Mga Ipiyalteg 11 - Tagbanwa

Pasar it duwang manigpamatuud

¹ Ta, pagkatupus it iti ngayti, binggayan akut esang anghil it tatakes nga subung it sungkud. Maat yat aken, “Mapanaw ka, ka taksen muy Templo nga pagsambaan mi it Ampuꞌang Diyus duꞌun it Jerusalem. Taksen mu gasiꞌ i papangantengan asan baw bilangen muy kadakel it mamagsamba.

² Takaꞌ ega taksen muy pagkakaliputputan ngayang piyakakamaꞌyagan ya, ka ibinggay nayan it mga taw nga ega magkilala it Ampuꞌang Diyus. Talagang parignaꞌen niray ega basta-basta ngayang siyudad nga piniliꞌ it Ampuꞌang Diyus, ka taꞌad-taꞌadan nayan nira seledan it epat nga puluꞌ baw duwang bulan,

³ nga yay sang ribu baw duwang gatus baw enem nga pulung aldaw. Temed may papaꞌasanen ku yan nga duwang manigpamatuud ku, nga mamagpapakay it maꞌerep nga tandaꞌ it kasmek. Ta, seledat mga aldaw ngaytu, sigi yan nga pangadal nira it pasar it Ampuꞌang Diyus baw ampang ya nga kaꞌilangan nga magsinguliꞌ i taw.”

⁴ May siyangpit it esang prupitaꞌ it tagnaꞌ nga duwang puꞌun nga olibo. Ta yay pagpapuntuꞌan ya kayan, duwa ngaytung manigpamatuud. Baw esa gasing kabilangan nira, duwang titidawan nga magtitindeg i dadaꞌtunan nira, nga magtitindeg duꞌun it adapan it Ampuꞌang Diyus, kanya nga magbebegbeg it muꞌsang banwa.

⁵ Basta yan may kupasakit it kanira, may apuy yan nga limiꞌwan kat baꞌbaꞌ nira, nga iti i magꞌanteng it mga kalaban nira ngayti. Sabap yay ipiyabetang-betang nga kamataynen it in siyuy kugated it duwa ngaytu.

⁶ Begayan sira it pudir baw kakayaan nga subuk isiradu i langit, isaꞌun ega muran mintras timpu nga ipagpangadal niray ampang it Ampuꞌang Diyus. Begayan sira gasiꞌ it pudir nga pabaraꞌen nga duguꞌ i danum, baw magpapanaw it maski unu nga kalasit salakep situt banwa basta nga maꞌirgan nira.

⁷ In maꞌbut nay timpu nga seked it kaꞌlay it pangadal nira ngaytu, may limiꞌwan na nga garing duꞌut piyakamalgeb ngayting siwang nga siyang nga kumakaꞌen nga ramu-ramu ka pakibunuꞌ it kanira. Daꞌgen i mga manigpamatuud ngaytu, mapatay sira it iti ngayti.

⁸ Bawnga muntulan i mga bilug nira nga patay na duꞌun it karsadaꞌ it ega ngayti basta-bastang siyudad, nga tagnaꞌ duꞌun kayti iriyansang duꞌun it krus i Ampuꞌan nirang si Jesus. Ta iti, siyudad ngaytit Jerusalem, pagpangaranan gasiꞌ it Sodoma baw Egipto, sabap it mga adat it taga duꞌun nga talagang subung nat mararaꞌe-raꞌet nga adat it taga Sodoma baw Egipto ngayti it tagnaꞌ paꞌ.

⁹ Seledan it tulung aldaw baw tengaꞌ, mga bilug nira ngayting mamagbubuntul, siging asa it mga katataawan nga gumaring kat muꞌsang mga bangsa, maski siyu i piyanggaring-garingan nira baw maski unu nga ampang i ampang nira. Ega ireg it mga katataawan ngayti nga ilbeng.

¹⁰ Sumagya i mga taw situt sinirungat langit sabap it miyatay nay duwa ngayting manigpamatuud. Magkasagyaan na sira baw mamagbega-begayen nat mga bagay nga begay lamang, sabap it naꞌawaꞌ nay duwa ngayti nga minggay it kanira it kakuriꞌan.

