Mga Ipiyalteg 15 - Tagbanwa

May pitung kaꞌanghilan nga tereped it taban nga salakep

¹ Pagleteg ku siꞌ duꞌut langit, naltegan ku, esa gasing tandaꞌanan nga kalililuꞌan nga banar. Ka may pitu nga kaꞌanghilan, magtataban sirat pitung kalasit panalakep. Itu ngaytu i kiyaꞌpusan nga mga panalakep, sabap itu nay pangiyaꞌpusan nga iseg it Ampuꞌang Diyus.

² May naltegan ku gasiꞌ nga subuk dagat nga kaꞌaat ka pirmirang salamin, nga kalaw-kalaw ya subuk sugut apuy. Naltegan ku gasiꞌ sira nga nandaꞌeg it kumakaꞌen ngayting ramu-ramu baw ladawan ya, ka ega siyamba nira baw ega nagpamarkaꞌ it bilang ngayti nga egay beken nga pagpaꞌiguꞌan, ngaran it taw nga ipiyagladawan nga ramu-ramu ngayti. Magtitindeg i muꞌsa ngayti duꞌun it tepad it atna ngaytit dagat nga salamin. Sekel niray mga turugtugun nga alpa nga ibinggay it Ampuꞌang Diyus it kanira.

³ Pagkantaꞌen niray kantaꞌ ni Moises nga esang manigsirbi it Ampuꞌang Diyus it tagnaꞌ paꞌ, baw kantaꞌ it paꞌaaten ngayting Uꞌuybun It Tupa, nga magꞌaat, “Ampuꞌang Diyus nga landaw nga gunaan, mabantug baw kalililuꞌan i mga buwat mu. Ikaw nga Adiꞌ it muꞌsang bangsa, mataldeng baw kamatuudan i mga ipiyabetang-betang mu.

⁴ Siyuy daꞌga miꞌlam it imu, Ampuꞌang Diyus? Siyuy daꞌga pamatuud it kabantugan mu? Ka ikaw lamang i alaid kat kasalaꞌan. Muꞌsa talaga it mga bangsa, matingped baw sumamba it imu. Sabap magkaltegan it muꞌsa i mataldeng nga mga ipiyabetang-betang mu.”

⁵ Pagkatupus kayti, naltegan ku nga inabriyan duꞌut langit i ega basta-bastang seled it bilang Templo nga duꞌun talagay Ampuꞌang Diyus.

⁶ Nanliꞌwan na duꞌun it Templo ngayti i pitu ngayting anghil nga tereped it taban nga salakep. Magpapakay sirat maputiꞌ nga pirmirang abel nga limpiyuꞌ nga banar baw sambut nga bulawan nga duꞌun it deꞌgan nira.

⁷ Bawnga may ibinggay it kanira it esa kat mga may ginawa ngayti nga giyuna nga pitung kakarungan nga bulawan nga mamagpupnuꞌ it iseg it Ampuꞌang Diyus, kanya nga egen seked it kaꞌnu-kaꞌnu.

⁸ Bawnga napnuꞌ i Templo ngaytit tabuk nga magpalteg it kabantugan baw guna it Ampuꞌang Diyus. Aypaꞌ ka egay maski siyu nga kasled duꞌut Templo ngayti seked it ega paꞌ naꞌubus i pitu ngayting kasalakepan nga taban it pitu ngayting kaꞌanghilan.