Mga Binwat 14 - Tagbanwa

Nanulduꞌ na Pablo duꞌun it Iconio

¹ Pagꞌabut na Pablo, duwa ni Bernabe, duꞌun it Iconio, binwat nira, subung nagat buwat nira ngayti duꞌun it Antioquia, nga siminled sira duꞌun it papagsambaan ka nanulduꞌ. Timindek nga banar i mga ampang nira kat nakem it mga magpagneg, aypaꞌ talagang dakel nga dakel i namayaꞌ, mga Judio baw ega Judio gasiꞌ.

² Temed ta, yan mga Judio nga ega kupamayaꞌ, piyaꞌulu-uluwan niray mga ega Judio nga beken, nga isgan na nira i mga namayaꞌ ngayti.

³ Temed kimnaꞌlay naga na Pablo duꞌun, nga magpangadal it may pagmaꞌiseg it nakem, pasar it Ampuꞌan. Baw pagtabangen sira it Ampuꞌan nga magkabwat sirat mga tandaꞌanan nga kalililuꞌang mga bagay, nga magpamatuud it kamatuudan talagay ipagpanulduꞌ nira ngayti pasar it ildaw it Ampuꞌang Diyus.

⁴ Ta, nabagiꞌ nay mga taw duꞌun it Iconio ngayti. Sang bagiꞌ, kampiꞌ kat mga apustul nga kana Pablo, sang bagiꞌ duꞌut mga Judio ngayting ega kupamayaꞌ.

⁵ Iyan atnakayti, binwat it mga Judio ngayti, pati mga pagbayaꞌen nira baw beken nga mga ega Judio, nagꞌupa-upakaten sirang pakuriꞌan nat egay sanguꞌ i duwa ngayting apustul baw buntalan paꞌ sira it batu.

⁶ Temed naringid-ringidan na Pablo i piyamagꞌupakatan ngayti. Egay beken, namagliꞌid sira, naꞌaduꞌun it Listra baw Derbe, mga siyudad nga sakep it Licaonia. Pati mga rugar nga duꞌun it linibut, naꞌbut nira gasiꞌ,

⁷ ka ipagpangadal nira siꞌ duꞌun i Magayen ngayting Baritaꞌ pasar it ki Jesus.

Kusamba i mga taga Listra it kana Pablo pagkapagayen nirat esang pilay

⁸ Duꞌun it Listra may esang taw nga pilay. Buwat yat kanya, magꞌaꞌdung na lamang, ka ega magkapanaw. Sekad ya i pilay ya ngayti.

⁹ Iyan magpangadal na si Pablo duꞌun, magpagneg i iting taw. Pagkalteg ni Pablo, namuyaan ya nga may pamayaꞌ it pilay ngayti nga mapagayen. Aypaꞌ tiyermek yat semyek,

¹⁰ baw diyadakulaꞌ yang ampang nga magꞌaat, “Sigi! Timindeg ka na!” Egay beken, nagpatiꞌdak nay taw ngayti, dayun it nakapanaw na.

¹¹ Pagkalteg it kadakel it binwat ngayti ni Pablo, namagpanggaꞌmaran sira kat sadili nirang ampang, nga ampang it Licaonia. Maamaatan sira, “Bilaꞌ, may mga diyus na nga nagbalyung taw ngaytu nga limnampud na situt aten!”

¹² Bawnga piyangaranan nira it Zeus si Bernabe, baw si Pablo, Hermes, sabap kanya i magpangadal nga pirmi.

¹³ Duꞌun it liꞌwan it siyudad ngayti may papagsambaan it pagbeteꞌ-beteꞌen nira nga diyus nga si Zeus. Ta, binwat it sasirduti nira duꞌun, namisiꞌ it mga bakaꞌ nga tudu nga piyabaliꞌgan yat mga bura-burak nga binwat, baw tiyaban ya duꞌun it puwirtaꞌan it siyudad. Pagpikiren ya, tabanen yay kadakel it sumamba it kana Bernabe, duwa ni Pablo. Isalisi yay mga bakaꞌ ngayti ka buwateng pasalamat.

¹⁴ Temed, iyan natanda-tandaꞌan na na Pablo i kubwaten it mga taw ngayti, riyasik niray pakayan nira ka eget nat paar nga ega buwaten i atkayti. Talagang diyali-daliꞌ nirat panengaꞌ-tengaꞌ i kadadaklan ngayti. Ipagpanggaꞌmaran na niray sabat nga magꞌaat,

¹⁵ “Kadakel mi, beteꞌ, ega buwaten mi tu. Ka kami, kasubung mi nagang taw. Ipagpaꞌrut namen ngaytut imyu nga kaꞌilangan indiꞌan mi nay mga pamagsambaen mi ngayan nga egay kamatuudan, ka ega yay mapulus. Kaꞌilangan nga pasakep kamu nat Ampuꞌang Diyus nga talagang egen, kanya nga gimnuna it langit baw lugtaꞌ baw dagat, pati muꞌsang paryaman nira.

