Mga Binwat 19 - Tagbanwa

Tiyuman ni Pablo i inaat yat mga taga Efeso nga paꞌuliꞌ naga kanya duꞌun baw manulduꞌ

¹ Iyan duꞌun nat Corinto si Apolos, si Pablo ngayting naꞌaduꞌun it mga napanulduꞌan ya ngayti nga duꞌun it Galacia baw Frigia, nakaꞌbut siꞌ duꞌun it Efeso. Pagꞌabut ya duꞌun, may nakitaan yang mga magpamayaꞌ.

² Iningkut ya sira, “Unu,” maat ya, “pagpamayaꞌ mi, piyasaruman kamu nat Espiritu Santo?” Maat i tubag nira, “Daꞌgay masugid namen. Yapay kagneg namet paꞌaaten ngayang Espiritu Santo.”

³ “Ta, in atkayan,” maat ni Pablo, “unuy nasepsepan mit pagbawtis it imyu? Unuy kaꞌulugan ya?” “Aaꞌ,” maat nira, “iyan i nasepsepan namen, subung it pagꞌaaten ni Juan ngayting magpamawtis it tagnaꞌ.”

⁴ Tiyubag sira ni Pablo, nga maat ya, “Iyan pagbawtis ni Juan, magsugid it, taw nga magpabawtis, nagsinguliꞌ nat mga kasalaꞌan ya. Temed daꞌga baꞌ ipagpanulduꞌ gasiꞌ ni Juan nga kaꞌilangan mamayaꞌ ta it kanya nga magsusunud it ki Juan ngayti? Paꞌaaten ya ngayti, si Jesus.”

⁵ Ta, pagkagneg it mga taw ngayti, nagpasaꞌup sira sit pabawtis nga imandaꞌan it magpamayaꞌ na sirat Ampuꞌan nga si Jesus.

⁶ Pagkabawtis it kanira, piyanalanginan sira ni Pablo it pamagtatapalen yay ulu nira. Ta, piyasaruman na sirat Espiritu Santo. Kamatuudan, miyampang sirat belag-belag nga ampang nga ega naꞌadalan nira, baw isiyugid nira i ipiyanakem it kanira it Ampuꞌang Diyus.

⁷ Kadakel it mga lalaki ngayti, mga sang puluꞌ baw duwa.

⁸ Garing sikayti, kada maꞌbut i Aldaw it Kapaꞌnaan, magseled si Pablo duꞌun it papagsambaan it mga Judio ka magpanulduꞌ. Seledat tulung bulan, ipagmaꞌiseg yat paꞌyag i pasar it kaꞌadiꞌan it Ampuꞌang Diyus, isaꞌun sana mapapamayaꞌ ya sira.

⁹ Temed ta, magpatgas gay beken, ka talagang daꞌsira kupamayaꞌ it panulduꞌ ya. Pagtibabaꞌen paꞌ nira i dalan it karibriyan kat adapan it kadakel. Iyan namuyaan ni Pablo nga atkayti i buwat nira, tiyananan ya sira. Ipiyablag yay mga magpamayaꞌ, ka namagpaꞌugad sira duꞌun it esang dakulang balay nga pagpangadalan it esang taw nga pagpangaranat ki Tirano. Bawnga aldaw-aldaw, sikayti na i pagpanulduꞌan ni Pablo it mga taw.

¹⁰ Binwat yay atkayti it seledat duwang taꞌun. Aypaꞌ, ega lamang mga taga Efeso ngayti i nakagneg it panulduꞌ yat ampang it Ampuꞌang Diyus, in daꞌga kadakel nat mga taw, Judio baw ega Judio, nga duꞌun it prubinsiyat Asia ngayti.

¹¹ Baw talagang ega basta-basta i mga kalililuꞌang bagay nga ipagpabwat it Ampuꞌang Diyus it ki Pablo.

¹² Kamatuudan, basta may nakapadiꞌkit it bilug ya nga lages u pagsambutun nga rambay, nga yanay ipadiꞌkit gasiꞌ duꞌun it mga magsarut, magpedek i sarut nira, u limꞌid i magpapulpug nga maraꞌe-raꞌet.

Pasar it nabetangan it mga anak ni Esceva, dakel i nangindiꞌ it mga kepetan nira

¹³ Kat iting timpu, may miyabut duꞌut Efeso ngayti nga mga magleꞌag-leꞌag nga mga Judio. Buwat it iting mga taw, mamagꞌimugaw it mga maraꞌe-raꞌet. Pagkamuya nira nga ngaran it Ampuꞌan nga si Jesus i pagsangpiten ni Pablo in magꞌimugaw kanyat maraꞌe-raꞌet, napikir nira nga guruun. Aypaꞌ, kaꞌsang magꞌimugaw siꞌ sira, maat nira, “Pagꞌaaten namen ikaw nga maraꞌe-raꞌet, kat ngaran ni Jesus nga ipagpangadal ni Pablo, limꞌid ka!”

