Mga Binwat 5 - Tagbanwa

Panriga nga tiyanggap na Ananias sabap it kasalaꞌan nga binwat nira

¹ May esang taw nga pagpangaranat ki Ananias. Ngaran it asawa ya, si Safira. Namagpaꞌalang sira gasit esang lugtaꞌ nira.

² Pagkapaꞌalang nira, tiyaban ni Ananias i bayad duꞌun it mga apustul, temed may piyagꞌuyunan nira duwa magꞌasawa nga ega ipuꞌsa. Pagꞌabut ni Ananias, maat ya, “Waytu gasiꞌ i amen nga tabang. Yanay seked it baya-bayad it ameng ipiyaꞌalang nga lugtaꞌ.”

³ Temed maat ni Pedro it kanya, “Ananias, unuka siyumbayaꞌ mu i panakem ni Satanas it imu nga ambutan i Espiritu Santo? Tanud mu mataguꞌ i piyagꞌuyunan mi duwa magꞌasawa nga idawaꞌ mi nagay beken.

⁴ Ka daꞌga baꞌ ipiyaꞌalang mi ngayting lugtaꞌ, sadili mi? Ta simpri, bayad, imyu. Kayti in sang unuy ireg mi nga ibgay simpri masunud i imyu ka imyu yan, basta isugid mi i kamatuudan. Unuka napikir mi i mambut ngaytu? Nangangaꞌulugan nga ega desang taw i inambutan mi, in daꞌga Ampuꞌang Diyus.”

⁵ Ta, pagkagneg kayti ni Ananias, gimimbaꞌ kanya nga lagi ka natay na. Aypaꞌ ka namagꞌiꞌlam i kumpur nakalteg baw nakabaritaꞌ kayti.

⁶ Binwat it mga kamangaꞌwaꞌan duꞌun, biyuꞌtungan niray miyatay ngayti bawnga pinirisiꞌen ka ilbeng.

⁷ Ta, ega naꞌlay, mga magtutulu nang uras, miyabut i asawa ni Ananias nga magpanundug. Egay uru-urut yat nabetangan it asawa ya ngayti.

⁸ Pagꞌabut ya, iningkut kanya ni Pedro. Maat ya, “Unu, matuud nga itu nay kapuꞌsaat bayad it lugtaꞌ nga ipiyaꞌalang mi?” “Eeꞌ”, maat ni Safira, “yanayan bayang matuud.”

⁹ Maat siꞌ ni Pedro, “Unuka atkayan i piyagꞌuyunan mi, nga sukdanan i Espiritu Santo nga piyapasarum it Ampuꞌan situt bilug ta? Wayan na it salakwatan, namagkaꞌuliꞌ na, i nanlebeng it asawa mu. Kayti, paribasay piyagꞌuyunan mi i ambut ngaytu, makatundug ka nagat asawa mu.”

¹⁰ Ta atkayti naga, pagkagneg it babay ngayti, gimimbaꞌ kanya nga lagi ka natay gasiꞌ, subung nagat asawa ya. Egay beken, pagkasled it mga namagpanlebeng ngayti, yay piyagꞌaꞌandaꞌat mata nira, miyatay siꞌ ngayti. Aypaꞌ iti siꞌ i ilimbeng nira. Limbengan nira, duꞌun nagat umid it asawa ya ngayti.

¹¹ Garing kayti, subraꞌ na nga namagꞌiꞌlam i muꞌsang magpamayaꞌ. Atnagay muꞌsang mga beken nga namagkabaritaꞌ.

Mga kalililuꞌang bagay nga magkabwat it mga apustul

¹² Kat mga apustul ngayti, dakel i nabwat nira nga tandaꞌanan nga kalililuꞌang bagay kat matat kadakel. Baw talagang urunyun i muꞌsang mga magpamayaꞌ nga mamagtingped aldaw-aldaw duꞌun it paꞌaaten ngayting Portico ni Solomon.

¹³ Temed iyan beken nga ega paꞌ namayaꞌ, ega magkaꞌurum paragi-ragiꞌ duꞌun. Takaꞌ pagdaya-dayawun nira i mga magpamayaꞌ ngayti.

¹⁴ Baw aldaw-aldaw magdudungag-dudungag i magpamayaꞌ, babay, lalaki. Talagang dakel na nga banar.

