Mga Binwat 27 - Tagbanwa

Gimnaring na na Pablo nga iduꞌlung na kanya duꞌun it Roma

¹ Iyan naꞌbut nay aldaw nga isakay namen, nga ipaduꞌlung nat gubirnadur si Pablo duꞌun it Roma nga sakep it Italia, ipiyakarguꞌ ya si Pablo ngayti baw beken nga mga pirisu duꞌun it esang kapitan it sundaluꞌ nga pagpangaranat ki Julio. Kaꞌuyutan kanya it dakulang guruput mga sundaluꞌ nga pagtaꞌwaget Gurupu it Impiradur.

² Siyakayan nameng barkuꞌ, barkuꞌ nga garing duꞌun it Adramitio, nga magpaꞌaduꞌun it mga papadungguꞌan nga duꞌun it Asia. Miyayaꞌ nagat amen i esang kaꞌiba-iba ni Pablo garing it tagnaꞌ, nga si Aristarco nga taga Tesalonica nga sakep it Macedonia.

³ Ipangadwang aldaw it sakay namen, nagpadungguꞌ kami duꞌun it Sidon. Pagkadungguꞌ duꞌun, piyaltegan ni Julio si Pablo it magayeng nakem ka inintulutan ya nga maningdal duꞌut mga iba-iba ya isaꞌun pakikita it kanira baw, in unuy tabang nira, matabang kanyat mga kakurangan ya.

⁴ Pagsakay namen sit garing duꞌun, daꞌkami nakapandiritsu ka sungsungun i deres. Panakay namen, ayun kat binit nga bali it pulaw it Chipre.

⁵ Iyan nadipag namen nay luꞌuk it Cilicia baw Panfilia, nakaꞌbut kami na duꞌun it Mira, nga esang lansangan it Licia.

⁶ Pagꞌabut namen duꞌun, may naparagan it pagbayaꞌen namen ngayting kapitan it sundaluꞌ, nga barkuꞌ nga garing duꞌun it Alejandria nga magpapaꞌaduꞌun it Italia. Aypaꞌ inaat ya kami nga sikayti siꞌ i panakayan namen.

⁷ Piyanawat pirang aldaw i sakay namen ka pirming sungsungun i deres. Apa-apasan i ikiyaꞌbut namen duꞌut patuꞌ it Gnido. Bawnga pagkapatuꞌ namen duꞌun, daꞌkami na nakapanggerteng. Aypaꞌ namiluk kami nat nandipag duꞌun it pulaw it Creta nga patuꞌ it Salmon.

⁸ Pagkadipag namen duꞌut pulaw ngayti, siging kayaꞌmat it sakay namen it magpangumbinitan. Takaꞌ talagang apa-apasan nagay ikiyaꞌbut namen duꞌut esang papadungguꞌan nga rugar nga pagpangaranat Magayeng Dudungguꞌan nga adeꞌdeng it siyudad it Lasea.

⁹ Paribasay dakulaꞌ nang atrasu it sakay namen, inabut kami nat timpu nga kaꞌiꞌilang nang ipagsakay. Kamatuudan, nakataꞌlib nay aldaw it piyakamataꞌas nga pagpuwasa. Aypaꞌ inupakat sira ni Pablo. Maat ya,

¹⁰ “Tabing galang it imyu, subuk magkamuyaan ku nga ikaꞌilang nay sakay ta ngaytu. Siguru, dakulaꞌ nga kagastaꞌan in dimiritsu tami paꞌ. Ega lamang barkuꞌ ngaytu baw mga kargaꞌ, kalapis pay pati ginawa ta.”

¹¹ Temed ega piyamayaꞌ it kapitan ngaytit sundaluꞌ i inaat ni Pablo, in daꞌga, iyan i piyamayaꞌ ya, ampang it timunil, nga kanyay pagbayaꞌen it mga barugsakay, baw ampang gasiꞌ it tagpuꞌun it barkuꞌ ngayti.

¹² Ka maat nira nga ega magayeng tiniran i duꞌun kayting dudungguꞌan in padadaꞌet. Iyan kunuy magayeng dudungguꞌan, duꞌun it Fenice nga sakep nagat Creta ngayti, ka kubli i duꞌun. Aypaꞌ, ireg it kadaklan nga sumakay siꞌ, nga apasen i Fenice ngayti. Sana kaꞌbut sira duꞌun, bawnga elatan nay makataꞌlib i panagramig nga timpu.

