting adat ya. Inukumanan kanya it panriga sabap it pangimatay yat mga manigsirbi it Ampuꞌang Diyus.”

³ Maat pay beken nga ipaggaꞌuy nira, “Bantugun i Ampuꞌang Diyus! Timindeg kat lawang it egay katupusan i tabuk it magkaꞌanteng ngaytu nga matanug nga siyudad.”

⁴ Ta, yan duwang puluꞌ baw epat ngayti nga mga magugurang baw epat ngayti nga may ginawa nga giyuna, namagpanluud ka siyamba niray Ampuꞌang Diyus ngayting magꞌaꞌdung duꞌun it araꞌdungan ya kat pagkaꞌadiꞌ. Maat i inaat nira, “Kamatuudan tu. Bantugun i Ampuꞌang Diyus!”

⁵ Bawnga may miyampang nga duꞌun i sinraꞌan, adeꞌdeng duꞌun it araꞌdungan ngaytit adiꞌ. Magꞌaat i inampang, “Bantugun i Ampuꞌang Diyus tami, kamung muꞌsa nga manigsirbi ya, matataꞌas baw mga timawaꞌ, kamu nga may matuud nga iꞌlam nga paggalang mi it kanya.”

⁶ Pagkaꞌanu siꞌ kayti, nakagneg aku siꞌ it dakel na nga mga taw nga magpanggaꞌmaran, nga subung nat bugasꞌas it dakulang kensad baw atnat dadakulang pamsar it duldug. Maat i pagꞌaaten nira, “Bantugun i Ampuꞌang Diyus! Sabap Ampuꞌang Diyus tami nga landaw nga gunaan, kanya i magbebegbeg it muꞌsa.

⁷ Aypaꞌ ka sumagya tami it dakulang kasagyaan baw bantugun tami i keseg it guna ya. Ka miyabut na nga subuk mangasawa nay paꞌaaten ngaytung Uꞌuybun It Tupa. Nakaꞌalistu na i subuk asawaen ya ngayti.

⁸ Ta, asawaen ya ngayti, piyapakayan nat pirmira nga abel nga maputiꞌ nga limpiyuꞌ nga banar.” Iyan limpiyuꞌ nga pakayan ngaytu, yay paꞌaaten, mga mataldeng nga buwat it mga taawan it Ampuꞌang Diyus.

⁹ Bawnga inaat akut anghil, “Isurat muytu. Magkasagya i piniliꞌ nga makaꞌuyut it paꞌaaten ngayting pagsadu it subuk pangasawa it paꞌaateng Uꞌuybun it Tupa.” Paꞌugdun ya paꞌ, “Matuud tu nga ampang it Ampuꞌang Diyus.”

¹⁰ Pagkagneg ku, nanluud aku duꞌun it sarungaan it magpakisugi-sugid ngaytit aken, ka sambaen ku kanya. Temed maat yat aken, “Ayaw! Ega mu buwaten i atkayan. Kaꞌilangan Ampuꞌang Diyus lamang i sambaen mu. Ka aku, manigsirbi ya gasiꞌ subung it imu baw subung it mga sulsug mu kat pamayaꞌ, sira nga magpamatuud it panulduꞌ nga ipiyaꞌrut ni Jesus. Sabap kamatuudan ngayting ipiyaꞌrut ni Jesus, itu nay pagpatalandagan it ampang it mga prupitaꞌ.”

Nandaꞌeg i magsasakay it kabayuꞌ nga maputiꞌ

¹¹ Pagkatupus siꞌ kayti, miyabri i langit. May naltegan ku nga esang kabayuꞌ nga maputiꞌ. Iyan magsasakay duꞌun, pagpangaranan it Egay Pagbaꞌgu baw Kamatuudan. Mataldeng kanya mangukuman baw tamaꞌ i pagbuwaten ya nga pakilaban it mga kakuntraꞌ ya.

