Mga Binwat 28 - Tagbanwa

Magayen i pagꞌistimar it amen it mga taga Malta, duꞌut pulaw ngayti nga napabnitan namen

¹ Pagkabnit namen, bawnga naꞌrutan namen i ngaran it iting pulaw, palan Malta.

² Magagayen talagay adat it mga taga duꞌun kayti ka ega basta-bastay ildaw nirat amen. Nagꞌapuy sirang lagi it piyadagpiꞌan it amen ka talagang ereꞌeret na nga keleg namen, beken it daꞌna gasiꞌ magtiꞌdaw nga uran.

³ Si Pablo ngayti, nanguꞌmit-kuꞌmit kanyat mga kayu nga idungag it dumuꞌput. Desang ipagpaduꞌput ya na, iyan nadangdang nat init it apuy, may limniꞌwan na nga dukul. Kimnulibeꞌbed duꞌun it alima ya baw kimnagat.

⁴ Pagkalteg it mga taga duꞌun ngayti it dukul ngayting kapapatay nga magkukulibeꞌbed duꞌun it alima ni Pablo, maat nira, “Aaꞌ, talagang itung taw, mangingimatay it masigkataw ya. Ka ungaytu ga, lamang nakaribri kanya kat dagat, ega nagaytu maꞌgen ka ega mapalagyuwan yay tiksaꞌen.”

⁵ Temed ipiyamimiꞌrik ni Pablo duꞌut apuy i dukul ngayti. Daꞌga naga kanya naꞌunu.

⁶ Sigi nang eꞌlat it mga taga Malta ngaytit manggetek na u gembaꞌ nat biglaꞌ si Pablo ka matay na. Temed ega. Iyan naꞌlay na sirat niniid, nga egay magkamuyaan nirang pagꞌugadan it kinataw ni Pablo, nagbaꞌgu siꞌ i pikiran nira. “Aaꞌ,” maat nira, “talagang itung taw, ega taw-tiyaw na lamang. Esa naytu nga diyus.”

⁷ Pagbayaꞌen duꞌun it iting pulaw, si Publio. Adeꞌdeng duꞌun it napabnitan namen ngayti i lugtaꞌ ya. Kanya i timnanggap it amen. Nakatlu kami duꞌut kanira, baw talagang piyaltegan ya kamit magayeng adat.

⁸ Ta, natakaꞌan nameng magsarut i amaꞌ ni Publio ngayti, pagramigan baw pagsakitat tinaꞌi nga ipagpamanaw-panaw. Siminled si Pablo duꞌun it irigaꞌan ya bawnga piyanalanginan it pagtatapalen. Ta, gimnayen nga lagi i sarut ya ngayti.

⁹ Pagkabaritat kadakel it binwat ngayti ni Pablo, kumpur magsarut duꞌun it pulaw ngayti, piyamagtaban na duꞌut ki Pablo. Kada mapanalanginan ya, magpedek i sarut.

¹⁰ Talagang dakel i mga begay nirat amen nga panggalang nirat amen. Baw ega lamang iti, ka iyan naꞌbut nay timpu nga sumakay kami siꞌ, dakulay ikiyargaꞌ nira duꞌun it barkuꞌ nga mga bagay nga kaꞌilangan namen.

¹¹ Temed naꞌlay i ikiyasakay namen ka piyataꞌlib namen i panagramig nga timpu. Inabut kamit tulung bulan duꞌut iting pulaw bawnga nakasakay kami. Siyakayan namen, barkuꞌ nga nagpaꞌimbeng duꞌun ka nagpataꞌlib gasit iting timpu. Iting barkuꞌ, garing gasiꞌ duꞌun it Alejandria, pagpangaranat Castor baw Polux.

Nanlangbus kami na duꞌun it Roma

¹² Pagsakay namen, nagpadungguꞌ kami duꞌut Siracusa. Nakatluy kaꞌlay namen duꞌun bawnga simnakay kami siꞌ.

¹³ Garing kami siꞌ duꞌun, burdahiꞌ i panakay namen seked nat naꞌbut namen, Regio. Pagꞌeyag it aldaw pabur siꞌ i diminres, aypaꞌ nakadiritsu na i sakay namen, nga pagꞌeyag siꞌ, duꞌun kami nat Puteoli.

¹⁴ Pagkatingdal may nakitaan namen nga mga sulsug kat pamayaꞌ. Inupakat nira kami nga, in mapakay sana, patinir kami duꞌun it kanira seledat sang lingguꞌ. Bawnga napanaw kami nay limnangbus duꞌun it Roma.

¹⁵ Iyan nabaritaꞌan it mga magpamayaꞌ duꞌun it Roma ngayti nga magꞌaꞌabut kami, ega biyali niray alaid, namagpanusmu sirat amen. May simnusmut amen duꞌun it lansangan it Foro de Appio. Iyan beken, duꞌun it lansangan it Tres Tabernas i kanira manang siyusmuwan. Pagkalteg nga lagi ni Pablo it kanira, nagpasalamat kanya duꞌun it Ampuꞌang Diyus baw kiminseg siꞌ i nakem ya.

¹⁶ Pagꞌabut namen duꞌun it Roma, inintulutan si Pablo nga manadilit balay nga taꞌidan ya. Piyaguwardiyaan lamang kanya it sundaluꞌ.

