Mga Ipiyalteg 16 - Tagbanwa

Iliyamaꞌ nat mga anghil i rugud it mga karung nira

¹ Bawnga ega naꞌlay may garing duꞌun it Templo nga nagnegan ku nga dadakulang panggaꞌmaran nga magꞌaat duꞌun it pitu ngayting kaꞌanghilan, “Sigi, mapanaw kamu na, ka ilamaꞌ mi na duꞌun it banwa i rugud it pitu ngayang kakarungan nga iyan i iseg it Ampuꞌang Diyus.”

² Aypaꞌ napanaw i uꞌnang anghil, ka iliyamaꞌ ya na situt banwa i rugud it kanya ngayting pagseskelen nga karung. Ta pagkalamaꞌ ya kayti, iyan mga taw nga nagpaꞌimandaꞌan it markaꞌ ngaytit kumakaꞌen ngayti nga ramu-ramu baw simnamba it ladawan ya, piyamungadan na sira it maꞌengat-engat baw marignaꞌ nang pamungad.

³ Bawnga iliyamaꞌ it ikadwang anghil duꞌut dagat i rugud it kanya ngayting karung. Ta, nagbalyung duguꞌ i dagat nga subung it maktul nga duguꞌ it taw nga patay na. Aypaꞌ ka natay i muꞌsang magginawa duꞌun.

⁴ Sunud siꞌ, liyamaꞌan it ikatlu ngayting anghil it rugud it kanya ngayti nga karung, duꞌun it mga danum nga magburus baw duꞌun it mga pagtumbudan it danum. Nagbalyu gasiꞌ nga duguꞌ i kanya ngayti nga liyamaꞌan.

⁵ Bawnga may nagnegan ku nga inaat it anghil nga manigpamaalaꞌ it mga danum, nga magꞌaat, “Ikaw i Ampuꞌang Diyus nga egen. Egen ka kayti baw kat katagnaꞌ-tagnaꞌan. Talagang mataldeng ka, baw purus mataldeng i binwat mu ngaytung pagꞌukuman.

⁶ Kat mga taw nga nagpaturuꞌ it duguꞌ it mga taawan mu baw duguꞌ gasiꞌ it mga prupitaꞌ, piyamgayan mu sirat duguꞌ nga imnun nira. Talagang iyan i bagay it kanira.”

⁷ Baw may nagnegan ku gasiꞌ nga ampang nga garing duꞌun it papangantengan ngayti, nga magꞌaat, “Ampuꞌang Diyus nga landaw nga gunaan, talagang mataldeng baw kamatuudan i pangukuman mu.”

⁸ Ikaꞌpat siꞌ ngayti nga anghil i limnamaꞌ it rugud it kanya ngayting karung. Aldaw i liyamaꞌan ya. Binggayan i aldaw it pudir nga subrang esben it singkar ya i mga taw.

⁹ Ta unupat inseb nang matuud i katataawan, sabap it talagang subraꞌ na nga kasgaꞌ, aypaꞌ diniyampaꞌ niray Ampuꞌang Diyus nga nagpapanaw it mga kakuriꞌan ngayti. Talagang tinmed nira nga daꞌsira magsinguliꞌ baw mangindiꞌ it mga kasalaꞌan nira baw daꞌsira magbantug it Ampuꞌang Diyus.

¹⁰ Pagkatupus kayti, iliyamaꞌ it ikalimang anghil i rugud it kanya gasing karung duꞌun it araꞌdungan it kumakaꞌen ngayting ramu-ramu kat pagkaꞌadiꞌ ya. Ta, diminlem nga lagi i kaꞌadiꞌan ya. Yay nabwat it mga taw, kakagat it mga bibig nira sabap it ega magkasagkaꞌan niray sakit it mga bungad nira.

¹¹ Diniyampaꞌ nira siꞌ i Ampuꞌang Diyus nga duꞌut langit sabap it paglabayen nira ngayting kakuriꞌan baw pamungad ngayti. Temed maski atkayti nay kabetangan nira, ega ga lamang nagsinguliꞌ baw inindiꞌan niray mga mararaꞌe-raꞌet nga pamagbuwaten nira.

