Mga Ipiyalteg 10 - Tagbanwa

Pasar it dekeyeng kasuratan

¹ Pagkatupus kayti, may naltegan ku siꞌ nga ega basta-bastang anghil nga talagang makseg. Magpapasalu kanya nga garing duꞌun it langit. Pagbubuꞌtungan kanyat kunum baw may buluntung duꞌut ulu yang ayun. Magsingkar nay rupa ya nga subung it aldaw baw subung it magtitindeg nga apuy i mga kapusuꞌan ya.

² May pagseskelen ya nga dekeyeꞌ nga kasuratan nga pagbubukaꞌen. Iwanan nga aꞌay ya, itiyungtung ya duꞌun it dagat. Iyan gibang nga aꞌay ya, situt lugtaꞌ magtutungtung.

³ Gimnaꞌuy kanya, nga atnat ngarawngaw it leon i gaꞌmaran ya. Pagkagaꞌuy ya, subuk tiyubag kanyat duldug ka kapitu mamsar, nga bilang magꞌampang.

⁴ Pagkagneg ku kayti, ikusurat ku sana. Temed nakagneg akut ampang nga garing duꞌut langit nga magꞌaat, “Itagu-taguꞌ muy inaat it pitu ngaytung pamsar it duldug. Ega isurat mu.”

⁵ Bawnga pagleteg ku siꞌ duꞌun it anghil ngayti nga magtutungtung i sang baling aꞌay ya duꞌun it dagat baw sang bali situt lugtaꞌ, ipiyatindeg yay iwanan nga alima ya.

⁶ Ka simnumpa kanya kat ngaran it Ampuꞌang Diyus nga egen it egay kaskedan, kanya nga gimnuna it langit baw banwa baw dagat, baw muꞌsang betang nira. Maat i nagnegan ku nga isiyumpa ya, “Ega nay elaten. Tumanen nay muꞌsa.

⁷ Ka basta inyepan it ikapitu ngayang anghil i taburi yat kanya, buwaten nayat Ampuꞌang Diyus i mga pabetang-betang ya nga ipagtagu-taguꞌ ya it kaꞌlay ngaytu, nga subung nat ipiyagꞌaat ya ngayan it mga prupitaꞌ nga manigsirbi yat tagnaꞌ paꞌ.”

⁸ Pagkatupus kayti, nagnegan ku sit sumaꞌup i ampang ngayti nga garing duꞌut langit. Magpakisugid sit aken nga magꞌaat, “Patpad ka duꞌun it anghil ngayti nga magtutungtung duꞌun it dagat baw kat lugtaꞌ, ka angutun muy pagseskelen ya ngayan nga pagbubukaꞌen nga kasuratan.”

⁹ Ta, minlep aku na duꞌun it anghil ngayti. Inangut ku nay kasuratan ngayti. Maat yat aken, “Iya, wayni na. Kawaꞌen mu baw kaꞌnen mu. Asat bibig mu, subung yan it taꞌmis it deges it putyukan, temed mapaꞌit yan in natlen na.”

¹⁰ Egay beken, kiyawaꞌ ku nay kasuratan ngayti baw isiyubuꞌ ku na. Talagang mataꞌmis nga matuud nga subung it deges, temed iyan natlen ku na, mapaꞌit nay suruk-surukan ku.

¹¹ Bawnga maat ya sit aken, “May ipalteg pat imu nga kaꞌilangan nga isurat mu, nga baraꞌan it kadakel nga mga bangsa pati mga adiꞌ nira, taw nga belag-belag i ampang baw pagtataꞌidan nirang mga rugar.”