Mga Ipiyalteg 14 - Tagbanwa

Uꞌubyun It Tupa baw mga subuk inalang ya

¹ Pagleteg ku siꞌ, naltegan kuy paꞌaaten ngayting Uꞌuybun It Tupa, nga magtitindeg duꞌun it Mungsuꞌ it Sion. Kaꞌibaan ya, sang gatus baw epat nga puluꞌ may epat nga ribung kataawan. Magsusurat duꞌun it peges it mga taw ngayti i ngaran it Uꞌuybun It Tupa ngayti baw ngaran gasiꞌ it Ampuꞌang Diyus nga Amaꞌ ya.

² Bawnga may nagnegan ku nga ampang nga gimnaring duꞌut langit, nga atnat bugasꞌas it dakulang kensad baw subung nat dadakulang pamsar it duldug. Ampang ngayti nga nagnegan ku, kaꞌaat ka tugtug it mga manigtugtug it turugtugun nga alpa.

³ Kadakel ngayti, nga sang gatus baw epat nga puluꞌ may epat nga ribu ngayting kataawan, magtitindeg na sira kat adapan it Ampuꞌang Diyus nga magꞌaꞌdung duꞌun it araꞌdungan ya kat pagkaꞌadiꞌ, baw kat adapan it epat ngayting may ginawa nga giyuna baw duwang puluꞌ may epat gasiꞌ ngayting mga magugurang. Nagnegan ku nga mamagkantaꞌ sira it baꞌgung kalasit kantaꞌ. Egay beken nga magkaꞌrut it iting kantaꞌ, in daꞌga iti lamang, kadakel ngayti nga, kat muꞌsang taw situt banwa, sira i napiliꞌ nga subuk inalang it paꞌaaten ngayting Uꞌuybun It Tupa isaꞌun mga taawan ya na.

⁴ Mga taw ngayti, ega simnalya manriꞌe-riꞌeng it maski siyu nga babay. Mamagbaya-bayaꞌ sirang pirmi it paꞌaaten ngayting Uꞌuybun It Tupa. Talagang kat muꞌsang katataawan, napiliꞌ sira nga subuk inalang, nga sira, mga taawan na it Ampuꞌang Diyus. Baw kabilangan nira, subuk uꞌnang lutuꞌ nga tirigu nga ipagpasalamat duꞌun it Ampuꞌang Diyus baw Uꞌuybun ngaytit Tupa.

⁵ Talagang maski kaꞌsa, daꞌsira miyambut, ega talagay masudi-sudi it kanira.

May tulu sing kaꞌanghilan nga miyampang

⁶ May naltegan ku siꞌ nga esang anghil nga maglalayug duꞌut lawang. Taba-taban yay Magayeng Baritaꞌ pasar it karibriyan nga egay pagbaꞌguwan ya, ka ipangadal situt banwa kat muꞌsa nga mga bangsa, maski siyu i piyanggaring-garingan nira baw maski unu nga ampang i ampang nira.

⁷ Miyampang kanyat dadakulaꞌ nga magꞌaat, “Galangen baw iꞌlaman mi i Ampuꞌang Diyus, baw bantugun mi i ega basta-bastang keseg it guna ya. Sabap naꞌbut nay timpu nga ukumanan ya nay muꞌsang mga taw. Kaꞌilangan nga sambaen mi i Ampuꞌang Diyus ngaytu nga nagguna it langit baw banwa, dagat baw muꞌsang mga pagtumbudan it danum.”

⁸ Bawnga may simnunud nga ikadwang anghil. Miyampang gasiꞌ i itiꞌen nga ipaggaꞌu-gaꞌuy ya na, nga magꞌaat, “Riyanggaꞌ na bayan! Talagang riyanggaꞌ nay Babilonia, matanug ngayting siyudad. Ka siyudad ngayti, subuk babay nga nagpaꞌinum it muꞌsang bangsa it talagang maꞌiseg nga irimnun isaꞌun kapamakun sirat kanya it egay pateng.”

