Mga Bilang 21 - Tagbanwa

Piyaꞌabutan it Ampuꞌang Diyus it mga dalitan nga dukul i mga Israelita nga mapiyamasul

⁴ Garing duꞌun it Bukid ngaytit Hor, pagpanaw siꞌ it mga Israelita ngayti, namagsunsun siꞌ sirat dalan nga magpaꞌaduꞌut esang sanga it pagpangaranat Madarag nga Dagat, isaꞌun lamang maribayan i banwa nga Edom. Ta it nagpaꞌatkayti i panaw nira, naꞌyawan sirat paliꞌut-liꞌut.

⁵ Miyampang na sirat kuntraꞌ it Ampuꞌang Diyus. Biyasul nira gasiꞌ si Moises, nga maat nira, “Unu baꞌ, piyapalꞌid mu kami duꞌut Egipto isaꞌun lamang maꞌimatay situt rugar ngaytung kapupuyangtan? Ka ungaytu, egay pangaꞌen namen nga singkadan baw egay dadanum. Naꞌyawan kami nat manna ngaytung egay kuwintaꞌ nga pangaꞌen!”

⁶ Egay beken, piyaꞌabutan sirat AMPUꞌANG DIYUS it may dalit nga mga dukul. Kada makagat, magpatay.

⁷ Ta it atkayti, nandangep siꞌ sira duꞌun it ki Moises. Maat nira, “Talagang nagkasalaꞌan kami siꞌ kat inampang namen nga kuntraꞌ it AMPUꞌANG DIYUS baw kuntraꞌ nagat imu. Esa-esa ga, ipanalangin mu duꞌut kanya nga awaꞌen ya nagay mga dukul ngaytu.” Aypaꞌ nanalangin siꞌ si Moises.

⁸ Maat i tubag it AMPUꞌANG DIYUS, “Muwat ka it ipasbung mu it dukul. Tumbaga i buwaten mu. Bawnga iꞌasan mu it kayu nga ipatindeg mu. Ta, siyu-siyuy matundaꞌ it mga dukul ngayan, timingaraꞌ lamang duꞌun, ega nayan matay.”

⁹ Aypaꞌ binwat nga matuud ni Moises i itiꞌen ngayti. Garing sikayti, kada matundaꞌ it dalitan ngayting dukul, basta timingaraꞌ lamang duꞌut tumbaga ngayting dukul, ega nga matuud magpatay, maꞌgen naga.