Mga Binwat 22 - Tagbanwa

Nangataldengan si Pablo kat adapan it kadakel

¹ Maat ni Pablo it kadakel ngayti, “Kamung mga kagiyaringanan situ baw mga kasulsugan ku, in mapakay it imyu, pagnegan mi daꞌan i pangataldengan ku ngaytu.”

² Iyan nagnegan nira nga Hinebreo i pagꞌampangen ni Pablo, nga ampang nirang sadili, subraꞌ na nga ega nay magtinge-tingeg. Ipiyasigi na ni Pablo i ampang ya, nga maat ya,

³ “Talagang Judio akuytu. Piyanganakan it aken, duꞌun it Tarso nga sakep it Cilicia. Takaꞌ situt Jerusalem ngaytuy piyaꞌadalan it aken, nga manigtulduꞌ ku si Gamaliel. Itiyulduꞌ yang banar it aken in unuy kaꞌigpit it pagsunud it mga urdin nga siyubli-subli ta. Aypaꞌ ega papanemdeman i pagsunud kut Ampuꞌang Diyus, in daꞌga talagang papaꞌres. Subung nagat imyu kayti.

⁴ Kamatuudan, kat iting timpu, masyadung pangise-iseg ku it mga taw nga magsunud it dalan ngaytut karibriyan. Pagpandakpen ku sira baw pagbayukun ka ipagpapirisu. Egay piniliꞌan, babay, lalaki, pagtiꞌsen ku talaga sira. Talagang ireg ku, ega nay egnen.

⁵ Piyakamataꞌas nga Sasirduti baw kaꞌibaan yang mga pagbayaꞌen it mga Judio, makapamatuud sira it pagꞌaaten ku ngaytu. Ka pagpanaw kut naꞌaduꞌun it Damasco, sira nagay nagbuwat it kariꞌgenan ku nga kasuratan nga ipalteg ku duꞌun it mga magpamaalaꞌ it mga Judio duꞌun, isaꞌun madakep ku i mga taw duꞌun nga magpamayaꞌ it ki Jesus. Pamagbabayukun sirang muꞌsa i tabanen ku situt Jerusalem isaꞌun betanganan sirat mabeꞌgat nga ukuman.

⁶ Iyan magpanaw kami na nga magꞌadeꞌdeng na duꞌut Damasco, nga magkakaꞌugtu nay aldaw, sakaling nasakep aku it siyang nga eyag nga garing duꞌun it langit.

⁷ Simnuꞌsub akung lagi duꞌut lugtaꞌ bawnga may nagnegan ku nga esang gaꞌmaran nga magpakisugid it aken, nga magꞌaat, ‘Saulo, Saulo, unuka atkaytuy buwat mu nga pagpakuriꞌan mu aku?’

⁸ Natubag ku yan, maat ku, ‘Ay siyu ka bayan, Agalen?’ ‘Si Jesus aku nga taga Nazaret. Aku talaga i pagpakuriꞌan mu,’ maat i tubag it aken.

⁹ Mga kaꞌibaan ku, naltegan niray eyag ngayti temed ega natandaꞌan niray ampang ngayti nga pakisugid it aken.

¹⁰ Miningkut aku siꞌ, nga maat ku, ‘Ampuꞌan, unu naytuy buwaten ku?’ Tubag ya it aken, ‘Timindeg ka na ka lumangbus ka na duꞌun it Damasco. May sumugid it imu duꞌun pasar it muꞌsang mga bagay nga ipiyabetang-betang it Ampuꞌang Diyus nga buwaten mu.’

¹¹ Pagtindeg ku, daꞌku na magkalteg ka nagdiꞌan-diꞌan nay bisaraꞌ ngaytit aken it ega ngayti basta-bastang eyag. Egay beken, pagpanaw namen it limnangbus duꞌun it Damasco, pagdudundunun aku manat maꞌiba ku ngayti.

¹² May esang taw duꞌun nga masiyambaen, uyun kat muꞌsang magbebtang kat mga urdin tami. Ngaran ya, si Ananias. Muꞌsang mga Judio nga taga duꞌun, pagdaya-dayawun niray iting taw.

¹³ Ta, yan duꞌun aku nat Damasco, nagpaꞌaduꞌun it aken si Ananias ngayti. Pagꞌabut ya, maat yat aken, ‘Saulo, nga sulsug ku kat pamayaꞌ, magꞌuliꞌnan naga nga magkalteg ka.’ Magkatupus i ampang ya ngayti, magkaltegan ku na kanya nga matuud.

¹⁴ Bawnga miyampang siꞌ kanya, nga maat ya, ‘Garing it tagnaꞌ, piniliꞌ ka nang lagi it Ampuꞌang Diyus it mga kagiyaringanan ta. Ipiyabetang-betang ya nga matantuwan mu i kaꞌirgan ya, ka maltegan muy mataldeng nga Manigsirbi ya baw magnegan muy ampang ya nga pakisugi-sugid yat imu.

¹⁵ Ka ipagpatindeg ya na ikaw, nga manigpamatuud ya kat muꞌsang taw. Ipamatuud mu i naltegan baw nagnegan mu ngayti.’

