Mga Binwat 17 - Tagbanwa

Dakel i namayaꞌ it panulduꞌ ni Pablo duꞌun it Tesalonica, temed dakel gasiꞌ i namagꞌiseg it kanya

¹ Garing duꞌun it Filipos ngayti, tiyaꞌliban na Pablo i mga siyudad it Anfipolis baw Apolonia, bawnga nakaꞌbut sira duꞌun it Tesalonica. Duꞌun, may papagsambaan it mga Judio,

² aypaꞌ subung nat buwat yat kaꞌlay, siminled si Pablo duꞌun ka nanulduꞌ it mga namagtingped. Tulung kaꞌbut it Aldaw it Kapaꞌnaan, ipagpaꞌyag yat kanira i kaꞌulugan it mga kasuratang ampang it Ampuꞌang Diyus.

³ Ipiyagpaꞌyag ya i magbebtang duꞌun, nga kaꞌilangan maꞌimatay baw maꞌgen it paꞌuliꞌ i Cristo ngayting Manriribring Adiꞌ nga isiyanggup it Ampuꞌang Diyus. Baw ipiyagꞌaat ya pang beken it kanira, nga maat ya, “Si Jesus na ngaytu nga ipagpangadal kut imyu, kanya na ngaytu i Cristo nga paꞌaaten.”

⁴ Pagkagneg nira it panulduꞌ na Pablo, duwa ni Silas, dakel na i namayaꞌ it pagꞌaaten nira ngayti. May namayaꞌ naga nga mga Judio, temed yay dakel nga banar, sira nga maski ega Judio temed masiyambaen naga it Ampuꞌang Diyus. Pati mga babay nga mataꞌas i duguꞌ, dakel gasit kanira i namayaꞌ it ki Jesus.

⁵ Temed iyan beken nga mga Judio, namagꞌinggit ga. Binwat nira, namagkumbinyu it mga taw nga buwal baw garusan. Iyan dakel na sira, giyulu na niray siyudad ngayti. Inaduꞌun na niray balay ni Jason ka tanud nira duꞌun na Pablo. Yay antap it nakem nira, pisiꞌen sira ka ipaꞌadap duꞌun it kadakel.

⁶ Ta it egay naparagan nira nga na Pablo duꞌun, iyan nay riyayak nira, si Jason baw beken nga mga magpamayaꞌ, ka iyan nay tiyaban nira duꞌut mga punuꞌan. Ipaggaꞌu-gaꞌuy na nira nga magꞌaat, “Naꞌbut nay ateng rugar it mga taw ngayting magpanggulu it kada abutun nirang rugar.

⁷ Si Jason ngaytu, piyaꞌapyat ya sira duꞌun it balay ya. Yay matuud, sira ngaytung muꞌsa, pagkuntraꞌen niray mga urdin it Impiradur, ka ipagpaliꞌwan nira nga yay matuud nga adiꞌ, si Jesus.”

⁸ Talagang namagkaguluy ulu it kadakel ngayti, pati mga punuꞌan, pagkagneg nirat pagꞌaaten ngayti.

⁹ Aypaꞌ, binwat it mga punuꞌan ngayti, piyaꞌlug nira na Jason baw mga kaꞌibaan ya it dakulaꞌ nga kantidad, nga iꞌuliꞌ mana basta ega nay buwaten na Pablo nga panggulu nira ngayti. Pagkabgay it ipagpaꞌlug ngayti, bawnga piyaꞌuliꞌ na Jason.

Pagsiguruun it mga taga Berea i kamatuudan it ipagpanulduꞌ ngayti na Pablo

¹⁰ Iting delem, piyapanaw nat mga magpamayaꞌ duꞌun it Tesalonica ngayti na Pablo, duwa ni Silas. Piyapaꞌugad na duꞌun it Berea. Pagꞌabut nira duꞌun, namagseled siꞌ duꞌun it papagsambaan it mga Judio ka nanulduꞌ siꞌ.

¹¹ Talagang magagayen i adat it mga taga Berea, nga magayen pat mga taga Tesalonica. Ka masasagya sirang magpagneg it panulduꞌ ngayti na Pablo, baw aldaw-aldaw talagang pagꞌadalan nirat magayen i mga kasuratang ampang it Ampuꞌang Diyus, in unu, matuud i muꞌsa ngayting pagꞌaaten.

