Mga Binwat 7 - Tagbanwa

Tubag ni Esteban duꞌun it mga magꞌimbistigar ngaytit kanya

¹ Bawnga iningkut si Esteban it Piyakamataꞌas nga Sasirduti, “Ta, unu, matuud i mga pagꞌaaten nira ngaytu?”

² Timnubag si Esteban, maat ya, “Mga kagiyaringanan ku baw kasulsugan, asi-asi pat imyu, pagnegan mit magayen i ampangen ku. Iyan Ampuꞌang Diyus nga subrang mabantug, nagpakikita kanya duꞌun it kiyaꞌapuꞌ-apuꞌan ta nga si Abraham, iyan duꞌun paꞌ kanya it Mesopotamia, nga ega paꞌ nagpaꞌugad duꞌut Haran.

³ Inaat ya kanya, ‘Limꞌid ka na situt pagtataꞌidan mu ngaytung banwa. Tananan mu nay mga kaduguꞌan mu ka paꞌaduꞌun kat banwa nga itulduꞌ kut imu.’

⁴ Egay beken, liminꞌid na kanya duꞌun it banwa it mga Caldeo nga pagtataꞌidan ya ngayti, ka nagpaꞌugad na duꞌut Haran. Garing duꞌut iting banwa, pagpatay it amaꞌ ya, piyapaꞌugad kanya sit Ampuꞌang Diyus situ nat itung banwa nga pagtataꞌidan ta na ngaytu kayti.

⁵ Temed, lamang piyapaꞌugad situ si Abraham ngayti, maski sang tapal nga lugtaꞌ, egay ibinggay it Ampuꞌang Diyus it kanya nga sadili ya. Temed, lamang atkayti, isiyanggup it Ampuꞌang Diyus nga talagang ipasadili ya it kanya i banwa ngaytu, nga subliyen it mga tungtung-inapuꞌ ya, lamang ega pay aꞌanak yat iting timpu.

⁶ Baw ipiyagꞌaat gasit Ampuꞌang Diyus it kanya, nga maat ya, ‘Ituy kamatuudan, nga mga tungtung-inapuꞌ mu, manumpang sira duꞌut banwat beken. Ega lamang desang manumpang, magsirbi gasiꞌ sira ka uripnen. Talagang ipabetang sirat makuriꞌ, seledat epat nga gatus nga taꞌun.

⁷ Temed, iyan banwa ngayang muripen it kanira, talagang rigaen ku. Garing sikayan makalꞌid na sira duꞌun, ka kaꞌuliꞌ sira siꞌ situt banwa ngaytu. Bawnga aku nga Ampuꞌang Diyus, sambaen nira siꞌ situ.’

⁸ Bawnga pasar it pakiꞌupakat it Ampuꞌang Diyus duꞌun it ki Abraham, ipiyagꞌurdin it Ampuꞌang Diyus nga, magtungtung-magꞌinapuꞌ, turiꞌan nira i kada lalaki duꞌun it kanira nga imandaꞌan it sakep naga sira it pakiꞌupakat ya ngayti. Aypaꞌ, pagpanganak nirat ki Isaac, pagꞌikawalung aldaw, tiyuriꞌan na kanya. Ta, si Isaac ngayti i amaꞌ ni Jacob, baw si Jacob i amaꞌ it sang puluꞌ baw duwang kalalakiyan nga sira na ngaytu i piyanggaring-garingan it mga kuyunan tami nga mga Judio.

⁹ Siguru magkaꞌrutan mi naga i binwat it mga anak ngayti ni Jacob it esang sulsug nira nga si Jose. Paribasay subraꞌ nay inggit nirat ki Jose ngayti, ipiyaꞌalang nira duꞌut namagtaꞌlib nga mga manigdagang bawnga tiyaban kanya duꞌun it Egipto. Temed yay matuud, si Jose ngayti, talagang pagtatarimaen nga pirmi it Ampuꞌang Diyus.

¹⁰ Kamatuudan, ipiyagribri ya kanya kat muꞌsang kakuriꞌan nga nabetangan ya, baw binggayan paꞌ kanyat ega basta-bastang kasepsep, aypaꞌ ka siyagyaan kanya it adiꞌ it Egipto. Bawnga binwat it adiꞌ ngayti, ipiyatindeg ya si Jose nga gubirnadur nga magpupudir it muꞌsang banwa it Egipto, pati pamalay-balay it adiꞌ ngayti.