¹⁵ Ta paribasay dakel nay piyagayen it mga apustul, buwat it mga taw duꞌun, pagtabanen nira i mga magsarut, nga duꞌun nagat pagliliꞌtidan nira nga ikamen, ka ipagduꞌun it tepad it mga karsadaꞌ it siyudad ngayti. Pagꞌiꞌinawaren nira nga in duꞌun i panawan ni Pedro, maꞌlungan lamang i mga magsarut ngaytit aninu ya, gumayen na sira.

¹⁶ Baw magꞌaꞌabut-aꞌabut i mga taw nga magpanggaring duꞌut kalalansanganan nga duꞌun it linibut it Jerusalem. Pagtabanen nira i mga magsarut nira, pati mga pagpapulpugun it maraꞌe-raꞌet. Talagang kumpur pagtabanen ngayti, gimnayen.

Mga nalabayan it mga apustul sabap it pagsunud nirat ipiyagꞌurdin ni Jesus

¹⁷ Iyan atnakayti, timnalaluꞌ nang banar i inggit it Piyakamataꞌas nga Sasirduti baw kadakel it mga kaꞌibaan ya nga mga Saduceo.

¹⁸ Aypaꞌ inaduꞌun niray mga apustul ka diyakep baw pinirisu.

¹⁹ Temed pagdelem, inabriyan i talaꞌep it esang anghil nga tiyaꞌeg it Ampuꞌan ka piyaliꞌwan ya sira.

²⁰ Bawnga inaat ya sira, “Paꞌaduꞌun kamu sit Templo, baw tulduꞌan mi siꞌ i kadakel pasar it kaꞌgenan ngaytu nga egay kaskedan.”

²¹ Aypaꞌ, pagꞌeyag, naꞌaduꞌun sirang matuud it Templo ka namagpanulduꞌ siꞌ. Ta, mga namagpadakep ngaytit kanira, nga Piyakamataꞌas ngayting Sasirduti baw kaꞌibaan yang mga Saduceo, ipiyatawag niray muꞌsang mga kaꞌibaan nirang beken, kumpur kaꞌuyutan nagat Sanedrin, nga sira i mga pagbayaꞌen it mga Judio. Iyan tiꞌmes na sira, ipiyapisiꞌ na nira duꞌut pirisuwan i mga apustul.

²² Temed desang naꞌuruꞌ-uruꞌ i mga taawan nira ngayting tiyaꞌeg ka, abutan nira, ega nay duꞌun nga mga apustul ngayti. Nagpaꞌuliꞌ sirang lagi ka ipiyaꞌrut.

²³ Maat nira, “Tabing galang it imyu nga muꞌsa, ega na bay duꞌun nga sira. Abutan namen talagang pagsisiraduun nagat magayen i pirisuwan ngayti. Duꞌun naga mamagtitindeg i mga guwardiya. Temed abriyan namen, daꞌnay maski sang kataawang ipagtaꞌeg mi ngayat amen.”

²⁴ Pagkagneg it mga pagbayaꞌen it mga sasirduti baw pagbayaꞌen it mga guwardiyat Templo, talagang nalibeg i pikiran nira ka ega naꞌrutan nira in unuy abutun kayti nga matanaꞌan.

²⁵ Iyan sigi pay runding nira, may miyabut nga garing duꞌut Templo nga simnugid, “Tabiꞌ it imyu ka may kusugiden ku. Duꞌun siꞌ bat Templo i mga taw ngayang pinirisu mi, magtegel sit panulduꞌ.”

²⁶ Ta, egay beken, naꞌaduꞌun nga lagi i pagbayaꞌen it mga guwardiyat Templo, pati mga taawan ya ngayti. Pagꞌabut nira, piyamagpabayaꞌ siꞌ i mga apustul, temed ega regesang pabayaꞌ ka mamagꞌiꞌlam naga sirat kadakel it taw ngayti nga mamagpagneg, ka barang buntalan sirat batu.

²⁷ Pagꞌabut nira siꞌ duꞌun it pamagtingpedan ngayti, ipiyaꞌadap i mga apustul duꞌun it mga kaꞌuyutan it Sanedrin ngayti. Inimbistigar sira it Piyakamataꞌas nga Sasirduti.

²⁸ “Daꞌga basaꞌan”, maat ya, “maseked-seked nga piyaar namen na kamu nga ega na ipanulduꞌ mi i pasar it iyang taw? Temed magꞌeꞌget kamu ga. Ilingkep mi nat Jerusalem i panulduꞌ mi ngaytu, baw ireg mi pang ipabekbek it amen i sabap it kamataynen ya.”

²⁹ Temed timnubag si Pedro baw mga kaꞌibaan yang mga apustul. Maat nira, “Dapat nga kaꞌirgan it Ampuꞌang Diyus i sunudun namen, ega kaꞌirgan it taw nga kuntraꞌ kat itiyaꞌeg ya ngaytit amen.

