Mga Ipiyalteg 18 - Tagbanwa

Diyaꞌeg na i siyudad it Babilonia

¹ Pagkatupus kayti, naltegan ku nga may esa sing anghil nga magpapasalu garing duꞌun it langit. Mataꞌas nga banar i katengdanan ya. Minyag i muꞌsang banwa sabap it singkar it kabakas ya.

² Pagꞌubsu-ubsun yay gaꞌmaran yat maggaꞌuy, nga magꞌaat, “Diyaꞌeg na! Diyaꞌeg na i matanug nga siyudad it Babilonia. Kayti muꞌsang kalasit mga mararaꞌe-raꞌet i mangistaran duꞌun baw pugadan nat marignaꞌ baw mararaꞌway nga mga manu-manuk.

³ Miyatkaytu sabap it karaꞌe-raꞌetan nga pagbuwaten it mga taga duꞌun. Ka siyudad ngayti, subung it babay nga ipagpanulus yay bilug ya. Piyaduraꞌitan yat maraꞌway nga pagbuwaten ya i muꞌsang bangsat taw situt sinirungat langit, pati mga adiꞌ nira. Baw iyan mga manigdagang, nagmanggaden na sabap it adat it mga taga duꞌun nga kupisiꞌen nay subrang mababakas nga mga bagay.”

⁴ Bawnga may nagnegan ku siꞌ nga miyampang nga beken nga garing duꞌun it langit nga magꞌaat, “Paꞌalaid kamu asat kanya, mga taawan ku. Ayaw kamut paꞌuyu-uyut it mga kasalaꞌan ya ngayan, isaꞌun daꞌkamu makaꞌuyut it panriga it kanya.

⁵ Sabap talagang kasalaꞌan ya, magrarapat nat langit. Talagang ega mapalipas it Ampuꞌang Diyus i mga karaꞌe-raꞌetan ya ngaytu.

⁶ Ka in magꞌuꞌunuy pakuriꞌ yat beken, talagang belsen na kanya. Baw ega desang belsen, in daꞌga duwang dubli i mabetangan ya. Baw ipnuꞌun i iꞌimnan yat subraꞌ pang mapaꞌit, mapaꞌit pat ipagꞌareg yang ipagpaꞌinum ya, nga ireg sugiden, pasukdanen kanyat Ampuꞌang Diyus it ega basta-bastang iseg ya.

⁷ Ka in magꞌuꞌunu nagpaꞌayaw-ayaw kanyat pagkasagyaan baw pagmataꞌas, atkayan nagay kadakulaꞌ it malabayan ya nga pakuriꞌ baw kasmek. Sabap kat nake-nakem ya, ‘Talagang magꞌaꞌdung aku naytu kat pagkaꞌadiꞌ. Egaytu balu aku. Seked it kaꞌnu-kaꞌnu, alaid talagat aken i masmekan.’

⁸ Temed ta, sabap it patuꞌgud ya ngayti, derengan nga mabut it kanya it sang aldaw i mga panalakep, sarut, kasmek baw getem. Bawnga siyudad ngayang pagpapuntuꞌan it babay ngaytu, ansurun it apuy. Sabap landaw nga gunaan i Ampuꞌang Diyus nga magꞌukuman it kanya.

⁹ Gumarwak talagat ega amang-amang i mga adiꞌ situt sinirungat langit nga nagpadura-duraꞌit it karaꞌe-raꞌetan baw maꞌingarum nga adat it mga taga Babilonia ngayti. Gumarwak sira nga makalawag it tabuk it magkaꞌanteng ngaytung siyudad.

¹⁰ Timitindeg lamang sira duꞌun it alaid, sabap magꞌiꞌlam sira nga makaꞌuyut it kakuriꞌan ngayting panriga. Maamaatan sira, ‘Abaa, subrang makuriꞌ talagaytu! Talagang ipagkapangingiraꞌbut nang bagay. Sabap seledan lamang it sang uras, nagꞌabut i panriga it mabantug baw matanug nga siyudad it Babilonia.’

¹¹ Ta sabap it nabetangan it siyudad ngayti, sumgaw gasiꞌ baw masmek i muꞌsang mga manigdagang situt banwa, sabap it ega nay malang it mga ipagdagang nira.

¹² Ega nay malang it bulawan baw pirak nira, mga marerga nga pagminaꞌen nga batu baw ega basta-bastang baliꞌeg nga rurug it bilug, baw mga pirmira nga abel, madalisi nga abel baw iyan liyuuꞌ it indilibel baw madarag. Daꞌnay mapaꞌalang nirat mabanglu nga kayu, baw kalasi-kalasing mga bagay nga yay binwat, marerga nga kayu, tanduk it elepante, tumbaga, basiꞌ baw pirmirang batu nga maputiꞌ.