¹¹ Ta, nagtaꞌlib i mga taꞌun, may miyabut nga masakit nga getem duꞌut Egipto. Atnaga i duꞌut Canaan ngayting pagtataꞌidan it mga kiyaꞌapuꞌ-apuꞌan ta nga mga anak ngayti ni Jacob. Talagang dakulang kakuriꞌan nira ka makuriꞌ i magkapisiꞌat pangaꞌen.

¹² Temed nabaritaꞌan ni Jacob nga duꞌut Egipto, bastanti naga i pangaꞌen duꞌun. Aypaꞌ piyapaꞌaduꞌun yay mga anak ya, nga mga kiyaꞌapuꞌ-apuꞌan ta ngayti, ka mamari.

¹³ Iyan ikadwa nang aduꞌun nira, yapay kakilala nira nga, palan, sulsug nira nga si Jose i pagꞌabutun nira, nga kanyay magpamaalaꞌ it pamgay it kumpur magpamari ngayti. Nakilalaan nira kanya ka nagpakilala na si Jose it kanira. Duꞌun kayti naꞌrutan it adiꞌ ngayti i pasar it mga kaduguꞌan ni Jose.

¹⁴ Bawnga ipiyapisiꞌ na ni Jose i amaꞌ ya nga si Jacob baw muꞌsat kaduguꞌan ya, nga kadakel nira, pitung puluꞌ may limang kataawan.

¹⁵ Aypaꞌ iyan i ikiyapaꞌaduꞌun ni Jacob baw mga kiyaꞌapuꞌ-apuꞌan tami it Egipto. Duꞌun nay piyamagpatayan nira.

¹⁶ Temed maski duꞌun nat Egipto i piyamagpatayan nira, ega naga duꞌun i limbengan it kanira, in daꞌga, duꞌun nagat Canaan ngayti nga banwa nira. Idiyuꞌun nira nagat paglebngan nirang kubkub duꞌun it Siquem nga inalang ni Abraham duꞌut mga anak ni Hamor.”

¹⁷ Maat paꞌ ni Esteban, “Ta, yan duꞌun nat Egipto i mga kiyaꞌapuꞌ-apuꞌan ta, magsisigi nay pandakel nira. Iyan naꞌlay na, nga magꞌadeꞌdeng nay timpu nga matuman nay isiyanggup it Ampuꞌang Diyus it ki Abraham, dadaklan na sirang banar.

¹⁸ Bawnga may nakapagꞌadiꞌ na duꞌun nga ega pagkilalaen ya i pasar it ki Jose ngayti.

¹⁹ Dakulaꞌ nang binwat ya nga pangakal kat bangsa ta. Piyakuriꞌan ya nga banar i mga kagiyaringanan tami, ka pagregesen ya sira nga pataꞌnan na duꞌut liꞌwan i mga madaragen nira isaꞌun ega na maꞌgen.

²⁰ Kat iting timpu ipiyanganak si Moises nga talagang magaye-gayeng waꞌwaꞌ. Impet kanyat tulung bulan it mga amaꞌ ya.

²¹ Temed iyan ega na makataguꞌ nira duꞌut seled it balay, idiyuꞌlung na nira duꞌut alaid bawnga tiyananan na. Temed may nakaparag it kanya, baw inanak kanya it babay nga anak it adiꞌ ngayti. Talagang pabetang yat waꞌwaꞌ ngayti, atnat ipiyagrasyaꞌ ya.

²² Aypaꞌ, pagdakulaꞌ ni Moises ngayti, tiyulduꞌan kanya it muꞌsang inadalan it mga mapipikir nga taga Egipto. Mabantug kanya kat pangangampangan baw buwat.

²³ Iyan magꞌidad na si Moises it epat nga pulung taꞌun, napikir ya nga letganan i kabetangan it mga kabilug ya ngayting mga tungtung-inapuꞌ ni Israel.

²⁴ Pagꞌabut ya duꞌun, may naltegan ya nga esang kabilug ya nga pagpakuriꞌan it esang taga Egipto. Pagkalteg ya, tiyabang yay kabilug ya ngayti. Inimatay yay magpakuriꞌ ngayting taga Egipto.

