Mga Binwat 13 - Tagbanwa

May ipiyabetang-betang it Ampuꞌang Diyus nga ipabwat ya it kana Bernabe, duwa ni Saulo

¹ Ta, kaꞌuyutan it gurupu it mga magpamayaꞌ nga duꞌun it Antioquia it iting timpu, may mga prupitaꞌ baw manigtulduꞌ. Si Bernabe ngayti i esa, baw si Simeon, nga panaꞌwag it kanya, Niger, si Lucio nga taga Cirene, baw si Manaen nga ipiyasulsug it adiꞌ nga si Herodes, baw si Saulo.

² Kaꞌsang mamagsamba sirat Ampuꞌan baw mamagpuwasa, inaat sira kat panakem it Espiritu Santo, “Kayti, ipasiguru mi nat aken si Bernabe baw si Saulo, ka buwaten na nira i ipiyabetang-betang ku nga ipabwat kut kanira.”

³ Ta, egay beken, ipiyasigi niray pagpuwasa nira ngayti bawnga piyanalanginan nirat pamagtatapalen si Bernabe, duwa ni Saulo. Bawnga piyapanaw na nira.

Namayaꞌ i gubirnadur it Chipre ka naltegan yay keseg it guna it Ampuꞌan

⁴ Kat panakem it Espiritu Santo ngayting nagpapanaw it kanira, uꞌnang inaduꞌunan nira, Seleucia. Garing duꞌun, namagpanakay sira nga nagpaꞌaduꞌun it pulaw it Chipre.

⁵ Duꞌun i piyadungguꞌan nirat Salamina. Pagꞌabut nira duꞌun, namagpangadal sirat ampang it Ampuꞌang Diyus duꞌun it mga papagsambaan it mga Judio. Si Juan Marcos ngayting piyabayaꞌ nira, katabang na nirat buwaten nira ngayti.

⁶ Iyan nalekep-lekep na niray pulaw ngayti seked duꞌut sang bali, nakaꞌbut na sira duꞌun it siyudad it Pafos. Duꞌut Pafos ngayti, may esang Judio nga katungkulan nga magpapru-prupitaꞌ. Ngaran ya, si Bar-Jesus.

⁷ Kakumbiꞌlid kanyang pirmi it gubirnadur it Chipre nga si Sergio Paulo. Gubirnadur ngayti, mapikir kanyang taw. Binwat ya, piyapaꞌaduꞌun yat kanya na Bernabe, duwa ni Saulo, ka ireg ya gasing makagneg it ampang it Ampuꞌang Diyus.

⁸ Temed ta, katungkulan ngayti nga esa nagang pangaran it kanya, si Elimas, talagang pagkuntraꞌen ya na Bernabe ngayti. Dakel-dakel nga ipagsasaw yat gubirnadur ngayti isaꞌun ega kapamayaꞌ.

⁹ It atkayti, tiyermek ni Saulo it semyek si Elimas ngayti. Si Saulo ngayti, Pablo gasiꞌ i esa nga ngaran ya. Bawnga miyampang si Pablo kat panakem it Espiritu Santo nga magsasarum duꞌun it kanya.

¹⁰ Maat i inampang ya, “Ikaw ngaytu nga taw, subuk nagpaꞌanak ka nat ki Satanas! Purus pangakal baw kalukuwan i muꞌsang pagbuwaten mu. Maski unung kataldengan, pagkalabanen mu. Unu, ega paꞌ pedkanan muy buwat mu ngayan nga pagpakiꞌambutun muy kamatuudan nga ampang it Ampuꞌang Diyus?

¹¹ Ta, kayti, ukumanan ya na ikaw. Mableg ka na. Ega matandaꞌan mu i delemen baw aldawun seked it ega paꞌ naꞌbut i ipiyagtirminu it Ampuꞌang Diyus.” Pagkaꞌampang ni Pablo kayti, sakaling diminlem nay panleteg ni Elimas, nga talagang beleg na nga matuud. Yanay nabwat yay kutap-kutap, ka magtulus it dumundun it kanya.

¹² Ta, pagkalteg it gubirnadur it iting kaꞌulugan, piyamayaꞌ ya nga lagi i ipagpangadal na Pablo, ka naliluꞌan ya i keseg it guna it Ampuꞌan ngayting ipagpanulduꞌ nira.

Nanulduꞌ na Pablo pasar it ki Jesus duꞌun it Antioquia nga sakep it Pisidia

¹³ Garing duꞌut Pafos, nanakay siꞌ na Pablo ngayti. Piyadungguꞌan nira, duꞌun it Perga nga sakep it Panfilia. Pagꞌabut duꞌun, nagpablag nat kanira si Juan ka miyuliꞌ na duꞌun it Jerusalem.