Biyagyuwan kami nay magsasakay

¹³ Ta, yan namuyaan nira nga gimnanti nay deres nga subuk salatan na, baw ega naga masbeg, simnagya sira ka tanud nira, makatabus na. Aypaꞌ biyatun na niray pamundu ka simnakay siꞌ. Panakay namen, magpangubay lamang it Creta.

¹⁴ Temed, ega naꞌlay kamit sasakay sakaling biyales siꞌ i deres ngayti it subuk tugpa-tugpa nga ereꞌeret na nga sebeg. Pangaran it mga taga duꞌun it iting deres, Euraclidon.

¹⁵ Iyan pinsag nay barkuꞌ ngayti, daꞌna magkaꞌunu-unu. Piyabayaꞌan namen na lamang i ipagpirpir.

¹⁶ Pagkapabali namen duꞌut pula-pulaw nga pagpangaranat Clauda, lingeb-lingeb it dekeyeꞌ. Aypaꞌ piyaꞌresan namet dumluꞌ i pagtutundanen nga papabnitan.

¹⁷ Pagkadluꞌ, iyan siꞌ i binwat nira, piyalikusan it dadakulaꞌ nga lubid i pagsasakayan namen ngayti. Bawnga, paribasay magꞌiꞌlam sirat ibelbeg duꞌun it dakulang gusun nga duꞌut patuꞌ it Libia, biyubud na niray layag nirang malabeg, baw paribasay ega nay mabwat, magpapirpir na lamang.

¹⁸ Ta, dakulaꞌ talaga nga kakuriꞌan namen ka magꞌereꞌeret gay bagyu ngayti. Aypaꞌ, pagꞌeyag it aldaw, buwat nira, ipagbuntal na duꞌut dagat i mga kargaꞌ isaꞌun yumaꞌngan i barkuꞌ.

¹⁹ Pagꞌikatlu nga aldaw, yanay ipagbuntal it mga barugsakay ngayti, mga kagamitan nira duꞌun it barkuꞌ.

²⁰ Bawnga pagtaꞌlib it pira-pirang aldaw nga egay naltegan nameng aldaw u mga bituꞌun ka sigi-siging bagyu, pagsisiguruun namen nga maꞌilang kami na talaga.

²¹ Iyan naꞌlay na ngayting daꞌsira na magkaꞌen, timnindeg si Pablo duꞌut adapan nirang muꞌsa baw miyampang. Maat ya, “Mga kaꞌibaan, in beteꞌ namayaꞌ kamut aken nga daꞌtami daꞌan limꞌid duꞌut Creta, ega atkaytuy nabetangan ta nga kadakulat kakuriꞌan baw kagastaꞌan.

²² Temed, kayti, pasagyaen mi i nakem mi ka egay makalapis nga ginawa it maski siyu it aten, in daꞌga itu lamang, barkuꞌ ngaytu i maranggaꞌ.

²³ Naꞌrutan kuytu ka, kat delem, miyabut situt aken i esang anghil. Tiyaꞌeg kanya it Ampuꞌang Diyus, kanya nga magsasakep it aken baw pirmi nga pagsirbiyan ku.

²⁴ Maat i inaat it anghil ngayti, ‘Ayaw kat iꞌlam, Pablo, ka kaꞌilangan nga makaꞌadap ka nagat Impiradur duꞌun it Roma, aypaꞌ daꞌka maꞌilang. Baw tiyubag gasiꞌ i panalangin mu nga, mga kaꞌibaan mut magsasakay, egay maꞌilang nga maski siyut kanira.’

²⁵ Aypaꞌ, mga kaꞌibaan, paksegen mi lamang i nakem mi ka pagpamayaꞌnen kung banar nga magmatuud i isiyugid ngaytut anghil it aken nga inaat it Ampuꞌang Diyus.

²⁶ Temed kat pabetang-betang ya, sumangrad i barkuꞌ ngaytu duꞌun it esang pulaw.”

Iyan naꞌlay kami nat papirpir may naꞌbut nameng banwa

²⁷ Iyan ikasang puluꞌ baw epat na nga delem, nga sigi pang pirpir it amen duꞌun it Dagat nga Adriatico, desang maglubu-lubuk nay delem pagtatanudun it mga barugsakay ngayti nga may adeꞌdeng na nga banwa.

²⁸ Siyundaan niray kaꞌararem, duwang puluꞌ pang depa. Pagkalangbu-langbus siꞌ, siyundaan nira siꞌ. Naꞌanuꞌan nirang sang puluꞌ baw lima manang depa.