²⁵ Tanud ni Moises nga masepsepan it mga kabilug ya ngayti nga kanya i gamiten it Ampuꞌang Diyus nga paliꞌwan it kanira kat pagkaꞌuripen nira. Temed ta, ega nasepsepan nira.

²⁶ Pagꞌeyag siꞌ, may naltegan ya nga duwang kabilug ya nga magraraꞌet. Inlep ya sira ka sabatan, isaꞌun magꞌayusan sira. Inaat ya, ‘Aa bilaꞌ! Ayaw kamut raraꞌet ka sang kaduguꞌ kamu.’

²⁷ Temed isiyuꞌmud ga kanya it sang kataawan ngayting magpakiraꞌet baw inaat, ‘Bilaꞌ! Siyuy nagpatindeg it imu nga pagbayaꞌen baw manigꞌukuman it amen?

²⁸ Barang kuꞌimatayen mu gasiꞌ aku, subung it binwat mu ngayan katꞌapun it taga Egipto ngayti!’

²⁹ Pagkagneg ni Moises it iting inampang, miyalagyu kanya nga lagi. Naꞌaduꞌun kanyat alaid nga banwa nga pagpangaranat Madian. Duꞌun nay piyangasawaan ya. Manganak sira, lalaki nga duwa.

³⁰ Iyan epat nang pulung taꞌun i kaꞌlay ni Moises duꞌun it Madian ngayti, kaꞌsang aldaw nga duꞌun kanyat tiꞌngir it Bukid it Sinai nga duꞌun it kapupuyangtan nga rugar, naltegan yay Anghil it Ampuꞌang Diyus, nga duꞌun it magsugu nga kayu-kayu nga magdiklap-diklap na.

³¹ Pagkalteg ni Moises it sugu ngayti, talagang naliluꞌ kanya. Aypaꞌ ka inlep ya ka eket-eketen. Temed desang magꞌadeꞌdeng, sakaling nanggaꞌmaran i Ampuꞌang Diyus,

³² nga magꞌaat, ‘Aku i Ampuꞌang Diyus it mga kagiyaringanan mu nga si Abraham, si Isaac baw si Jacob.’ Pagkagneg ni Moises kayti, yimnegyeg kanyat iꞌlam, baw ega na magkaꞌurum lemteg.

³³ Bawnga inaat siꞌ kanya it Ampuꞌang Diyus, ‘Awaꞌen muy talumpaꞌ mu ka, lugtaꞌ nga pagtitindegan mu, ega basta-bastang lugtaꞌ, ka liyampudan ku ngaytu.

³⁴ Talagang magkaltegan ku i muꞌsang pakuriꞌ it mga taga Egipto kat piniliꞌ ku ngaytu nga mga taawan. Magkagnegan ku talaga i mga pangabang nira. Aypaꞌ limnampud aku na ka naꞌbut nay timpu nga iribri ku sira. Ta kayti, papaꞌuliꞌen ku ikaw duꞌun it Egipto.’”

³⁵ Maat paꞌ ni Esteban, “Ta, si Moises ngayti nga ega kinilala nira, ka maat nira, ‘Siyuy nagpatindeg it imu nga pagbayaꞌen baw manigꞌukuman it amen?’, kanya na ngayti i ipiyatindeg it Ampuꞌang Diyus nga pagbayaꞌen nga paliꞌwan it kanira kat pagkaꞌuripen nira ngayti. Nabwat yaytu kat tabang it Anghil ngaytit Ampuꞌang Diyus nga naltegan ya duꞌun it kayu-kayu.

³⁶ Eeꞌ baꞌ, si Moises ngayti i nagpaliꞌwan it kanira duꞌun it Egipto. Dakel i nabwat ya nga tandaꞌanan nga kalililuꞌang bagay duꞌun it Egipto ngayti, baw duꞌun it Madarag nga Dagat, baw kat seledat epat nga pulung taꞌun nga pagpanguꞌnaan ya sira duꞌun it kapupuyangtan nga rugar.

³⁷ Baw si Moises naga ngayti i nagsugid kat mga kagiyaringanan ta nga maat ya, ‘Mabut i aldaw nga may ipatindeg it Ampuꞌang Diyus kat mga kabilug mi nga esang Prupitaꞌ nga subung nagat aken.’