¹⁴ Temed, na Pablo, garing duꞌut Perga ngayti, nanlangbus siꞌ sira duꞌun it Antioquia, nga iti nga Antioquia, sakep it Pisidia. Ta, pagkaꞌbut it Aldaw it Kapaꞌnaan, siminled sira duꞌun it papagsambaan ka magpakisamba. Pagkasled nira, namagꞌadung na.

¹⁵ May biyasa nga pirang kaꞌurdinan ni Moises bawnga kat mga isiyurat it tagnang mga prupitaꞌ. Pagkatupus kayti, inaat it mga manigpamaalaꞌ it papagsambaan ngayti na Pablo, “Mga sulsug nameng Judio, barang may ipangadal mit imyu. Mapakay nga manulduꞌ kamu it amen.”

¹⁶ Aypaꞌ timnindeg si Pablo baw sininyasan yay kadakel nga magꞌangut it pagneg, bawnga miyampang. Maat ya, “Mga kabilug ku nga mga tungtung-inapuꞌ ni Israel baw beken nga may iꞌlam it Ampuꞌang Diyus, pagneg kamu.

¹⁷ Naꞌrutan tami na nga Ampuꞌang Diyus it bangsa tami nga Israel, piniliꞌ yay mga kiyaꞌapuꞌ-apuꞌan ta baw piyadakel ya sira, iyan nagpakibanwa sira duꞌut Egipto, baw inildawan ya sirat dakulang kagayenan. Bawnga, kat keseg it guna ya, ipiyaliꞌwan ya sira kat pagkaꞌuripen nira duꞌun.

¹⁸ Piyabayaꞌ-bayꞌan ya i pakikuntraꞌ nirat kanya it seledat epat nga pulung taꞌun, nga kaꞌlay it panaw nira duꞌun it kapupuyangtan nga rugar.

¹⁹ Bawnga ipiyadaꞌeg ya i pitung kabangsaan nga datiyan nga mga taga Canaan. Baw ipiyasubli ya nat mga kagiyaringanan tami i banwa ngayti.

²⁰ Kaꞌlay it muꞌsa ngaytu, mga epat nga gatus baw limang pulung taꞌun. Pagkatiꞌen-tiꞌen nira duꞌun it Canaan, ganti-mangganti i mga pagbayaꞌen nira nga pagrumraan it Ampuꞌang Diyus, seked it si Prupitaꞌ Samuel na i pagbayaꞌen nira.

²¹ Bawnga namagꞌangut na sirat adiꞌ. Aypaꞌ riyumraan it Ampuꞌang Diyus si Saul nga adiꞌ nira. Amaꞌ ya, si Kis, nga kat kuyunan nga mga tungtung-inapuꞌ ni Benjamin. Kaꞌlay it pagꞌadiꞌ ni Saul, epat nga pulung taꞌun.

²² Pagꞌiriꞌ it Ampuꞌang Diyus it pagkaꞌadiꞌ ni Saul ngayti, igiyanti ya si David, nga iyan siꞌ i magꞌadiꞌ it kanira. Baw ipiyamatuud ya paꞌ nga magꞌaat, ‘Namuyaan ku nga si David ngaytung anak ni Jesse, magkasagyaan kung banar i adat ya ka magkaꞌuyun talaga it adat ku. Pagsisiguruun ku nga sunudun yay muꞌsang kaꞌirgan ku.’

²³ Ta, kat pabetang-betang it Ampuꞌang Diyus, garing duꞌut mga tungtung-inapuꞌ ni David ngayti i liniꞌwanan it Manriribri nga isiyanggup ya nga rimibri it aten nga mga tungtung-inapuꞌ ni Israel. Si Jesus na ngaytu i paꞌaaten.

²⁴ Dedemdemen mi i binwat ni Juan nga magpamawtis. Kanyay miyuꞌna it ki Jesus, ka ipagpanulduꞌ ya duꞌun it mga kabilug yang mga Judio nga, kaꞌilangan, magsinguliꞌ sirang muꞌsa baw indiꞌan i mga kasalaꞌan nira baw pabawtis nga pamatuud it indiꞌan na.

²⁵ Iyan magkatiwas na ni Juan ngayti i kanyang buwaten, maat ya siꞌ it mga taw, ‘Siyu aku kat tandes mi? Barang, kat pasepsep mi, aku nay Manriribri. Yay matuud, daꞌku baytu kanya. Temed ega maꞌlay, mabut na kanya. Baw talagang kanya, landaw paꞌ it aken. Kamatuudan, maski muꞌbad it seget it talumpaꞌ ya, ega mapakay nga mabwat ku, ka subrang banar i kataꞌasan ya.’