¹³ Ega nay malang it mga panraragiꞌ it pangaꞌen, baw kamangyan baw beken nga mga babangluun, irimnun nga letes it buwat ubas, lana it olibo, arina baw tirigu. Ega na makapaꞌalang niray mga bakaꞌ, tupa, kabayuꞌ baw sarakayan nga pagguyudun it kabayuꞌ. Pati mga ipagdagang nirang masigkataw nira nga ipagpaꞌuripen, ega na maꞌalang.

¹⁴ Aaten it mga manigdagang ngayti, ‘Sayang talaga, ka ega nay muꞌsang mga magagayeng bagay nga pagrarasan it mga taga duꞌun. Talagang ega na maparagan nira pat sumaꞌup i kamanggadan baw kabakas it siyudad ngayti.’

¹⁵ Iyan nay buwaten it mga manigdagang ngayti nga nagmanggaden na kat iyan nga siyudad, ega na patpad, in daꞌga timitindeg na lamang duꞌun it alaid, ka magꞌiꞌlam sira nga makaꞌuyut it paglabayen ngayting kakuriꞌan. Talagang sumgaw sira baw masmek.

¹⁶ Maat i aaten nira, ‘Abaa, subrang makuriꞌ talagaytu! Kaꞌiꞌiraꞌbut nay nagꞌabut ngaytu kat matanug ngaytung siyudad. Tagnaꞌ ngayti, talagang mabakas i mga pakayan baw kasisilaw na nga rurug it bilug it mga taw duꞌun. Ka pakayan nira, pirmirang abel, baw mga liyuuꞌ it indilibel baw madarag. Baw rurug it bilug, mga bulawan baw marerga nga pagminaꞌen nga batu baw ega basta-bastang baliꞌeg.

¹⁷ Talagang seledan lamang it sang uras, nagsipat na nga muꞌsa i mga iyan ngayan.’ Ta, duꞌun gasiꞌ it alaid, maglawa-lawag na lamang, i mga barugsakay baw mga pagbayaꞌen nira, baw mga manigpanakay, kumpur duꞌun it dagat i pangaꞌgenan baw panulus nira.

¹⁸ Talagang sugawan niray magkaꞌanteng ngayting siyudad in malawag niray maggaring duꞌun nga tabuk. Maamaatan yan sira, ‘Talagang ega masbungan i kabantugan it itung siyudad.’

¹⁹ Egay beken, anuꞌan nirat kapu-kapu i mga ulu nira nga tandaꞌ it kadakulat kasmek nira. Baw mamagꞌampang i magsugaw nga magꞌaat, ‘Abaa, subrang makuriꞌ talagaytu! Talagang subrang makuriꞌ i nabetangan it matanug ngaytu nga siyudad. Nagmanggaden i muꞌsang tagpuꞌun it mga barkuꞌ nga magtataban it dagangan situt siyudad ngaytu. Temed seledan lamang it sang uras, nagsipat nay manggad ya baw kabakas ya.’

²⁰ Kamu nga duꞌun it langit, sagyaan mi nga banar i nabetangan ya ngaytu. Kamu nga mga prupitaꞌ baw mga apustul baw beken nga taawan it Ampuꞌan, magkasagya kamu na. Sabap binles nat Ampuꞌang Diyus i mga binwat it taga Babilonia ngayti nga binwat nirat imyu.”

²¹ Bawnga may esa nga ega basta-bastang anghil nga minsiꞌ it sangbat nga batu nga dakulaꞌ nga banar. Ibiyuntal ya duꞌun it dagat dengan it miyampang kanya nga magꞌaat, “Atkaytuytu i keseg it panranggaꞌ it matanug nga siyudad it Babilonia. Talagang ega na maltegan pat sumaꞌup.

²² Talagang ega na magnegan paꞌ duꞌun i gaꞌmaran it mangangantaꞌ, baw tugtug it mga manigtugtug it alpa, baw pagpatlaꞌ it mga pagꞌeypan nga plauta baw trompeta. Ega na gasiꞌ maltegan duꞌun i mga makakaꞌrut nga mga manigbuwat it maski unu nga pagbuwaten, baw ega na gasiꞌ magnegan i tingeg it mga gilingan.

²³ Talagang ega nay meyag duꞌun nga maski esa nga titidawan. Ega nay magnegang kasagyaan nga pagsadu it mga magꞌasawa. Ka rigaen i mga taga Babilonia ngayti sabap nagpataꞌas i mga manigdagang duꞌun. Talagang mga matatanug baw makekseg sira kat muꞌsang banwa. Baw tiyeꞌag-teꞌag nira i muꞌsang mga bangsa, aypaꞌ ka nagpadura-duraꞌit i katataawan it karaꞌe-raꞌetan nga kepetan it mga taga duꞌun.

²⁴ Rigaen i mga taga Babilonia sabap it mamuyaan duꞌun i ipiyaturuꞌ nirang duguꞌ, nga duguꞌ it inimatay nira nga mga prupitaꞌ baw beken nga mga taawan it Ampuꞌang Diyus, nga kumpur inimatay situt sinirungat langit.”