Mga Binwat 2 - Tagbanwa

Piyasaruman nat Espiritu Santo i mga magpamayaꞌ it ki Jesus

¹ Naꞌbut siꞌ i Aldaw it Pentecostes. Kadakel it mga apustul, sang siraan nagat beken ngayting mga magpamayat ki Jesus, namagtingped duꞌut dibwat it esang balay.

² Sakaliꞌ nga may nagnegan nira nga tingeg nga garing duꞌut langit, nga subung it agusꞌus it masbeg nga deres, baw siyakep talaga it tingeg ngayti i balay nga piyagtingpedan nira.

³ Bawnga may naltegan nira nga subuk mga diklap it apuy nga timnaꞌpun kat kada esat kanira.

⁴ Piyasaruman na sirang muꞌsa it Espiritu Santo, baw kat panakem it Espiritu Santo ngayti, nagpapuꞌun sirat mampang it belag-belag nga mga ampang nga ega naꞌadalan nira.

⁵ Ta, kat iting timpu, may duꞌun nat Jerusalem nga mga Judio nga namaggaring duꞌun it belag-belag na nga kababanwaan situt sinirungat langit. Mga taw ngayti, masiyambaen naga sirat Ampuꞌang Diyus.

⁶ Pagkagneg nirat tingeg ngayti, dakel nga namagpanglep duꞌun. Pagꞌabut nira, nandanga-danga sira ka nagnegan nirang pagꞌampangen it mga magpamayaꞌ ngayti i ampang duꞌut giyaringan nira ngayting mga banwa.

⁷ Talagang naliluꞌ sira nga banar baw magꞌingku-ingkutun, nga magꞌaat, “Daꞌga baꞌ purus taga Galilea i mamagꞌampang ngaytut belag-belag nga mga ampang?

⁸ Ta unu baytu nga kaꞌulugan, ka kada esat aten, magkagnegan tami nga pagꞌampangen niray ampang duꞌun it mga giyaringan ta nga banwa?

⁹ Ka ungaytu, ampang it taga Partia, taga Media, taga Elam. Beken ngaytu, ampang it taga Mesopotamia, taga Judea, taga Capadocia baw beken nga mga rugar nga subuk Ponto, Asia,

¹⁰ Frigia, Panfilia, Egipto, baw mga rugar duꞌut Libia nga adeꞌdeng it Cirene. Pati ampang it sira ngaytu nga gimnaring duꞌut Roma, nga mga Judio baw siminled kat pagkaJudio, nga bisitaꞌ tami.

¹¹ Subung naga sira ngaytu nga taga Creta baw Arabia. Ka ungayan ga, ipagꞌaat nira ngayan nga pasar it ega basta-basta nga binwat it Ampuꞌang Diyus, daꞌgay-daꞌga magkasepsep.”

¹² Kadakel nira ngayti duꞌun, talagang namagkaliluꞌ baw nalibeg i pikiran nira. Maamaatan sira, “Unuytung kaꞌulugan i atkaytu?”

¹³ Temed kat beken, pagselman ga nira. Pagꞌaaten paꞌ nira nga, “Bilaꞌ, mamaglangu bayan sira.”

Piyaꞌyagan sira ni Pedro ka ipiyanulduꞌ ya i pasar it ki Jesus

¹⁴ Temed timnindeg si Pedro baw kaꞌibaan ya ngayting sang puluꞌ may esang mga apustul duꞌut sarungaan it kadakel ngayti. Bawnga nanggaꞌmaran si Pedro, mga maat ya, “Mga kabanwa ku nga Judio baw muꞌsang mga beken nga situt Jerusalem, asi-asi pat imyu, pagnegan mit magayen i iꞌaat ku ngaytu.

¹⁵ Kami ngaytu, egaytu mamaglangu nga subuk tandes it beken. Unuy ilangu namen it padali-daliꞌ it kadedelman paytu?

¹⁶ In daꞌga, miyabut ngaytu kayti, pagtuman tu it magsusurat nga ampang it prupitaꞌ nga si Joel, nga magꞌaat,

¹⁷ ‘Maat it Ampuꞌang Diyus, “Kat pangiyaꞌpusang timpu, parabir mabut i umur it banwa, ildawan ku nay muꞌsang taw, nga masaruman na sira it Espiritu Santo ku. Bawnga kat panakem yat kanira, mampang i mga anak mi, babay, lalaki, it ipagpaꞌrut kut katataawan. May ipanakem kut mangaꞌwaꞌen mi nga lamang magsusulag, subuk pagtagaynepen nira. Baw iyan magugurang mi, may ipanakem kut kanira nga tagaynepen nirat magꞌigaꞌ.

