Mga Binwat 20 - Tagbanwa

Inaduꞌun siꞌ ni Pablo i mga magpamayaꞌ duꞌun it Macedonia baw Grecia

¹ Pagkatiwas it kaguluwan ngayti, tiningped ni Pablo i kadakel it mga magpamayaꞌ duꞌun. Piyamagtulduꞌan ya sira it ipagmapaꞌgen it pamayaꞌ nira baw piyamꞌunan yat mapanaw na kanya nga paꞌaduꞌun it Macedonia.

² Pagꞌabut ya duꞌun, inaduꞌunan ya i muꞌsang rugar nga may magpamayaꞌ. Diyungagan yay tagnang ipiyanulduꞌ yat kanira it ipagmapaꞌgen gasit pamayaꞌ nira, bawnga limnangbus na duꞌun it Grecia.

³ Tulung bulan i kaꞌlay ya duꞌun it Grecia ngayti, bawnga kupanaw siꞌ, nga maat sumakay na nga paꞌaduꞌun it Siria. Temed it naringid-ringidan ya nga palan, namagꞌisun-isunun i nga Judio nga apaꞌan kanya, napikir yang ega na sumakay. Aypaꞌ nagpasurut kanya, nga naꞌaduꞌun sit Macedonia.

⁴ Ega esa-esa yay napanaw ngayti ka dakel i miyayat kanya. Sang kataawan i taga Berea nga si Sopatro nga anak ni Pirro. Duwa i taga Tesalonica, si Aristarco baw si Segundo. Duwa gasiꞌ i taga Asia nga si Tiquico baw si Trofimo. Iyan beken, si Gayo nga taga Derbe baw si Timoteo.

⁵ Pagꞌabut nira duꞌun it Filipos nga sakep it Macedonia ngayti, piyauꞌna ni Pablo duꞌun it Troas i mga miyayaꞌ ngayti. Inaat ya nga melat lamang sirat amen duꞌun ka, kanya, patuduꞌ daꞌan duꞌun it Filipos ngayti.

⁶ Yapaꞌ tumundug kami, nakataꞌlib nay Pistaꞌ it Tinapay nga Egay Ipagpaꞌalsa. Ta, nanakay kami na nga tumundug it mga piyauꞌna ya ngayti. Nakalimay sasakay namen bawnga nakaꞌbut. Sang lingguꞌ kami duꞌun.

Duꞌun it Troas, inggen ni Pablo it paꞌuliꞌ si Eutico

⁷ Iyan aldaw nat Linggo, pagsedep it aldaw, nagtiringpeden kami it mga taga Troas ngayting magpamayaꞌ, ka magkaraꞌnen baw buwaten i Apunan, langkuy manulduꞌ si Pablo. Paribasay meyag mapanaw kami siꞌ, kiyaꞌlay ya na nga panulduꞌ. Inabut it seked it lubuk it delem.

⁸ Piyagtingpedan namen ngayti, duꞌut ikatlung ruknuꞌ nga kadaꞌtagan, baw dakel i tidaw.

⁹ May esang lalaki nga mangaꞌwaꞌen nga pagpangaranat ki Eutico, nga duꞌun it lalawagan i kanyang pagꞌaꞌdungan. Iyan sigi pay ampang ni Pablo, si Eutico ngaytu, magtudtud na. Iyan naꞌlay na, nakaꞌigaꞌ na kanyat maꞌlek. Egay beken, naꞌulug na duꞌun it lugtaꞌ. Paribasay abwatay i naꞌlugan ya ngayti, kuꞌmiten nira, patay na.

¹⁰ Temed limnampud nga lagi si Pablo baw siyakem yay miyatay ngayti. Bawnga inaat yay mga kaꞌibaan ya ngayti, “Ega na maguluwan mi i taw ngaytu ka, ungaytu, egen siꞌ.”

¹¹ Ta, namagꞌapyat kami siꞌ duꞌut dibwat bawnga nangaꞌen kami daꞌan. Pagkakaꞌen, ipiyasigi ni Pablo nga pagtuturanan ya sira. Inabut i tuturan ya ngaytit nabantar i matat aldaw. Bawnga napanaw na kanya.