¹² Bawnga iliyamaꞌ na gasit ikaꞌnem i rugud it kanya ngayting karung. Liyamaꞌan ya, duꞌun it Eufrates nga dakulang danum. Egay beken, napra i danum ngayti isaꞌun diri-diritsu i panaw it mga adiꞌ kat lebatan baw mga sundaluꞌ nira in manrumpak na.

¹³ Bawnga naltegan ku nga may nanliꞌwan nga tulung mararaꞌe-raꞌet, sangbat duꞌun it baꞌbaꞌ it dragon ngayti, baw sangbat duꞌun it baꞌbaꞌ it kumakaꞌen ngayting ramu-ramu baw sangbat gasiꞌ duꞌun it baꞌbaꞌ it mapiyandayaꞌ nga prupitaꞌ. Tulu ngayting mararaꞌe-raꞌet, subuk baꞌak i pamilug nira.

¹⁴ Iti nga mga mararaꞌe-raꞌet, manigpaliꞌwan it kalililuꞌang mga bagay. Baw binwat nira, limingkep sirat muꞌsang banwa, ka kiyukus niray muꞌsang mga adiꞌ nga lumaban it Ampuꞌang Diyus nga landaw nga gunaan in asan nat ega basta-bastang aldaw nga ipangukuman ya.

¹⁵ “Pagneg kamu!” maat it Ampuꞌan nga si Jesu-Cristo. “Talagang manluꞌsut aku kat uras nga ega magkaꞌru-kaꞌrutan mi, nga subung it buwat it mananakaw. Aypaꞌ magkasagya i subuk magsusulag ka pagpaꞌbutun yay agalen ya. Baw ega paglelbasen yay pakayan ya isaꞌun, in mabut na, ega maglelbas baw kaꞌeyaꞌ-eyaꞌ nga sumusmu kanya.”

¹⁶ Ta tiningped na it mga mararaꞌe-raꞌet ngayti i muꞌsa ngayting kiyukus nira nga mga adiꞌ, pati mga sundaluꞌ nira, duꞌun it rugar nga pagpangaranat Armagedon in kat Hinebreo nga ampang.

¹⁷ Pagkatupus kayti, iliyamaꞌ nat ikapitu ngayting anghil i rugud it kanya ngayting karung. Kat lawang i liyamaꞌan ya. Bawnga miyampang it dadakulaꞌ i duꞌun it araꞌdungan ngaytit adiꞌ nga duꞌun it Templo duꞌut langit, nga magꞌaat, “Nagꞌabut nay kakumplituwan it pangukuman baw iseg it Ampuꞌang Diyus!”

¹⁸ Bawnga sakaling nangilat baw nanduldug nat dadakulaꞌ nang pamsar baw yimnegyeg nay lugtaꞌ it yanay keseg. Itu na talagay piyakamakseg nga yegyeg it lugtaꞌ nga ega na namasaan it katataawan it yanaytuy kaꞌlay. Piyakamakseg na talaga.

¹⁹ Aypaꞌ ka nabagiꞌ it tulung bagiꞌ bawnga naranggaꞌ na i matanug ngayting siyudad it Babilonia. Baw naranggaꞌ gasiꞌ i muꞌsang siyudad situt sinirungat langit. Ka tiyuman it Ampuꞌang Diyus i isiyanggup ya pasar it panriga yat mga taga Babilonia ngayti. Talagang piyalabay yang banar it ega basta-bastang iseg ya. Iseg ya ngayti, subung it sang basu nga ipiyuꞌsa yat paꞌinum it kanira.

²⁰ Nagsipat i muꞌsang pulaw. Gimnesneb i muꞌsang bukid.

²¹ Bawnga miyuran it talagang dadakulaꞌ na, nga piꞌsang it yilu i magtedag nga mamagtimbang nat agen-agen it limang puluꞌ nga kilu i sang piꞌsang. Unupat pagsariyan nat tedag i mga taw. Aypaꞌ diniyampaꞌ niray Ampuꞌang Diyus sabap it iti ngayti, ka ereꞌeret talaga nga kakuriꞌan.