¹⁴ Mga mamagꞌimugaw ngayti, pitu sirang kataawan, namagsulsu-sulsugun. Amaꞌ nira, esang pagbayaꞌen it sasirduti, ngaran ya, si Esceva.

¹⁵ Takaꞌ, tiyubag ga sirat maraꞌe-raꞌet ngayti, nga magꞌaat, “Bilaꞌ! Pagkilalaen ku bayan si Jesus, baw si Pablo, magkakilalaan ku gasiꞌ. Temed in kamu, ega kilala ku in siyu may siyu kamu!”

¹⁶ Unupat riyusuban nat taw ngayting magpulpug i pitu ngayting kataawan baw siyariyan ya nat pasakit. Egay nabwat nira, piyamagdaꞌeg. Daꞌsira nakaꞌintur i nanliꞌwan duꞌut balay ngayti. Namagkalelbasan baw namagkabungad-bungadan paꞌ.

¹⁷ Nabaritaꞌan it muꞌsang mga taga Efeso ngayti, Judio baw ega Judio, i iti ngayti. Aypaꞌ ka kadakel nira duꞌun, namagꞌiꞌlam na, baw subrang nabantug i ngaran it Ampuꞌan nga si Jesus duꞌun.

¹⁸ Garing duꞌun kayti, dakel i mga magpamayaꞌ nga subuk nasulag. Aypaꞌ ipiyalbaw nira baw sininguliꞌan i mga kasalaꞌan nira duꞌun it adapan it kadakel.

¹⁹ Dakel sira nga, lamang namayaꞌ na sirat Ampuꞌan, may pagsarigan nira pang beken, nga subuk mutyaꞌ, duwaꞌa, baw beken pang kiyaꞌrutan. Ta, egay beken, mga kasuratan nga pamagsusuratan it kaꞌrut nira ngayti, ipiyagparada nira nang muꞌsa, bawnga siyuriban kat matat kadakel. May kimnatu-katu it regat muꞌsa ngayting mga kasuratan, nagkantidad it subrat limang pulung ribu.

²⁰ Ta gimnaring sikayti, subraꞌ na nga dakulaꞌ i liyapusan it ipagpanulduꞌ nga ampang it Ampuꞌang Diyus baw dimnakel pang banar i mga magpamayaꞌ.

May dakulang kaguluwan nga limniꞌwan duꞌun it Efeso

²¹ Ta, napikir siꞌ ni Pablo nga mapanaw, nga paꞌaduꞌun sit Macedonia baw Acaya, bawnga lumangbus duꞌun it Jerusalem. Maat ya, “Pagkapangigaꞌ ku duꞌun it Jerusalem, kaꞌilangan nga paꞌaduꞌun aku nat Roma.”

²² Pagkapikir ya kayti, piyauꞌna ya na duꞌun it Macedonia i duwang katabang ya nga si Timoteo baw si Erasto. Kanya, nagpatuduꞌ paꞌ duꞌun it prubinsiya ngaytit Asia.

²³ Temed, kat iting timpu, timnindeg i ega basta-bastang kaguluwan sabap it dalan nga ipagpanulduꞌ ni Pablo.

²⁴ Yay nagpapuꞌun-puꞌun, si Demetrio. Kanyay esang mananalsal, nga dakel i taawan ya nga mananalsal naga, nga manigbuwat it dedekeyeng ladawan it papagsambaan nga duꞌun it Efeso it pagbete-beteꞌen nga diyus nira nga si Diana. Mga ladawan ngayti, pirak i binwat, baw talagang magkapirakan nira i iti nga panulus.

²⁵ Binwat ni Demetrio ngayti, tiningped yay mga taawan ya baw beken nga iti nagay kanirang panulus. Pagkatingped, maat ya, “Mga kaꞌibaan kung mananalsal, urut tami nga muꞌsa nga itu nang panulus i ikinseg ta.

²⁶ Temed, kayti, magkamuyaan baw magkabaritaꞌan mi na in unu may unu i pagbuwaten it taw ngaytung pagpangaranat ki Pablo. Pagꞌaaten ya nga ega talagay kakapulusan it pagsamba tamit mga diyus nga binwat it taw. Dakel na talagay napapamayaꞌ ya baw nakumbinyu ya, it ega lamang situt Efeso ngaytu, in daꞌga agen-agen it lemkep naytut muꞌsang Asia.