¹⁸ Eeꞌ baꞌ, kat iting timpu, talagang ildawan kuy muꞌsang mga manigsirbi ku, babay, lalaki, nga pasaruman na sirat Espiritu Santo ku. Bawnga kat panakem yat kanira, mampang sira it ipagpaꞌrut kut katataawan.

¹⁹ Baw may ipalteg ku nga mga tandaꞌanan nga kalililuꞌang mga bagay nga maltegan duꞌut langit baw situt banwa. May maltegan nga duguꞌ, apuy baw maꞌpal nga tabuk.

²⁰ Bawnga in magꞌaꞌabut nay mataꞌas ngayan nga ega basta-bastang aldaw nga ipangukuman na it Ampuꞌang Diyus it katataawan, demlem nay aldaw. Iyan bulan, kat panleteg it taw, atnat duguꞌ.

²¹ Baw yay matuud, maribri i kumpur magpaꞌildaw it aken”, maat it Ampuꞌang Diyus.’”

²² Maat paꞌ ni Pedro, “Kamung mga kabilug ku nga tungtung-inapuꞌ ni Israel, pagnegan mit magayen i ipagꞌaat ku ngaytu. Si Jesus ngayan nga taga Nazaret, maꞌyag nga siyarigan kanya it Ampuꞌang Diyus. Kamatuudan, kat keseg it guna it Ampuꞌang Diyus ngaytu, talagang ega basta-basta i nabwat ya situt imyu nga mga tandaꞌanan nga kalililuꞌang bagay. Urut mi nagaytu ka nagpasar kat mata mi.

²³ Temed ta, ipiyaꞌalima mi kanya ngaytu duꞌun it mga taw nga ega magkilala it Ampuꞌang Diyus, ka ipiyaꞌimatay mi kanya duꞌun it krus. Temed yay matuud, pagtuman tu lamang it pabetang-betang it Ampuꞌang Diyus.

²⁴ Talagang nakapaꞌimatay mi si Jesus ngaytu, temed inggen kanyat paꞌuliꞌ it Ampuꞌang Diyus, ka ega mapakay nga mapuꞌgunan kanya it kamataynen.

²⁵ Dedemdemen mi i magsusurat nga ampang it tagnang adiꞌ nga si David, ka miniguꞌ nang banar it ki Jesus ngaytu. Magꞌaat ngayan i magsusurat, ‘Magkamuyaan ku nga pirming kat uꞌnaan ku i Ampuꞌang Diyus. Pirming situt aken i tabang ya, aypaꞌ ka daꞌku patarantaꞌ.

²⁶ Ituy magkasagyaan it nakem ku, baw kaꞌilangan ipagsugid kuy kasagyaan ku ngayni. Baw beken, Ampuꞌang Diyus ku, maski matay i bilug ku, pagsisiguruun ku nga,

²⁷ ega tananan muy kiyarurwa ku duꞌun it pagꞌaꞌanuꞌan it mga miyatay. Ega pataꞌnan mu nga marunut duꞌut lebeng i bilug ku, aku nga magsunud nga pirmi it kaꞌirgan mu.

²⁸ Itiyulduꞌ mut aken i dalan nga magpaꞌaduꞌun it kaꞌgenan nga egay kaskedan. Baw ega nay kasubraꞌ it kasagyaan ku in asan aku nat imu.’

²⁹ Ta kayti, mga kasulsugan, panawun it pikiran mi i ipagrapar ku ngaytu. Daꞌga baꞌ si David ngayti nga kagiyaringanan tami, miyatay kanya baw ilimbeng? Baw daꞌga baꞌ seked kayti situ pat aten i limbengat kanya?

³⁰ Temed nakaꞌampang kanya it atkayti sabap it piyaprupitaꞌ kanya. Naꞌrutan yay isiyanggup it kanya it Ampuꞌang Diyus it may sumpa. Sanggup ngayti, may ipaꞌdung it Ampuꞌang Diyus kat pagkaꞌadiꞌ ni David nga esa it mga tungtung-inapuꞌ ya.

³¹ Isiyugid ni David i ipiyanakem it kanya pasar it pagꞌegen ni Cristo it paꞌuliꞌ, nga ega talaga tananan duꞌun it pagꞌaꞌanuꞌan it mga miyatay, baw ega pataꞌnan i bilug ya nga rumunut duꞌun it lebeng.

³² Ta, paꞌaaten ya ngaytu, si Jesus nga inggen it Ampuꞌang Diyus it paꞌuliꞌ. Baw kami ngaytung muꞌsa i magpamatuud kaytu, ka pagkaꞌgen ya ngaytit paꞌuliꞌ, nakitaen namen naga kanya.