¹⁶ Bawnga inaat ya siꞌ aku, ‘Ta, unu pay pagꞌelaten? Timindeg ka na baw pabawtis. Manalangin ka duꞌun it Ampuꞌang Diyus nga mangut it pasinsiyaen i mga kasalaꞌan mu.’

¹⁷ Ta, pagkaꞌuliꞌ ku situt Jerusalem, kaꞌsang magpanalangin aku kat seled it Templo, pananud ku, nagsipat i banwa. Subung akut magpanagaynep.

¹⁸ Naltegan ku i Ampuꞌan baw inaat ya aku, ‘Dali-daliꞌen mu nga liꞌid situt Jerusalem, ka daꞌsira tumanggap it pamatuud mu pasar it aken.’

¹⁹ Katubag aku, ‘Unuka atkayan, Ampuꞌan, it matantuwan nira nga talagang nabaꞌgu nay adat ku? Ka urut niray buwat ku it tagnaꞌ, nga pagseled-seleden kuy mga papagsambaan ka in siyuy maparagan ku nga magpamayat imu, ega lamang desang pagpasakitan ku in daꞌga ipagpapirisu ku paꞌ.

²⁰ Baw iyan pagꞌimatay it ki Esteban ngayting manigpamatuud mu, duꞌun aku naga ka esa aku gasiꞌ nga nagpaꞌuyun it ukuman nira ngayti nga kamataynen. Aku paꞌ gasiꞌ i miyarigra it mga pakayan it minimatay it kanya.’

²¹ Temed maat ya sit aken, ‘Mapanaw ka kayti, ka duꞌun i pagtaꞌgan kut imu it mangadal, duꞌut babanwaan it mga taw nga ega Judio.’”

Pagkagneg it mga taw nga tulduꞌan ni Pablo i mga taw nga ega Judio, simnikrab siꞌ i iseg nira

²² Seked lamang duꞌun kayting ampang ya i piyagnegan it kadakel ngayti. Pagkagneg nirat siyangpit yay mga taw nga ega Judio, simnikrab siꞌ i iseg nira. Ipaggaꞌu-gaꞌuy na nira nga magꞌaat, “Kaꞌilangan, taw nga subuk kanya, iriꞌen na situt banwa! Ega nayan mapakay nga egnen kanya!”

²³ Sigi nang gaꞌuy-gaꞌuy nirat atkayti. Beken nga buwat nira, limbas niray sang lapis nga pakayan ka ipamagtibung baw siging akep nirat kapu-kapu ka ipamagsaꞌbug duꞌut lawang, kat kadakulat iseg nira.

²⁴ Pagkamuya it piyakapagbayaꞌen ngaytit sundaluꞌ, isingkat ya nga ipasled na si Pablo duꞌut kutaꞌ nira ngayti, ka imbistigaren duꞌun. Isingkat ya paꞌ nga ripdasan si Pablo seked it aminen ya nga in unu talaga i binwat ya nga karaꞌe-raꞌetan nga nasalaꞌan it mga Judio.

²⁵ Temed pagkatagkes it ki Pablo duꞌut tatagkesan, inaat yay esang kapitan it sundaluꞌ nga magtitindeg duꞌut adeꞌdeng ya. Maat ya, “Daꞌga baꞌ kuntraꞌ it urdin it mga Romano i ripdasan i esang taw nga seled kat pagkaRomano in ega paꞌ nabetanganan it ukuman?”

²⁶ Pagkagneg it kapitan ngayti, inaduꞌun yay piyakapagbayaꞌen baw inaat, “Esa-esa ga, pikiren mu daꞌan i ipiyagꞌurdin mu ngaytu ka, kuꞌatkaytuun mu ngaytung taw, palan, seled it pagkaRomano.”

²⁷ Inaduꞌun nga lagi it piyakapagbayaꞌen ngayti si Pablo ka iningkut ya, “Unu, seled ka nga matuud it pagkaRomano?” “Eeꞌ”, maat ni Pablo.

²⁸ “Aken ngaytu,” maat it piyakapagbayaꞌen ngayti, “talagang dakulaꞌ nga kantidad i ibinggay ku isaꞌun makasled aku kat pagkaRomano.” “Temed aku”, maat ni Pablo, “subuk manengteng akung Romano, ka nasubli ku garing duꞌun it mga giyaringan ku i pagkaRomano kut aken.”

²⁹ Pagkagneg it inampang ni Pablo ngayti, namagpaꞌala-alaid nga lagi duꞌut kanya i maat ngayti mimbistigar it kanya. Miniꞌlam gasiꞌ i piyakapagbayaꞌen, pagkaꞌrut yat Romano palan si Pablo. Iniꞌlaman ya, nakapatagkes ya ngayti nga maat ripdasan.

³⁰ Aypaꞌ, pagꞌeyag it aldaw, piyauꞌbadan na it piyakapagbayaꞌen ngayti si Pablo it mga kadina ngayti. Bawnga ipiyatawag ya i mga pagbayaꞌen it sasirduti baw muꞌsang beken nga pagbayaꞌen it mga Judio, kumpur kaꞌuyutan it Sanedrin. Ireg yang matantuwan i kamatuudan, in unuy ipagdimanda nirat ki Pablo. Iyan tingped na sirang muꞌsa, ipiyapisiꞌ ya na si Pablo ka ipiyaꞌadap na duꞌun it kadakel ngayti.