²⁷ Aypaꞌ, in pataꞌnan ta na lamang, ega maꞌlay, ega lamang panulus ta ngaytuy rumaꞌway kat matat kadakel, in daꞌga pati papagsambaan it mabantug nga diyus ta nga si Diana, magbaraꞌ nang egay kakapulusan. Ta liꞌwan ya, matibabaꞌ na i kabantugan ya, kanya nga pagsambaen it muꞌsang taw, ega lamang situt prubinsiyat Asia ngaytu, in daꞌga, kat muꞌsang banwa situt sinirungat langit.”

²⁸ Pagkagneg nira, kulput na sirat iseg. Ipaggaꞌu-gaꞌuy na nira, nga magꞌaat, “Mabantug si Diana nga pagsambaen tami nga mga taga Efeso!”

²⁹ Unupat nagulu nay sang kasiyudadan. Egay beken, miyuꞌsa na sirat dimnaliꞌ duꞌun it papagtingpedan nira nga rugar. Pagrarayaken it beken i duwang kataawan nga kaꞌibaan ni Pablo, nga si Gayo baw si Aristarco nga taga Macedonia.

³⁰ Pagkaꞌrut ni Pablo, ireg ya sana nga adapen yay kadakel ngayti, takaꞌ siyabatan kanyat mga magpamayaꞌ.

³¹ Baw ega lamang sira, in daꞌga may pira nga mga punuꞌan it prubinsiyat Asia ngayti nga, paribasay magayen i pakiꞌiba-iba nirat ki Pablo, simnabat gasiꞌ. May tiyaꞌeg nira nga paꞌaduꞌut kanya nga ipagbenge-bengel nga ega iduꞌlung i ginawa ya duꞌun it kaguluwan ngayti.

³² Ta, mga taw ngayti duꞌun it papagtingpedan nga rugar, daꞌna magkaꞌru-kaꞌrutay tingeg-tingeg nira ka namelag-belagen it ipamaggaꞌuy. Kadaklan nira, ega magkaꞌrutan niray puꞌun-sabap, magpabaya-bayaꞌ na lamang it gumaꞌuy.

³³ Iyan atnakayti, miniꞌlam i mga Judio duꞌun. Aypaꞌ, binwat nira, piyapatindeg nira i esang kabilug nira, nga si Alejandro, duꞌut tengat kadakel ngayti isaꞌun ipatantu it kanira nga ega mga Judio i pagpanggaringan it iting kaguluwan. Pagkatindeg ni Alejandro, sininyasan yay kadakel ngaytit alima ya nga ega na timingeg ka kuꞌampang kanya.

³⁴ Temed it kilala nira na nga Judio naga kanya, maꞌunu pagneg sira, isan yan inggetan nira nay ipaggaꞌuy nira ngayti nga magꞌaat, “Subrang mabantug si Diana nga pagsambaen tami nga mga taga Efeso!” Yanayti i pagsaꞌu-saꞌupun nirat seledat duwang uras.

³⁵ Apa-apasan masabatan sirat sikritaryu it siyudad ngayti. Iyan namagpasabat na, maat yat kanira, “Mga kabanwa kung taga Efeso, siyung taw i ega magkaꞌrut nga situt Efeso ngaytu i puꞌun it pagsamba it mabantug nga diyus nga si Diana, ka sikaytung siyudad i pagtitindegat papagsambaan it kanya, baw sikaytu gasiꞌ i naꞌlugan it ega basta-bastang batu nga ladawan ya nga garing duꞌut langit?

³⁶ Talagang egay kapakiꞌambut it itung mga bagay, aypaꞌ kaꞌilangan, ipaꞌulibas mi nay iseg mi ngaytu. Ayaw kamut pabiglaꞌ-biglaꞌ.

³⁷ Ka, mga taw nga tiyaban mi situ, ega naga magpamisi-pisiꞌ sirat mga betang it papagsambaan ta. Ega gasiꞌ pagtibabaꞌen niray pagsambaen tami.

³⁸ Aypaꞌ, si Demetrio ngaytu baw mga kaꞌibaan yang mananalsal, in talagang may nasalaꞌan nira kuntraꞌ it beken nga taw, abri naga i papagꞌukumanan ta ngayti. Magayen, iꞌapyat niray ipagkudimanda nira duꞌun it gubirnadur ka paꞌukuman sira duꞌun.

³⁹ U in beteꞌ may beken paꞌ, nga ireg mi, isun-isunan it kadakel, ta, mapakay nagayan basta uyun kat ipiyagꞌurdin pasar it miting it puꞌsa.

⁴⁰ Ka in maꞌrutan it gubirnu duꞌun it Roma nga atkaytuy binwat ta, siguradung madimandaan taming muꞌsa nga kiyuntraꞌ tay urdin nira nga bawal i panggulu. Talagang egay makapaliꞌwan ta nga pangataldengan it kaguluwan ngayan kagayna.”

⁴¹ Pagkatupus yat ampang ya ngayti, piyaꞌuliꞌ ya nay kadakel.