Mga Binwat 11 - Tagbanwa

Ipiyaꞌyag ni Pedro nga, pati mga taw nga ega Judio, makaꞌuyut gasiꞌ it ildaw it Ampuꞌang Diyus

¹ Nabaritaꞌan it mga apustul baw bekeng mga magpamayaꞌ duꞌun it Judea nga may mga taw na nga ega Judio nga namayaꞌ na it ampang it Ampuꞌang Diyus. Temed may ega mamagkapakay nga namagkabaritaꞌ ngayti.

² Aypaꞌ ka pagkaꞌuliꞌ ni Pedro duꞌun it Jerusalem, piyakidaꞌgan kanya it mga Judio ngayting magpamayaꞌ nga ega mamagkapakay.

³ Maat nira, “Bilaꞌ! Unuka atkayay binwat mu nga naꞌaduꞌun ka nat balay it mga taw nga ega Judio? Baw nagpakikaꞌen ka paꞌ duꞌut kanira!”

⁴ Aypaꞌ, iyan atnakayti, itiyuturan ni Pedro it pagayen-gayen duꞌun it kanira i muꞌsa pasar it ipiyatantu ngaytit kanya.

⁵ Maat ya, “Kaꞌsa nga magpanalangin aku, iyan duꞌun akut Jope, sakaling pananud ku, nagsipat i banwa. Subung akut magpanagaynep. Naltegan ku may ipagtuntun nga subuk malabeg nga rambay nga garing duꞌut langit. Pagsesgetay epat nga kantu ya. Duꞌut sarungaan ku i inabut.

⁶ Ta, ininengneng ku i betang ya. Maltegan ku, mga ramu-ramu nga magpanaw baw mga magkambang, pati mga maꞌiꞌiseg nga ramu-ramu, baw mga manu-manuk i beken.

⁷ Bawnga may nagnegan ku nga ampang nga magꞌaat it aken, ‘Sigi, Pedro. Kumarniꞌ ka, ka kaꞌnen mu.’

⁸ Takaꞌ tiyubag ku nga maat ku, ‘Aaꞌ, ega mabwat kuy atkayan, Ampuꞌan, ka sapagtaw ku kat banwa, daꞌku nakasalya kumaꞌen it maski unung pangaꞌen nga bawal kat siyubli-subli nameng urdin.’

⁹ Miyampang sit sumaꞌup i magꞌampang ngayti nga duꞌun it langit. Maat ya, ‘Pedro, ega na liꞌyan mu i ipagpabetang nat Ampuꞌang Diyus nga mapakay ya na.’

¹⁰ Tulung bisis singkat baw siyabatan aku it atkayti, bawnga biyatun nay pagbebtangat mga ramu-ramu ngayti.

¹¹ Iguꞌ nga magsipat i itiꞌen, may miyabut duꞌun it balay ngayting pagꞌiꞌistaran ku nga tulung kataawan nga garing duꞌun it Cesarea, nga magpamisit aken.

¹² Inaat akut Espiritu Santo nga daꞌku mangangaliꞌ nga mayaꞌ it kanira. Ta, nangiba it aken i enem ngaytung mga sulsug ta kat pamayaꞌ. Naꞌaduꞌun kami it balay it taw ngayting magpapisiꞌ it aken.

¹³ Pagkasled namen, itiyuturan yat amen in magꞌuꞌunu may naltegan ya nga anghil duꞌun it balay ya ngayti. Maat it anghil ngayti, ‘Tumaꞌeg kat pirang kataawan nga paꞌaduꞌun it Jope. Ipapisiꞌ mu si Simon nga esa gasing pangaran it kanya, si Pedro.

¹⁴ Kanya i paꞌyag it imu it panulduꞌ nga ikaribri mu, pati beken ngaytung kat seled it pamalay-balay mu.’

¹⁵ Aypaꞌ nagpapuꞌun aku nat tumulduꞌ it kanira. Temed, ega paꞌ naꞌlay i panulduꞌ ku ngayti, piyapasarum na duꞌut kanira i Espiritu Santo, subung nagat pagpasarum ya situt aten katꞌesa.

¹⁶ Duꞌun nademdeman ku i inampang ngayat Ampuꞌan, nga maat ya ngayan, ‘Danum i ipagbawtis ni Juan, temed kamu, Espiritu Santo i ibawtis it imyu.’

¹⁷ Ta kayti, sira ngayti nga ega Judio, mga kasubung tami na, nga inildawan it Ampuꞌang Diyus nga pasaruman it Espiritu Santo, pagpamayaꞌ nira it Ampuꞌan nga si Jesu-Cristo. Aypaꞌ ka siyu aku nga mapaaran kuy Ampuꞌang Diyus?”

