Mga Binwat 9 - Tagbanwa

Namayaꞌ na gasiꞌ si Saulo

¹ Temed ta, si Saulo ngayti, atnat kada pangginawa ya, kupuuꞌ i magpanliꞌwan, sabap ireg yang ireg nga imatayen i mga magpamayaꞌ it Ampuꞌan. Aypaꞌ, binwat ya, naꞌaduꞌun kanya it Piyakamataꞌas nga Sasirduti,

² ka miyangut duꞌun it kariꞌgenan yang kasuratan nga tabanen ya duꞌun it Damasco. Ipalteg ya duꞌun it mga magpamaalaꞌ it mga papagsambaan it mga Judio isaꞌun madakep yay kumpur maparagan ya nga magsunud it dalan ngayting pamayaꞌ it ki Jesus. Kada madakep ya, babay, lalaki, pagbabayukun i tabanen ya duꞌun it Jerusalem.

³ Pagkatanggap yat kasuratan ngayti, napanaw na kanya. Desang magꞌadeꞌdeng nat Damasco, sakaling nasakep kanyat siyang nga eyag nga garing duꞌun it langit.

⁴ Simnuꞌsub nga lagi kanya duꞌut lugtaꞌ bawnga may nagnegan ya nga esang gaꞌmaran nga magpakisugid it kanya, nga magꞌaat, “Saulo, Saulo, unuka atkaytuy buwat mu nga pagpakuriꞌan mu aku?”

⁵ “Ay, siyu ka bayan, Agalen?” maat ni Saulo. “Si Jesus aku. Aku talaga i pagpakuriꞌan mu”, maat i tubag it kanya.

⁶ “Timindeg ka na ka lumangbus ka na duꞌun it pagꞌabutun mu nga siyudad. May sumugid it imu duꞌun in unuy kaꞌilangan mu nga buwaten.”

⁷ Mga kaꞌibaan ni Saulo it magpanaw, timnitindeg na lamang sira. Egay namagkariꞌe-riꞌeng, ka magkagnegan niray tingeg it gaꞌmaran temed egay magkaltegan nirang taw nga magꞌampang.

⁸ Timnindeg na si Saulo ngayting magsusuꞌsub. Temed pagmukrat ya, ega na magkalteg kanya. Egay beken, diyundun mana kanyat mga kaꞌibaan ya ngayti seked it nakaꞌbut sira duꞌun it Damasco.

⁹ Seledat tulung aldaw, ega magkalteg kanya. Ega gasiꞌ magkaꞌen kanya baw maski danum, ega magꞌinum.

¹⁰ Ta, may magtataꞌid duꞌun it Damasco it iting timpu nga esang taw nga magpamayaꞌ it Ampuꞌan, nga pagpangaranat ki Ananias. Sakaling subung it magtagaynep kanya, ka piyakisugidan kanyat Ampuꞌan, nga magꞌaat, “Ananias.” “Wayni aku, Ampuꞌan”, maat i tubag ni Ananias.

¹¹ Nagnegan siꞌ ni Ananias, maat it Ampuꞌan, “Ananias, mapanaw ka. Paꞌaduꞌun kat karsadaꞌ nga pagpangaranat Mataldeng. Balay na Judas i abutun mu. Aaten mu sira nga magtulus ka it taw ngayang pagpangaranat ki Saulo nga taga Tarso. Siging panalangin ya kayti.

¹² Baw may naltegan ya nga subung it tiyagaynep ya. Naltegan ya, may miyabut nga esang taw nga pagpangaranat ki Ananias, nga timnapal it kanya isaꞌun makalteg siꞌ.”

¹³ Temed pagkagneg ni Ananias kayti, maat ya, “Aaꞌ, Ampuꞌan, dakel i timnuturan it aken pasar it itung taw, nga dakulaꞌ nga banar i karaꞌe-raꞌetan nga pakuriꞌ yat mga magpamayat imu duꞌun it Jerusalem.

¹⁴ Baw enged ya gasiꞌ ngaytu situt Damasco, atkayan naga. Piyaꞌintulutan kanyat mga pagbayaꞌen it sasirduti nga pandakpen yay muꞌsang magsamba baw magpanalangin asan it imu.”

¹⁵ Temed maat siꞌ it Ampuꞌan it ki Ananias, “Aduꞌunun mu na kanya, ka piniliꞌ ku nagay itung taw nga magsirbi it aken. Manuturan nayan kanya pasar it aken. Baw ega lamang mga Judio i tuturanan ya, in daꞌga mga bangsa gasiꞌ nga ega Judio, pati mga adiꞌ nira.

¹⁶ Baw yay matuud, ipatantu kut kanya nga kanya siꞌ i lumabay it dakel-dakel nga kakuriꞌan sabap it pagsirbi yat aken.”

