Mga Binwat 16 - Tagbanwa

Piyabayaꞌ na Pablo si Timoteo kat panaw nira ngayti

¹ Garing duꞌut Cilicia sigi pang panaw na Pablo, duwa ni Silas, seked nakaꞌbut siꞌ duꞌun it Derbe bawnga duꞌun it Listra. Duꞌut Listra ngayti may nakitaan nirang esang magpamayaꞌ nga pagpangaranat ki Timoteo. Inaꞌ ya, Judio nga namayaꞌ gasiꞌ it Ampuꞌan. Takaꞌ amaꞌ ya, Griego.

² Si Timoteo ngayti, pagdaya-dayawun it mga magpamayaꞌ nga taga Listra, atnaga i taga Iconio.

³ Ireg ni Pablo nga pabayaꞌen kanya kat panaw nira ngayti, aypaꞌ inupakat ya. Temed parabir napanaw sira, tiyuriꞌan ya kanya isaꞌun ega malibegan it pikiran it mga Judio duꞌun. Ka urut it kadakel nga Griego i amaꞌ ni Timoteo, baw iyan mga Griego, ega kanirang adat i pagturiꞌan.

⁴ Ta, kat panaw nira ngayti, kada abutan nirang rugar, ipagsugid nira kat mga magpamayaꞌ duꞌun, isaꞌun masunud nira gasiꞌ, i mga piyagꞌupakatan ngaytit mga apustul baw mga magpamaalaꞌ it mga magpamayaꞌ duꞌun it Jerusalem, nga ipagsasar nirat mga magpamayaꞌ nga ega Judio.

⁵ Aypaꞌ nagmapaꞌgen i pamayaꞌ it mga magpamayaꞌ kat muꞌsang rugar nga pagpaꞌaduꞌunan nira baw aldaw-aldaw magkadungagan sira.

Ipiyaꞌrut it Espiritu Santo nga duꞌun nat Macedonia i pangadalan nira

⁶ Nakaꞌaduꞌun i panaw na Pablo ngayti it mga banwa nga pagpangaranat Frigia baw Galacia. Temed it piyanakman sirat Espiritu Santo nga ega mangadal duꞌun it Asia, aypaꞌ ka napanaw na sira ayun duꞌun it Misia.

⁷ Pagꞌabut nira duꞌut patuꞌ it Misia ngayti, ireg nira nga lumangbus duꞌun it Bitinia, temed daꞌsira piyalugtan it Espiritu Santo nga piyapasarum duꞌun it kanira ni Jesus.

⁸ Aypaꞌ duꞌun nagat sakep it Misia i piyanawan nira seked nakaꞌbut na sira duꞌun it siyudad it Troas.

⁹ Pagꞌabut nira duꞌun it Troas ngayti, iyan delem na, subung it pagtagaynepen ni Pablo, magleteg kanya it esang taw nga taga Macedonia. Buwat it taw ngayti, magpaꞌildaw nga banar duꞌut ki Pablo, nga magpaꞌa-paꞌaat, “Asi-asi pat imu, in mapakay manlangbus ka duꞌun it Macedonia ka kaꞌilangan nameng banar i tabang mu.”

¹⁰ Ta, duꞌun naꞌrutan namen nga, palan, duꞌut Macedonia i ireg it Ampuꞌan nga pangadalan namen it Magayeng Baritaꞌ. Aypaꞌ piyaꞌresan nameng tumulus it masakayan it paꞌaduꞌun.

Si Lydia i uꞌnang namayaꞌ duꞌun it Filipos

¹¹ Pagkaparag it masakayan namen, nanakay kami na. Garing duꞌut Troas, nandiritsu duꞌun it pulaw it Samotracia, bawnga pagꞌeyag nanlangbus duꞌun it Neapolis.

¹² Duꞌun nay liyampudan namen bawnga napanaw kami nat limnangbus duꞌun it Filipos, esang mabantug nga siyudad duꞌut uꞌnang bagiꞌ it prubinsiya it Macedonia. Kadaklan it mga magtataꞌid duꞌun, mga Romano, ka esa nga kulunyaꞌ i Filipos ngayti. Kimnaꞌla-kaꞌlay kami duꞌun.

¹³ Napakaꞌrutan namen nga may rugar nagang pagpanalanginan duꞌut Filipos ngayti, temed duꞌut tambing it danum nga liꞌwan it siyudad. Aypaꞌ, iyan Aldaw nat Kapaꞌnaan, naꞌaduꞌun kami. Abutan namen, tingped na. Mga babay nga bulun. Ta, nagpakiꞌadung kami na baw tiyulduꞌan namen sira it Magayeng Baritaꞌ.