Pagkaꞌbut ni Pablo duꞌut Roma, lamang pagguguwardiyaan it sundaluꞌ magkapanulduꞌ naga kanya

¹⁷ Iyan nakatlu na, ipiyatawag ni Pablo i mga pagbayaꞌen it mga Judio duꞌun it Roma ngayti. Iyan natingped na sira, maat ni Pablo it kanira, “Aku ngaytu, mga kasulsugan, lamang maat egay binwat ku nga kuntraꞌ kat bangsa ta u kuntraꞌ kat mga siyubli-subli tami nga kaꞌugaliꞌan, temed diyakep nira aku duꞌun it Jerusalem bawnga ipiyaꞌalima nira akut mga Romano ka pinirisu.

¹⁸ Ireg it namagdakep ngaytit aken nga daꞌku na egnen. Temed, mga Romano, ireg nirang paliꞌwanen aku ka, pagꞌimbistigar nirat aken, egay naparagan nira nga dapat ikabetangan it aken it ukuman nga kamataynen.

¹⁹ Temed it ega magkapakay it mga Judio nga paliꞌwanen aku, aypaꞌ naregesan nay nakem kut magꞌapiral situt Impiradur. Egaytu maat may ikudimanda ku nga kuntraꞌ kat bangsa ta.

²⁰ Aypaꞌ ka kayti, ipiyatawag ku kamu ka ireg kung magkita-kitaen tami. Ireg ku nga pakisugi-sugid it imyu, isaꞌun makapatantu kut imyu nga pagsesgetan akut kadina ngaytu sabap lamang it pamayaꞌ kut Manriribring Adiꞌ nga isiyanggup, kanya nga pagpapaꞌbutun tami nga muꞌsa nga mga tungtung-inapuꞌ ni Israel.”

²¹ Maat it mga taw ngayti, “Yanaytuy kaꞌlay, egay surat nga miyabut situt amen nga garing duꞌut Judea nga magsugid it pasar it imu. Baw iyan magkaꞌasitu nga mga kabanwa ta nga maggaring duꞌun, egay itiyuturan u magkarunding nira nga karaꞌe-raꞌetan nga binwat mu.

²² Takaꞌ, it situ ka na, ireg nameng magnegan in unuy masugid mu sabap it pamayaꞌ mu ngaytu. Ka iyan lamang i magkaꞌrutan namen nga, maski aring banwa, talagang pagkuntraꞌen i mga magpamayaꞌ it iyan nga pagꞌadalan.”

²³ Aypaꞌ piyagꞌupakatan niray aldaw nga ipagtingped nira siꞌ duꞌun. Pagkaꞌbut it iting aldaw, dakel sira nga miyabut duꞌut balay ngayting pagꞌiꞌistaran ya. Nagꞌapun egay beken nga buwat ni Pablo, magpaꞌyag baw magpamatuud duꞌun it kadakel ngayti pasar it kaꞌadiꞌan it Ampuꞌang Diyus. Paggaringen ya, duꞌun it mga isiyurat ni Moises baw mga prupitaꞌ. Pagpaꞌresan ya sirat papamayaꞌnen it si Jesus i pagpaꞌiguꞌan, nga kanya i Cristo ngayting Manriribring Adiꞌ nga isiyanggup nga pagpapaꞌbutun nira.

²⁴ Mga piyaꞌyagan ni Pablo ngayti, may namayaꞌ, may ega.

²⁵ Daꞌsira magparag-paragen, aypaꞌ nanganya-kanya nat uliꞌ. Temed parabir sira nakagaring i miyuliꞌ, inaat sira ni Pablo, “Talagang matuud i inaat it Espiritu Santo kat mga kagiyaringanan mi, nga isiyurat it prupitaꞌ ngaytit tagnaꞌ nga si Isaias, nga magꞌaat,

²⁶ ‘Aaten muy ining mga taw, “Maski manamar kamu nat pagneg, talagang daꞌkamu makasepsep. Baw maski semyek kamu na nga semyek, ega makilalaan mi i pagletganan mi.”

²⁷ Talagang ining mga taw, piyadsen na niray ulu nira. Paglagpasen nay mga talinga nira baw ipagpeyeng na niray mga mata nira. Ka in daꞌga atkayan, barang mamagkalteg naga sira, mamagkagneg naga, mamagkasepsep naga, baw paꞌuliꞌ naga sira situt aken, nga mapagayen ku naga sira, arit ega.’”

²⁸ Maat pay paꞌugdun ni Pablo, “Aypaꞌ it atkayan, nga ega kupamayaꞌ i kadaklan it mga Judio, kaꞌilangan matantuwan mi tu, nga duꞌun nat mga taw nga ega Judio i pagtaꞌgan it amen nga mangadal it Magayen ngaytung Baritaꞌ it Ampuꞌang Diyus pasar it karibriyan. Talagang pagsisiguruun ku nga ega dumaꞌga sira.”

²⁹ Pagkatupus ni Pablo it iting inampang ya, namaggaring nay mga Judio ngaytit muliꞌ. Ega basta-bastay inda-indaꞌegen nira it magpanaw.

³⁰ Seledat duwang taꞌun, duꞌun nagay pagꞌiꞌistaran ni Pablo it pagꞌaꞌarkilaan ya ngayting balay nga bilang ipiyasadili na it kanya. Kada taw nga magtungbalay duꞌun it kanya, egay pagdaꞌgaen ya.

³¹ Ipagpangadal yat kanira it magayen i pasar it kaꞌadiꞌan it Ampuꞌang Diyus, baw muꞌsang panulduꞌ pasar it Ampuꞌan nga si Jesu-Cristo. Baw egay maski siyu nga magsamrang it kanya.