Mga Binwat 24 - Tagbanwa

Ipiyagꞌusay it mga Judio duꞌun it gubirnadur i dimanda nira it ki Pablo

¹ Desang nakalima, miyabut na duꞌut Cesarea i Piyakamataꞌas nga Sasirduti nga si Ananias. Kaꞌibaan yay mga mataꞌas nga ginuꞌu baw si Tertulo nga esang abugado. Ipiyaꞌapyat na nira duꞌun it gubirnadur i dimanda nirat ki Pablo.

² Bawnga, iyan ipiyapisiꞌ nat gubirnadur si Pablo, nagpapuꞌun na si Tertulo ngayti it musay it dinimandaan nirat ki Pablo. Maat ya, “Kagalang-galang nga Gubirnadur, talagang garing it pagkaꞌdung mung lagi nga punuꞌan namen, kaꞌlay ngaytu, ega nay kaguluwan situt itung banwa. Kaꞌimbengan i nagpasubli. Talagang kat padisir mu ngaytu, dakel nga mga bagay i nabaꞌgu nga ikiyagayen it muꞌsang taw nga pagsasakpan mu.

³ Aypaꞌ, muꞌsa kami, pagsagyaan nameng banar baw pagpasalamatan namen it dakulang pasalamat.

⁴ Maski masasaw namen i buwat mu, ireg namen paꞌatrasu ka daꞌan it maski ega maꞌlay ka in mapakay pagnegan mu daꞌan i sugi-sugid namen ngaytu.

⁵ Ka, itung taw, namuyaan namen nga mapiyanggulu talaga. Buwat ya, magpanlekep-lekep it muꞌsang kababanwaan ka pagpaꞌulu-uluwan yay mga Judio nga manggulu. Esa kanya gasing pagbayaꞌen it mga taw ngayting pagpangaranat Nazaretanen.

⁶ Dungag pang binwat ya, ngari-ngaring makaparaꞌway kanya it Templo namen duꞌun it Jerusalem. Aypaꞌ sikayti diyakep namen kanya.

⁷ Temed ta, inaduꞌun kami it piyakapagbayaꞌen ngaytit sundaluꞌ nga si Lysias. Riyeges ya kami it may dakulang kaguluwan baw inagaw ya i taw ngaytung diyakep namen.

⁸ Inaat ya paꞌ nga situ manat imu i paꞌapyatan it dimanda namen. Ta kayti, in imbistigaren mu na kanya, matantuwan mu nga matuud i muꞌsa ngaytung ipagdimanda namen it kanya.”

⁹ Pagkaꞌampang ni Tertulo kayti, riyumbayan kanyat mga Judio ngayting magbabayaꞌ it kanya. Maamaatan sira, “Talagang matuud yay muꞌsa ngayan.”

Lamang magayen i pangataldengan ni Pablo duꞌun it gubirnadur, pinirisu naga kanyat duwang taꞌun

¹⁰ Sininyasan it gubirnadur si Pablo nga kanya siꞌ i mampang. Aypaꞌ miyampang na si Pablo nga tubag yat dimanda ngaytit kanya. Maat ya, “Kagalang-galang nga Gubirnadur, magkaꞌrutan ku nga naꞌlay ka nang manigꞌukuman situt itung banwa. Aypaꞌ ka daꞌku magꞌaliꞌ mampang pasar it sadili ku, nga pangataldengan ku.

¹¹ Talagang in beteꞌ ineꞌteꞌen mu, maꞌrutan muy kamatuudan nga kaꞌlay it pagꞌabut ku duꞌut Jerusalem ka sumamba duꞌun, ikasang puluꞌ may duwa paꞌ i itung aldaw.

¹² Maski kaꞌsa, egay namuyaan nira nga magpakidaꞌeg aku it maski siyu duꞌun it seled it Templo, u magpangunkun it taw duꞌun it mga papagsambaan u maski baꞌ aring rugar kat siyudad ngayti.

¹³ Talagang egay magkapaliꞌwan nira nga puriba it mga nasalaꞌan nira ngaytu it aken.

¹⁴ Itu lamang i aminen ku. Uyun nagat panulduꞌ nga maat nira, kamaliꞌ, i pagsirbi kut Ampuꞌang Diyus it mga kagiyaringanan namen. Baw pagsunudun ku naga gasiꞌ i muꞌsang magbebtang duꞌut mga urdin ni Moises baw muꞌsang mga isiyurat it mga prupitaꞌ it tagnaꞌ.