¹⁴ Esang nakagneg it panulduꞌ namen ngayti, babay nga pagpangaranat ki Lydia. Iting babay, manigpaꞌalang it esang piyakamaꞌal nga kalasit abel nga indilibelen. Taga Tiatira kanya temed may balay ya na duꞌun it Filipos ngayti. Masiyambaen kanya it Ampuꞌang Diyus. Bawnga pagkagneg yat panulduꞌ ni Pablo sabap it ki Jesus, inildawan kanya it Ampuꞌan nga nasepsepan yat magayen baw piyamayaꞌ ya.

¹⁵ Pagpamayaꞌ ya, nagpabawtis na, pati sira nga kat seled it pamalay-balay ya. Bawnga inupakat ya kami. Maat ya, “In leteg mit aken, namayaꞌ aku nang matuud it Ampuꞌan, duꞌun kamu na mistar it balay namen.” Sigi nang upakat yat amen, aypaꞌ nagpaꞌugad kami na duꞌun it kanira.

Napirisu na Pablo ka inisgan it agalen it esang babay nga tiyabang nira

¹⁶ May esa sing aldaw nga magpaꞌaduꞌun kami sit pagpanalanginan ngayti, naragpangan namen i esang babay nga uripen nga mamimintuꞌ. Ipagkapintuꞌ ya, pagsasaruman kanya it maraꞌe-raꞌet. Magkapirak talagay mga agalen ya sabap, kada mintuꞌ, may bayad.

¹⁷ Pagkaragpang namen it kanya, dimnasun na kanyat amen, sigi-siging gaꞌuy ya nga magꞌaat, “Itung mga taw, manigsirbi sirat Ampuꞌang Diyus nga Piyakamataꞌas. Ipagtulduꞌ nirat imyu i dalan it karibriyan.”

¹⁸ Ega lamang kaꞌsa i buwat yat atkayti, in daꞌga aldaw-aldaw. Aypaꞌ, iyan naskedan na si Pablo, siyarunga ya baw inaat i maraꞌe-raꞌet ngayti nga magsasarum duꞌun it babay ngayti, “Pagsekaten ta ikaw kat ngaran ni Jesu-Cristo nga limꞌid ka na asat kanya.” Pagkaꞌampang kayti ni Pablo, nagliꞌid nga lagi i maraꞌe-raꞌet ngayti.

¹⁹ Ta, yan namuyaan it mga agalen it babay ngayti nga ega na mapirakan nira, diyakep nira si Pablo baw si Silas bawnga riyayak-rayak nira duꞌun it mga punuꞌan it siyudad ngayti.

²⁰ Bawnga pagkapaꞌadap nirat kana Pablo duꞌun it mga piyakamataꞌas nga punuꞌan, maat nira, “Itung mga taw, mga Judio sira, baw masyadung panggulu nira situt siyudad ta.

²¹ Magpanulduꞌ sirat mga kaꞌugaliꞌan nga kuntraꞌ it mga urdin tami nga mga Romano, nga ega mapakay nga tanggapen ta u sunudun.”

²² Pagkagneg it kadaklan it mga taw nga nanramu, talagang namagpangiseg gasiꞌ sirang muꞌsa it kana Pablo. Binwat it mga piyakamataꞌas ngayting mga punuꞌan, ipiyalbas nira it pagrarasiken i pakayan na Pablo bawnga isingkat nga balbagen.

²³ Talagang tiyegelan nirat malbag bawnga pinirisu. Ipiyagbenge-bengel nira it magpamaalaꞌ it pirisuwan nga guwardiyaan yat magayen.

²⁴ Ta, paribasay atkayti i sekat it kanya, tiyaban ya na na Pablo, duwa ni Silas, duꞌun it seled nga banar it pirisuwan baw piyanglawan ya pay mga aꞌay nira.

Ipiyaliꞌwan it Ampuꞌang Diyus na Pablo duꞌun it pirisuwan

²⁵ Iyan maglubu-lubuk nay delem, siging panalangin baw pagkantaꞌ na Pablo nga magbantug sira it Ampuꞌang Diyus. Pagpapagnegan sira it mga pirisung beken.

²⁶ Bawnga sakaling yimnegyeg it makseg i lugtaꞌ. Egay beken, rimnuyag i muꞌsang pakseg it pirisuwan ngayti, dengat namagkaꞌabri nay mga talaꞌep baw namagkauꞌbad i mga magsesget it kada esa.