²⁹ Paribasay miniꞌlam na sirat makasaꞌpat kami duꞌut malbaw, binwat nira, iꞌinlug nay epat nga pamundu duꞌut buliꞌ. Baw ipagpanalangin nira nga sana maldaw na.

³⁰ Bawnga iyan atnakayti, namagkapikir it mga barugsakay ngayti nga tananan nira nay barkuꞌ ngayti. Aypaꞌ nagpapuꞌun sirat ituꞌnay duꞌut dagat i pagkakargaꞌen ngayting sakayan nga yay ligwatan nira, manglug it sinipit duꞌut uꞌnaan.

³¹ Pagkamuya ni Pablo kayti, inaat yay magkakarguꞌ ngayting kapitan it sundaluꞌ baw mga taawan ya. Maat ya, “Iyan bay pagpikiren nira ngayan, tananan i barkuꞌ. In atkayan, maꞌilang kamuy imyu.”

³² Pagkagneg it mga sundaluꞌ ngayti, tiyabtab niray lubid nga seget it sakayan ngayting papabnitan. Piyataꞌnan nay maꞌulug duꞌun it dagat.

³³ Iyan magpangeyag-eyag na, inupakat ni Pablo i kadakel ngayti nga sana kumaꞌen na sira. Maat ya, “Magayen, kumaꞌen kamu na ka, ungaytu, itu nay ikasang puluꞌ baw epat nga aldaw, daꞌkamu na kimnaꞌen. Nasasawan mi nay raꞌe-raꞌet it banwa ngaytu.

³⁴ Aypaꞌ, kayti, pagneg kamut aken. Kaꞌilangan kumaꞌen kamut paꞌgen nga kaꞌen, ka yay matuud, maski sang naay nga buꞌuk mi, egay maꞌilang.”

³⁵ Pagkaꞌampang ya kayti, kimnuꞌmit kanyat tinapay bawnga nagpasalamat duꞌun it Ampuꞌang Diyus kat adapan it kadakel ngayti. Pagkatupus it pasalamat ya, piniꞌsang-piꞌsang ya ka kimnaꞌen nat kanya.

³⁶ Pagkalteg it beken, gimnayen i nakem nirang muꞌsa. Namagkaꞌen na gasiꞌ sirat kanira.

³⁷ Kadakel nameng muꞌsa it magsasakay, duwang gatus baw pitung puluꞌ may enem nga kataawan.

³⁸ Pagkakaꞌen nameng muꞌsa, iyan siꞌ i binwat nira, ipagꞌulug nay mga sakut tirigu duꞌut dagat isaꞌun yumaꞌngan paꞌ i barkuꞌ.

Maat pabnit kami, desang naranggaꞌ i barkuꞌ ka nakasaꞌpat i dulung ya duꞌut gusun

³⁹ Iyan maꞌyag nang banar, ega nakilalaan nira in unuy iting banwa nga napabnitan namen ngayti. Temed nalawag nira, may baybayan. “Aaꞌ,” maat nira, “siguru, luꞌuk yan.” Bawnga nagrunding-rundingen na sira nga, in mapakay, sumukdan it padungguꞌ duꞌun.

⁴⁰ Aypaꞌ, tiyabtab na niray mga laygen, piyabayaꞌan na duꞌut dagat i mga pamundu, bawnga inuꞌbad niray papaꞌnget it timun. Pagkauꞌbad, sinintak niray puuk ka padungguꞌ na duꞌun it baybayan ngayting nalawag nira.

⁴¹ Temed nataban it sebeg i barkuꞌ duꞌun it pagdarakepat langeb. Unupat nakasaꞌpat nay dulung ka may gusun palan. Ega na nakalꞌid. Baw paribasay duꞌun it pagbukaꞌan, nasalsag nga lagi i buliꞌ it barkuꞌ ngayti.

⁴² Iyan atnakayti, ireg it mga sundaluꞌ, pangimatayen nay mga pirisu ka barang, in kabnit paꞌ, malagyu sira.

⁴³ Temed ega magkapakay i kapitan nira ka ega ireg ya nga maꞌimatay si Pablo. Aypaꞌ piyaar ya sira. Bawnga inaat ya nga in siyuy magkalanguy, manaptap na ka lumanguy na, muꞌna na duꞌun it binit.

⁴⁴ Iyan beken, manikep-sikep nat maꞌambayan nirat pabnit, subuk mga tablaꞌ baw beken nga mga buwat-buwat it barkuꞌ nga maglutaw. Aypaꞌ, kat atkayti nga buwat, ega nagay nalmes. Namagkabnit nga muꞌsa duꞌun it baybayan.