Mga Binwat 1 - Tagbanwa

¹ Kagalang-galang nga Teopilo, Iyan uꞌna ngayang isiyurat ku, magsugid pasar it kadakel it mga binwat baw ipiyanulduꞌ it Ampuꞌan nga si Jesus, pagpapuꞌun yat manulduꞌ,

² seked it aldaw nga piyaꞌuliꞌ na kanya duꞌun it langit, pagkatupus it mga ipiyagꞌaat yat mga piniliꞌ ya ngayti nga mga alagad, nga isingkat yat kanira i buwaten nira kat keseg it Espiritu Santo.

³ Mga alagad ya ngayti, siray paꞌaaten nga mga apustul. Baw garing it inimatay baw nagꞌegen siꞌ si Jesus seked it pagꞌuliꞌ ya ngayti duꞌun it langit, seledan it epat nga pulung aldaw pirmi kanya nga magpakikita duꞌun it kanira. Dakel i ipiyalteg ya nga puriba nga nagꞌegen naga kanya, baw itiyulduꞌ ya paꞌ it kanira i pasar it kaꞌadiꞌan it Ampuꞌang Diyus.

⁴ Kaꞌsa nga tingped i mga apustul ngayti, ipiyagꞌurdin ni Jesus nga daꞌsira daꞌan limꞌid duꞌun it Jerusalem. Maat ya, “Iyan elaten mi i isiyanggup ngayan it Amaꞌ, nga isiyugid ku ngayat imyu.

⁵ Ka danum i ipagbawtis ni Juan it tagnaꞌ, temed kamu, Espiritu Santo i ibawtis it imyu it ega na maꞌlay nga timpu, ka pasarum na kanya kat bilug mi.”

Miyuliꞌ na si Jesus duꞌun it langit

⁶ Kaꞌsa sing tingped i mga apustul, nagpakikita siꞌ si Jesus duꞌun it kanira. Iningkut nira kanya. Maat nira, “Ampuꞌan, unu, buwaten mu na kayti ngaytu nga maꞌiriꞌ i magsasakep ngaytut aten isaꞌun makatindeg sit sumaꞌup i kaꞌadiꞌan it bangsa tami ngaytu nga Israel?”

⁷ Tiyubag sira ni Jesus, “Amaꞌ ku lamang i magkaꞌrut it in kaꞌnung timpu u uras i ituman yat kumpur ipiyabetang-betang ya. Kamu ngaytu, ega mapakay nga maꞌrutan mi i mga itu ngaytu.

⁸ Temed yay matuud, pagpasarum it Espiritu Santo kat bilug mi, maꞌimyu nay ega basta-bastang kakayaan. Baw pamatuud kamu na sabap it aken, ega lamang situt Jerusalem in daꞌga duꞌun it muꞌsang rugar nga sakep it Judea baw Samaria, baw kat paꞌari-aring rugar nga situt sinirungat langit.”

⁹ Iyan nakasugid ya nay muꞌsa ngayti, letganan nira, magpadibwat-magpadibwat kanya seked it nasipatan na nira ka magpangunragiꞌ nat kunum.

¹⁰ Iyan sigi pang titingaraꞌ nira duꞌut langit, nga magyayaꞌngad it ki Jesus ngayti nga magpatibung, sakaling may magtitindeg duꞌun nat umid nira nga duwang kataawan nga lalaki nga magpapakay it maputiꞌ.

¹¹ Miyampang i duwa ngayti, nga magꞌaat, “Kamung mga taga Galilea, unuka sigi pang yayaꞌngad mi duꞌun it langit? Si Jesus ngaytu nga gimnaring na situt imyu ka miyuliꞌ na duꞌun it langit, mabut nagay aldaw nga paꞌuliꞌ kanya siꞌ situt banwa. Baw in magꞌuꞌunu naltegan mi kanya nga nagpatibung, atkayan naga yan kanya in lumampud siꞌ.”

Piniliꞌ nay gumanti it ki Judas Iscariote

¹² Ta, egay beken, gimnaring na sira duꞌun it Mungsuꞌ it Olibo ka nagpaꞌuliꞌ na duꞌun it Jerusalem. Ega naga alaid duꞌut Jerusalem i mungsuꞌ ngayti, mga sang kilumitru lamang.