¹¹ Temed nagtaꞌlib i tulung aldaw ngayti baw tengaꞌ, ipiyagꞌuliꞌ siꞌ it Ampuꞌang Diyus duꞌut mga miyatay ngayti i ginawa nira. Egay beken, nagbangun na sira, langkuy it timnindeg. Ta, namagkelas i atay it kumpur namagkalteg it kanira.

¹² Bawnga may nagnegan nirang dadakulang ampang nga garing duꞌun it langit, nga magꞌaat, “Daliꞌ kamu nang duwa. Mapyat kamu na sini.” Aypaꞌ mintras pagsesyekan sirat mga kalaban nira ngayti, nangunragiꞌ nat kunum i duwa ngayti, ka namagpatibung na duꞌut langit.

¹³ Bawnga sakaling yimnegyeg nay lugtaꞌ it ereꞌeret nga keseg, aypaꞌ ka gimnesneb i ikasang pulung bagiꞌ it siyudad ngayti. Pitung ribu i kadakel it taw nga natay. Iyan naꞌped nga mga taw, namagꞌiꞌlam na sirang ereꞌeret. Biyantug na niray Ampuꞌang Diyus nga duꞌun it langit.

¹⁴ Nagtaꞌlib nay ikadwa ngayting ega basta-bastang kakuriꞌan. Temed sumunud nat madaliꞌ i ikatlu.

Yapay eyep it ikapitu ngayting anghil it kanya nga taburi

¹⁵ Inyepan nat ikapitu ngayting anghil i kanya ngayting taburi. Bawnga may nagnegan ku nga mamagꞌampang it dadakulaꞌ nga duꞌun it langit, nga magꞌaat, “Muꞌsang katataawan nga kat pudir it simnakep it kanira kat sinirungat langit, kayti sinakepan na sira it Ampuꞌang Diyus tami baw si Jesu-Cristo nga siyarigan ya. Talagang magꞌadiꞌ kanya it egay katupusan.”

¹⁶ Ta binwat siꞌ it duwang puluꞌ ngayti may epat nga mga magugurang nga magꞌaꞌdung duꞌun it mga araꞌdungan it may pudir nga kat adapan it Ampuꞌang Diyus, namagpanluud sira ka simnamba it kanya.

¹⁷ Maat i inampang nira, “Mabantug nga Ampuꞌang Diyus nga landaw nga gunaan, garing it tagnaꞌ paꞌ may ikaw nga lagi, baw seked kayti ngaytu egay pagꞌugadan mu. Magpasalamat kami ka ipiyalteg mu i egay katupusan nga guna mu ka nagpapuꞌun ka na it magꞌadiꞌ.

¹⁸ Talagang ereꞌeret nga iseg it iyan mga bangsa nga ega mamagkilala it imu. Temed ta, naꞌbut nay timpu nga ipatantu mu nay imu nga iseg. Naꞌbut nay timpu nga betanganan nat ukuman i mga miyatay, baw begayan nat tumbas i mga prupitaꞌ nga mga manigsirbi mu, baw muꞌsang mga taawan mu, kumpur may iꞌlam baw paggalang it imu, mataꞌas nga duguꞌ baw timawaꞌ. Talagang kayti nay timpu nga pakuriꞌan mu nat ega basta-basta i iyan mamagpakuriꞌ kat sinirungat langit.”

¹⁹ Ta, may miyabri nat salakwatan it Templo it Ampuꞌang Diyus duꞌun it langit, baw naltegan ku duꞌun it seled i Kaban it Pakiꞌupakat ya. Sakaling kimnilat baw nanduldug it dadakulaꞌ nga pamsar. Yimnegyeg i lugtaꞌ baw miyuran na, nga yay magtedag, dadakulaꞌ nga yilu nga subung it deset batu. Mga itu ngaytu, pamatuud it kabantugan it Ampuꞌang Diyus ngayti.