¹² Iyan beken, inibaan nira na si Eutico it miyuliꞌ. Masasagya sirang banar ka egen naga kanyang matuud.

Tiyulduꞌan ni Pablo i mga magpamaalaꞌ it mga magpamayaꞌ duꞌun it Efeso it bilang pan-gun nga panulduꞌ ya

¹³ Nanakay kami nay amen, ki Pablo napanaw. Pagkadungguꞌ namen duꞌun it Ason, duꞌun nay inlatan namen ka yay piyagꞌupa-upakatan nga pagꞌelat-elatan. Sumakay mana si Pablo in duꞌun na.

¹⁴ Aypaꞌ pagꞌabut ni Pablo duꞌun it Ason ngayti, sang kamiyan nay simnakay. Nagpadungguꞌ duꞌun it Mitilene i pagsasakayan namen ngayti.

¹⁵ Gimnaring kami duꞌun, bawnga sunud nga aldaw, nakaꞌbut kami duꞌun it patut Chios. Sunud sing aldaw, Samos i naꞌbut namen. Ikaꞌpat nga aldaw, nakaꞌbut kami na duꞌun it Mileto.

¹⁶ Atkayti sabap napikir nga lagi ni Pablo nga ribayan yay Efeso. Ega na patuluy duꞌun ka ega na ireg yang paꞌatrasu pat maꞌlay duꞌut Asia. Magꞌapuraꞌ na kanya, ka ireg ya nga ireg nga kaꞌbut duꞌun it Jerusalem parabir mabut i Pistaꞌ it Pentecostes.

¹⁷ Temed, pagkadungguꞌ duꞌun it Mileto, ipiyapisiꞌ naga ni Pablo i mga magpamaalaꞌ it mga magpamayaꞌ duꞌun it Efeso, ka ireg ya nagang makitaan sira.

¹⁸ Iyan namagꞌabut na sira, maat yat kanira, “Talagang magkaꞌrutan mi nga in magꞌuꞌunu i pangaꞌgenan ku asat imyu, garing it uꞌna ngayting pagꞌabut ku situt prubinsiya it Asia.

¹⁹ Daꞌga baꞌ, ipiyasigi ku i pagsirbi kut Ampuꞌan it mapiyababaꞌ aku baw uyut i pati luwaꞌ ku? Eeꞌ baꞌ, piyaꞌresan ku maski dakel i nalabayan kung kakuriꞌan kat alimat mga Judio.

²⁰ Pagꞌuꞌrutan mi gasiꞌ nga egay itiyaguꞌ kut imyu nga maski unung panulduꞌ nga kat ikagayen mi, in daꞌga ipiyanulduꞌ ku kat adapan it kadakel baw kat mga balay mi gasiꞌ.

²¹ Ipagpamatuud ku kat maski siyu, Judio baw ega Judio, nga kaꞌilangan nirang pagsinguliꞌan duꞌun it Ampuꞌang Diyus i mga kasalaꞌan nira baw mamayaꞌ it Ampuꞌan ta nga si Jesus.

²² Ta kayti, subung akut pagdalundunun it Espiritu Santo nga paꞌaduꞌun it Jerusalem. Egaytu magkaꞌrutan ku in unung mga bagay i mabetangan ku duꞌun.

²³ Iyan lamang i magkaꞌrutan ku, iyan ipiyamatuud it Espiritu Santo it aken kat kada siyudad nga naꞌbut ku, nga magꞌelat it aken i pirisuwan baw beken pang kakuriꞌan.

²⁴ Temed, maski ginawa ku, ega subrang pagrarasan ku, basta masarunga kut magayen baw matuman ku i katengdanan nga tiyanggap ku duꞌun it Ampuꞌan nga si Jesus, nga mangadal it Magayeng Baritaꞌ pasar it ildaw it Ampuꞌang Diyus.

²⁵ Ta kayti, kamung muꞌsa nga piyangadalan ku pasar it kaꞌadiꞌan ngaytut Ampuꞌang Diyus, pagsisiguruun ku nga, garing kayti, daꞌtami na magsinle-sinletegen it sumaꞌup situt sinirungat langit.