²⁷ Nasulag i magpamaalaꞌ it pirisuwan ngayti. Pagkalteg yat abri nay mga talaꞌep, biyarut yay basiꞌ ya ka mangeget na, ka tanud ya nakapalagyu nay mga pirisu duꞌut seled.

²⁸ Temed iyan atnakayti, piyataꞌwagan ni Pablo it diyadakulaꞌ ya, nga magꞌaat, “Ayaw kat pangeget ka wayni kami nagang muꞌsa.”

²⁹ Pagkagneg ya kayti, nagpaꞌereg-ereg kanya it paduꞌlung it tidaw. Bawnga magpapalagyuy siminled duꞌut pirisuwan baw nanluud kanya kat adapan na Pablo. Magyeyegyeg kanya it iꞌlam.

³⁰ Piyabayaꞌ ya na sira duꞌut liꞌwan bawnga miningkut. Maat ya, “Tabing galang it imyu, isugid mi in unuy kaꞌilangan kung buwaten isaꞌun maribri aku.”

³¹ Tiyubag nga lagi na Pablo i ingkut ya ngayti, nga maat nira, “Mamayaꞌ baw sumarig ka nat Ampuꞌan nga si Jesus. Iyan i ikaribri mu, pati sira nga kat seled it pamalay-balay mu.”

³² Bawnga langkuy ipiyanulduꞌ nira nay ampang it Ampuꞌang Diyus duꞌun it magpamaalaꞌ ngayti baw muꞌsang kaꞌibaan ya duꞌut balay.

³³ Ta, egay beken nga binwat it magpamaalaꞌ ngayti, tiyaban yang lagi na Pablo duꞌun it may danum ka inugasan yay mga bungad nira. Pagkatiwas, nagpabawtis na kanya, puꞌsa sirang sang kabalayan.

³⁴ Bawnga piyabayaꞌ na nira na Pablo duꞌut balay ka tiyarakanan na sira. Talagang dakulaꞌ nga banar i kasagyaan nirang muꞌsa sabap it namayaꞌ na ngayti sira it Ampuꞌang Diyus.

³⁵ Pagꞌeyag it aldaw may miyabut nga mga pulis nga tiyaꞌeg it mga piyakamataꞌas nga punuꞌan. Maat nirat magpamaalaꞌ ngaytit pirisuwan, “Ipaliꞌwan mu na i mga taw ngayan.”

³⁶ Bawnga isiyugid it magpamaalaꞌ i inaat ngayti, nga maat yat kana Pablo, “May tiyaꞌeg it mga piyakamataꞌas nga punuꞌan nga maat nira, paliꞌwanen ku na kamu. Aypaꞌ masagya kamu na nga mapanaw ka ribri kamu na.”

³⁷ Temed maat i tubag ni Pablo it mga tiyaꞌeg ngayti, “Bilaꞌ! Unung sugi-sugid i atkayan it, maski seled kami kat pagkaRomano, biyalbag kami kat muyagan, daꞌkami paꞌ inimbistigar, bawnga pinirisu kami paꞌ? Ta kayti, ireg nirang paliꞌwanen kamit ega urut it kadakel. Talagang daꞌkami magkapakay kayan. Kaꞌilangan, sira nga mga piyakamataꞌas nga punuꞌan i paꞌasitu ka yay paliꞌwan it amen.”

³⁸ Aypaꞌ miyuliꞌ nay mga pulis duꞌun it mga nagtaꞌeg ngaytit kanira, ka itiyuturan niray mga inampang ni Pablo ngayti. Pagkagneg it mga piyakamataꞌas ngayting mga punuꞌan nga palan, seled kat pagkaRomano na Pablo, duwa ni Silas, miniꞌlam sirang banar.

³⁹ Egay beken, dimnali-daliꞌ sirat maꞌaduꞌun ka miyangut it pasinsiya. Bawnga pagkapaliꞌwan nira, siging upakat nirat kana Pablo nga sana, daꞌsira magtinir duꞌun, limꞌid na.

⁴⁰ Ta, pagkaliꞌwan na Pablo duꞌun it pirisuwan, naꞌaduꞌun sirat balay ni Lydia, ka pakikita daꞌan it mga magpamayaꞌ. Tiyuduꞌan sira na Pablo it ampang nga pakseg it pamayaꞌ nira, bawnga pagkatupus it muꞌsang kuꞌampangen nira, namagpanaw na.