Mga Ipiyalteg 13 - Tagbanwa

Kumakaꞌen nga ramu-ramu nga duwa i naltegan ni Juan

¹ Sumunud siꞌ, may naltegan ku nga naningdal nga garing duꞌun it dagat nga esang kumakaꞌen nga ramu-ramu nga siyang kat banwa. Pitu gasiꞌ magsangay ulu ya baw sang puluꞌ i tanduk ya, nga pagkukurunaan i kada tanduk ya ngayti. Baw teptep it ulu ya ngayti, yay magsusurat nga mga ngaran ya, nga kada sangbat ngaytu, talagang magtibabaꞌ it Ampuꞌang Diyus.

² Subung it dakulang pasla nga pagpangaranan it leopardo i pamilug it kumakaꞌen ngayting ramu-ramu nga naltegan ku. Aꞌay baw kukuꞌ ya, subung it pangaꞌay it maꞌiseg nga ramu-ramu kat talun nga pagpangaranan it oso. Pamaꞌbaꞌ ya, subung it pagbaꞌbaꞌ it leon. Ibinggay nat dragon ngayti i muꞌsang pudir ya baw pagkaꞌadiꞌ ya duꞌun it kumakaꞌen ngayti nga ramu-ramu, pati ega basta-bastang kakayaan ya.

³ Pagleteg ku, may naltegan ku nga barnat pinilatan duꞌun it sangbat nga ulu, nga subung it bungad nga ipatay temed it minilat naga. Naliluꞌ i muꞌsang taw situt sinirungat langit. Nagpasakep na sira it kumakaꞌen ngayting ramu-ramu.

⁴ Siyamba niray dragon ngayti sabap kanyay nagbegay it pudir it kumakaꞌen ngayting ramu-ramu. Siyamba nira gasiꞌ i ramu-ramu ngayti, ka maamaatan sira, “Ta, siyuy makasbung it kanya? Siyu pay makalaban kayan?”

⁵ Sakaling nakaꞌampang i kumakaꞌen ngayti nga ramu-ramu nga lumandi-landi baw timibabaꞌ kanya it Ampuꞌang Diyus. Baw piyaꞌintulutan kanyat magꞌadiꞌ it pagsasakpan ya seledat epat nga puluꞌ may duwang bulan.

⁶ Ta unupat sigi nga tinibabaꞌ ya nang matuud i Ampuꞌang Diyus baw langit nga pagtataꞌidan it Ampuꞌang Diyus ngaytu, pati kumpur duꞌun it langit.

⁷ Piyaꞌintulutan gasiꞌ kanya nga giraen baw subuk daꞌgen yay mga taawan it Ampuꞌang Diyus. Binggayan kanyat pudir nga mamegbeg it muꞌsang bangsat taw nga maski unuy duguꞌ baw ampang nira.

⁸ Aypaꞌ sambaen kanyat muꞌsang katataawan situt sinirungat langit, puyrat iyan mga taw nga, parabir giyuna i banwa, mamagsusurat na i mga ngaran nira duꞌun it pagsusuratan it mga ngaran it kumpur mabgayan it kaꞌgenan nga egay kaskedan. Itung kasuratan, pagꞌaꞌarigraen it paꞌaaten nga Uꞌuybun It Tupa nga inimatay it tagnaꞌ.

⁹ Ta it pagꞌargan it talinga, ipagpagneg, kaꞌilangan pagnegan mit magayen i mga itu ngaytu.

¹⁰ Kumpur piyabetang-betangan nga pirisuun, siguradung pirisuun naga yan. Baw kumpur piyabetang-betangan nga imatayen it tarep basiꞌ, ta atkayan naga, imatayen yan. Aypaꞌ ka mga taawan it Ampuꞌang Diyus, kaꞌilangan papaꞌgenen niray pamayaꞌ nira baw pagsarig it kanya ngaytu isaꞌun makateꞌteꞌ sira, maski sang unuy pakuriꞌ it kanira.

¹¹ Ta, may naltegan ku siꞌ nga esa sing kumakaꞌen nga ramu-ramu, nga kat lugtaꞌ i liniꞌwanan ya. Duway tanduk ya nga subung it pananandukan it uꞌuybun it tupa temed gaꞌmaran, subuk gaꞌmaran it dragon.

¹² Pagsarigan kanyat uꞌna ngayting kumakaꞌen nga ramu-ramu, aypaꞌ ka giyamit yay pudir baw kakayaan it uꞌna ngayti. Baw riyeges yay muꞌsang taw situt sinirungat langit nga sumamba it uꞌna ngayting ramu-ramu, nga lamang may bungad nga ipatay na temed it minilat naga.

¹³ Talagang kalililuꞌang banar i mga binwat it ikadwa ngayting kumakaꞌen nga ramu-ramu, nga subuk nagpalampud kanyat apuy nga gimnaring duꞌut langit. Binwat yaytu kat matat kadakel.

¹⁴ Diyayaꞌ yay muꞌsang mga taw situt banwa sabap duꞌun it pagbuwaten ya ngayting mga kalililuꞌang bagay nga ipagpabwat it uꞌna ngayting kumakaꞌen nga ramu-ramu. Ipiyagꞌurdin yat mga taw nga muwat it ladawan nga ipasbung it uꞌna ngayting ramu-ramu nga nabungadan it basiꞌ takaꞌ yanagayang nagꞌegen.

¹⁵ Piyaꞌintulutan gasiꞌ i ikadwa ngayti nga kumakaꞌen nga ramu-ramu it paginawaen yay ladawan ngayting binwat. Ta egay beken, nakaꞌampang i binwat ngayti, baw isingkat ya nga pangimatayen i mga taw nga ega magsamba it kanya.

¹⁶ Bawnga riyeges it kumakaꞌen ngayting ramu-ramu i muꞌsang taw, mataꞌas baw timawaꞌ, manggaden baw miskin, uripen baw ega. Riyeges sira nga piyaꞌimandaꞌanan i kat iwanang alima u peges nira.

¹⁷ Talagang ega mapakay nga mangalang u paꞌalang i iyan nga egay markaꞌ nga ngaran it kumakaꞌen ngayting ramu-ramu u bilang nga iti nagay pagpaꞌiguꞌan.

¹⁸ Ta, matantuwan lamang tu basta dakulay kasepsep. Ka mapakay nagang maꞌrutan it masepsep i ireg sugiden it bilang ngaytu nga ngaran nagat ramu-ramu ngayti i pagpaꞌiguꞌan. Sabap ngaran tu it lalaki i bilang ngaytu nga enem nga gatus baw enem nga puluꞌ may enem.