Mga Binwat 3 - Tagbanwa

Napagayen na Pedro i esang pilay

¹ Kaꞌsang apun nga kabali nang alaid i aldaw, namagpaꞌaduꞌun sit Templo na Pedro, duwa ni Juan, ka uras siꞌ it panalangin duꞌun.

² Ta, may esang taw nga pilay, nga pilay ya ngayti, sekad ya. Iting taw, aldaw-aldaw pagtabanen kanyat beken duꞌun it salakwatan it piyakakamaꞌyagan it Templo nga pagpangaranat Salakwatang Magayen, ka magpaꞌildaw-ildaw it kumpur mamagseled.

³ Pagkalteg yat kana Pedro nga semled gasiꞌ, kimnayap na kanya.

⁴ Tiyermek nira nga duwa it semyek i taw ngayti bawnga miyampang si Pedro. Maat ya, “Lemteg ka sinit amen.”

⁵ Egay beken, liminteg kanya ka magꞌeꞌlat nat begayan.

⁶ Temed maat ni Pedro, “In pirak baw bulawan, egay magkabgay namen, temed may beken nagang ibgay kut imu. Kat keseg it guna ni Jesu-Cristo nga taga Nazaret, timindeg ka na kayti ka makapanaw ka nayan.”

⁷ Dengat ampang ngayti ni Pedro, singkel yay iwanang alimat pilay ngayti ka ipiyatindeg. Ta, dengat sekel ni Pedro, gimnayen nga lagi i dipirinsiya it mga biyengel-bengel baw kararapa it duwa nga aꞌay ya.

⁸ Nagpatitigdaw i timnindeg bawnga nagpasuliꞌ-sulit magpanaw. Pagseled na Pedro, nagpakidngan na kanya, sigi nang tigda-tigdaw yat magpanaw, sigi gasing pagbantug yat Ampuꞌang Diyus.

⁹ Naltegan it muꞌsang taw duꞌun nga magkapanaw na kanya baw magbantug kanya it Ampuꞌang Diyus.

¹⁰ Paribasay kilala na niray iting taw nga kanya nay pilay nga pirming ipagpaꞌdung duꞌun it Salakwatang Magayen ngaytit Templo ka magpaꞌildaw-ildaw, talagang naliluꞌ sira. Nalibeg i pikiran nira it in unuka sakaling nakapanaw na kanya.

Tiyulduꞌan ni Pedro i mga taw pasar it ki Jesu-Cristo

¹¹ Iyan naltegan it kadakel nga sigi pang seskel it lalaki ngaytit kana Pedro duwa ni Juan, dimnali-daliꞌ na sirat melep it kanira duꞌun it pagꞌaꞌatpan nga bagiꞌ it piyakakamaꞌyagan it Templo ngayti nga pagpangaranat Portico ni Solomon. Talagang naliluꞌ sirang banar.

¹² Pagkamuya ni Pedro, inaat ya sira, “Mga kabanwa ku nga tungtung-inapuꞌ ni Israel, unuka magkaliluꞌan mi siꞌ i itung taw? Baw unuka atkayay panenyekan mit amen, adimaat ikiyapanaw ya ngaytu, kat keseg it sadili nameng kiyaꞌrutan u pagsunud it kaꞌirgan it Ampuꞌang Diyus?

¹³ Yay matuud, gunaytu it Ampuꞌang Diyus it mga kiyaꞌapuꞌ-apuꞌan ta nga si Abraham, si Isaac baw si Jacob. Ka Ampuꞌang Diyus ngaytu it mga kagiyaringanan tami, binggayan ya nat ega basta-bastang kabantugan i manigsirbi ya nga si Jesus, kanya naga nga ipiyaꞌalima mi duꞌun it gubirnadur nga si Pilato. Eeꞌ baꞌ, daꞌga basaꞌan maski napikir na ni Pilato ngayti nga ipaliꞌwan ya si Jesus, temed magpanduwa-duwa nay pandaꞌga mi?

¹⁴ Talagang diyaꞌga mi kanya ngaytu nga mataldeng baw alaid kat muꞌsang kasalaꞌan, ka iyan i inangut mi nga paliꞌwanen, esang taw nga mangingimatay.