¹⁶ Iyan tagnaꞌ paꞌ nga ega pay miyabut nga Magayen ngaytung Baritaꞌ, subuk piyabaya-bayaꞌan it Ampuꞌang Diyus i katataawan nga ega Judio, nga sumamba it in unuy kusambaen nira.

¹⁷ Temed maski atkayan, pirming pagbegayan ya kita it mga imandaꞌan it kanya i matuud nga Ampuꞌang Diyus. Kamatuudan, pirmi nga pagꞌildawan yat ipagkagayen it muꞌsang taw. Daꞌga baꞌ ipagbegay yay uran nga magpakseg it mga luwak ta, isaꞌun magbastanti i pangaꞌen baw isaꞌun magmasagya i nakem ta?”

¹⁸ Lamang ipiyaꞌyag na Pablo i muꞌsa kat inampang nira ngayti, temed talagang nakuriꞌ-kuriꞌan sirat maar it mga taw ngayting kusamba it kanira nga may ipagsamba nga panalisi. Temed, iyan naꞌlay nat kasasabat, napaaran naga sira.

Biyuntalan it batu si Pablo duꞌut Listra

¹⁹ Bawnga may miyabut duꞌun it Listra nga mga Judio, nga gimnaring duꞌun it Antioquia baw Iconio. Unupat piyaꞌulu-uluwan nira i kadakel it taw duꞌut Listra ngayti nga buntalan nira it batu si Pablo. Pagkabuntal, pagguguyudun nirang tiyaban duꞌut liꞌwan it siyudad ka, tanud nira, patay na.

²⁰ Temed ega. Pagkagaring it mga namagbuntal ngayti, iyan magtitindeg nay mga magpamayaꞌ duꞌut linibut ya, nagbangun kanya ka nakatanud siꞌ. Paggayen it ginawa ya, namagpaꞌuliꞌ sira duꞌun it siyudad. Pagꞌeyag it aldaw napanaw siꞌ sira ni Bernabe, limnangbus duꞌun it Derbe.

Piyakseg na na Pablo i pamayaꞌ it mga baꞌgung namayaꞌ bawnga namagꞌuliꞌ duꞌut Antioquia nga sakep it Siria

²¹ Duꞌun siꞌ it Derbe ngayti, ipiyangadal niray Magayeng Baritaꞌ baw dakel i namayaꞌ it Ampuꞌan. Bawnga, buwat na Pablo, duwa ni Bernabe, namagpaꞌuliꞌ siꞌ sira duꞌun it Listra, bawnga duꞌun it Iconio, bawnga duꞌun it Antioquia ngayting sakep it Pisidia.

²² Duꞌut kada rugar ngayti, pagpaksegen nira i nakem it mga magpamayaꞌ baw ipagbenge-bengel nirat kanira nga, sana, teꞌteꞌan i pamayaꞌ nirat Ampuꞌan maski pakuriꞌan. “Ka simpri,” maat nira, “kaꞌilangan, dakel i malabayan ta nga kakuriꞌan parabir mabut tami duꞌun it kaꞌadiꞌan it Ampuꞌang Diyus nga duꞌun it langit.”

²³ Baw beken nga buwat nira, kada piyaꞌuliꞌan nira nga rugar, nagpatindeg sirat mga manigpamaalaꞌ it mga magpamayaꞌ. In mapiliꞌ na, mamagpuwasa baw mamagpanalangin sira, ka ipagꞌintergaꞌ i mga napiliꞌ ngayti duꞌun it Ampuꞌan nga piyamayaꞌ nira.

²⁴ Pagkatiwas it muꞌsa ngayti, tiyananan na niray Pisidia baw nagpaꞌuliꞌ duꞌun it Panfilia.

²⁵ Duꞌut Panfilia ngayti, naꞌbut nira siꞌ i siyudad it Perga baw ipiyangadal nira duꞌun i ampang it Ampuꞌang Diyus. Garing duꞌun nanlampud na sira duꞌun it Atalia nga duꞌun it dagat.

²⁶ Duꞌun i giyaringan nirat namagpanakay nga muliꞌ siꞌ duꞌun it Antioquia ngayting sakep it Siria. Duꞌun it Antioquia ngayti i piyanalanginan it kanira it mga magpamayaꞌ nga ipagꞌintergaꞌ sira duꞌun it Ampuꞌan, nga ildawan yay panaw nira ngayti. Ta kayti, natiwas na niray ipiyabwat ngaytit kanira.

²⁷ Aypaꞌ pagꞌabut duꞌun, tiningped niray mga magpamayaꞌ baw itiyuturan it kanira i muꞌsang mga bagay nga binwat it Ampuꞌang Diyus duꞌun it piyanawan nira, baw in magꞌuꞌunu piyarugaran ya nay mga taw nga ega Judio nga mamayaꞌ it ki Jesus.

²⁸ Garing it nakaꞌuliꞌ ngayti na Pablo duꞌut Antioquia, naꞌlay siꞌ sira nga kaꞌiba-iba it mga magpamayaꞌ duꞌun.