²⁶ Mga kasulsugan nga mga tungtung-inapuꞌ ni Abraham, baw beken nga may iꞌlam it Ampuꞌang Diyus, talagang kita ngaytu i pagpaꞌabutan it itung ampang, magsugid ngaytu it karibriyan.

²⁷ Sira nga magtataꞌid duꞌut Jerusalem, pati mga pagbayaꞌen nira, ega inabut it pikiran nira nga si Jesus na ngaytuy Manriribri. Maski pagbasaen niray isiyurat it mga prupitaꞌ it kada matingped sira duꞌun it papagsambaan, ega natantuwan nira nga si Jesus naga i pagpapuntuꞌan it ampang ngayti nga pagbasaen. Temed ta, natuman nira talagay magbebtang duꞌun ka inukumanan nira si Jesus ngayti it kamataynen.

²⁸ Eeꞌ baꞌ, maski egay magkaparagan nira nga kasalaꞌan nga binwat ya, piyagut na nira duꞌut ki Pilato nga imatayen na.

²⁹ Iyan natuman na niray muꞌsang mga isiyurat it mga prupitaꞌ pasar it kanya, inawaꞌ nay bilug ya duꞌun it riyansangat kanya nga krus baw idiyuꞌun it lelbengan.

³⁰ Temed, lamang naꞌatnakayti, inggen kanya it Ampuꞌang Diyus it paꞌuliꞌ.

³¹ Kamatuudan, seledat pira-pirang aldaw, pirmi kanya nga magpakikita it mga magbaya-bayaꞌ it kanya, sira nga miyayaꞌ it kanya garing duꞌun it Galilea seked duꞌun it Jerusalem. Ta, sira na ngaytu i magpamatuud kat kadakel pasar it kanya.

³² Ta, kayti, taban namen situt imyu i Magayen ngaytung Baritaꞌ pasar it sanggup it Ampuꞌang Diyus duꞌun it mga kiyaꞌapuꞌ-apuꞌan tami nga mga Judio.

³³ Talagang tiyuman ya na kayti nga timpu, aten na ngaytu, kita nga mga tungtung-inapuꞌ nira. Ka ipiyatindeg ya si Jesus nga Manriribri ta. Ituy pagpapuntuꞌan it isiyurat ngayan duꞌun it pagpangaranan it Mga Awit, nga magꞌaat i ikadwa ya, ‘Kayti, ipagpatandaꞌ ku nga Anak kuytu ikaw. Akuy Amaꞌ mu.’

³⁴ May beken nagang mga sanggup nga tiyuman it Ampuꞌang Diyus duꞌun it ki Jesus. Pagꞌaaten nira nga egnen ya si Jesus it paꞌuliꞌ baw, gumaring sikayan, ega na matay paꞌ it sumaꞌup. Ka maat i isiyurat nga ampang ya, ‘Iꞌildaw ku nat imyu i mga ega basta-bastang kagayenan nga isiyanggup ku it tagnang adiꞌ nga si David it ega magꞌugad-ugad nga sanggup.’

³⁵ Baw may magsusurat nga beken duꞌun it Mga Awit, nga magꞌaat, ‘Ega pataꞌnan mu nga marunut duꞌut lebeng i bilug ku, aku nga magsunud nga pirmi it kaꞌirgan mu.’

³⁶ Egaytu pagpaꞌiguꞌan, si David, ka pagkatuman ya it pangatengdanan ya nga ibinggay it Ampuꞌang Diyus it kanya, natay na kanya. Egay beken, ilimbeng na kanya duꞌut limbengan it mga kagiyaringanan ya baw narunut nay bilug ya.

³⁷ Temed si Jesus ngaytu nga ipiyatindeg it Ampuꞌang Diyus nga Manriribri ta, ega nga matuud narunut i kanya nga bilug.

³⁸ Aypaꞌ kaꞌilangan nga matantuwan mi tu, mga kasulsugan, itu nga ipagpanulduꞌ namen it imyu kayti nga, sabap it binwat ni Jesus ngaytu, mapakay nga mapasinsiya i muꞌsang kasalaꞌan mi.

³⁹ Muꞌsa nga mamayaꞌ baw sumarig it kanya, pasinsiyaen i muꞌsang mga kasalaꞌan nira. Temed egay taw nga maribri kat ukuman it Ampuꞌang Diyus in yay pagsarigan ya, pagsunud yat mga urdin ni Moises, ka pirming kurang i pagsunud ta it mga urdin ngayti.

