Mga Ipiyalteg 1 - Tagbanwa

¹ Itung mga magsusurat nga magbebtang situt kasuratan ngaytu, mga bagay nga ipiyaꞌrut it Ampuꞌang Diyus it ki Jesu-Cristo pasar it ipiyabetang-betang nga mabut asat pagdadarapaꞌen, ka ipalteg ya nat mga magsirbi it kanya. Muꞌsa ngaytu ipiyalteg nga matuud ni Jesu-Cristo it ki Juan nga manigsirbi ya, ka may tiyaꞌeg yang anghil ya nga palteg kaytu.

² Talagang pamatuud tu ni Juan it muꞌsa nga naltegan ya nga ipiyalteg it kanya nga ampang it Ampuꞌang Diyus nga ipiyamatuud ni Jesu-Cristo.

³ Aypaꞌ dedemdemen mi tu! Magkasagyay in siyu nga magbasa duꞌun it katingpedan it mga magpamayaꞌ it kasuratan ngaytung ampang nga garing duꞌut Ampuꞌang Diyus. Baw magkasagya gasiꞌ i iyan magpagneg basta pagsunudun yay kumpur pagꞌaaten. Sabap adeꞌdeng lamang i timpu nga magꞌabut i mga itu ngaytu.

Pangumusta ni Juan duꞌut mga pagsuratan ya baw pagbantug yat Ampuꞌang Diyus

⁴ Aku nga si Juan i magsurat asat imyu, mga gurupu it mga magpamayaꞌ baw magsarig it Ampuꞌan kat pitung rugar nga sakep it Asia. Ipagpanalangin ku nga sana asat imyu nga pirmi i ildaw baw kaꞌimbengan it nakem nga ipagbegay it Diyus Amaꞌ, baw Ampuꞌan nga si Jesu-Cristo baw Espiritu Santo. Diyus Amaꞌ ngaytu, egen it egay kaskedan, ka garing it tagnaꞌ paꞌ may kanya na, pati kayti baw seked it kaꞌnu-kaꞌnu may kanya ga lamang. Baw Espiritu Santo ngaytu, tuluꞌ tu kanya it Ampuꞌang Diyus ngayting magꞌaꞌdung duꞌun it araꞌdungan ya kat pagkaꞌadiꞌ.

⁵ Kanya ngaytung si Jesu-Cristo, purus kamatuudan i kumpur ipagpamatuud ya. Iti, inggen kanyat Ampuꞌang Diyus it paꞌuliꞌ. Talagang kanya i piyakamataꞌas kat muꞌsang egnen paꞌ it paꞌuliꞌ. Baw kanya ngaytu i magbebegbeg it maski siyung magsasakep nga subuk mga adiꞌ situt sinirungat langit. Sana bantugun tami si Jesu-Cristo, nga magraras talaga it aten. Sabap kat kamataynen ya, nga ipiyaturuꞌ yay duguꞌ ya, ipiyaliꞌwan ya na kita kat panguripen it kasalaꞌan.

⁶ Binwat ya paꞌ kita nga bilang sasirduti, ka sirbiyan tami nay Ampuꞌang Diyus nga Amaꞌ ya. Baw mabut talaga nga magꞌadiꞌ tami nga bilang mga kaꞌibaan ya duꞌun it kaꞌadiꞌan ya. Eeꞌ baꞌ, bantugun kanya nga pirmi, baw magmatanyag talagay keseg it guna ya seked it kaꞌnu-kaꞌnu. Kamatuudan tu!

⁷ Dedemdemen mi tu, mabut kanya nga subuk mangindelangan it kunum. Talagang maltegan tu it muꞌsang katataawan, pati mga nagꞌimatay it kanya. Ta sabap it kanya ngaytu, sumgaw i muꞌsang bangsat taw situt sinirungat langit, ka matantuwan na niray panriga. Talagang matkaytuytu nga matuud.

⁸ Maat it Ampuꞌang Diyus, “Akuy uꞌna it muꞌsa baw aku naga i kat sinauryan. May aku naga garing it tagnaꞌ paꞌ, baw seked it kaꞌnu-kaꞌnu may aku paꞌ. Talagang egay kasbung it guna ku.”