³⁰ Ituy kamatuudan, iyan Ampuꞌang Diyus ngaytu it mga kagiyaringanan tami, inggen ya it paꞌuliꞌ si Jesus ngayan nga inimatay mi ka ipiyaransang mi duꞌun it krus.

³¹ Pagkaꞌgen it kanya, miyuliꞌ na duꞌun it langit ka binggayan nat Diyus Amaꞌ it ega basta-bastang kataꞌasan duꞌun it iwanan nga ayun ya. Baw kanya na ngaytu i Manigpamegbeg baw Manriribri tami, nga magbegay nat aten nga mga tungtung-inapuꞌ ni Israel nga masinguliꞌan baw indiꞌan i mga kasalaꞌan tami isaꞌun mapasinsiya.

³² Ta kami ngaytu, talagang magpamatuud kami nga kamatuudan i muꞌsa ngaytu. Baw magpamatuud naga i Espiritu Santo nga ipagpasarum it Ampuꞌang Diyus kat mga magsunud it kanya.”

³³ Ta, pagkagneg it mga pagbayaꞌen ngayti, timnalaluꞌ nga banar i iseg nira. Ireg nira nang pangimatayen i mga apustul ngayti.

³⁴ Temed yan atnakayti, may timnindeg nga sang kataawan nga Pariseo nga kaꞌuyutan nagat Sanedrin ngayti. Ngaran ya, si Gamaliel. Esa kanya nga manigtulduꞌ it mga urdin nga isiyurat ni Moises baw paggalangen kanya it muꞌsang mga taw. Isingkat ya nga tabanen daꞌan duꞌut liꞌwan i mga apustul ngayti.

³⁵ Pagkagaring, bawnga miyampang kanya. Maat ya, “Mga kabanwa ku nga tungtung-inapuꞌ ni Israel, kaꞌilangan nga maꞌintur ta, nga pikiren tami it magayen in unuy kubwaten tami it kanira ngaytu.

³⁶ Ka siguru ega paꞌ nalipatan mi si Teudas ngayang nagpabantug-bantug nga kunuꞌ, mataꞌas kanya nga taw. Egay beken, nakaꞌambilung it epat nga gatus nga kataawan. Temed, pagkaꞌimatay it kanya, namagkatari-tariwanak nay naꞌambilung ya ngayti. Limniꞌwan basaꞌan nga egay liyapusan.

³⁷ Sumunud sing minwat it atkaytu, si Judas nga taga Galilea, iyan timpu nga paninsus it katataawan. Dakel gasing taw i napasunud ya, temed pagkaꞌimatay gasit kanya, ega nagay liyapusan ka subung nagat tagnaꞌ ngayti, namagkatari-tariwanak gasiꞌ.

³⁸ Aypaꞌ kayti, ituy ipagꞌaat kut imyu nga ega mi riꞌnge-riꞌngen i itung mga taw. Pataꞌnan mi na lamang sira. Ka in garing lamang kat taw i pagpaꞌresan nira ngaytu, simpri ega gasiꞌ i lapusan kaytu. Subung nagat tagnaꞌ ngayti.

³⁹ Temed in garing duꞌun it Ampuꞌang Diyus, simpri ega bayan mapaaran mi, isan yan limiꞌwan pang magpakikuntraꞌ kamu it Ampuꞌang Diyus.”

⁴⁰ Pagkagneg nira kayti, napakay naga sira. Temed piyasled nira naga i mga apustul ngayti ka piyamagtiꞌkulan. Baw parabir piyaliꞌwan nira, piyaar nira siꞌ nga ega na sumaꞌu-saꞌup it manulduꞌ pasar it ki Jesus ngayti.

⁴¹ Ta it atkayti i nabetangan it mga apustul, masagyang-masagya sirang gimnaring duꞌun it Sanedrin ngayti, ka binggayan sirat Ampuꞌang Diyus it galang, ka piyalabay ya sira it kaꞌeꞌyaꞌan sabap it pakilagpit nirat ki Jesus.

⁴² Aypaꞌ maꞌunu pedkanan nira i buwat nira ngayti, ipiyasigi nira ga. Aldaw-aldaw duꞌun sira it Templo, baw duꞌun gasiꞌ it kababalayan, magpanulduꞌ pasar it ki Jesus nga kanya i Cristo ngayting Manriribring Adiꞌ nga isiyanggup it Ampuꞌang Diyus.