Mga Binwat 25 - Tagbanwa

Ipiyaꞌapyat duꞌun it ki Festo i dimanda it mga Judio temed nagꞌapiral si Pablo duꞌun it Impiradur

¹ Garing it pagꞌabut ni Festo duꞌun it Cesarea, tulung aldaw i kaꞌlay ya duꞌun, bawnga naꞌaduꞌun kanyat Jerusalem.

² Pagꞌabut ya duꞌun, egay beken nga siyugid it mga pagbayaꞌen it sasirduti baw beken nga pagbayaꞌen it mga Judio, nagpaꞌapyat siꞌ duꞌut kanya it dimanda nirat ki Pablo.

³ Baw pagꞌangutun nira gasiꞌ duꞌun it gubirnadur ngayti nga, in mapakay, ipaduꞌlung ya si Pablo duꞌun it Jerusalem ka ubsun nay surugiden. Temed, antap it nakem nira, apaꞌan na duꞌut dalan ka imatayen.

⁴ Temed maat i tubag ni Festo it kanira, “Ega yan mapakay. Pagpipirisuun paꞌ si Pablo duꞌun it Cesarea baw ega maꞌlay muliꞌ aku naga duꞌun.

⁵ Iyan bay magayen, may ipabayaꞌ mit aken nga mga ginuꞌu mi. Ka in matuud nga may binwat ya nga karaꞌe-raꞌetan, duꞌun manay paꞌapyatan nirat dimanda mi.”

⁶ Egang matuud naꞌlay si Festo duꞌun it Jerusalem ngayti. Nakawalu u in daꞌga nakapuluꞌ lamang, miyuliꞌ na kanya duꞌun it Cesarea. Pagꞌabut ya duꞌun, pagꞌeyag it aldaw, miyadung na kanya duꞌut araꞌdungan it manigꞌukuman bawnga ipiyapisiꞌ ya si Pablo.

⁷ Pagꞌabut ni Pablo duꞌun, liniputan na kanyat mga Judio ngayting garing duꞌun it Jerusalem. Dakel-dakel na nga ipagpaliꞌwan nira nga mabebeꞌgat nga kuntraꞌ it kanya. Temed, daꞌsira magkatuud.

⁸ Natubagan nga muꞌsa ni Pablo, nga maat i pangataldengan ya, “Talagang egay nabwat ku nga kuntraꞌ kat siyubli-subling urdin it mga Judio, kuntraꞌ kat Templo, u kuntraꞌ kat Impiradur.”

⁹ Temed, it ireg ni Festo nga may buwaten ya nga sagyaan it mga Judio, inaat ya si Pablo, “Unu, ireg mu nga tabanen ka duꞌun it Jerusalem ka duꞌun manay ubsan kut surugiden ngaytu?”

¹⁰ Temed timnubag si Pablo, “Ega. Talagang daꞌku magkapakay kayan. Kayting situ aku nat adapan it manigꞌukuman nga ipiyatindeg it Impiradur, kaꞌilangan, situ nay sumaryaan it aken. Talagang natantuwan mu na nga egay binwat kung maski unung kamaliꞌ kuntraꞌ kat mga kabilug ku nga mga Judio.

¹¹ In beteꞌ matuud nga may nabwat ku nga karaꞌe-raꞌetan, nga bagay it aken, imatayen, ega daꞌgaen ku. Temed it egay kamatuudan it maski unu ngaytu nga ipagpaliꞌwan nira kuntraꞌ it aken, ega talaga i may pudir nga ipaꞌalima aku duꞌun it kanira. Aypaꞌ magꞌapiral aku na duꞌun it Impiradur nga duꞌun it Roma.”

¹² Pagkagneg ni Festo kayti, riyunding yay mga katimbang ya. Bawnga nagpalingdan duꞌut ki Pablo. Maat ya, “Ta, it atkayan nga magꞌapiral ka duꞌun it Impiradur, egay beken, tabanen ka duꞌun.”

Ipiyaꞌadap si Pablo duꞌun it adiꞌ nga si Agripa

¹³ May pirang aldaw i nagtaꞌlib, miyabut duꞌun it Cesarea i adiꞌ nga si Agripa, duwa sira naga ni Bernice, ka ireg nirang kumustaen i baꞌgung gubirnadur nga si Festo.

¹⁴ Ta it naꞌla-naꞌlay i pangigaꞌ na Agripa ngayti duꞌun, natuturan na ni Festo duꞌut kanira i pasar it ki Pablo. Maat ya, “May esa bayang pirisu nga natananan it giyantiyan ku ngayting si Felix.