¹⁷ Ta, egay beken, napanaw na si Ananias, dayun-dayun duꞌut iting balay. Pagkasled ya, tiyapal ya si Saulo ngayti bawnga miyampang. Maat ya, “Saulo, nga sulsug ku kat pamayaꞌ, tiyaꞌeg aku baytut Ampuꞌan. Iyan baꞌ, si Jesus nga nagpakikita it imu duꞌun it pagpanawan mu ngaytit magꞌaꞌasitu. Piyaꞌasitu ya aku isaꞌun makalteg ka siꞌ baw isaꞌun pasaruman ka it Espiritu Santo.”

¹⁸ Pagkaꞌampang ya kayti, sakaling may naꞌawaꞌ kat mata ni Saulo nga subuk siꞌsiꞌ. Pagkaꞌirit itiꞌen, nakalteg siꞌ kanya nga matuud. Egay beken, timnindeg na kanya ka nagpabawtis na.

¹⁹ Pagkabawtis, kimnaꞌen na kanya, bawnga nagꞌuliꞌnan siꞌ i keseg ya. Garing sikaytiꞌen nagpakiꞌiba na kanyat mga magpamayaꞌ duꞌut Damasco it pirang aldaw.

Magpangadal na si Saulo duꞌun it Damasco

²⁰ Buwat ya, nagpapuꞌun nga lagi it mangadal duꞌun it mga papagsambaan it mga Judio pasar it ki Jesus, nga kanya talagay Anak it Ampuꞌang Diyus.

²¹ Talagang namagkaliluꞌ i muꞌsang mamagkagneg. Maamaatan sira, “Bilaꞌ, daꞌga baꞌ itu nay taw ngayang subraꞌ nga magpakuriꞌ it muꞌsang taga Jerusalem nga magsamba baw magpanalangin duꞌun it ki Jesus ngaytu? Baw daꞌga baꞌ, iyan gasiꞌ i inasitu ya, ka tabanen ya duꞌut Jerusalem nga pamagbabayukun i mga magpamayaꞌ situ, ka ipaꞌadap duꞌun it mga pagbayaꞌen it sasirduti?”

²² Temed magdudungag-dudungag i kakayaan baw pagmaꞌiseg it nakem ni Saulo it mangadal, aypaꞌ ka subrang namagkaliluꞌ i mga Judio nga magtataꞌid duꞌun it Damasco ngayti. Ka egay magpandaꞌeg it pamatuud ya nga si Jesus ngaytu, Cristo nga matuud nga Manriribring Adiꞌ nga isiyanggup it Ampuꞌang Diyus.

²³ Iyan naꞌlay na, pagꞌisun-isunan nat mga Judio duꞌun nga imatayen nira si Saulo ngayti.

²⁴ Buwat nira, delem-aldaw pagꞌapaꞌan kanya duꞌun it mga puwirtaꞌan it kutaꞌ it siyudad ngayti, ka in limiꞌwan, imatayen nira. Temed naringid-ringidan yay kubwaten nira ngaytit kanya.

²⁵ Ta it atkayti na, ipiyapalagyu kanya it mga namayaꞌ it panulduꞌ ya. Binwat nira, piyapargud kanya duꞌut supakan bawnga itiyuꞌnay nira duꞌut sang balit kutaꞌ.

Miyuliꞌ si Saulo duꞌun it Jerusalem

²⁶ Pagkaꞌbut ni Saulo duꞌun it Jerusalem, siyukdanan ya nga maat pakiꞌiba kanya it mga magpamayaꞌ duꞌun. Temed mamagꞌiꞌlam sirat kanya. Ega pagpamayaꞌnen nira nga, kanya, esa na nga magpamayaꞌ it Ampuꞌan.

²⁷ Temed tiyabang kanya ni Bernabe. Tiyaban ya si Saulo duꞌun it mga apustul ka itiyuturan yat kanira in magꞌuꞌunu nakitaan ni Saulo i Ampuꞌan nga nagpakisugid it kanya duꞌun it dalan. Baw itiyuturan ya gasiꞌ in sang unuy pagmaꞌiseg it nakem ni Saulo it magpangadal pasar it ki Jesus duꞌun it Damasco.

²⁸ Aypaꞌ, garing sikayti, kaꞌiba-iba na ni Saulo i mga apustul ngayti duꞌun it Jerusalem. Talagang may pagmaꞌiseg it nakem ya nga magpangadal pasar it Ampuꞌan.

²⁹ Baw nangadal kanya duꞌun it mga Judio nga Ginirego i ampang, temed magpakibatir ga sira. Unupat, napikir na nira nga imatayen kanya.

³⁰ Temed, iyan naꞌrutan it mga sulsug ya kat pamayaꞌ nga atkayti i kubwaten it kanya, ipiyagꞌuruꞌ nira si Saulo seked duꞌun it Cesarea. Pagꞌabut nira duꞌun, piyasakay nira kanya isaꞌun makaꞌuliꞌ kanya duꞌun it Tarso.