¹⁵ Baw subung it pagsisiguruun it mga taw ngaytu, pagsisiguruun ku gasiꞌ nga egnen it Ampuꞌang Diyus it paꞌuliꞌ i muꞌsang taw, mga mataldeng kat panleteg ya baw daꞌga.

¹⁶ Sabap it itung mga bagay nga pagpamayaꞌnen ku, pagpaꞌresan ku nga egay mabwat kung kamaliꞌ kat panleteg it Ampuꞌang Diyus u masigkataw ku.

¹⁷ Ta, pagtaꞌlib it pira na nga taꞌun garing it tagnang aduꞌun kut Jerusalem, naꞌaduꞌun aku siꞌ, magtataban it pirak nga itabang it mga kabilug kung Judio duꞌun. Beken gasing enged ku, megay it ipagpasalamat ku duꞌun it Ampuꞌang Diyus.

¹⁸ Iyan naltegan nira aku duꞌun it Templo, minwat kami it ipagpanlimpiyuꞌ uyun kat kaꞌugaliꞌan namen. Daꞌkami sang bulyugan i duꞌun baw ega nagay kaguluwan.

¹⁹ Temed maski atkayan, piyamwat-buwatan akut pirang mga Judio nga taga Asia. Sana sira ngayti i paꞌasitu nga paꞌapyat it dimanda, in beteꞌ may nasalaꞌan nirat aken.

²⁰ U in daꞌga, sira naga ngaytuy sumugid in unuy naparagan it mga kaꞌuyutan it Sanedrin, pagꞌadap-adapen namen duꞌun it Jerusalem, nga in unuy nabwat kung kamaliꞌ.

²¹ Iti lamang i inaat ku, nga diyadakulaꞌ kung ampang, iyan magtitindeg aku duꞌut adapan nira, maat ku, ‘Pagꞌimbistigaren aku kayti situt adapan mi sabap it pagsisiguruun ku nga egnen it Ampuꞌang Diyus i mga miyatay.’”

²² Ta, si Felix ngayting gubirnadur, naꞌrutan ya nat magayen i mga pagpamayaꞌnen it mga taw nga magsunud it dalan ngaytit karibriyan. Aypaꞌ inaat yay kadakel ngayti nga duꞌun, “Pedkanan tami daꞌan i surugiden ngaytu. Sublan mana in mabut situ si Lysias, nga piyakapagbayaꞌen it sundaluꞌ duꞌun it Jerusalem.”

²³ Bawnga ipiyakarguꞌ ya si Pablo duꞌun it esang kapitan it sundaluꞌ. Temed ipiyagꞌaat ya nga ega naga masyadung igpitan baw ega gasiꞌ paaren i mga iba-iba yang magpasyar duꞌun it kanya nga magtabang kat mga pagkaꞌilanganen ya.

²⁴ Pagtaꞌlib it pirang aldaw, miyabut siꞌ si Felix, nga magbabayaꞌ nat kanya i asawa ya nga si Drusila. Si Drusila ngayti, esang Judio. Pagꞌabut nira duꞌun, ipiyapisiꞌ nira si Pablo ka kupagneg sirat paꞌyag ya pasar it pamayaꞌ yat ki Cristo Jesus.

²⁵ Pagꞌabut ni Pablo ipiyaꞌyag yay muꞌsa, in magꞌuꞌunuy pangaꞌgenang mataldeng kat panleteg it Ampuꞌang Diyus, nga kaꞌilangan supilen i sadili. Ipiyanulduꞌ ya gasiꞌ nga talagang mabut i aldaw nga ipangukuman it Ampuꞌang Diyus it katataawan. Pagkagneg ni Felix ngayti, piyangingiraꞌbutan kanya. Piyapdek ya na si Pablo nga inaat, “Ta kayti, magbelag-belagen tami na temed kat belag nga aldaw ipapisiꞌ ta siꞌ ikaw.”

²⁶ Kat nakem ya gasiꞌ, pagꞌiꞌinawaren ya nga begayan kanya ni Pablo it pabur nga iꞌangut it ipaliꞌwan ya kanya. Aypaꞌ pirmi yang ipagpapisiꞌ si Pablo ka magsugi-sugid sira.

²⁷ Pagtaꞌlib it duwa nang taꞌun, giyantiyan na kanya. Si Porcio Festo i igiyanti nga gubirnadur. Baw ta, it ireg ni Felix ngayti nga may buwaten ya nga sagyaan it mga Judio, piyataꞌnan ya na lamang si Pablo nga pagpipirisuun paꞌ.