Mga Binwat 21 - Tagbanwa

Maski urut na ni Pablo i mabetangan ya duꞌun it Jerusalem temed ega nagpasurut

¹ Pagbelag-belagen namen, nanakay kami siꞌ i amen. Diri-diritsu i sakay namen duꞌun it Cos. Pagꞌeyag it aldaw nanlangbus kami siꞌ duꞌun it Rodas, bawnga garing duꞌun naꞌaduꞌun it Patara.

² Duꞌun may naꞌbutan namen nga barkuꞌ nga magꞌaꞌaduꞌut Fenicia. Nanindak kami na duꞌun, ka duꞌun kami siꞌ nanakay.

³ Pagkapatuꞌ namen it pulaw it Chipre, nga ayun kat gibang namen, tiyaꞌliban namen nat nandiritsu na duꞌun it Tiro nga sakep it Siria, ka duꞌun i diskargaꞌan it kargaꞌ it barkuꞌ ngayti.

⁴ Pagpaningdal namen, tiyulus namen i mga magpamayaꞌ. Ta, paribasay ipiyaꞌrut it kanira it Espiritu Santo nga in mabut si Pablo duꞌun it Jerusalem, pakuriꞌan kanyang banar it mga taga duꞌun, siging aat nira it kanya nga ega na lamang lumangbus duꞌun. Temed ega nagpasabat si Pablo. Sang lingguꞌ i kaꞌlay namen duꞌun,

⁵ bawnga namꞌun kami nat kanira ka manakay siꞌ. Paggaring namen duꞌun it siyudad ngayti nga manꞌun na duꞌun it dagat, miyuꞌsa sirat pabayaꞌ it amen, babay, lalaki, pati mga anak nira. Bawnga parabir kami gimnaring it sumakay, limningkuꞌud kaming muꞌsa duꞌun it baybayan ka nanalangin.

⁶ Pagkatupus nagsigpaꞌa-paꞌadyusun kami na. Simnakay kami nay amen, kanira namagꞌuliꞌ na.

⁷ Garing duꞌun it Tiro ngayti, diritsu kami duꞌun it Tolemaida. Pagkatingdal, nagpakikita kami it mga magpamayaꞌ duꞌun. Duꞌun nay inigaꞌan namen.

⁸ Pagꞌeyag, nanlangbus kami siꞌ. Pagꞌabut duꞌun it Cesarea, duꞌun i piyaꞌabutan namen it balay ni Felipe, nga esang manigpangadal it Magayeng Baritaꞌ. Esa kanya kat pitu ngayting lalaki nga piniliꞌ it tagnaꞌ duꞌun it Jerusalem nga manigpamgay it ipagtabang kat mga makukuriꞌ. Duꞌun nay inistaran namen.

⁹ Si Felipe ngayti, may epat nga umbay nga anak yang babay. Pagkilalaen sira nga prupitaꞌ ka pirmi sirang pagpanakman it Espiritu Santo it ipagpasugid it Ampuꞌang Diyus duꞌun it mga taw.

¹⁰ Iyan naꞌla-naꞌlay kami na duꞌun, may miyabut nga esang taw nga garing duꞌun it Judea nga pagpangaranat ki Agabo. Prupitaꞌ gasiꞌ it kanya.

¹¹ Inlep ya kami, bawnga inawaꞌ yay sambut ni Pablo ka ibiyayuk yat sadili yang mga aꞌay baw mga alima. Pagkabwat yat atkayti, miyampang kanya nga magꞌaat, “Ituy ipagpaꞌrut it Espiritu Santo. Atkaytuy buwaten it mga Judio duꞌun it Jerusalem, nga bayukun nira i tagpuꞌun it sambut ngaytu, bawnga ipaꞌalima nira duꞌun it mga taw nga ega Judio.”

¹² Pagkagneg nameng muꞌsa it inaat ngayti ni Agabo, kami baw mga taga duꞌun ngayti, sigi nang sabat namen it ki Pablo nga ega na paꞌaduꞌun it Jerusalem.

¹³ Takaꞌ miyaat ga kanya, “Unuy buwat mi ngayan nga magsugaw? Subuk pagpataꞌbangen mi i nakem ku! Yay matuud, bayukun aku u imatayen, ega talaga daꞌgaen ku, basta sabap it pagsirbi ku it Ampuꞌang si Jesus.”

¹⁴ Ta, it ega magpasabat kanya, mindek kami na. Miyaat kami na lamang, “In unuy kaꞌirgan it Ampuꞌan, iyan sana i masunud.”