Nagpakikita si Jesu-Cristo it ki Juan

⁹ Talagang aku nga si Juan, sulsug mi kat pamayaꞌ baw kaꞌibaan mi naga it pagpakuriꞌan sabap it pamayaꞌ tami it ki Jesus. Baw esa aku nagang sinakepan it kaꞌadiꞌan ya, baw kasubung mi it temeꞌteꞌ it pagsunud it ki Jesus ngaytu. Idiyuꞌlung aku duꞌun it pulaw nga pagpangaranat Patmos, ka yay ukuman it aken sabap it pangadal kut ampang it Ampuꞌang Diyus baw pamatuud kut mga bagay pasar it ki Jesus.

¹⁰ Iyan kaꞌsa, nga aldaw nga pagkilalaen tami nga ipagsamba tamit Ampuꞌang Diyus, kat pabetang-betang it Espiritu Santo, sakaliꞌ nga nagsipat i banwa. Sakaling may nagnegan ku kat talikudan ku nga ayun nga panggaꞌmarang dadakulaꞌ nga subuk pagꞌeypan nga taburi.

¹¹ Magꞌaat i pagꞌaaten, “Kaꞌilangan nga isurat mu kat magkaluu-lulun nga pagsuratan in unu nga bagay nga maltegan mu, bawnga ipataban muytu kat pitu ngaytung karugaran nga may magpamayaꞌ it Ampuꞌan, nga duꞌun it Efeso, Esmirna, Pergamo, Tiatira, Sardis, Filadelfia baw duꞌun it Laodicea.”

¹² Pagkagneg ku, limningaw aku, ka in siyuy magpakisugid ngaytit aken. Naltegan ku, pitung titidawan nga magtitindeg i dadaꞌtunan nira nga purus bulawan i binwat.

¹³ Baw magtitindeg duꞌun it piyagtenga-tengaꞌan it mga titidawan ngayti i subuk Taga Langit nga Ipiyanganak it Taw, magpapakay it pasaꞌkil i kasagyad baw kat deꞌgan ya may maglilikus nga bulawan nga sambut.

¹⁴ Kaputiꞌ it buꞌuk ya subuk namukaꞌ na nga langeb, baw iyan mata ya, atnat sugu it apuy.

¹⁵ Magsinggat i mga aꞌay ya subuk pirmirang tumbaga nga tiyunaw baw piyakintab. Gaꞌmaran ya subuk bugasꞌas it dakulang kensad.

¹⁶ May pagseskelen it iwanan nga alima ya nga pitung kabituꞌunan, baw may magliꞌwan duꞌun it baꞌbaꞌ ya nga atnang panare-tarem it basiꞌ nga limbak tarem. Baw iyan rupa ya, ereꞌeret nga kabibisaraꞌ, ka subung it aldaw in nakasakay nat ugtuwan.

¹⁷ Pagkalteg kut kanya ngayti, simnuꞌsub aku na duꞌut aꞌay ya. Ega nakariꞌe-riꞌeng aku ka subuk ega nay giginawa ku. Temed tiyapal ya aku it iwanan nga alima ya baw inaat ya, “Ayaw kat iꞌlam. Aku i uꞌnat muꞌsa baw aku nagay kat sinauryan. Talagang kat pamegbeg ku i muꞌsa.

¹⁸ Egen aku talaga it ega basta-bastang kaꞌgenan. Matuud natay aku temed egen aku naga kayti. Ega naytuy kaskedan it kaꞌgenan ku ngaytu. Talagang kat pamegbeg ku nay keseg it kamataynen baw rugar nga pagꞌaꞌanuꞌan it mga miyatay.

¹⁹ Aypaꞌ isurat muy mga bagay nga naltegan mu na baw mga bagay nga maltegan mu paꞌ, nga pagpaꞌulugan it muꞌsa ngaytu, mga nagꞌabut na kayti baw iyan mga magꞌabut paꞌ asan it pagdadarapaꞌen.

²⁰ Kayti ipatantu kut imu i pagpaꞌulugan it naltegan mu nga pitung kabituꞌunan nga pagseskelen it iwanan nga alima ku baw pitu ngaytung titidawan nga magtitindeg i dadaꞌtunan nira nga purus bulawan i binwat. Iyan pitu ngaytu nga bituꞌun, ladawan tu it pitu nga taraꞌgen nga magpamaalaꞌ it mga magpamayaꞌ duꞌun it pitu ngaytung karugaran. Baw itu, pitu ngaytung titidawan, itu naga, mga magpamayaꞌ duꞌun it pitu ngaytung karugaran.”