Mga Ipiyalteg 17 - Tagbanwa

Pasar it matanug nga babay nga magpanulus it bilug ya

¹ Pagkatupus it mga iti ngayti, minlep duꞌut aken i esa kat pitu ngayting mga anghil nga mamagseskel it karung. Miyampang kanya, nga maat ya, “Daliꞌ na, ka ipalteg kut imu in magꞌuꞌunu rigaen i babay nga matanug na nga magpanulus it bilug ya, nga yay pagpapuntuꞌan, matanug nga siyudad nga magtitindeg duꞌun it may dakel nga danum.

² Talagang mga adiꞌ baw mga katataawan kat sinirungat langit, nagpadura-duraꞌit nang banar it adat ya ngaytung maraꞌway.”

³ Bawnga kat pamegbeg it magsasarum it aken nga Espiritu Santo, tiyaban akut esang anghil duꞌut esang rugar nga kapupuyangtan. Naltegan ku duꞌun i esang babay nga magsasakay it madarag nga kumakaꞌen nga ramu-ramu nga pitu magsangay ulu ya baw sang puluꞌ i tanduk ya. Limbug nat surat i bilug it ramu-ramu ngayti. Yanay magsusurat, mga ampang nga ega basta-bastang pagtibabaꞌen i Ampuꞌang Diyus.

⁴ Madarag i pakayan it babay ngayti baw talagang mabakas subuk pakayan it adiꞌ. Bulawan baw marerga nga mga pagminaꞌen nga batu baw ega basta-bastang baliꞌeg i rurug it bilug ya. May sekel ya nga bulawan nga iꞌimnan nga magpupnuꞌ it marignaꞌ baw mararaꞌway nang bagay kat adat ya ngayti nga atkayti.

⁵ Magsusurat duꞌun it peges yay esang ngaran nga may tagu-taguꞌ nga pagpaꞌulugan, nga magꞌaat, “Matanug nga Babilonia, nga inaꞌ it pamakun baw muꞌsang maraꞌway nga buwat situt sinirungat langit.”

⁶ Naltegan ku nga maglalangu i babay ngayti. Iliyangu ya, duguꞌ it mga taawan it Ampuꞌang Diyus, mga taw nga inimatay sabap it panindeg baw pamayaꞌ nirat ki Jesus. Pagkalteg kut kanya ngaytu, naliluꞌ aku talaga.

⁷ Temed iningkut akut anghil ngayti, maat ya, “Unuka naliluꞌ ka? Kayti ipaꞌyag kut imu i kaꞌulugan it babay ngayan baw pagsasakayan ya ngayang kumakaꞌen nga ramu-ramu nga pitu magsangay ulu baw sang puluy tanduk.

⁸ Iyan ramu-ramu ngayan nga naltegan mu, egen payan it tagnaꞌ temed kayti, patay na. Takaꞌ manliꞌwan nagaytu it sumaꞌup nga garing duꞌut piyakamalgeb ngayting siwang, ka tabanen duꞌun it dakulang karigaan nga egay katupusan. Ta, maliluꞌ i mga taw kat sinirungat langit nga ega mamagsusurat i mga ngaran nira duꞌun it pagsusuratan it mga ngaran it kumpur mabgayan it kaꞌgenan nga egay kaskedan, garing pat pagguna it banwa. Maliluꞌ sira pagkalteg nirat kumakaꞌen ngaytung ramu-ramu sabap tagnaꞌ egen paꞌ bawnga natay na, temed nanluꞌsut siꞌ.

⁹ Talagang kaꞌilangan sikaytu kalumu it ulu baw kasepsep. Iyan pitu ngayang kaꞌuluwan, pitu yan nga kamungsuꞌan nga pagꞌaꞌdungan it babay ngayan.

¹⁰ Ipagladawan gasiꞌ tu sikaytu i pitung adiꞌ. Diyaꞌeg nay lima nga kaꞌadiꞌan. Iyan esa, magꞌadiꞌ paꞌ. Iyan ikapitu, ega paꞌ miyabut. Pagꞌabut ya, ega magtinir kanyat maꞌlay.

¹¹ Baw ta, yan kumakaꞌen ngayang ramu-ramu nga katꞌesa egen paꞌ temed kayti ngaytu ega na, kanyay ikawalu nga adiꞌ. Takaꞌ esa naga kanya kat pitu ngaytu. Bawnga in mabut siꞌ, tabanen kanya duꞌun it dakulang karigaan nga egay katupusan.

¹² Iyan sang puluꞌ ngayang tanduk ya nga naltegan mu, sang puluꞌ yan nga mga adiꞌ nga ega paꞌ nakapagꞌadiꞌ. Temed mamaalaꞌ sira nga iba it ramu-ramu ngaytu, lamang ega maꞌlay ka kaꞌaat ka seledat sang uras lamang.

¹³ Esa-esa lamang tu i kat nakem it sang puluꞌ ngaytu, aypaꞌ ka ipasakep nirat kumakaꞌen ngaytung ramu-ramu i kakayaan nira baw pudir nira kat pagkaꞌadiꞌ.

¹⁴ Ka giraen niray paꞌaaten ngaytung Uꞌuybun It Tupa, temed daꞌgen ya naga sira pati ramu-ramu ngayti. Sabap paꞌaaten ngaytu nga Uꞌuybun It Tupa, kanya i Ampuꞌan it muꞌsang mga agalen baw Adiꞌ it muꞌsang mga adiꞌ. Makaꞌuyut it pandaꞌeg ya ngaytu i mga piniliꞌ baw ipiyapinpin ya nga mga taawan ya nga masunud it kanya.”

¹⁵ Maat pay beken nga inaat it anghil ngaytit aken, “Iyan naltegan mu ngayang mga danum nga duꞌun magꞌaꞌdung i babay ngayan, gandur yan it taw i ireg sugiden kayan, kat belag-belag nga bangsa, kaduguꞌ-duguꞌan baw ampang.

¹⁶ Iyan sang puluꞌ ngayang katandukan nga naltegan mu gasiꞌ baw iyan ramu-ramu nga kumakaꞌen, isgan nira yan i babay ngayang magpanulus it bilug ya. Agawun niray muꞌsa nga mga kusas ya. Tananan nira kanya nga lebas na. Bawnga agden nira, baw iyan maꞌpedan, antengen nira.

¹⁷ Ka ipiyanakem it Ampuꞌang Diyus it sang puluꞌ ngayti nga tumanen niray ipiyabetang-betang ya, ka magꞌurunyun sira baw ipabegbeg niray pudir baw kakayaan nirat ramu-ramu ngaytu seked it matuman i mga inampang it Ampuꞌang Diyus.

¹⁸ Ta, yan babay ngayan nga naltegan mu, yay pagpapuntuꞌan, matanug yan nga siyudad nga magbebegbeg it mga adiꞌ kat sinirungat langit.”