¹⁸ Pagkagneg it mga magpakidaꞌeg ngaytit ki Pedro, mindek na sirat pakibatir. Iyan siꞌ i binwat nira, biyantug niray Ampuꞌang Diyus. Maamaatan sira, “Ta, in atkayan palan, inildawanan na gasiꞌ it Ampuꞌang Diyus i pati mga taw nga ega Judio, nga masinguliꞌan baw indiꞌan nira i mga kasalaꞌan nira, isaꞌun makanira i kaꞌgenan nga egay kaskedan.”

Pagkapangadal it Magayeng Baritaꞌ duꞌun it Antioquia, dakel i namayaꞌ nga ega Judio

¹⁹ Ta, yan beken nga mga magpamayaꞌ ngayting natari-tariwanak sabap it pakuriꞌ ngaytit kanira, nga nagpapuꞌun duꞌun it pagꞌimatay it ki Esteban, alaid na nga mga banwa i naꞌbut nira. May nakaꞌbut duꞌun it Fenicia. Iyan beken, naꞌaduꞌut pulaw it Chipre. Baw maski duꞌut Antioquia, may nakaꞌbut na duꞌun. Kada maꞌbut nirang banwa, ipagpangadal na nira duꞌun i Magayeng Baritaꞌ pasar it ki Jesus. Temed mga Judio lamang i pamagtulduꞌan nira.

²⁰ Takaꞌ, uyut it mga magpangadal ngayti i beken nga, lamang Judio sira, duꞌun i diyakulaꞌan nira it Chipre baw Cirene. Ta, pagꞌabut nira duꞌut Antioquia ngayti, nangadal sira duꞌun gasiꞌ it mga Griego pasar it Ampuꞌan nga si Jesus.

²¹ Baw dakulaꞌ i tabang it Ampuꞌan it kanira kat pangadal nira ngayti, aypaꞌ ka dakel nga dakel i namayaꞌ baw nagpasakep it Ampuꞌan.

²² Ega naꞌlay, nakaꞌbut nay baritaꞌ sabap it itiꞌen duꞌun it mga magpamayaꞌ nga duꞌun it Jerusalem. Pagkabaritaꞌ nira, inupakat nira si Bernabe nga paꞌaduꞌun it Antioquia.

²³ Pagꞌabut ya duꞌun, natantuwan ya i kadakulat ildaw it Ampuꞌang Diyus kat mga taw ngayti. Aypaꞌ ka masagya kanyang banar. Bawnga tiyulduꞌan ya sira nga kaꞌilangan teꞌteꞌan nira i Ampuꞌan it tingled i nakem.

²⁴ Ka si Bernabe ngayti, talagang taw nga magayen i adat. Makseg i pamayaꞌ ya baw talagang masunud it Espiritu Santo nga magsasarum duꞌun it kanya. Aypaꞌ dimnungag nang dimnungag i mga magpamayaꞌ it Ampuꞌan duꞌun.

²⁵ Iyan atnakayti, limnangbus na si Bernabe duꞌun it Tarso ka tulusun ya si Saulo.

²⁶ Pagkaparag ya, piyabayaꞌ yat nagpaꞌuliꞌ duꞌun it Antioquia. Baw inabut sirat sang taꞌun duꞌun, magpakiꞌiba-iba baw magpanulduꞌ it kadakel ngaytit mga magpamayaꞌ. Dakel talagay tiyulduꞌan nira. Mga magpamayaꞌ duꞌut Antioquia ngayti, siray uꞌnang tiyaꞌwag nga Cristiano, nga ireg sugiden, nagpalagpit it ki Cristo.

²⁷ Kat iting timpu, may miyabut duꞌun it Antioquia nga mga prupitaꞌ nga garing duꞌun it Jerusalem.

²⁸ Kaꞌsang aldaw nga tingped i mga magpamayaꞌ duꞌun, timnindeg i sang kataawan ngayting prupitaꞌ nga pagpangaranat ki Agabo. Kat panakem it Espiritu Santo isiyugid ya nga mabut it muꞌsang banwa i dakulang getem. (Miyabut tu nga matuud it iyan si Claudio pay Impiradur.)

²⁹ Aypaꞌ, pagkagneg it mga magpamayaꞌ ngayti duꞌut Antioquia, nagꞌupa-upakaten sira nga pataban sirat tabang, nga kumpur kaya it kada esa, duꞌun it mga kasulsugan nira kat pamayaꞌ nga magtataꞌid duꞌun it Judea.

³⁰ Aypaꞌ nagbegay sira nga matuud. Bawnga inupakat nira na Bernabe, duwa ni Saulo, nga siray tumaban it iti ngayti duꞌun it mga magpamaalaꞌ it mga magpamayaꞌ duꞌun it Judea.