Mga Binwat 12 - Tagbanwa

Pinirisu si Pedro temed ipiyaliꞌwan kanyat esang anghil

¹ Ta, kat iti nagang timpu, ipiyadakep it adiꞌ nga si Herodes i pirang kataawan nga mga magpamayaꞌ duꞌun it Jerusalem ka pakuriꞌan sira.

² Esa it mga apustul, nga si Santiago nga sulsug ni Juan, ipiyabunuꞌ ya.

³ Pagkamuya yat siyagyaan it mga Judio nga ega magpamayaꞌ it ki Cristo i binwat ya ngayti, si Pedro siꞌ i ipiyadakep ya. Temed paribasay naꞌbut nay Pistaꞌ it Tinapay nga Egay Ipagpaꞌalsa,

⁴ pagkadakep, pinirisu ya daꞌan. Ipiyagꞌintergaꞌ ya duꞌun it mga sundaluꞌ, nga tagꞌepat-epat sira nga gumuwardiya it ki Pedro ngayti. Ka pagpikiren ni Herodes, pagtiwas it pistaꞌ ngayti, bawnga ipaꞌadap ya si Pedro duꞌun it kadakel it mga Judio ka ukumanan ya na kanya.

⁵ Aypaꞌ duꞌun na lamang si Pedro it pirisuwan. Temed sigi nga mamagpanalangin i mga magpamayaꞌ it pagꞌubsu-ubsun niray kat nakem nira, ka isaꞌun mapaliꞌwan naga si Pedro.

⁶ Bawnga iyan naꞌbut nay delem nga, meyag, ukumanan na si Pedro, magꞌigaꞌ kanya kat piyagtengaꞌan it duwa nga kasundaluꞌan. Pagsesgetan paꞌ kanyat duwang kadina, baw may mga guwardiya paꞌ duꞌun it salakwatan.

⁷ Sakaling may miyabut nga esang anghil it Ampuꞌan baw minyag nga lagi i duꞌun it seled ngayting pagpipirisuwan it ki Pedro. Giniꞌleng ya si Pedro ka siyulag bawnga miyampang. Maat ya, “Sulag! Magbangun ka! Dali-daliꞌen mu!” Pagkaꞌampang ya kayti, nauꞌbad nga lagi i mga kadina duꞌun it alima ni Pedro.

⁸ Bawnga inaat siꞌ it anghil ngayti, “Sambutan mu nay pakayan mu baw magtalumpaꞌ ka na.” Siyunud ni Pedro, bawnga maat siꞌ it anghil, “Magpakay ka nat panliꞌwan ngayang pakayan mu baw mayaꞌ kat aken.”

⁹ Dimnasun na si Pedro it nanliꞌwan. Tanu-tanud ya ega matuud i miyabut ngaytit kanya nga tabang it anghil ngayti. “Barang”, maat ya, “tagaynep ku lamang tu.”

¹⁰ Tiyaꞌliban niray uꞌna bawnga ikadwa nga guwardiya. Bawnga nakaꞌbut sirat puwirtaꞌan nga magꞌaduꞌut lansangan. Lamang basiꞌ i siradu, magꞌabut sira, magkaꞌabri it sadili ya. Aypaꞌ dayun it limniꞌwan sira. Pagkaliꞌwan, sigi nang panaw nira. Temed, ega alaid i napanawan, nagsipat nay anghil ngayti.

¹¹ Iyan esa-esa mana ni Pedro, natanudan ya nga, iti palan, matuud i miyabut ngaytit kanya. Ega desang tagaynep. “Aaꞌ,” maat ya, “natantuwan ku na nga tiyaꞌeg it Ampuꞌan i esang anghil ya nga rimibri it aken kat alima ni Herodes baw kat pagꞌiꞌinawaren it mga Judio nga mabetangan ku.”

¹² Egay beken, pagkatantu ya kayti, naꞌaduꞌun kanya it balay ni Maria, nga inaꞌ ni Juan nga esang pangaran it kanya, si Marcos. Duꞌun it iting balay dakel i mga magpamayaꞌ nga natingped ka mamagpanalangin. Ipagpanalangin nira, si Pedro ngayti.

¹³ Pagꞌabut ya duꞌun, timniꞌtik kanya duꞌun it liꞌwan nga talaꞌep. Ega naꞌlay, inaduꞌun it esang taraꞌgen nga babay. Ngaran ya, si Rode. Iningkut ya in siyuyti.