³³ Kayti, binggayan na si Jesus it ega basta-bastang kataꞌasan duꞌun nat iwanang ayun it Diyus Amaꞌ. Baw tiyanggap na ni Jesus i isiyanggup it Diyus Amaꞌ nga pasaruman i bilug namen it Espiritu Santo. Ta, mga itu nga magkaltegan baw magkagnegan mi na ngaytu kayti, sabap tu it piyapasaruman kami ni Jesus it Espiritu Santo.

³⁴ Simpri ega naga si David ngayti i nagpatibung duꞌun it langit. Aypaꞌ ega kanyang sadili i pagpapuntuꞌan ya kat inaat ya ngayti, nga magꞌaat, ‘Maat it Ampuꞌang Diyus duꞌun it Ampuꞌan ku nga Cristo, “Kayti madung ka na sinit iwanan ku nga ayun,

³⁵ seked it iyan mga kalaban mu, paꞌampuꞌun ku na nga tutungtungan mana sira it aꞌay mu.”’

³⁶ Aypaꞌ kayti, ipagrapar ku nat imyu nga mga tungtung-inapuꞌ ni Israel i kamatuudan ngaytu, nga si Jesus ngaytu nga ipiyaransang mi duꞌun it krus, ipiyatindeg kanyat Ampuꞌang Diyus nga Ampuꞌan baw Manriribring Adiꞌ tami nga muꞌsa.”

³⁷ Ta, pagkagneg it mga taw it inaat ngayti ni Pedro, dakulang eter-eter it seled nira ka tindek talagay nakem nira. Aypaꞌ iningkut nira si Pedro baw beken ngayting mga apustul. Maat nira, “Ta bilaꞌ, in atkayan, mga sulsug, unu nay buwaten namen?”

³⁸ Tiyubag sira ni Pedro, nga magꞌaat, “Ta, kaꞌilangan, magsinguliꞌ kamu it mga kasalaꞌan mi, baw pabawtis nga magpamatuud it pakilagpit kamu nat ki Jesu-Cristo. Buwaten mi tu isaꞌun mapasinsiya i mga kasalaꞌan mi baw begayan kamu nga pasaruman it Espiritu Santo.

³⁹ Ka ituy isiyanggup it aten nga muꞌsa, pati mga kaꞌanakan ta baw mga taw duꞌut mga alalaid nga mga rugar, kumpur taꞌwagen it Ampuꞌang Diyus nga pasakep it kanya.”

⁴⁰ Dakulaꞌ pay inampang ni Pedro nga pamatuud baw sasar ya baw ipiyagbenge-bengel yat kanira, nga magꞌaat, “Iyan siguruun mi nga maribri kamu, nga ega na kaꞌuyutan it mga taw nga maraꞌe-raꞌet i adat, nga talagang rigaen it Ampuꞌang Diyus.”

⁴¹ Ta, egay beken, iyan namayaꞌ it inampang ya ngayti, nagpabawtis na sira. Iting aldaw, tulung ribu i kadakel it nakadungag kat mga magpamayaꞌ it ki Cristo.

⁴² Baw muꞌsa sira ngayti, talagang pagpaꞌresan niray ipagpanulduꞌ it mga apustul baw pirmi sira nga mamagtingped. Magsagpu-sagpunun paꞌ sira it pangaꞌen nga uyut i pagbuwateng Apunan baw pirmi gasiꞌ nga magpanalangin.

Mga adat it uꞌnang mga magpamayaꞌ

⁴³ Dakel nga tandaꞌanan nga kalililuꞌang bagay i magkabwat it mga apustul, aypaꞌ ka muꞌsang katataawan, paggalangen nira it may iꞌlam i Ampuꞌang Diyus.

⁴⁴ Mga magpamayaꞌ, buwat nira, pirmi sirang mamagtingped baw talagang urunyun sirang muꞌsa. Ega mamagꞌitu-itungun sirat maski unung betang nira nga pagkaꞌilanganen it sulsug nira kat pamayaꞌ.

⁴⁵ Kamatuudan, in may kagipitan it sang kataawan, buwat it beken, magpaꞌalang sirat mga betang u kusas nira ka itabang nirat magkakuriꞌan ngayting sulsug nira kat pamayaꞌ, in sang unuy pagkaꞌilanganen ya.

⁴⁶ Baw buwat nirat aldaw-aldaw, mamagtingped sira duꞌun it piyakakamaꞌyagan it Templo. Adat nira gasiꞌ, mamagdugu-dugupun sirat pagkaraꞌnen it masagyay nakem nga egay antap nga ega magayen.

⁴⁷ Pirmi sira nga mamagbantug it Ampuꞌang Diyus, baw pagdaya-dayawun sira it kadakel it mga taw nga ega paꞌ namayaꞌ. Talagang aldaw-aldaw may pagꞌildawan it Ampuꞌang Diyus it karibriyan, nga ipagdungag yat mga magpamayaꞌ ngayti.