¹⁵ Daꞌkami naga kimnaꞌlay duꞌun. Nagdawa-dawaꞌ kami siꞌ ka limnangbus na duꞌun it Jerusalem.

¹⁶ May miyayaꞌ gasit amen nga mga magpamayaꞌ nga taga Cesarea ngayti. Itiyulduꞌ nirat amen i balay ni Mnason duꞌun it Jerusalem nga yay paꞌabutan namen. Si Mnason ngayti, esang taga Chipre nga naꞌlay nang timpu i pagpamayaꞌ ya.

Duꞌun it Jerusalem, inupakat si Pablo it mga magpamaalaꞌ it mga magpamayaꞌ

¹⁷ Pagꞌabut namen duꞌun it Jerusalem, masagyang tiyanggap kami it mga sulsug namen kat pamayaꞌ duꞌun.

¹⁸ Pagsunud nga aldaw, naꞌaduꞌun kami na na Pablo it ki Santiago. Abutan namen duꞌun, tiꞌmes i mga magpamaalaꞌ it mga magpamayaꞌ.

¹⁹ Kiyumusta sirang muꞌsa ni Pablo bawnga itiyuturan yay muꞌsang binwat it Ampuꞌang Diyus nga tiyanaꞌan it panulduꞌ ya kat mga taw nga ega Judio.

²⁰ Pagkagneg nira, biyantug niray Ampuꞌang Diyus. Bawnga inaat nira si Pablo, “Sulsug namen kat pamayaꞌ, siguru namuyaan mu na nga ribu-ribu nay mga kabilug ta nga Judio nga namagpamayaꞌ nat ki Jesus, baw muꞌsa sira mapaꞌres nga banar kat pagsunud it mga urdin ni Moises.

²¹ Nabaritaꞌan nira nga ipagtulduꞌ mu nga pirmi kat muꞌsang mga Judio kat piyanawan mung mga banwa nga indiꞌan na niray mga urdin ni Moises. Ipagꞌaat mut kanira, kunuꞌ, nga ega na turiꞌan i mga anak nirang lalaki baw ega na sunudun i muꞌsang kaꞌugaliꞌan nga ipiyasubli ni Moises it aten.

²² Ta, kayti, unuy magayen nga buwaten? Ka simpri, mabaritaꞌan nira nga miyabut ka na situ.

²³ Magayen, sunudun muy iꞌaat namen ngaytut imu. May epat nga kalalakiyan situ nga namagsanggup duꞌun it Ampuꞌang Diyus.

²⁴ Ta, pabayaꞌen mu sira duꞌun it Templo baw paꞌuyut ka it buwat nira nga panlimpiyuꞌ it kanira. Baw in mapakay, ikaw nay magbayad it muꞌsang paggamiten kat panlimpiyuꞌ ngaytu, isaꞌun mapakay na nga pabuꞌlug sira, nga imandaꞌan it natuman nay sanggup ngayti. Ka in mabwat muytu, maꞌrutat kadakel nga egay kamatuudan it muꞌsa ngaytung magkabaritaꞌan nira, ka mamuyaan nira nga, maski ikaw, magsunud nagat mga urdin ni Moises.

²⁵ Temed egaytu ipagpaꞌuyut i mga magpamayaꞌ nga ega Judio. Iyan lamang i ireg nameng sunudun nira, subung it ipiyagꞌaat tami duꞌun it surat ngayang ipiyataban duꞌun it kanira nga ega kumaꞌen sirat karniꞌ nga giyamit it beken kat pagsamba nirat kanirang pagbete-beteꞌen nga diyus, ega gasiꞌ kumaꞌen it duguꞌ u karniꞌ nga ega piyadguꞌ, baw liꞌyan niray muꞌsang kalasit pamakun kat ega asawa nira.”

²⁶ Ta, napakay si Pablo it inaat ngaytit mga magpamaalaꞌ, aypaꞌ pagsunud nga aldaw, piyabayaꞌ yay epat ngayting kataawan duꞌun it Templo. Pagkabwat nirat kaꞌugaliꞌan nira nga panlimpiyuꞌ, nga nagpaꞌuyut na si Pablo, siminled na sira duꞌun it sasirduti ka ipiyaꞌrut nirat kanya nga in unung aldaw i itupus it panlimpiyuꞌ ngayti bawnga tumaban nay kada esat kanira it kanya-kanyang patuꞌ nga panalisi baw pasalamat nga pagꞌantengen. Temed yanayti, si Pablo nay baalaꞌ mayad.

Ega inaguy-aguy si Pablo it mga Judio duꞌun it Jerusalem

²⁷ Ta, yan nakapitu na, naꞌaduꞌun na na Pablo it Templo. May duꞌun gasiꞌ nga mga Judio nga garing duꞌun it Asia. Pagkalteg nirat ki Pablo, piyangabangan niray kadakel duꞌun it Templo baw diyakep nira kanya.