⁴⁰ Aypaꞌ magꞌintur kamu isaꞌun ega malabayan mi i inaat duꞌun it kasuratan it mga prupitaꞌ,

⁴¹ nga magꞌaat, ‘Pagnegan mi tu, kamung mga mapiyanibabaꞌ. Talagang maliluꞌan mi i mabut it imyu nga ikaꞌilang mi. Sabap may buwaten ku kat timpu mi nga maski iꞌunu-unu pat tuturan it imyu i buwaten ku ngaytu, ega pakimatuudun mi.’”

Panulduꞌ na Pablo duꞌut Antioquia, diyaꞌga it kadaklan it mga Judio, temed siyagyaan it mga taw nga ega Judio

⁴² Pagkatupus it panulduꞌ ngayti, iyan mamagliꞌwan na na Pablo, duwa ni Bernabe, inaat sira nga, in mapakay, ipangadal nira nagat sumaꞌup i iting mga bagay it sunud nga lingguꞌ.

⁴³ Ta, nagsigꞌuliꞌan nay kadakel. Temed may miyayaꞌ it kana Pablo nga mga Judio baw beken nga taw nga namagseled it pagkaJudio. Aypaꞌ inaat sira na Pablo nga kaꞌilangan teꞌteꞌan nira i nasepsepan nira nga pasar it ildaw ngaytu it Ampuꞌang Diyus.

⁴⁴ Iyan naꞌbut siꞌ i Aldaw it Kapaꞌnaan, agen-agen it miyuꞌsa i mga taga siyudad ngayti it pakitingped duꞌun it papagsambaan, ka kupagneg it ipagpangadal ngayting ampang it Ampuꞌang Diyus.

⁴⁵ Temed mga Judio, pagkamuya nirat dakel na ngayting banar i natingped nga ega Judio, mininggit sirang banar. Aypaꞌ, kada ampangen ni Pablo, pagsariyen nirat batir, uyut i diyampaꞌ.

⁴⁶ Temed miyampang na Pablo, duwa ni Bernabe, it may pagmaꞌiseg it nakem nira. Maat nira, “Kaꞌilangan nga kamuy uꞌnang makagneg it ipagpangadal namen ngaytung ampang it Ampuꞌang Diyus. Temed, it atkayan nga pagdaꞌgaen mi ga, subuk pagꞌukumanen mi i sadili mi nga, kamu, ega mapakay nga begayan it kaꞌgenan nga egay kaskedan. Aypaꞌ, kayti, ega na kamu i tulduꞌan namen, in daꞌga sira nga ega Judio.

⁴⁷ Ka ituy ipagtaꞌeg it amen it Ampuꞌan, nga pagpaꞌiguꞌan it magsusurat ngaytu nga magꞌaat, ‘Ipiyatindeg ku ikaw nga bilang tidaw it mga taw nga ega kat bangsa nga Israel. Ka maꞌyagan mu i muꞌsang taw situt sinirungat langit pasar it dalan it karibriyan.’”

⁴⁸ Ta, pagkagneg it mga taw ngayting ega Judio nga magraragiꞌ duꞌun, simnagya sirang banar. Maamaatan sira, “Subraꞌ talaga nga magayen i ampang ngaytu it Ampuꞌang Diyus!” Kumpur piniliꞌ it Ampuꞌang Diyus nga makanira i kaꞌgenang egay kaskedan, namayaꞌ na sira.

⁴⁹ Garing kayti, limingkep nay Magayeng Baritaꞌ pasar it Ampuꞌan duꞌun it muꞌsang banwa ngayti, pati mga katepad nga rugar.

⁵⁰ Temed, binwat it mga Judio duꞌut Antioquia ngayti, piyaꞌulu-uluwan nira i mga babay nga mga mataꞌas i duguꞌ, nga maski ega Judio temed masiyambaen it Ampuꞌang Diyus. Piyaꞌulu-uluwan nira gasiꞌ i pati mga lalaki nga piyakamataꞌas kat siyudad ngayti, nga kuntraꞌen na Pablo, duwa ni Bernabe. Unupat inimugaw na nira duꞌut kanira ngayting rugar.

⁵¹ Temed, iyan maggagaring na na Pablo, tiyagtag nira i kapu-kapu duꞌun it mga aꞌay nira, nga imandaꞌan it, mga taw duꞌun it Antioquia ngayti nga ega kupamayaꞌ it panulduꞌ nira, ipagpabetang nat Ampuꞌang Diyus nga ega na taawan ya. Bawnga nanlangbus na sira duꞌun it Iconio.

⁵² Temed, sira nga nagpakimatuud it panulduꞌ nira baw nagpasakep it Ampuꞌan, dakulaꞌ nang kasagyaan nira baw magsasarum nay Espiritu Santo kat bilug nirang muꞌsa.