¹² Aypaꞌ dakel sirang mga Judio i namayaꞌ. Mga Griego, atkayan naga. Dakel i mga babay nira nga mataꞌas i duguꞌ nga namayaꞌ baw dakel gasing mga lalaki.

¹³ Temed pagkabaritaꞌ it mamagꞌinggit ngayting mga Judio duꞌut Tesalonica nga duꞌun sit Berea i pagpangadalan na Pablo it ampang it Ampuꞌang Diyus, inaduꞌun nira ka guluun siꞌ i kadakel duꞌun, baw paꞌulu-uluwan sira nga mangiseg it kana Pablo.

¹⁴ Ta, it atkayti siꞌ, binwat it mga magpamayaꞌ duꞌut Berea, piyapanaw na nira si Pablo, nga lumampud duꞌun it dagat ka paꞌugad siꞌ duꞌut beken nga rugar. Takaꞌ, na Silas, duwa ni Timoteo, ipiyagtuduꞌ naga ni Pablo duꞌun it Berea.

¹⁵ Mga inupakat nga mangiba it ki Pablo, idiyuꞌlung nira kanya seked duꞌun it Atenas. Pamaggaring nirat muliꞌ, itinggun ya nga tumundug naga na Silas it madaliꞌ.

Naꞌyagan it mga taga Atenas i kamatuudan pasar it Ampuꞌang Diyus

¹⁶ Mintras pagꞌelaten ni Pablo na Silas duꞌun it Atenas ngayti, talagang nagulu i ulu ya, ka naltegan ya nga subuk yanay betang it iting siyudad, mga tiyaw-taw nga ladawan it mga pagbete-beteꞌen nira nga mga diyus.

¹⁷ Aypaꞌ, buwat ya, duꞌun it papagsambaan it mga Judio magpanulduꞌ kanyat mamagtingped duꞌun, nga mga Judio baw beken nga taw nga ega Judio temed masiyambaen sira it Ampuꞌang Diyus. Baw aldaw-aldaw duꞌun kanyat mataawun nga rugar it siyudad, magpanulduꞌ gasiꞌ it mga taw nga magkakitaan ya duꞌun.

¹⁸ Temed, ega naꞌlay, biyatir kanya it pirang kataawan nga kaꞌuyutan it mga Epicureo baw mga Estoico. May miyaat nga, “Bilaꞌ! Siyu baytung taw nga magpamatul-batul ngaytut manulduꞌ? Ega bay kasepsep yang sadili. Pagguruun ya lamang duꞌut beken.” Temed maat it beken, “Subuk belag siꞌ nga piyakadiyus i ipagpanulduꞌ ya ngaytu.” Pagꞌaaten niray atkayti ka nagnegan nira i panulduꞌ ni Pablo pasar it ki Jesus baw pagꞌegen ya ngaytit paꞌuliꞌ.

¹⁹ Aypaꞌ ka piyabayaꞌ nira kanya duꞌun it papagtingpedan nira nga pagpangaranat Areopago, nga iti ngayti, papagtingpedan naga it mga piyakamataꞌas nga manigꞌukuman duꞌun it Atenas ngayti. Maat i mga nagpabayaꞌ ngaytit ki Pablo, “Asi-asi pat imu, ireg namen nga maꞌyagan i ipagpanulduꞌ mu ngaytu ka yapay kagneg namen.

²⁰ Ka talagang kalililuꞌan kat talinga namen i ipagpaliꞌwan mu ngaytu. Aypaꞌ ireg namen nga maꞌrutan i kaꞌulugan ya.”

²¹ (Iyan bay adat it mga taw duꞌut Atenas ngayti, datiyan nga taga duꞌun baw mga dayuꞌan, maꞌireg it pagneg baw panuturan it baꞌgung mga bagay. Egay bekeng pagpasasawan nira.)

²² Aypaꞌ timnindeg si Pablo duꞌun it adapan it kadaklan ngayting namagtingped duꞌun it Areopago ngayti baw nagpapuꞌun kanyat mampang. Maat ya, “Mga taga Atenas, talagang magkamuyaan ku nga, kamu situ, masiyambaen nga mga taw.