Piyagayen ni Pedro i esang pilay nga si Eneas

³¹ Ta, kat iting timpu, ega nay ipagkagulu it mga magpamayaꞌ duꞌun it muꞌsang mga rugar nga sakep it Judea, Galilea baw duꞌut Samaria. Pagtabangen sirang pirmi it Espiritu Santo, aypaꞌ ka nagmapaꞌgen i pamayaꞌ nira, baw kat pangaꞌgenan nira, paggalangen nira it may iꞌlam i Ampuꞌan. Baw kat tabang it Espiritu Santo, magdudungag-dudungag i kadakel nira.

³² Ta, si Pedro ngayti, buwat yat kanya, paglekpen yay muꞌsang rugar nga may magpamayaꞌ. Kat panaw ya ngayti, nakaꞌbut kanya duꞌun it Lida, ka baꞌnawun ya gasiꞌ i mga magpamayaꞌ nga magtataꞌid duꞌun.

³³ Ta, may naltegan ya nga esang lalaki nga pagpangaranat ki Eneas. Walung taꞌun nay kaꞌlay it biyuntulan ya, ka may patay nga bagit bilug ya.

³⁴ Pagkalteg ni Pedro it pilay ngayti, inaat ya, “Eneas, kayti nga lagi, pagpagayenen ka na ni Jesu-Cristo. Magbangun ka na baw lulunun mu nay pagliliꞌtidan mu ngayan.” Pagkaꞌampang ni Pedro kayti, nagbangun na nga matuud i pilay ngayti, dayun it nakatindeg.

³⁵ Ta, muꞌsang mga taga Lida ngayti, pati mga taga Saron, nga nakalteg it magayen na kanya, namayaꞌ nga muꞌsa it Ampuꞌan.

Inggen ni Pedro i esang babay nga miyatay duꞌun it Jope

³⁶ May esang babay nga magpamayaꞌ nga taga Jope, ngaran ya si Tabita. Ngaran ya kat Ginirego nga ampang, si Dorcas. Iting babay, dakel i mga magagayen nga buwat nga pagbuwaten ya. Talagang matiyabangen kanyat mga makukuriꞌ.

³⁷ Kat iting timpu, simnarut kanyat maꞌget nga ipiyatay ya na. Pagpatay ya, inugasan i bilug ya uyun duꞌun it mga kaꞌugaliꞌan nira, bawnga ipiyadayag duꞌun it esang seled duꞌut dibwat.

³⁸ Bawnga, paribasay nagꞌadeꞌdeng i Lida baw Jope, pagkabaritaꞌ it mga taga Jope nga magpamayaꞌ nga duꞌun na it Lida si Pedro, may tiyaꞌeg nira nga duwang kataawan nga paꞌaduꞌun. Tinggunan nirat pasanguꞌ-sanguꞌ, nga sana paꞌaduꞌun nga lagi it kanira si Pedro.

³⁹ Aypaꞌ, pagkasugid it ki Pedro, miyayaꞌ kanya it kanira. Pagꞌabut ya duꞌun it Jope, tiyaban kanya duꞌun it dibwat ngayting seled nga pagdadayagan it miyatay ngayti. Pagkasled ya, nagsigdarmuk it kanya i mga balu nga babay nga mamagsugaw duꞌun. Ipiyalteg nirat kanya i muꞌsang kalasit pakayan nga tiyaiꞌ ni Dorcas, nga ildaw yat kanira iyan egen paꞌ kanya.

⁴⁰ Bawnga inaat sira ni Pedro nga duꞌun na daꞌan sirat liꞌwan. Iyan esa-esa ya mana, nanluud kanya ka nanalangin. Pagkatupus it panalangin ya, siyarunga yay miyatay ngayti baw miyampang. Maat ya, “Tabita, magbangun ka.” Egay beken, nagmukrat nga lagi si Tabita ngayti. Pagkalteg yat ki Pedro, nagbangun na kanya.

⁴¹ Singkel ni Pedro i alima ya ka ipiyatindeg. Bawnga tiyaꞌwagan yay mga balu ngayti baw beken ngayting mga magpamayaꞌ nga semled siꞌ, ka ipiyaꞌadap ya nat kanira nga talagang egen siꞌ.

⁴² Binwat ngayti ni Pedro, nanlekep duꞌun it muꞌsang lansangan it Jope. Aypaꞌ ka dakel i namayaꞌ it Ampuꞌan nga taga duꞌun.

⁴³ Kimnaꞌlay si Pedro duꞌun it Jope ngayti. Duꞌun i pagꞌiꞌistaran yat balay ni Simon nga esang manigꞌasikasu it kulit it ramu-ramu.