¹⁵ Baliswaꞌ talagay binwat mi ka, si Jesus ngayti, kanya i puꞌun it kaꞌgenan ta, temed kamataynen i itiyumbas mit kanya. Takaꞌ inggen kanyat Ampuꞌang Diyus it paꞌuliꞌ, baw magpamatuud kami kaytu, ka pagkaꞌgen ya ngaytit paꞌuliꞌ, nakitaan namen naga kanya.

¹⁶ Ta kayti, magkaltegan mi ngaytung pilay nga kilala mi naga, piyagayen kanya it guna ni Jesus. Eeꞌ baꞌ, kat keseg it pamayaꞌ baw pagsarig namen it ki Jesus ngayti, piyagayen yay taw ngaytu it gayen banar kat adapan mi.

¹⁷ Ta kayti, mga kasulsugan, magkaꞌrutan ku nga ega natantuwan mi, pati mga pagbayaꞌen ta, nga in siyu talaga si Jesus, aypaꞌ ka binwat mi i karaꞌe-raꞌetan ngaytu.

¹⁸ Temed kat binwat mi ngaytu, tiyuman it Ampuꞌang Diyus i ipiyanakem yat mga prupitaꞌ it tagnaꞌ nga ipagpaꞌrut yat katataawan, nga maat, pakuriꞌan nagat mga taw i Cristo nga Manriribring Adiꞌ nga isiyanggup ya.

¹⁹ Aypaꞌ kayti, magsinguliꞌ kamut kamatuudan baw pasakep kamu nat Ampuꞌang Diyus, isaꞌun mapasinsiya kamu nga maꞌawaꞌ i mga kasalaꞌan mi.

²⁰ Basta ituy buwaten mi, begayan kamut Ampuꞌang Diyus it ega basta-bastang kasagyaan baw kaꞌimbengan it nakem mi. Baw beken, mabut i aldaw nga ipalampud ya siꞌ si Jesu-Cristo, iyan Manriribri nga ipiyabetang-betang it Ampuꞌang Diyus nga magꞌadiꞌ it aten.

²¹ Temed kayti duꞌun siꞌ kanya it langit, seked it natuman na i kumpur ipiyabetang-betang it Ampuꞌang Diyus nga ipiyagpasugid yat mga prupitaꞌ nga manigsirbi yat tagnaꞌ paꞌ.

²² Ka dedemdemen mi i inaat ni Moises, nga maat ya, ‘Mabut i aldaw nga may ipatindeg it Ampuꞌang Diyus kat mga kabilug mi nga esang prupitaꞌ nga subung nagat aken. Kaꞌilangan, pagnegan mit magayen baw sunudun mi i kumpur aaten yat imyu.

²³ Ka in siyuy ega sumunud it itung prupitaꞌ, talagang mabeꞌgat i panriga it kanya, ka maꞌiriꞌ kanya kat mga taawan it Ampuꞌang Diyus.’

²⁴ Eeꞌ baꞌ, muꞌsang mga prupitaꞌ, garing pat ki Samuel, daꞌgay-daꞌga simnugid pasar it itu na nga timpu, kayti ngaytu.

²⁵ Kita na ngaytu kayti i pagpaꞌiguꞌan it iting mga inampang it mga prupitaꞌ sabap, pagtuman it Ampuꞌang Diyus it ipiyagsugid nira ngaytu, kayti na ngaytung timpu ta. Baw pasar it pakiꞌupakat it Ampuꞌang Diyus kat mga kiyaꞌapuꞌ-apuꞌan tami, kita nagay pagpaꞌiguꞌan it isiyanggup ngayat Ampuꞌang Diyus it ki Abraham nga magꞌaat, ‘Manggaring kat mga tungtung-inapuꞌ mu, maꞌildawan i muꞌsang bangsa situt sinirungat langit.’

²⁶ Ta, kitay uꞌna-uꞌna nga nakatanggap it ildaw ya ngaytu ka, pagkapatindeg it Ampuꞌang Diyus it manigsirbi ya nga si Jesus, kita nga mga Judio i tiyaꞌgan ya, nga pasinguliꞌen ya kita baw paꞌindiꞌen it mga karaꞌe-raꞌetan nga pamagbuwaten tami.”