³⁸ Baw iyan namagtingped nay mga kagiyaringanan ta ngayti duꞌun it Bukid it Sinai nga duꞌun it kapupuyangtan nga rugar, si Moises naga ngayti i piyakisugidan it Anghil it Ampuꞌang Diyus. Ipiyaskel it kanya i mga egay kaꞌawaꞌan nga ampang it Ampuꞌang Diyus nga ipagkusugid yat aten.

³⁹ Temed, mga kagiyaringanan ta, paribasay siging pangaruruy nirat Egipto, nga mga ladawan nga magkaltegan i pagsambaen it mga taga duꞌun, ega na kusunud sirat ki Moises ngayti. Talagang kupangindiꞌ na sirat kanya.

⁴⁰ Aypaꞌ ka inupakat nira si Aaron, nga maat nira, ‘Muwat ka it mga ladawan it Ampuꞌang Diyus, nga yay manguꞌnat aten nga ganti ni Moises, ka egaytu magkaꞌrutan tami in naꞌunu naytu si Moises ngaytu nga nagpaliꞌwan it aten duꞌut Egipto.’

⁴¹ Ta egay beken, namagbuwat na sirat ladawan nga ipiyasbung nira it uꞌuybut bakaꞌ. Pagkaꞌman, namagꞌanteng na sirat ipagpasalamat duꞌun it ladawan ngayti, langkuy it namagkasagyaan na, ka pagsagyaan nira talaga i binwat nira ngayti nga ladawan.

⁴² Aypaꞌ miyabut nga piyabaya-bayaꞌan na sira it Ampuꞌang Diyus. Piyataꞌnan na sira nga sumamba it mga paryaman nga duꞌut langit, subung nagat magbebtang duꞌun it kasuratan it mga prupitaꞌ it tagnaꞌ, nga magꞌaat, ‘Kamung mga tungtung-inapuꞌ ni Israel, ega aku i pagsambaen mi kat mga panalisi baw pasalamat ngayting pagꞌantengen mi duꞌun it kapupuyangtan nga rugar, seledat epat nga puluꞌ ngayting taꞌun.

⁴³ Kamatuudan, pagpiri-pirisiꞌnen mi i mga binwat mi nga ladawan it mga paryaman duꞌut langit, nga yanay pagsambaen mi. Paꞌaaten ku ngaytu nga pagpiri-pirisiꞌnen mi, magkapuru-purun ngayting bala-balay nga pagsambaan mit ladawan it ki Moloc, baw beken, ladawan ngaytit ki Renfan nga ipiyasbung it bituꞌun. Aypaꞌ ka ipiyabetang-betang ku nga rumpakan kamu, baw pabayaꞌen kamu duꞌun it saꞌli it Babilonia.’”

⁴⁴ Maat paꞌ ni Esteban, “May ipiyagbegay nagat Ampuꞌang Diyus it mga kagiyaringanan tami nga magkapuru-purun nga bala-balay, iyan duꞌun paꞌ sirat kapupuyangtan nga rugar, iti ngayti nga magpamatuud it duꞌun kanya nagang pirmi it kanira. Bala-balay ngayti, talagang ipiyasbung it ladawan nga ipiyalteg it ki Moises, subung nagat ipiyagꞌurdin it kanya.

⁴⁵ Siyubli-subli nagaytut mga kaꞌanakan nira nga pagpanguꞌnaan na ni Josue ngayting simnubli it ki Moises. Taban nira nagat siminled situt banwa ngaytu nga nakanira, iyan inimugaw nira i datiyan nga mga taga situ kat tabang it Ampuꞌang Diyus. Talagang iti nay siyubli-subli nirang papagsambaan nirat Ampuꞌang Diyus seked it timpu it adiꞌ nga si David.

⁴⁶ Paribasay, si David ngayti, talagang siyagyaan it Ampuꞌang Diyus, inangut ya nga in mapakay, ipalugut ya it kanya nga patindeg it balay nga papagsambaan nirat Ampuꞌang Diyus, sira nga mga tungtung-inapuꞌ ni Jacob.