¹⁴ Pagkagneg ya it gaꞌmaran ni Pedro, nakilalaan yang lagi. Temed, kat kadakulat sagya ya, ega nangbit kat nakem ya nga abriyen i talaꞌep. Miyalagyu na i nagpaꞌuliꞌ duꞌun it seled ka nanugid it, magtiꞌtik ngayti duꞌut liꞌwan, si Pedro na.

¹⁵ Temed daꞌsira magpamayaꞌ. Pagꞌaaten ga niray babay ngayti, pagꞌengel-engelen. Temed maat yat maseked-seked, “Talagang kanya bayti!” Maamaatan sira, “Barang anghil ya mana.”

¹⁶ Paribasay ega paꞌ inabriyan i talaꞌep, sigi-siging tiꞌtik ni Pedro. Aypaꞌ egay beken, inabriyan na nira. Ta, si Pedro nga matuud i duꞌun. Pagkalteg nira, talagang namagkaliluꞌ sirang banar.

¹⁷ Pagkasled ni Pedro, sininyasan ya sirat alima ya nga ega timingeg. Bawnga itiyuturan ya na i muꞌsa, in magꞌuꞌunu ipiyaliꞌwan kanyat Ampuꞌan duꞌut pirisuwan. Pagkatupus, inaat ya sira, “Isugid mi manat ki Santiago baw beken nga mga sulsug ta kat pamayaꞌ.” Pagkaꞌampang ya kayti, napanaw nat palinga-linga daꞌan duꞌut belag nga rugar.

¹⁸ Aypaꞌ pagꞌeyag it aldaw, talagang gulu-gulu i mga sundaluꞌ ngayting guwardiya ka in magꞌuꞌunu nakapalagyu si Pedro.

¹⁹ Egay beken, ipiyatulus ni Herodes. Iyan ega nay magkaparagan, inimbistigar yat magayen i mga guwardiya ngayti. Temed it egay magkasugid nira, ipiyagꞌaat ni Herodes nga yay panrigat kanira, pangimatayen. Ega naꞌlay, ginmaring si Herodes ngayti duꞌun it Judea ka may innged ya duꞌun it Cesarea. Nakakaꞌlay kanya duꞌun.

Inlud si Herodes bawnga natay ka siyadili yay kabantugan it Ampuꞌang Diyus

²⁰ Iyan duꞌun na kanya it Cesarea ngayti, may miyabut nga mga taw nga garing duꞌun it Tiro baw Sidon. Talaluꞌ talagay iseg ni Herodes it duwa ngayting kabanwaan. Aypaꞌ, paribasay duꞌut banwa ni Herodes i pagpanggaringan it kadakulaꞌat pangaꞌen it mga taga Tiro baw Sidon, napagꞌupakatan nira nga paꞌaduꞌut ki Herodes ngayti ka mangut it kaꞌayusan duꞌut kanya. Pagꞌabut nira, iniba-iba niray sarig-sarigan ni Herodes nga magpamaalaꞌ it mga taawan ya. Ngaran ya, si Blasto. Piyatabang na kanyat mga taga Tiro baw Sidon ngaytit mupakat it adiꞌ nga, in mapakay, magkagayen na sira.

²¹ Pagkaꞌbut it aldaw nga magkaꞌayusan na sira, nagpakay si Herodes it mabakas nga pakayan it adiꞌ baw miyadung duꞌun it araꞌdungan ya kat pagkaꞌadiꞌ ka magdiskursuꞌ.

²² Pagkatupus it inampang ya ngayti, subuk giyaw-giyaw i kadakel it taw. Maat nira, “Esang diyus na palan i magꞌampang ngaytu, ega naytu taw!”

²³ Ta, biglaꞌ nga inabut si Herodes it egay pasubraꞌ nga eget it sarut, panriga it kanya it esang anghil it Ampuꞌan. Inlud i bilug ya. Ega naꞌlay, miyatay na. Nakabetang kanyat atkayti sabap ega siyabatan yay mga taw ngayting mamagsamba it kanya. Maꞌunu sabatan ya, nasagyaan ya ga nga tiyanggap i pagbantug ngayti nga Ampuꞌang Diyus lamang i dapat nga bantugun.

²⁴ Temed subraꞌ na nga dakulaꞌ i liyapusan it ipagtulduꞌ nga ampang it Ampuꞌang Diyus. Kamatuudan, talagang dimnakel pang banar i mga magpamayaꞌ.

²⁵ Ta, yan natiwas nay ingged ngayti na Bernabe, duwa ni Saulo, duꞌun it Jerusalem, namagpaꞌuliꞌ siꞌ sira duꞌun it Antioquia. Piyabayaꞌ nira si Juan, nga si Marcos i esa nga ngaran ya.