Mga Binwat 6 - Tagbanwa

May ipiyatindeg kat katengdanan nga manigpamgay it ipagtabang

¹ Ta, kat timpu ngayting itiꞌen, nga magdudungag-dudungag nay mga magpamayaꞌ, miyabut nga may pagraꞌe-raꞌetan it nakem it mga Judio nga Ginirego i ampang, nga kuntraꞌ kat mga Judio nga Hinebreo i ampang. Maamaatan sira nga, in aldaw-aldaw pagpamgayan i mga balu it ipagtabang it kanira, unuka paglipatan i mga balu nga Ginirego i ampang?

² Aypaꞌ binwat it sang puluꞌ baw duwa ngayting mga apustul, tiningped nira i kadakel it mga magpamayaꞌ bawnga inaat nira, “Ega mapakay nga kaming mga apustul, talikudan namen i panulduꞌ it ampang it Ampuꞌang Diyus ka yanay sarungaen, pamgay it ipagtabang.

³ Aypaꞌ kayti, magayen miliꞌ kamut pitung kalalakiyan nga ipatindeg namen kat katengdanan ngaytu nga manigpamgay. Kaꞌilangan, iyan i piliꞌen mi, mga taw nga pagkilalaen it kadakel mi nga masunud sirang banar it Espiritu Santo nga magsasarum duꞌun it kanira baw ustuꞌ talagay kasepsep nira.

⁴ Ka kami ngaytu, iyan i dakulaꞌ nga pagsarungaen namen, magpanalangin baw magpanulduꞌ na ngaytut ampang it Ampuꞌang Diyus.”

⁵ Pagkagneg it kadakel ngayti, napakay sirang muꞌsa. Egay beken, namagpiliꞌ na sira. Uꞌnang piniliꞌ nira, esang taw nga pagpangaranat ki Esteban, nga makseg i pamayaꞌ ya baw talagang masunud kanya it Espiritu Santo nga magsasarum duꞌun it kanya. Mga beken nga piniliꞌ nira, si Felipe, si Procoro, si Nicanor, si Timon, si Parmenas baw si Nicolas nga esang taga Antioquia nga siminled na kat pagkaJudio.

⁶ Bawnga ipiyaꞌadap nira i pitu ngayti duꞌun it mga apustul ka piyanalanginan it pamagtatapalen.

⁷ Ta, subraꞌ na nga nasarunga nira i panulduꞌ nirat ampang it Ampuꞌang Diyus. Kamatuudan, talagang dimnakel nang banar i mga magpamayaꞌ duꞌut Jerusalem. Pati mga sasirduti dakel na gasing namayaꞌ.

Kiyuntraꞌ si Esteban bawnga diyakep

⁸ Ta, yan si Esteban ngayti, talagang matanyag duꞌun it kanya i dakulang ildaw baw ega basta-bastang kakayaan nga garing duꞌun it Ampuꞌang Diyus. Kamatuudan, dakel i magkabwat ya nga tandaꞌanan nga kalililuꞌang bagay kat matat kadakel.

⁹ Temed may kimnuntraꞌ nagat kanya nga beken nga mga Judio nga kaꞌuyutan it esang gurupu nga pagpangaranat Mga Ipiyaliꞌwan. Mga Judio ngaytu, may taga Cirene, taga Alejandria, taga Cilicia baw taga Asia gasiꞌ. Daꞌsira magkapakay it panulduꞌ ni Esteban ngayti, aypaꞌ ka namagpakidaꞌeg sirat kanya.

¹⁰ Temed ega pagdaꞌgen nira i kasepsep ni Esteban ngayti baw mga pagꞌampangen ya kat panakem it Espiritu Santo.

¹¹ Iyan namuyaan nirang atkayti, binwat nira, may mga tiyangdanan nira nga paliꞌwan it kaꞌambutan nga kuntraꞌ it ki Esteban. Maat i ambut nira, “Nagnegan namen baꞌ i panibabaꞌ yat ki Moises, pati Ampuꞌang Diyus gasiꞌ, ka pagkuntraꞌen yay mga urdin tami nga ibinggay it Ampuꞌang Diyus it ki Moises ngayti.”

¹² Talagang yanay buwat it mga mamagpakidaꞌeg ngaytit ki Esteban, pagpaꞌulu-uluwan niray katataawan, pati mga mataꞌas nga ginuꞌu baw mga manigpaꞌyag it urdin, nga kumuntraꞌ it ki Esteban ngayti. Ta, unupat diyakep na nira si Esteban. Tiyaban kanya duꞌun it Sanedrin ka ipiyaꞌadap duꞌun it mga pagbayaꞌen it mga Judio.

¹³ Bawnga may timnindeg nga magpanistigu it kaꞌambutan nga magꞌaat, “Talagang itung taw, sigi-siging ampang ya nga panibabaꞌ it Templo ngaytung ega basta-bastang papagsambaan tamit Ampuꞌang Diyus baw kuntraꞌ kat mga urdin ya.

¹⁴ Ka”, maat nira, “nagnegan nameng ipagsugid ya nga, kunuꞌ, si Jesus ngayting Nazaretanen, ranggaꞌen yay Templo ngaytu baw gantiyan yay mga kaꞌugaliꞌan nga ipiyasubli ni Moises it aten.”

¹⁵ Pagkagneg it muꞌsa ngayting mga kaꞌuyutan it Sanedrin nga magꞌaꞌdung duꞌun, sinyekan nira si Esteban nga ega paglisuꞌun niray mata nira ka naltegan nira, rupa ya, magsilaw subuk rupat anghil.