²³ Ka, iyan magpanaw-panaw aku nga magpanleteg-leteg it mga tiyaw-taw nga pagsambaen mi situ, may napsagan ku nga pagsusuratan it magꞌaat, ‘Pabatuꞌ it diyus nga ega paꞌ kilala tami.’ Ta kayti, yanaytuy ipagpangadal ku ngaytut imyu, itiꞌen ngayting Diyus nga maat pagsambaen mi, lamang ega paꞌ magkakilalaan mi.

²⁴ Kanya ngaytu nga Ampuꞌang Diyus i gimnuna it langit baw banwa, baw muꞌsang paryaman nira. Baw paribasay kanya i Ampuꞌan nga magbebegbeg it langit baw banwa, ega magtaꞌid kanya duꞌun it papagsambaan nga binwat lamang it taw.

²⁵ Baw ega gasiꞌ kaꞌilangan ya nga pagsirbiyan it taw, adimaat may maski unung tabang nga pagkaꞌilanganen ya, sabap kanya i magbegay it kaꞌgenan, ginawa baw muꞌsa nga pagkaꞌilanganen it muꞌsang binwat ya.

²⁶ Baw yay matuud, lamang esa-esay puꞌun ta nga taw, piyadakel ya nay mga bangsa, isaꞌun malkepan it taw i banwa ngaytu nga giyuna ya. Baw kanya nagay nagpabetang-betang it mga timpu baw banwa it kada bangsa ngaytu, nga in kaꞌnuy ipatindeg ya u ipuuꞌ, baw in ari mga seked it mataꞌidan nirang mga rugar.

²⁷ Binwat ya i atkaytu isaꞌun, muꞌsang taw, tumulus sana it kanya, it maski maat rantap nga tulus, isaꞌun lamang maparagan nira. Ka yay matuud, ega naga alaid kanya kat kada esat aten.

²⁸ Itu, subung it sambatan it tagnaꞌ nga magꞌaat, ‘Kanya talagay puꞌun it kaꞌgenan baw ginawa tami. Eeꞌ baꞌ, egen tami sabap lamang it pabetang-betang ya.’ Daꞌga basaꞌan, subung nagat ipiyagsugid it beken nga mga mapipikir situt imyu, nga magꞌaat, ‘Kita nga taw, subung it ipiyanganak ya’?

²⁹ Ta, it kita, subuk ipiyanganak it Ampuꞌang Diyus, dapat nga ega pikiren ta nga subung kanya lamang it tiyaw-taw nga bulawan u pirak nga binwat u batu nga piyarparan. Ka mga ladawan ngaytu, uyun lamang kat kakayaan baw kiyaꞌrutat taw.

³⁰ Iyan tagnaꞌ paꞌ, subuk piyabaya-bayaꞌan it Ampuꞌang Diyus i mga kamaliꞌ it mga taw nga daꞌgay uru-urut pasar it kanya. Temed kayti, ipagsasar yat muꞌsang katataawan, kat paꞌari-aring rugar, nga magsinguliꞌ na sira baw indiꞌan nay muꞌsang kasalaꞌan nira.

³¹ Ka ipiyabetang-betang ya nga lagi i aldaw nga ipangukuman ya it muꞌsang taw kat mga kasalaꞌan nira. May esang taw nga ipiyatindeg ya nga mangukuman, baw mataldeng i pangukuman ya ngaytu. Kamatuudan it kanya i ipiyatindeg it Ampuꞌang Diyus, natay kanya bawnga inggen kanyat Ampuꞌang Diyus it paꞌuliꞌ.”

³² Desang nasangpit ni Pablo i pagꞌegen ngaytit paꞌuliꞌ, mamagsele-selem nay beken nga mamagpagneg it kanya ka magpakiꞌambut. Takaꞌ, iyan beken, maat nira, “Pagnegan namen naga ikaw it sumaꞌup it itung mga bagay.”

³³ Aypaꞌ, iyan atkayti na, liminꞌid si Pablo duꞌun it kadadaklan ngayti.

³⁴ Temed may beken gasiꞌ nga nagpakikumbiꞌlid nat ki Pablo baw namayaꞌ nat Ampuꞌan. Esat mga namayaꞌ ngayti, si Dionisio nga kaꞌuyutan it mga piyakamataꞌas nga manigꞌukuman duꞌun it Atenas. Esa gasiꞌ, babay nga pagpangaranan it ki Damaris. Baw may beken paꞌ nga kaꞌibaan nira.