⁴⁷ Ipiyalugut it Ampuꞌang Diyus nga may ipatindeg nga balay, temed si Solomon mana nga anak ni David i piyalugtan yat patindeg.

⁴⁸ Lamang nagpalugut i Ampuꞌang Diyus ngaytu nga Piyakamataꞌas, simpri ega magtaꞌid kanya duꞌut balay nga binwat lamang it taw, adimaat taw kanya. Ka subung nagat ipiyagꞌaat it esang prupitaꞌ it tagnaꞌ nga magꞌaat,

⁴⁹ ‘“Talagang langit i araꞌdungan ku kat pagkaꞌadiꞌ. Lugtaꞌ, pagtutungtungan lamang it aꞌay ku”, maat it Ampuꞌang Diyus. “Unung kalasit balay i mabwat mi nga ipabalay mit aken? U unung rugar i bagay it aken nga papaꞌnaan ku,

⁵⁰ it aku nagay nagbuwat it muꞌsa ngaytung mga bagay?”’

⁵¹ Ta kayti”, maat ni Esteban, “mararapar i aken. Ka talagang kadsen it ulu mi! Baw adat mit imyu, subung talaga it mga taw nga egay pagkilala it Ampuꞌang Diyus, ka pagpasngelan mi lamang i ampang ya. Pagkuntraꞌen mi nga pirmi i Espiritu Santo, subung nagat buwat it mga kagiyaringanan mi.

⁵² Daꞌga baꞌ, mga prupitaꞌ it tagnaꞌ, daꞌgay-daꞌga piyakuriꞌan it mga kagiyaringanan mi ngayti? Baw inimatay nira paꞌ i mga piyapasugid it Ampuꞌang Diyus pasar it pangabut it mataldeng nga manigsirbi ya nga si Jesus. Ta kamu na kayti, kamu i subuk dimnagang it ki Jesus ngayti. Kamu i nagpaꞌimatay it kanya,

⁵³ kamu ngaytu nga piyaꞌyagan it mga urdin it Ampuꞌang Diyus nga ipiyaskel duꞌun it ki Moises, nga mga anghil i bilang suruꞌan ya. Temed ta, ega naga siyunud mi.”

Inimatay na nira si Esteban

⁵⁴ Ta, pagkagneg it mga pagbayaꞌen ngaytit mga Judio, talagang magkeeket nay nipen nirat pangise-iseg.

⁵⁵ Temed si Esteban ngayti, kat keseg it Espiritu Santo nga magsasarum duꞌut kanya, timningaraꞌ duꞌun it langit, baw naltegan ya i ega basta-bastang kabantugan it Ampuꞌang Diyus. Naltegan ya gasiꞌ si Jesus nga magtitindeg duꞌun it iwanan nga ayun it Diyus Amaꞌ.

⁵⁶ “Aruy”, maat ya, “letganan mi ti! Magkaltegan ku, inabri i langit. Waytiꞌen magtitindeg duꞌun it iwanan nga ayun it Diyus Amaꞌ si Jesus ngayting taga langit nga ipiyanganak it taw!”

⁵⁷ Pagkagneg nira kayti, namagpanggesang-gesang na, piyamagtagnepan nay talinga isaꞌun daꞌna makagneg it pagꞌampangen ni Esteban. Bawnga derengan sira nat rusub it kanya.

⁵⁸ Riyayak nira duꞌun it liꞌwan it siyudad ngayti bawnga biyuntalan kanyat batu seked it naꞌimatay na nira. Mga nanistigu ngayti kuntraꞌ it ki Esteban, nga mamagꞌimatay it kanya, piyamagꞌawaꞌ niray panliꞌwan nga pakayan nira ka masimber. Idiyaꞌtun nira duꞌun it sarungaan it esang taw nga pagpangaranat ki Saulo.

⁵⁹ Siging buntal nira, siging panalangin ni Esteban nga magꞌaat, “Ampuꞌan ku nga si Jesus, tanggapen mu i kiyarurwa ku.”

⁶⁰ Iyan magꞌababaꞌ nay ginawa ya, limningkuꞌud kanya baw nanggaꞌmaran it dadakulaꞌ. Maat ya, “Ampuꞌan, ipasinsiya mut kanira i itung binwat nirang kasalaꞌan.” Magkatupus i iting ampang ya, pagbugtuꞌan kanya.