Mga Ipiyalteg 12 - Tagbanwa

Esang tandaꞌanan nga ipiyalteg pasar it pandaꞌeg it ki Satanas

¹ Simnunud siꞌ nga ipiyalteg it aken duꞌun it langit, kalililuꞌan nga tandaꞌanan. Ka naltegan kuy esang babay nga aldaw i pakayan ya. Pagtutungtungan yay bulan, baw pagkukurunaan i ulu yat sang puluꞌ may duwa nga kabituꞌunan.

² Magbebteng i babay ngayti baw pagsaꞌgidan na. Magkatingeg kanya sabap it sakit it pabsug.

³ Bawnga esa paꞌ gasiꞌ nga tandaꞌanan i ipiyalteg it aken duꞌun it langit. Piyakadakulaꞌ nga subuk buwaya i pamilug nga pagpangaranan it dragon, nga madarag i bilug ya. Pitu magsangay ulu ya baw sang puluꞌ i tanduk ya. May kuruna it kada ulu ya ngayti.

⁴ Pagleteg ku, kiyaut it ikug yay ikatlung bagiꞌ it mga bituꞌun bawnga iꞌinlug yang muꞌsa situt banwa. Bawnga binwat ya siꞌ, timnindeg kanya duꞌun it saru-sarungaan it babay ngayti nga pagsaꞌgidan, ka pagꞌapaꞌan yay sumakit i waꞌwaꞌ ka sangwapen ya.

⁵ Egay beken, nanganak nay babay ngayti, sumakit, lalaki. Temed ega nasangwap it dragon sabap, kat pabetang-betang nagat Ampuꞌang Diyus, may simnibnut it madaragen ngayti ka tiyaban duꞌun it kanya ngayting magꞌaꞌdung duꞌun it araꞌdungan ya kat pagkaꞌadiꞌ. Ka iting waꞌwaꞌ, nakasiguru nga magꞌadiꞌ it muꞌsang bangsa it may kakayaan nga ega basta-basta.

⁶ Ta, yan babay ngayti, binwat ya, miyalagyu duꞌun it rugar nga kapupuyangtan, duꞌut esang rugar nga ipiyagꞌareg nang lagi it Ampuꞌang Diyus it kanya, isaꞌun maꞌarigraan kanya duꞌun, it seledat sang ribu baw duwang gatus baw enem nga puluꞌ nga aldaw.

⁷ Ta, pagkatiwas kayti, nagkagira nay duꞌut langit. Nagpakibunuꞌ na Miguel baw kanya nga kaꞌibaan nga mga anghil, piyakibunuꞌan nira i dragon ngayti. Ta minles nagay dragon ngayti baw mga kimnampiꞌ it kanya nga mga anghil.

⁸ Temed egay nabwat nira ka diyaꞌeg sira. Aypaꞌ daꞌsira na piyatinir duꞌun it langit.

⁹ Egay beken, itindag na i dakulaꞌ ngayting dragon. Ta, dragon ngayti, kanyay nagpabaluy-baluy ngayan nga dukul it tagnaꞌ paꞌ baw garing sikayan, siging pandayaꞌ yat muꞌsang katataawan situt sinirungat langit. Ngaran yang sangbat, Manigbuꞌbug, baw esa gasiꞌ, si Satanas. Itindag na kanya situt banwa pati mga anghil ngayting kimnampiꞌ it kanya.

¹⁰ Bawnga may nagnegan ku nga ampang nga dadakulaꞌ, maggaring duꞌun it langit, nga magꞌaat, “Kiyumplitu na kayti i panribri it Ampuꞌang Diyus it mga taawan ya. Ipiyalteg ya nay ega basta-bastang kakayaan ya it pagkaꞌadiꞌ. Talagang ipiyalteg nat siyarigan ya nga Cristo i pudir ya. Sabap inimugaw na duꞌun it langit si Satanas ngayting magbuꞌbug it mga kasulsugan tami kat pamayaꞌ. Kaꞌlay ngaytu, ipagdimanda ya sira duꞌun it Ampuꞌang Diyus tami it delem-aldaw, temed kayti, ega na ka inimugaw na kanya.

¹¹ Diyaꞌeg si Satanas it mga kasulsugan tami ngayti kat keseg it ipiyaturuꞌ nga duguꞌ it paꞌaaten nga Uꞌuybun It Tupa baw kat pamatuud nirat kamatuudan pasar it kanya ngayting si Jesu-Cristo. Ka ega talaga riyarasan niray ginawa nira, sabap lamang it pamayaꞌ nirat kanya.

¹² Aypaꞌ dakulaꞌ na talagay kasagyaan situt langit. Sumagya kamung muꞌsa nga magtataꞌid situ. Temed kumpur magtataꞌid asan it banwa baw dagat, talagang ega basta-bastang kakuriꞌan i labayen mi. Kaꞌildaw-ildaw kamu ka piyaꞌasan na si Satanas ngaytu. Timnalalu talagay iseg ya ka urut ya na nga dekeyeꞌ manay timpu yat kanya.”

¹³ Ta pagkamuya it dragon ngayti it itindag na kanya situt banwa, inusig yay babay ngayting nanganak it laa-lalaki ngayti.

¹⁴ Temed sakaling inildawan it Ampuꞌang Diyus i babay ngayti nga piyaꞌeladan ya it subuk elad it dakulang agila, isaꞌun makalayug nga paꞌaduꞌun it rugar nga kapupuyangtan. Duꞌun i taguꞌan it kanya isaꞌun maribri kanya duꞌun it dragon ngayti. Baw duꞌun kayti, arigraen kanyat magayen it Ampuꞌang Diyus seledat tulung taꞌun baw tengaꞌ.

¹⁵ Pagkamuya it paꞌaaten ngayting dragon, simnupra kanyat danum nga miyakan-bakan, ka isaꞌun ibelbeg i babay ngayti.

¹⁶ Takaꞌ tiyabang i babay ka miyukaꞌ i lugtaꞌ. Kaꞌaat ka, natlen nat kemlat it lugtaꞌ i danum ngayting isiyupra it dragon. Aypaꞌ ka ega naꞌunu i babay ngayti.

¹⁷ Ta, kat kadakulaꞌ it iseg it dragon it babay ngayti, paꞌugadan ya nga giraen i beken nga mga tungtung-inapuꞌ it babay ngayti. Itung mga taw, sira nga mamagsunud nga banar it kaꞌirgan it Ampuꞌang Diyus baw ega mamagpangindiꞌ kat kamatuudan nga ipiyatantu it Ampuꞌan nga si Jesus.

¹⁸ Binwat it dragon ngayti, naꞌaduꞌun na kanyat tambing it dagat.