¹⁵ Pagpaꞌaduꞌun kut Jerusalem, inabigwar sit mga pagbayaꞌen it sasirduti baw mga mataꞌas nga ginuꞌu it mga Judio i dimanda nirat kanya. Pagꞌangutun nira nga betanganan ku nat ukuman.

¹⁶ Takaꞌ tiyubag ku sira nga ega yay buwat it mga Romano, nga ega basta-basta ukumanan i maski siyu in ega paꞌ nakapagꞌadap-adapen sirat mga taw nga nagdimandat kanya baw, kanya nga ipiyagdimanda.

¹⁷ Aypaꞌ pagꞌuliꞌ ku situ namagbayaꞌ na sirat aken. Ega inatrasu ku, in daꞌga, pagꞌeyag it aldaw, miyadung aku na kat araꞌdungan it manigꞌukuman bawnga ipiyapisiꞌ ku si Pablo ngayti.

¹⁸ Ta it tiꞌmes na, timnindeg nay mga Judio ngayti nga ipiyaliꞌwan nay mga nasalaꞌan nirat kanya, tanud ku may ipaliꞌwan nira nga mabeꞌgat nga karaꞌe-raꞌetan nga nabwat ya. Arit ega.

¹⁹ In daꞌga, iyan lamang i pagsalaꞌan nirat kanya, mga pagdaꞌe-daꞌegan nira pasar it sadili nirang rilihiyun, baw pasar it esang taw nga pagpangaranat ki Jesus nga, lamang miyatay na, temed ipagpaliꞌwan ni Pablo ngayti nga naꞌgen nagat paꞌuliꞌ.

²⁰ Ta, paribasay elam aku pasar it iting mga bagay, iningkut ku kanya in unu, ireg yang paꞌaduꞌun it Jerusalem ka duꞌun manay ubsan it surugiden nira ngaytu.

²¹ Temed tubag ya, ireg ya nga magꞌapiral duꞌun it Impiradur, nga yanay mukuman kaytu. Aypaꞌ isingkat ku nga pirisuun siꞌ kanya seked it makapaduꞌlung ku kanya duꞌun it Impiradur nga duꞌun it Roma.”

²² Pagkagneg ni Agripa ngayti, inaat ya si Festo, “In mapakay, ireg ku sana nga mapagnegan i iting taw.” “Unuka ega?” maat ni Festo. “Dedelem magnegan mu yan.”

²³ Aypaꞌ, pagꞌeyag naꞌaduꞌun it papagsurugidenan i adiꞌ ngayting si Agripa, duwa ni Bernice. Mabakas talagay pakayan nira baw ega basta-bastay pabibat kanira. Nagpatingped gasiꞌ duꞌun i mga piyakapagbayaꞌen it mga sundaluꞌ baw muꞌsang matataꞌas nga mga taw duꞌut Cesarea. Iyan natingped nay muꞌsa, ipiyapisiꞌ na ni Festo si Pablo.

²⁴ Pagꞌabut ni Pablo, miyampang na si Festo. Maat ya, “Kagalang-galang nga Adiꞌ, baw kadakel it taw nga kaꞌibaan ta situ, waytu na i taw nga kamataynen ya i pagꞌingeꞌreten it kadakel it mga Judio. Talagang piyagut nira duꞌun it Jerusalem, bawnga pati situt Cesarea, piyagut siꞌ nira. Ipaggaꞌu-gaꞌuy nira nga ega na egnen kanya.

²⁵ Temed, it ega nagay naparagan ku nga binwat ya nga dapat betanganan kanyat ukuman nga kamataynen, baw beken it ireg yang magꞌapiral duꞌun it Impiradur, aypaꞌ napikir ku nga ipataban kanya duꞌun it Roma.

²⁶ Temed ta, egay magkaꞌrutan ku nga masurat ku pasar it kanya ngaytu nga mapakay nga ipataban duꞌun it agalen ku ngayti. Aypaꞌ ka kayti, ipagpaꞌadap ku kanya situt kadakel mi, subraꞌ na situt imu, kagalang-galang nga Adiꞌ, isaꞌun in maꞌimbistigar kanya, may makabtang ku na duꞌut surat nga ipataban duꞌun.

²⁷ Ka subuk egay kakapulusan in may ipataban ku nga pirisu temed egay ipataban nga ipagpaꞌyag it nadimandaan it kanya.”