²⁸ Yanay pagꞌampa-ampangen nira nga ipagpanggagaꞌuy na, “Mga kaꞌibaan nga tungtung-inapuꞌ ni Israel, tumabang kamut amen. Ka itu nay taw ngayan nga ipaglekep ya kat paꞌari-aring rugar i panulduꞌ ya nga panibabaꞌ it bangsa tami, mga urdin ni Moises, baw pati Templo ngaytu. Baw kayti, beken paꞌ nga buwat ya, pagpabayaꞌen yat magseled i mga taw nga ega Judio situt Templo ta ngaytu. Talagang pagparaꞌwayen yay ega basta-basta ngaytung papagsambaan tamit Ampuꞌang Diyus!”

²⁹ Atkaytuy ampang nira ka, kaꞌsa, naltegan nira nga kaꞌibaan ni Pablo it magpanaw duꞌun it karsadaꞌ, si Trofimo nga taga Efeso. Tanu-tanud tu piyabayaꞌ na kanya ni Pablo duꞌut seled it Templo.

³⁰ Ta, unupat nagulu nay muꞌsang siyudad. Subuk pugdak it putyukan i katataawan nga dimnalit ki Pablo. Diyakep nira kanya baw pagrarayaken i tiyaban duꞌut liꞌwan it Templo. Pagkaliꞌwan nira, piyamagsiradu nay mga talaꞌep.

³¹ Talagang ireg nirang imatayen si Pablo. Temed pagkaꞌrut it piyakapagbayaꞌen it mga Romano nga sundaluꞌ duꞌut Jerusalem nga maguluy muꞌsang siyudad,

³² ipiyatawag yang lagi i beken nga mga kapitan it taga sang gatus nga mga sundaluꞌ, ka dimnaliꞌ sira duꞌun. Pagkalteg it mga taw ngaytit reetat mga sundaluꞌ, pati piyakapagbayaꞌen nira, pindekan na nirat timiꞌkul si Pablo.

³³ Pagꞌabut it piyakapagbayaꞌen ngayti, diyakep yang lagi si Pablo baw ipiyabayuk yat duway kadina. Bawnga iningkut ya nga in siyu kanya baw in unuy binwat ya.

³⁴ Daꞌna magkaꞌru-kaꞌrutan i pagꞌaatet esa may esa ka namelag-belagen nat ipagpanggaꞌmaran nga tubag nira. Ta, it atkayti nang kagulu, egay naꞌrutan it piyakapagbayaꞌen nga kamatuudan. Egay beken, ipiyabayaꞌ ya nat mga sundaluꞌ si Pablo ka iduꞌun it pagkukutaꞌen nga kampu nira.

³⁵ Pagꞌabut duꞌut pagꞌapyatang agdan, tiyabyang na si Pablo it mga sundaluꞌ it miyapyat ka pagpakiꞌagawan pat mga taw.

³⁶ Sabap kadakel ngayti, dimnasun naga it mga sundaluꞌ, mamagpapataꞌwag it “Imatayen yan! Ega nayan egnen!”

³⁷ Desang ipagpasled na si Pablo duꞌun it pagkukutaꞌen ngayting kampu it mga sundaluꞌ, maat yat piyakapagbayaꞌen ngayti, “In mapakay, may kusugiden kut imu.” “Palan, magkaꞌrut kat Ginirego nga ampang,” magꞌaat it piyakapagbayaꞌen ngayti.

³⁸ “Daꞌga baꞌ basaꞌan, ikaw i taga Egipto ngayan nga magpanggulu it tagnaꞌ? Daꞌga baꞌ nangukus kat epat nga ribung kataawan nga mangingimatay, nga tiyaban mu duꞌun it kapupuyangtan nga rugar bawnga magpanrangpas kamu na?”

³⁹ “Kagalang-galang it imu,” maat ni Pablo, “alaid it aken i paꞌaaten mu ngayan ka talagang aku ngaytu, Judio nga taga Tarso nga sakep it Cilicia. Matanyag nagang siyudad i rugar ku ngayti. In mapakay sana it imu, ireg ku nga mampang nga ipagneg it kadakel ngaytu.”

⁴⁰ Ta, it piyalugtan kanya, timnindeg kanya duꞌun it ulun-ulunan it agdan baw ipiyatindeg yay alima ya ka may kuꞌampangen ya. Bawnga iyan ega nay magtingeg, miyampang na kanya kat Hinebreo nga ampang.