⁹ Ipaggaꞌu-gaꞌuy gasiꞌ i ampang it ikatlung anghil nga simnunud it duwa ngayti. Maat ya, “In siyu-siyuy magsamba it kumakaꞌen ngayang ramu-ramu pati ladawan ya baw nagpamarkaꞌ it pangingimandaꞌan ya kat peges u alima ya,

¹⁰ siguradu nga malabayan niray iseg it Ampuꞌang Diyus nga ipiyagꞌareg ya nga egay maski unu nga uyut nga ildaw. Pakuriꞌan sira talaga duꞌun it apuy nga may asupri, kat adapan it paꞌaaten ngaytung Uꞌuybun It Tupa baw mga anghil it Ampuꞌang Diyus.

¹¹ Iyan apuy ngayting magpakuriꞌ it kanira, talagang ega magpugda-pugdaw seked it kaꞌnu-kaꞌnu. Talagang delem-aldaw, egay kapaꞌnaan it kakuriꞌan it mga simnamba ngaytut kumakaꞌen ngayting ramu-ramu baw ladawan ya, baw namagpamarkaꞌ ngayti it pagꞌiꞌimandaꞌanan nga kanyang ngaran i pagpaꞌiguꞌan.”

¹² Aypaꞌ it atkayan i mabetangan nira ngayti, kaꞌilangan talaga nga kumpur mga taawan it Ampuꞌang Diyus nga mamagsunud it kaꞌirgan ya baw magpamayaꞌ nat ki Jesus, kaꞌilangan nga teꞌteꞌan nira kanya maski ikagtas nat ginawa nira.

¹³ Bawnga nakagneg aku sit ampang nga gimnaring duꞌun it langit nga magꞌaat, “Isurat muy itu ngaytu. Garing kayti, makasagyang banar i sira nga seked it kamataynen ega nagpaꞌiwar-iwar it pakilagpit nirat Ampuꞌan.” “Talagang matuud tu,” maat it Espiritu Santo, “makapaꞌna na sira kat paꞌres nira baw begayan sirat tumbas it mga binwatan nira.”

Kaygen nay kakaygen situt banwa

¹⁴ Pagleteg ku siꞌ, may naltegan ku nga esang maputiꞌ nga kunum. Magsasakay duꞌun i subung it Taga Langit nga Ipiyanganak it Taw. May kuruna nga bulawan duꞌun it ulu ya baw magseskel kanyat gagapas nga yanay tarem.

¹⁵ Bawnga may esa sing anghil nga singkat nga nanliꞌwan duꞌun it Templo duꞌut langit. Giyaꞌuyan yay magsasakay ngayti duꞌun it kunum, nga magꞌaat, “Sigi, gamiten mu nay gagapas mu ngayan. Gumapas ka na, ka lutuꞌ nay kaygen ngayan asat banwa.”

¹⁶ Aypaꞌ egay beken, ikinimpay ya nay gagapas ngayting pagseskelen ya. Nagapas yang muꞌsa i kaygen situt banwa.

¹⁷ Pagkatupus it itiꞌen, may esa sing anghil nga nanliꞌwan duꞌun it Templo nga duꞌut langit. May sekel ya gasiꞌ nga matarem nga gagapas.

¹⁸ Bawnga nanliꞌwan siꞌ duꞌun i esa gasing anghil nga magpamaalaꞌ it apuy duꞌut papangantengan ngayti. Diyadakulaꞌ yay ampang ya nga inaat yay anghil ngayting magseskel it matarem ngayting gagapas, “Sigi, gamiten mu nay gagapas mu ngayan ka ranasen mu nay buwaꞌ it ubas kat muꞌsang ubasan asat banwa, ka iꞌnug nang muꞌsa.”

¹⁹ Aypaꞌ ikinimpay it anghil ngayti i sekel ya ngayting gagapas. Riyanas ya nay muꞌsang buwaꞌ it ubas bawnga ibiyuntal na duꞌut dakulang kikilangan ka kilangen na. Temed yay pagpapuntuꞌan it kikilangan ngaytu, ega basta-bastang iseg it Ampuꞌang Diyus.

²⁰ Sabap kumpur ega magkilala it Ampuꞌang Diyus, riniga na sira duꞌun it liꞌwan it siyudad, nga bilang buwat ubas nga pagkilangen isaꞌun murus i letes. Ka miyurus nay duguꞌ nira, talagang liminyud seked it mga tulung gatus nga kilumitru i kiyalantayan baw mga sang mitru baw tengaꞌ i kaꞌararem.