¹² Atnat magsugu nga apuy i mata ya. Baw pagkukurunaan kanyat dakel na nga kuruna. Magsusurat duꞌun it bilug yay esa gasiꞌ nga ngaran, temed kanya lamang i magꞌuꞌrut it ireg sugiden.

¹³ Talpuk nat duguꞌ i pakayan ya. “Ampang it Ampuꞌang Diyus” i panaꞌwag it kanya.

¹⁴ Magdadasun it kanya i kadakel it mga taawan ya duꞌun it langit. Sira i bilang mga sundaluꞌ ya. Magpapakay sirat limpiyuꞌ baw maputiꞌ nga pakayan baw mapuputiꞌ gasiꞌ nga mga kabayuꞌ i kanira nga pamagsasakayan.

¹⁵ May magliꞌwan nga tarep basiꞌ duꞌun it baꞌbaꞌ ya. Iti i gamiten ya nga ipasukuꞌ ya it katataawan nga ega nagpasakep it kanya. Bawnga magꞌadiꞌ kanya it may kakayaan nga ega basta-basta. Baw in magꞌuꞌunu pagkilangen i buwaꞌ it ubas duꞌun it kikilangan, atkayan nagay kaꞌigpit in pasukdanen ya i mga taw ngayti it ega basta-bastang iseg it Ampuꞌang Diyus nga landaw nga gunaan.

¹⁶ Magsusurat duꞌun it pakayan ya baw duꞌun it paꞌa yay ampang nga magꞌaat, “Adiꞌ it muꞌsang mga adiꞌ baw Ampuꞌan it muꞌsang mga agalen.”

¹⁷ Bawnga may naltegan ku siꞌ nga esang anghil nga magtitindeg duꞌun it aldaw. Giyaꞌuyan yay muꞌsang mga manu-manuk duꞌun it lawang. Maat ya, “Daliꞌ kamu na, matingped sinit dakulaꞌ ngayning pagkaraꞌnen it Ampuꞌang Diyus.

¹⁸ Daliꞌ mi na. Kaꞌnen mi i isi it muꞌsang mga ega nagpasakep it Ampuꞌang Diyus. Kaꞌnen mi i isi it mga adiꞌ, mga sundaluꞌ baw mga pagbayaꞌen nira, pati mga kabayuꞌ nga pagsakayan nira. Kaꞌnen mi i isi it muꞌsang taw nga ega magkilala it Ampuꞌang Diyus, mga uripen baw daꞌga, timawaꞌ baw matataꞌas.”

¹⁹ Bawnga naltegan ku siꞌ i kumakaꞌen ngayting ramu-ramu. Mga kaꞌibaan ya, mga adiꞌ situt sinirungat langit baw mga sundaluꞌ nira. Ka pakibunuꞌan nira i magsasakay ngayti duꞌun it kabayuꞌ nga maputiꞌ baw kanya ngayting kaꞌibaan.

²⁰ Temed nadakepan i kumakaꞌen ngayting ramu-ramu. Nadakepan gasiꞌ i mapiyangakal ngayting prupitaꞌ nga piyabwat it ramu-ramu ngaytit mga kalililuꞌang bagay. Iti na ngayting mga kalililuꞌang bagay i giyamit ya nga pandayaꞌ yat mga taw nga inimandaꞌanan it markaꞌ it kumakaꞌen ngayting ramu-ramu baw simnamba it ladawan ya. Ta unupat duwa ngayting nadakepan, egen sira nga ibiyuntal duꞌun it lapnaw it magdiklap-diklap nay sugut asupri.

²¹ Egay beken, inimatay nay kadakel it mga sundaluꞌ nira it tarep basiꞌ ngayting magliꞌwan duꞌun it baꞌbaꞌ it magsasakay ngayti duꞌun it kabayuꞌ nga maputiꞌ. Talagang naꞌya-naꞌyawan i mga manu-manuk it kaꞌen it mga bilug it mga inimatay ngayti.