¹³ Pagꞌabut nira duꞌun it siyudad, dayun-dayun sira duꞌut piyaꞌabutan nira nagang balay, baw miyapyat duꞌut esang seled duꞌut dibwat nga pagꞌiꞌistaran nira. Kadakel nira, si Pedro, si Juan, si Santiago baw si Andres, si Felipe baw si Tomas, si Bartolome baw si Mateo, si Santiago nga anak ni Alfeo, si Simon nga Cananeo, baw si Judas nga anak ni Santiago.

¹⁴ Muꞌsa ngayti, urunyun talaga sira kat papaꞌres nga panalangin. Kaꞌibaan nira naga kat panalangin ngayti i mga babay, pati si Maria nga inaꞌ ni Jesus, baw mga ariꞌ nga lalaki ni Jesus, duꞌun gasiꞌ.

¹⁵ Kaꞌsa nga tingped naga sira, mga sang gatus baw duwang puluꞌ i kadakel nira. Timnindeg si Pedro kat tengaꞌ nira baw miyampang.

¹⁶ Maat ya, “Mga sulsug ku kat pamayaꞌ, ega mapakay nga ega matuman i magsusurat nga ampang ni David ngaytit tagnaꞌ, kat panakem it Espiritu Santo, pasar it ki Judas ngayti nga nanguꞌnat mga namagdakep it ki Jesus.

¹⁷ Talagang kanya, ikasang puluꞌ may duwa namen nga mga alagad, baw may kanya nagang kabagiꞌan it ipagpabwat ngaytu it Ampuꞌan.” (

¹⁸ Ta si Judas ngayti, iyan natanggap ya ngayan nga pabur it karaꞌe-raꞌetan ngayting binwat ya nga subuk idiyagang ya si Jesus, giyamit nga ipiyagꞌalang it esang lugtaꞌ. Baw nabetangan ni Judas, naꞌulug kanya baw nabasway i tinaꞌi ya. Unupat limniꞌwan nga muꞌsa i betang it tinaꞌi ya.

¹⁹ Nabaritaꞌan nagaytu it muꞌsang mga taga Jerusalem. Aypaꞌ ka iting lugtaꞌ, napangaranat Akeldama kat kanirang ampang, nga ireg sugiden, Lugtaꞌ it Duguꞌ.)

²⁰ “Ta, itu nang ampang ni David i paꞌaaten ku nga magbebtang duꞌun it kasuratan ta ngayang pagpangaranat Mga Awit, ‘Kaꞌilangan, maꞌiriꞌat taw i pamalay-balay ya baw ega na mataꞌidan it maski siyu.’ Baw itu gasiꞌ nga magsusurat, ‘Kaꞌilangan, magantiyan kanya kat katengdanan ya.’

²¹ Ta, kayti, kaꞌilangan nga may piliꞌen ta nga ganti ni Judas ngayti. Pamiliꞌan ta nga mga taw, sira nga kaꞌiba-iba nameng pirmi it kaꞌlay nga iba namen paꞌ i Ampuꞌan nga si Jesus,

²² garing it pagpamawtis ni Juan seked it miyuliꞌ na si Jesus duꞌun it langit, ka idungag it kadakel namen nga manigpamatuud it pagꞌegen ni Jesus ngaytu it paꞌuliꞌ.”

²³ Aypaꞌ duwang kataawan i napiliꞌ nira nga pamiliꞌan in siyuy mapakay, si Matias baw si Jose Justo, nga panaꞌwag it kanya, si Barsabas.

²⁴ Bawnga nanalangin sira, nga magꞌaat, “Ampuꞌan, urut mu talaga i kat nakem it muꞌsang taw. Aypaꞌ ipakilala mut amen in siyu manggid kat duwa ngaytu i piniliꞌ mu,

²⁵ nga iganti it ki Judas kat pagsirbi ngaytu baw pagkaꞌapustul ya. Ka si Judas ngayti, nangindiꞌ kanya, baw nakaꞌaduꞌun it rugar nga bagay talaga it kanya.”

²⁶ Pagkatupus it panalangin nira ngayti, namagpintuꞌan na sira. Si Matias i napintuꞌ, aypaꞌ kanya i nakadungag kat sang puluꞌ may esa ngayting mga apustul.