²⁶ Aypaꞌ, ipagpamatuud ku na kayti nga in may maski siyung taw nga maꞌulug kat panriga it Ampuꞌang Diyus, ega nay aken nga turubagen duꞌun.

²⁷ Ka ega nay ipiyaꞌped ku. Ipiyagsugid ku nat imyu i muꞌsang pabetang-betang it Ampuꞌang Diyus nga ireg ya nga maꞌrutan it taw.

²⁸ Aypaꞌ kayti, yan pagꞌiꞌinturun mi nga pirmi i sadili mi nga pamayaꞌ, baw pagꞌiꞌipaten mi gasiꞌ i pamayaꞌ it kadakel it mga magpamayaꞌ asan it Efeso nga ipiyasakep it Espiritu Santo it imyu nga mga magpamaalaꞌ. Arigraan mit magayen i mga subuk inalang ngaytit Ampuꞌang Diyus isaꞌun kanya nang taawan, nga egay beken nga ipiyagꞌalang ya, in daꞌga duguꞌ it sadili yang Anak nga si Jesus.

²⁹ Ka magkaꞌrutan ku nga pagkagaring ku, may mabut asan it Efeso nga mga taw nga manulduꞌ it talagang kamaliꞌ. Kaꞌalimbawaan nira, subuk maiꞌiseg nga bunglun nga magꞌaged it mga tupa, ka kuranggaꞌen nira i pamayaꞌ it mga magpamayaꞌ duꞌun it imyu.

³⁰ Baw ega lamang garing kat liꞌwan, in daꞌga maski mga kaꞌuyutan mi nga maat namayaꞌ na, siguradung may timindeg gasiꞌ nga paliꞌwan it dakel-dakel nga kaꞌambutan isaꞌun sira i sunudun it mga magpamayaꞌ.

³¹ Aypaꞌ magtitiyakap kamu nga pirmi. Dedemdemen mi nga, seledat tulung taꞌun, delem-aldaw eꞌres i panulduꞌ kut imyu nga sumang kaꞌanu pagbayaꞌen nat luwaꞌ ku.

³² Ta kayti, ipagꞌintergaꞌ ta na kamu duꞌun it Ampuꞌang Diyus baw tabang yat imyu kat ampang ya nga ipiyanulduꞌ ku nat imyu pasar it ildaw yat aten. Ampang ya ngaytu i ipagkapapaꞌgen it pamayaꞌ mi. Baw basta teꞌteꞌan mi kanya, siguradung matanggap mi i kakumplituwan it karibriyan mi nga magꞌaꞌareg kat muꞌsa nga piniliꞌ baw ipiyapinpin it Ampuꞌang Diyus nga mga taawan ya.

³³ Yay matuud, ega minirak aku nga kupisiꞌ it bulawan, pirak u pakayan it maski siyut imyu,

³⁴ in daꞌga, namuyaan mi na nga in sang unuy paꞌres ku isaꞌun makaparag it ipagkaꞌgen ku, pati ipagkaꞌgen it mga kaꞌibaan ku.

³⁵ Atkaytuy binwat ku isaꞌun sana guruun mi gasiꞌ, nga matiyabangen kamu it beken, iyan nga mga marurupuk baw beken nga makukuriꞌ. Ka daꞌga baꞌ inaat it Ampuꞌan nga si Jesus nga subrang magkasagya i taw nga pirming magbegay, subraꞌ paꞌ kat taw nga pagbegayan?”

³⁶ Pagkatupus it muꞌsa ngayting inampang ni Pablo, namaglingkuꞌud sirang muꞌsa ka nanalangin.

³⁷ Talagang daꞌsira nakasagkaꞌ, namagkasgaw na sirang muꞌsa. Simnakem sirat ki Pablo ka namagpangarek.

³⁸ Ka iti i nasmekan nirang banar, ampang ya ngayting ega na magsinle-sinletegen sirat sumaꞌup situt sinirungat langit. Pagpanaw ya, namagpabayaꞌ naga sira seked duꞌun it barkuꞌ.